1-2. Vyuma muka natushimutwila muchihande chino?

ACHISHINGANYEKENU muli nakuvandamina sepa lyenu uze amishikanga ngwenyi mwaminehela vyuma vize muli nakusaka. Jino munahase kwivwa ngachilihi nge keshi kwiza halwola luze mwalishikangako? Mukanda waVishimo 13:12 wamba ngwawo: “Nge vyuma natalilila mutu vinashimbula kutesamo, cheji kwivwisanga kumuchima kukola.” Jino namwivwa ngachilihi nge sepa lyenu mwamitumina mujimbu wakumilweza vyuma vinamulingisa ahone kuheta washi? Twafwelela ngwetu namuunda muchima nakutwalaho kumuvandamina.

² Muchihande chino, natushimutwila hajindongi jamuMbimbiliya jize najitukafwa tutwaleho lika kupwa namuchima ‘wakuvandamina.’ (Mika 7:7) Natushimutwila nawa havyuma vivali vize vyatela kutulingisa tuvandamine Yehova. Kaha chamakumishilo, natushimutwila havyuma navakalivwisa kuwaha vaze navalisuula kuvandamina Yehova.

3. Chuma muka tunalinangula kulundongi lwatwama hali Vishimo 13:11?

³ Mukanda waVishimo 13:11 watulweza ovyo twatela kupwila namuchima wakutalilila chikoki. Wamba ngwawo: “Luheto lwakuwana muwashiwashi lweji kukumanga, oloze luheto lwakuwana chikoki chikoki lweji kwililanga.” Chuma muka tunalinangula kulundongi kana? Chapwa chachilemu kulinga vyuma chikoki chikoki.

4. Vyuma muka tunahase kulinangula kulundongi lwatwama hali Vishimo 4:18?

⁴ Mukanda waVishimo 4:18 watulweza ngwawo “jila yavaka-kwoloka yinapu nge musana wakututuka chalikumbi uze weji kuyanga nakumunyika lika palanga nomu naliheta likumbi hamulungu.”  Mazu kana alumbununa omwo Yehova eji kusololanga chindende chindende vyuma vize mwakalingila vatu jenyi. Mazu kana anahase nawa kulumbununa omwo muka-Kulishitu eji kuzovolokanga kushipilitu mangana apandame kuli Yehova. Cheji kumbatanga lwola numba mutu apandame kuli Yehova. Nge natulinangulanga Mazu aKalunga nakukavangiza vyuma vize navatulweza muliuka, kaha mukuhita chalwola tunahase kupwa navilinga vize apwile navyo Kulishitu. Kaha nawa tunahase kupwa nachinyingi chachivulu chakutachikiza Kalunga. Tutalenu omwo Yesu alumbunwine chishina kanechi.

5. Chifwanyisa muka azachishile Yesu hakulumbununa omwo tweji kuzovolokanga kushipilitu?

⁵ Yesu ambile ngwenyi, mujimbu waWangana uze tweji kwambululanga wapwa nge linona lyalindende lize lyeji kukolanga chindende chindende mumichima yavatu vaze vazanga vyuma vyakwoloka. Ambile ngwenyi: “Mbuto jeji kusokanga nakukula chakuzeneka ikiye [kulumbununa muka-kukuva] kutachikiza vyuma vili nakulingisa ngocho. Mavu eji kulovolanga avene jimbuto chikoki chikoki, chakulivanga mitombo, numba kusoloke mitwe, kukuminyinako himanona akuhya lyehi kumitwe.” (Mako 4:27, 28) Uno Yesu apwile nakulumbununa ika? Alumbunwine ngwenyi ngana muze jimbuto jeji kukolanga chikoki chikoki, namutu uze mwevwa muchano waWangana nakuwitavila eji kuzovolokanga kushipilitu chikoki chikoki. Chakutalilaho, omu chilongesa chetu chaMbimbiliya eji kupandamanga kuli Yehova, tweji kuputukanga kumona vyuma eji kwalumunangako mukuyoya chenu. (Efwe. 4:22-24) Oloze twatela kutachikiza ngwetu Yehova ikiye eji kulingisanga mutu kana azovoloke.—Koli. 1, 3:7.

6-7. Vyuma muka tunalinangula kuli Yehova hajila atengelelemo mavu?

⁶ Yehova eji kuzatanga milimo yenyi yosena chikiko chikoki kweseka nalwola anoneka. Eji kulinganga ngocho mangana atohwese lijina lyenyi nakunganyalisa vana venyi vamwilu navatu vosena hamavu. Chakutalilaho, achishinganyekenu omu Yehova atengele mavu chikoki chikoki.

