1. Chuma muka nachitukafwa tulivwisenga kuwaha kulinangula upolofweto wamuMbimbiliya?

 BEN uze twavulukanga muchihande chinafumuho ambile ngwenyi: “Ngwazanga kulinangula upolofweto wamuMbimbiliya.” Uno omu mukiko mweji kwivwanga nayenu tahi? Nyi mwamona ngwenu upolofweto wamuMbimbiliya wapwa waukalu kwivwishisa? Pamo munahase kushinganyeka ngwenu, kulinangula upolofweto cheji kwivwisanga uli. Chipwe ngocho, vishinganyeka kana vinahase kwalumuka kachi nge namutachikiza ovyo Yehova asonekelele upolofweto kana muMazu enyi.

2. Vyuma muka natushimutwila muchihande chino?

² Muchihande chino natushimutwila ovyo twatela kulinangwila upolofweto wamuMbimbiliya navyuma navitukafwa tulinangulewo. Natukekesa nawa haupolofweto uvali wamumukanda waNdanyele mangana tumone omwo kwivwishisa upolofweto kana nachitukafwa oholyapwa.

3. Chuma muka twatela kulinga mangana twivwishise upolofweto wamuMbimbiliya?

³ Twatela kulomba Yehova atukafwe mangana twivwishise upolofweto wamuMbimbiliya. Tuchitalenu hachakutalilaho chino. Achishinganyekenu muli nakuya kuchihela chaungeji, kaha sepa lyenu uze muli nakuya nenyi atachikiza kanawa kuchihela kana. Natachikiza kanawa oho munahete nokwo yaya jila hijila. Chikupu vene namuwahilila chikuma hakuwana nge sepa lyenu etavilanga kutambuka hamwe nayenu. Chochimwe nawa, Yehova atachikiza kanawa oho tunahete navyuma navisoloka kulutwe. Shikaho hakusaka twivwishise upolofweto wamuMbimbiliya, twatela kulomba Yehova atukafwe.—Ndanye. 2:28; Petu. 2, 1:19, 20.

4. Mwomwo ika Yehova asonekelele upolofweto muMazu enyi? (Yelemiya 29:11) (Talenu nawa muvwimbimbi.)

 ⁴ Yehova asaka vana venyi vakalivwise kuwaha vyuma vyamwaza kulutwe, ngana muze vasaka visemi vamwenemwene. (Tangenu Yelemiya 29:11.) Oloze Yehova ikiye kaha nahase kutulweza vyuma navikasoloka kulutwe, kaha lwola lwosena eji kuhanjikanga muchano. Asoneka upolofweto muMazu enyi mangana tutachikize vyuma vyavilemu shimbu kanda visoloke. (Isa. 46:10) Upolofweto wamuMbimbiliya wapwa wana uze atuhana Setu wamwilu. Uno munahase kukunyuka ngachilihi ngwenu upolofweto wamuMbimbiliya naukatesamo chikupu?

5. Uno vyuma muka navalinangula vanyike kuli Max?

⁵ Hamashikola veji kutangilanga vanyike vamuliuka lyetu hatwama vatu vamwe vaze kavamona Mbimbiliya kupwa yayilemuko. Vyuma veji kuhanjikanga navilinga vyavo vinahase kulingisa ava vanyike vaputuke kuhuhwasana vyuma vafwelela. Achitalenu hachakutalilaho chandumbwetu Max. Ambile ngwenyi: “Omu ngwapwile kushikola, ngwaputukile kuhuhwasana ngwami vyuma vangunangwilenga visemi jami kavyapwile vyamuchanoko, kaha nawa ngwami Mbimbiliya kavayihwima kuli Kalungako.” Uno chuma muka valingile visemi jenyi? Ambile ngwenyi, “Numba tuhu ngwatachikijile ngwami valizakaminyine oloze vaunjile muchima.” Visemi jenyi vakumbulwile vihula vyenyi kuzachisa Mbimbiliya. Oloze Max naikiye alingileko vyuma vimwe. Ambile ngwenyi: “Ngwalinangwilenga upolofweto wamuMbimbiliya hauka, kaha ngwalwezelengako vakwetu vyuma ngwalinangwilenga.” Uno vyuma muka vyafuminemo? Max ambile ngwenyi: “Ngwakunyukile jino ngwami Mbimbiliya vayihwima kuli Kalunga.”