 ⁷ Mbimbiliya yamba ngwayo omu Yehova apwile nakutenga mavu, “apimine seteko yawo,” nakujika “manevo hamavu,” nakwala “lilolwa lyamumbango yawo.” (Yopa 38:5, 6) Kaha nawa awanyineko lwola lwakukekesa vyuma vize atengele. (Kupu. 1:10, 12) Achishinganyekenu omu vevwile vangelo hakumona chuma hichuma chize atengelenga Yehova. Vangelo vawahililile chikuma, mwomwo Mbimbiliya ngwayo vaputukile kulikuwa “nakusakwilila jikushi.” (Yopa 38:7) Vyuma muka tunalinangulako? Mwahichile myaka yayivulu chikuma numba Yehova akumise kutenga vyuma, kahomu akekesele vyuma vize atengele, amwene ngwenyi “vinawahe chikuma.”—Kupu. 1:31.

8. Vyuma muka natushimutwila?

⁸ Nganomu tunamono havyakutalilaho tunashimutwila, muMbimbiliya mwatwama jindongi jajivulu jize jinahase kutukafwa tupwenga namuchima wakutalilila chikoki. Tushimutwilenu jino havyuma vivali vize vyatela kutulingisa tulisuule kuvandamina Yehova.

9. Chuma muka chatela kutulingisa tuvandamine Yehova?

⁹ Shimbu jimwe twatela kuvandamina Yehova akumbulule kulomba chetu. Kachi nge tunalombo Yehova atukafwe tumike muvyeseko chipwe tuhonese vilinga vyavipi hahaze vene natumulomba, oloze kakumbulwileko, kaha tunahase kushinganyeka ngwetu nashimbula kukumbulula kulomba chetu. Mwomwo ika Yehova keshi kukumbulwila kulomba chetu chosena hahaze vene natumulombako?

10. Mwomwo ika twatela kupwila namuchima wakutalilila chikoki nge tunalombo?

¹⁰ Yehova eji kwivwililanga kulomba chetu. (Samu 65:2) Nge natulomba kuli Yehova, kaha mwamona ngwenyi twamufwelela. (Hepe. 11:6) Asaka nawa kumona tunakulinga vyuma kweseka nakulomba chetu nakulinga mwaya muchima wenyi. (Yowa. 1, 3:22) Shikaho nge tunakusaka kuhonesa tutenga twetu chipwe kumbila tato yayipi, twatela kupwa namuchima wakutalilila chikoki nakulinga vyuma kweseka nakulomba chetu. Yesu ambile ngwenyi kulomba chetu chimwe kavachikumbulula hahaze veneko. Ambile ngwenyi: “Lombenunga lika, kaha navakamihana. Tondenunga lika, kaha namukawana. Ngongomwezenunga lika, kaha navakamisokolwela. Mwomwo weshowo mwalombanga mwatambula, kaha weshowo mwatondanga mwawana, kaha weshowo mwangongomwezanga navamusokolwela.” (Mateu 7:7, 8) Nge natukavangiza awa mazu ahanjikile Yesu ‘nakulomba naluzema,’ kaha natufwelela ngwetu Setu wamwilu mwevwa kulomba chetu nakuchikumbulula.—Kolo. 4:2.

11. Uno mukanda WavaHepeleu 4:16 nautukafwa ngachilihi nge tunamono ngwetu kulomba chetu kavachikumbulwile washiko?

¹¹ Numba tuhu natumona ngwetu kulomba chetu kavachikumbulwile washiko, oloze Yehova atufwelelesa ngwenyi mwakumbulula kulomba chetu “halwola lwakutamo.” (Tangenu WavaHepeleu 4:16.) Shikaho, katwatela kuhana Yehova mulonga nge tunamono ngwetu kulomba chetu nashimbula kuchikumbululako. Chakutalilaho, vatu vavavulu vanalombonga hamyaka yayivulu ngwavo Wangana waKalunga ufumiseko katwamino kamyaka yino. Yesu naikiye ambile ngwenyi twatela kulombanga Wangana waKalunga wizenga. (Mateu 6:10) Oloze nachipwa chakuhenga kuzeya kushipilitu mwomwo ngwetu kano kaye kakapi kakakumine washiko. (Hamba. 2:3; Mateu 24:44) Chapwa chachilemu kutwalaho lika kuvandamina Yehova nakulomba nakufwelela ngwetu mwatwivwa. Kano kaye navakakanongesa ‘halikumbi lize naola’ yize Yehova atongola. Chikupu vene elu nalukapwa lwola lwakutamo.—Mateu 24:36; Petu. 2, 3:15.