6. Vyuma muka mwatela kulinga nge munaputuka kupwa namuchima wakuhuhwasana, kaha mwomwo ika?

⁶ Nge munaputuka kuhuhwasana ngwenu vyuma vyatwama muMbimbiliya kavyapwa vyamuchanoko, ngana muze chapwile kuli Max, kaha kanda namulihana mulongako. Oloze mwatela kulingako vyuma vimwe. Kuhuhwasana chinapu nge shingwe. Nge shingwe yize yili kuchuma katweshi kuyifumisako, kaha chuma kana nachiputuka kulyenyeka chindende chindende. Hakusaka mufumise kuhuhwasana chize chinapu nge shingwe yize nayenyeka lufwelelo lwenu, mwatela kulihulisa ngwenu, ‘Kutala ngwafwelela vyuma yahanjika Mbimbiliya kutalisa kuvyuma navikasoloka kulutwe tahi?’ Nge kamwatachikijile mwakukumbulwila chihula kanako, kaha mwatela kulinangula upolofweto wamuMbimbiliya uze unatesamo lyehi. Uno munahase kulinga ngachilihi ngocho?

7. Ndanyele aseza chakutalilaho muka kutalisa kukulinangula upolofweto? (Ndanyele 12:10) (Talenu nawa muvwimbimbi.)

⁷ Ndanyele aseza chakutalilaho chamwaza kutalisa kukulinangula upolofweto. Alinangwile upolofweto mwomwo yachuma chimwe chamwaza chakusaka kutachikiza muchano. Ndanyele apwile nawa namuchima wakulinyisa hakutachikiza ngwenyi Yehova eji kuhananga kunangakana kuli vosena vaze vamutachikiza navaze vasaka kukavangiza jishimbi jenyi jitoma. (Ndanye. 2:27, 28; tangenu Ndanyele 12:10.) Asolwele ngwenyi apwile wakulinyisa omu apendaminyinenga hali Yehova amukafwe. (Ndanye. 2:18) Ndanyele akekeselenga nawa kanawa vyuma alinangwilenga.  Ahehwojwelenga muVisoneka vahwima vize apwilenga navyo. (Yele. 25:11, 12; Ndanye. 9:2) Munahase kulondezeza ngachilihi Ndanyele?

8. Mwomwo ika vatu vamwe veji kulinangwilanga upolofweto?

⁸ Kekesenu ovyo muli nakulinangwila upolofweto. Uno muli nakulinangula upolofweto wamuMbimbiliya mangana mutachikize muchano tahi? Nge mukiko, kaha Yehova mwamikafwa. (Yowa. 4:23, 24; 14:16, 17) Vyuma vyeka muka vyeji kulingisanga vatu vamwe valinangule upolofweto? Vamwe veji kulinganga ngocho mangana vawane unjiho wasolola nge Mbimbiliya kavayihwima kuli Kalungako. Veji kushinganyekanga ngwavo nge Mbimbiliya kavayihwima kuli Kalungako, kaha vanahase kulitungila vavene jishimbi javyuma vyakwoloka navyakuhenga. Ngocho twatela kulinangula upolofweto mwomwo yavyuma vyamwaza. Kuli nawa chuma chikwavo chachilemu chatela kutukafwa twivwishise upolofweto wamuMbimbiliya.