12. Lwola muka chinahase kupwa chachikalu kupwa namuchima wakutalilila chikoki?

 ¹² Twatela kupwa namuchima wakutalilila chikoki omu tuli nakumona ukalu. Kakavulu vatu mukaye veji kuyanjisanga vatu vaze vafuma kumuyachi weka, nakuvisemwa vyeka,namalimi eka namafuchi eka. Veka nawa veji kuvayanjisanga mwomwo yautonji chipwe mwomwo yakuviza muwongo. Vangamba jaYehova vavavulu vanavayanjisanga mwomwo yakukavangiza vyuma yanangula Mbimbiliya. Kachi nge nayetu vali nakutuyanjisa mwomwo yavyuma twafwelela, kaha twatela kwanuka mazu ahanjikile Yesu. Ambile ngwenyi: “Ou mwakakachila palanga nakusongo navakamulwila.” (Mateu 24:13) Vyuma muka mwatela kulinga nge munejiva ngwenu ndumbwenu umwe muchikungulwilo nalingi shili yayinene? Kachi nge chihande kana chinahete lyehi kutulama, kutala namuchiseza mumavoko avo nakufwelela ngwenu navachisopa kweseka najindongi jaYehova tahi? Kaha vyuma muka vatela kulinga tulama?

13. Yehova asaka tulama valinge vyuma muka kachi nge mutu nalingi shili yayinene?

¹³ Kachi nge tulama vanatachikiza ngwavo mutu umwe muchikungulwilo nalingi shili yayinene, kaha veji kulombanga Yehova avahane “mangana akufuma mwilu” avakafwe vamone vyuma ngana muze avimona ikiye. (Yako. 3:17) Chuma vafwila shina kukafwa mutu uze nalingi shili ‘afume mujila yenyi yakuhenga’ kachi nge chinahase. (Yako. 5:19, 20) Kaha nawa veji kuzatanga nangolo javo josena mangana vakinge chikungulwilo nakuvendejeka vandumbwavo vaze vanevu kupihya mwomwo yachuma kana. (Koli. 2, 1:3, 4) Nge tulama vali nakutala hachihande chamutu uze nalingi shili yayinene, veji kuvangilanga kutondatonda unjiho wakwoloka, kahechi chinahase kumbata lwola. Kufumaho veji kulombanga Kalunga avatwaminyine, nakumuhuhumuna kuzachisa Visoneka, nakumwolola “mujila yakutamo.” (Yele. 30:11) Tulama kavambata makumbi amavulu hakusopa chihandeko, kaha nawa kavalusuka kuchivatulako. Nge tulama navakavangiza jindongi jaYehova hakusopa chihande, kaha vatu vosena muchikungulwilo navanganyala. Numba nge tulama navakavangiza jindongi jaYehova hakusopa chihande, oloze vandumbwavo vamwe muchikungulwilo vaze vevwisanga kupihya kuli uze alinganga shili vanahase kutwalaho lika kwivwa kukola kumuchima. Nge nayenu mukiko mweji kwivwanga, kaha vyuma muka navimikafwa muhone kutwalaho lika kwivwa kukola kumuchima?

14. Chakutalilaho muka chamuMbimbiliya chize chinahase kumikafwa muunde muchima nge ndumbwenu namilingi mwamupi?

 ¹⁴ Uno vamilingaho lyehi mwamupi kuli mutu chipwe kuli ndumbwenu muchikungulwilo tahi? Munahase kuwana vyakutalilaho vyamwaza muMbimbiliya vize vinahase kumikafwa muvandamine Yehova akolole vyuma. Chakutalilaho chimwe shina chaYosefwe. Numba tuhu Yosefwe vamulingile mwamupi kuli vandumbwenyi, oloze kechelele vyuma vyavipi vamulingilenga vimulingise avakwachile matotoko. Atwalileho lika kuzachila Yehova, kaha Yehova amukiswile hakupwa namuchima wakutalilila chikoki nalukakachila. (Kupu. 39:21) Mukuhita chalwola, Yosefwe akonekelele vandumbwenyi nakushinganyeka omwo Yehova amukiswile. (Kupu. 45:5) Ngana mwaYosefwe, nayetu nawa tunahase kuunda muchima nge natupandama kuli Yehova nakuvandamina lwola mwakolola vyuma.—Samu 7:17; 73:28.