9. Muchima muka twatela kupwa nawo mangana twivwishise upolofweto wamuMbimbiliya? Lumbununenu.

⁹ Pwenunga vakulinyisa. Yehova atulweza ngwenyi mwakafwanga vaka-kulinyisa. (Yako. 4:6) Shikaho twatela kumulomba atukafwe twivwishise upolofweto wamuMbimbiliya. Twatela nawa kwitavila kukafwa chakufuma kuli ndungo wakushishika uze Yehova ali nakuzachisa hakutuhana kulya chakushipilitu halwola lwakutamo. (Luka 12:42) Hakuwana nge Yehova kapwa Kalunga waliwayangako, ngocho chapwa chakutamo kuzachisa jila yimwe mangana atukafwe twivwishise muchano watwama muMazu enyi.—Koli. 1, 14:33; Efwe. 4:4-6.

10. Vyuma muka munalinangula kuli Esther?

¹⁰ Kekesenunga kanawa. Sakulenu upolofweto uze mwazanga chikuma, nakuhehwojola chatete haupolofweto kana. Omu mukiko alingile ndumbwetu Esther. Azangile chikuma upolofweto uze wahanjikile chimweza vyakwiza chaMeshiya. Ambile ngwenyi: “Omu ngwapwile namyaka yakusemuka 15, ngwaputukile kuhehwojola unjiho uze wasolola nge upolofweto kana vausonekele shimbu kanda Yesu ezenga hano hamavu.” Vyuma alinangwile kutalisa kuMikanda Yakuvunga YamuChijiva chaMungwa vyamukunywile. Ambile ngwenyi: “Mikanda yimwe vayisonekele shimbu kanda Kulishitu ezenga hano hamavu, ngocho upolofweto watwama mumikanda kana wafuma kuli Kalunga.” Esther ambile cheka ngwenyi: “Ngwalinangwilenga mikanda kana mapapa kakavulu numba nguyivwishise.” Oloze apwa wakuwahilila mwomwo yakukilikita chenyi. Omu akumishile kulinangula kanawa upolofweto wauvulu wamuMbimbiliya, ambile ngwenyi, “Chikupu vene ngunalimwena ami ivene ngwami Mbimbiliya yapwa yamuchano.”

11. Natunganyala ngachilihi nge natuliwanyina etu vavene unjiho wakusolola nge Mbimbiliya yapwa yamuchano?

¹¹ Kumona omwo upolofweto wauvulu wamuMazu aKalunga unatesamo lyehi chatukafwa tufwelele chikuma Yehova najila eji kututwaminyinangamo. Kaha nawa upolofweto wamuMbimbiliya weji kutukafwanga tutwaleho lika kutalilila vyuma vyamwaza vyakulutwe chamokomoko navyeseko natumona. Tushimutwilenu mukavatu upolofweto uvali vasonekele kuli Ndanyele uze uli nakutesamo oholyapwa. Kwivwishisa upolofweto kana nachitukafwa tusakule kanawa vyakulinga.

12. Uno vilyachilo “[vya]fwelu yakufutula naunonga ututa” vyemanyinako ika? (Ndanyele 2:41-43)

¹² Tangenu Ndanyele 2:41-43. Vilyachilo vize amwene Mwangana Nevukataneza muchilota chize alumbunwine Ndanyele, vyapwile “[vya]fwelu yakufutula naunonga ututa.” Nge natwesekesa upolofweto kana kuupolofweto weka wamumukanda waNdanyele naKusoloka, kaha tunahase kukukulula ngwetu vilyachilo vyemanyinako chiyulo chaAnglo-America chize chapwa changolo mukaye kosena makumbi ano. Kutalisa kuchiyulo kanechi, Ndanyele ambile ngwenyi, “wangana kana naukapwa wangolo kaha nawa wakuhehela.” Mwomwo ika naukapwila nawa wakuhehela? Mwomwo vatu vaze vemanyinako kuunonga ututa veji kuhonesanga ou wangana kupwa nangolo ngana mwafwelu. b