15. Chuma muka chakafwile ndumbwetu umwe wapwevo apwenga namuchima wakutalilila chikoki?

¹⁵ Numba tuhu katweshi kuhita muukalu waunene ngana uze ahichilemo Yosefweko, oloze tunahase kwivwa kupihya nge vanatulingi mwamupi. Kachi nge tunalimbalaka nandumbwetu, chipwe namutu uze kapwa ndumbwetuko, kaha kukavangiza jindongi jamuMbimbiliya chinahase kutukafwa. (Fwili. 2:3, 4) Chakutalilaho, ndumbwetu umwe wapwevo evwilenga kupihya omu atachikijile ngwenyi mukwavo muka-milimo ali nakumuyongola. Muchishishisa chakupihilila, ou ndumbwetu ashinganyekele hachakutalilaho chaYesu. Omu Yesu vapwile nakumutukana ikiye kavahilwishililenga matukako. (Petu. 1, 2:21, 23) Chakutalilaho chaYesu chakafwile ou ndumbwetu ahone kupihilila nauze mukwavo. Mukuhita chalwola atachikijile ngwenyi ou mukwavo avijile chikuma, kaha nawa alizakaminyine chikuma. Ou ndumbwetu akukulwile ngwenyi ou mukwavo muka-milimo amuyongwelenga mwomwo yaukalu keshi chakufuma kumuchimako. Ngocho ou ndumbwetu awahililile chikuma hakutalilila chikoki mukwavo muka-milimo omu amuyongwelenga, kahechi chamulingishile aunde muchima.

16. Chuma muka chatela kumivendejeka nge munakuhita muukalu? (WaPetulu 1, 3:12)

¹⁶ Kachi nge munakumona ukalu chipwe nge vakwenu vanamilingi mwamupi, kaha tachikizenu ngwenu Yehova ali hakamwihi navaze “vanakulyonyinga mumuchima.” (Samu 34:18)  Amizanga chikuma mwomwo yakumbila chiteli chenu hali ikiye nakupwa namuchima wakutalilila chikoki. (Samu 55:22) Ikiye mwakasopesa vatu vosena hano hamavu, kaha kakweshi chuma cheji kusolokanga chize azeneka kutachikizako. (Tangenu WaPetulu 1, 3:12.) Nge munakuhita muukalu uze kamweshi kuhasa kukumisako, kutala namulisuula kutwalaho lika kuvandamina Yehova akakumise ukalu kana tahi?

17. Vyuma muka mwakatulingila Yehova kweseka namazu ahali Isaya 30:18?

¹⁷ Kalinwomu Setu wamwilu atukisule kuhichila muWangana wenyi. Hali Isaya 30:18 hatwama mazu akwamba ngwavo: “Yehova ali nakumitalilila chikoki mangana amivwile uselewa, mwakatuka mangana amitetele. Mwomwo Yehova apwa Kalunga wachiyulo. Vawahilila vaze veji kumuvandaminanga.” Vosena vaze veji kuvandaminanga Yehova navalivwisa kuwaha vyuma vyamwaza oholyapwa namukaye kakahya.

18. Vyuma muka vyamwaza natukalivwisa kuwaha?

¹⁸ Omu vatu jaKalunga navakapwa mukaye kakahya, kaveshi cheka kukalizakaminanga nakumona ukalu vali nakumona makumbi anoko. Kakweshi kukapwa kuhengesa chiyuloko, kaha nawa kakweshi kukapwa kukolako. (Kuso. 21:4) Katweshi kukalizakaminanga hachuma numba chimweko mwomwo vyuma vyosena vize natukasaka natukapwanga navyo. (Samu 72:16; Isa. 54:13) Ocho kuwaha kana enu vayaya!

19. Yehova ali nakutukafwa ngachilihi oholyapwa?

¹⁹ Yehova ali nakutukafwa oholyapwa tuhonese jitato jajipi nakupwa navilinga vyamwaza mangana tutengamo kukapwa muchiyulo chenyi. Kanda kuhomba mwomwo yaukalu, nakulitwamina kuzachila Yehovako. Kuli vyuma vyamwaza vize Kalunga natutumbikila kulutwe. Shikaho tutwalenuho lika kutalilila Yehova chikoki nakuvandamina omu mwakatesamo vyuma vyosena atushika.