13. Uno kwivwishisa ou upolofweto chinatukafwe tulinangule muchano muka waulemu?

¹³ Tweji kulinangulanga muchano waulemu kuchilota chamutu wamunene wachifwanyisa, chikumanyi kuvilyachilo vyenyi, chize Ndanyele alumbunwine. Chatete, Chiyulo chaNgolo chaKaye chaAnglo-America, chinasolola nge chikwechi ngolo. Chakutalilaho, chazachile mulimo waunene hakufungulula jita yakaye yatete nayeyi yamuchivali. Chipwe ngocho, echi chiyulo changolo chakaye chinapu chakuhehela kaha nawa nachitwalaho lika kupwa chakuhehela mwomwo vatu vatwamamo vali nakulikokojwesa mwavomwavo nakuzunga nawa nafulumende. Chamuchivali, Chiyulo chaNgolo chaKaye chaAnglo-America chikiko chamakumishilo kuyula, palanga nomu Wangana waKalunga naukafumisako mawangana osena avatu. Shikaho, numba tuhu mafuchi eka nawafumbukila chiyulo kana, oloze kaweshi kukachishisako. Twejiva ngocho, mwomwo “lilolwa” lize lyemanyinako Wangana waKalunga nalikachika vilyachilo vyamutu wachifwanyisa vize vyemanyinako Chiyulo chaNgolo chaKaye chaAnglo-America.—Ndanye. 2:34, 35, 44, 45.

14. Uno kwivwishisa upolofweto wahanjika havilyachilo nachitukafwa ngachilihi tusakule kanawa vyakulinga?

¹⁴ Kutala mwakunyuka ngwenu upolofweto waNdanyele wahanjika havilyachilo vyafwelu naunonga wapwa wamuchano tahi? Nge mukiko, kaha jila namuyoyelamo yatela kusolola nge mwakunyuka hachuma kana. Kamweshi kufwila mukingo wakufuma kuvyuma vyamukaye kaze navanongesa kalinwomuko. (Luka 12:16-21; Yowa. 1, 2:15-17) Kwivwishisa upolofweto kana nachimikafwa nawa mumone kulema chamulimo wakwambulula nakunangula vatu. (Mateu 6:33; 28:18-20) Nge munalinangula lyehi upolofweto kana, kaha lihulisenu ngwenu, ‘Uno vyuma ngweji kusakulanga kulinga vyasolola nge ngwakunyuka ngwami Wangana waKalunga kalinwomu ufumiseko jifulumende javatu josena tahi?’

15. Iya emanyinako “mwangana wakunote” “[na]mwangana wakusulo” makumbi ano? (Ndanyele 11:40)

¹⁵ Tangenu Ndanyele 11:40. Mukanda waNdanyele kapetulu 11 wahanjika hali vamyangana vavali chipwe ngwetu jifulumende jivali jize jili nakulipika. Nge natwesekesa upolofweto kanou naupolofweto weka wamuMbimbiliya, tunahase kwamba ngwetu “mwangana wakunote” napu lifuchi lyaRussia navaka-kulikundwiza, kaha “mwangana wakusulo” napu chiyulo changolo chakaye chaAnglo-America. c

16. Ukalu muka veji kumonanga vandumbwetu vaze vatwama muchiyulo “[cha]mwangana wakunote”?

¹⁶ Vatu jaKalunga vaze vatwama muchiyulo chamwangana wakunote vali nakuvayanjisa chikuma  kuli mwangana kana. Vinjiho jaYehova vamwe vanavavetenga nakuvatwala mutumenga mwomwo yavyuma vafwelela. Chamokomoko naluyanjisa lwakufuma kuli ou “mwangana wakunote,” vandumbwetu vanazamisa lufwelelo lwavo. Mwomwo ika? Mwomwo vandumbwetu vanatachikiza ngwavo kuyanjisa vatu jaKalunga chili nakutesamo mazu aupolofweto atwama mumukanda waNdanyele. d (Ndanye. 11:41) Kutachikiza chuma kana nachitukafwa tutwaleho lika kutalilila vyuma vyamwaza nakupwa nawa vakushishika kuli Yehova.

17. Ukalu muka vanamononga vandumbwetu vaze vatwama muchiyulo “[cha]mwangana wakusulo”?

¹⁷ Kunyima, “mwangana wakusulo” naikiye nayanjisanga vatu jaYehova. Chakutalilaho, hajita yakaye yatete nayamuchivali, vandumbwetu vavavulu vavakashile mutumenga mwomwo yakuhona kwazana muvihande vyalifuchi nachiyulo, kaha vana vaVinjiho jaYehova vavahangilenga kumashikola mwomwo yachihande chochimwe. Kaha mumyaka yakalinwomu vandumbwetu vaze  vatwama muchiyulo chamwangana kana vanapunga muvyeseko vyeka vize vinahase kuvalingisa vahone kupwa vakushishika. Chakutalilaho, halwola lwakuvwota, muka-Kulishitu nahase kupwa mucheseko chakukundwiza lizavu lyamapolitiki limwe chipwe kukundwiza twamina umwe wamapolitiki. Numba tuhu keshi kuvwotako, oloze nahase kupwa navishinganyeka vyakumona twamina umwe kupwa wamwenemwene kuzomboka mukwavo. Shikaho nachipwa chachilemu chikuma kulihendanga kuvihande vyamapolitiki muvilinga namuvishinganyeka vyetu.—Yowa. 15:18, 19; 18:36.

18. Vyuma muka vyeji kusolokanga kuli etu hakumonomu “mwangana wakunote” “[na]mwangana wakusulo” vali nakulipika? (Talenu nawa muvwimbimbi.)

¹⁸ Vatu vaze vahona kufwelela upolofweto wamuMbimbiliya vanahase kulizakamina chikuma hakumona omwo “mwangana wakusulo” “[na]mwangana wakunote” vali ‘nakulipula jipami.’ (Ndanye. 11:40, kwinyikila) Ava vamyangana vosena vavali vatwama namata amatendazungu aze anahase kulalisa vyuma vyakuyoya vyosena hano hamavu. Oloze twatachikiza ngwetu Yehova keshi kukechelela chuma kana chikasolokeko. (Isa. 45:18) Shikaho kulipika “[cha]mwangana wakunote” “[na]mwangana wakusulo” kachatuhombesako, oloze cheji kujikijisanga lufwelelo lwetu. Kaha nawa kulipika kana chasolola nge kukuma chakatwamino kamyaka yino chili hakamwihi.

19. Vyuma muka twatela kutachikiza kutalisa kuupolofweto wamuMbimbiliya?

¹⁹ Katwatachikiza mujila upolofweto umwe naukatesamoko. Nakapolofweto Ndanyele vene kevwishishile ulumbunwiso wavyuma vyosena vize asonekeleko. (Ndanye. 12:8, 9) Shikaho, numba tuhu katwevwishisa kanawa omu upolofweto umwe naukatesamoko, oloze kachalumbununa nge upolofweto kana kaweshi kukatesamoko. Chikupu vene, tunafwelela ngwetu Yehova mwakatusolwela vyuma twatela kutachikiza halwola lwakutamo ngana muze alingilenga kunyima.—Amo. 3:7.

20. Upolofweto muka uze nautesamo kalinwomu, kaha vyuma muka twatela kutwalaho lika kulinga?

²⁰ Vaka-mafuchi navakavilika mutambi “[wa]kuunda namukingo.” (Teso. 1, 5:3) Kufumaho, jifulumende jakaye najikafumbukila kwitava chamakuli nakuchinongesa. (Kuso. 17:16, 17) Kutwala muze, navakafumbukila vatu jaKalunga. (Ezeke. 38:18, 19) Vyuma kanevi navikaneha jita yamakumishilo yaAlamangetone. (Kuso. 16:14, 16) Twafwelela ngwetu vyuma kanevi kalinwomu visoloke. Omu tuli nakuvandamina vyuma kana, tutwalenuho lika kusakwilila Setu wamwilu wazangi hakuhakanga mangana kuupolofweto wamuMbimbiliya nakukafwa vakwetu valinge mwomumwe.