1. Kweseka naWavaHepeleu 12:1, vyuma muka twatela kulinga mangana tukahete kusongo mukulaha chakuya kukuyoya?

 MBIMBILIYA yafwanyisa chiyoyelo chayetu vaka-Kulishitu kukulaha. Vaka-kulaha vaze navalaha kanawa palanga nakusongo navakatambula fweto yakuyoya chahaya myaka. (Chimo. 2, 4:7, 8) Shikaho twatela kuzata nangolo mangana tutwaleho lika kulaha, chikumanyi hakuwana nge kalinwomu tuhete kusongo. Kaposetolo Paulu uze alahile nakuheta kusongo mukulaha chakuya kukuyoya, avulukile vyuma navitukafwa tulahe nakukatambula fweto. Atulweza ‘tuzule vyuma vyosena vyakutulemuwisa, . . . nakulaha nalukakachila mukulaha chize vanatutomena.’—Tangenu WavaHepeleu 12:1.

2. Uno ‘kuzula vyuma vyosena’ chalumbununa ika?

² Uno omu Paulu asonekele ngwenyi, twatela ‘kuzula vyuma vyosena vyakutulemuwisa,’ alumbunwine ngwenyi kakweshi vyuma vyeka vize muka-Kulishitu atela kumbatako tahi? Nduma. Apwile nakulumbununa ngwenyi tuseze vyuma vize kavyapwile vyavilemuko, mwomwo vyuma kana vinahase kutuzezeka nakutuzeyesa. Hakusaka tulahe nalukakachila, twatela kutachikiza washi vyuma vize kavyeshi nakusakiwako vize navituzezekesa, nakuvizula. Chipwe ngocho, katwatela kumbila navyuma vize twatela kumbatako. Nge chiku, kaha katweshi kutamo kupwa mukulaha kanako. (Chimo. 2, 2:5) Uno vyuma muka twatela kumbata?

3. (a) Kweseka naWavaka-Ngalesha 6:5, vyuma muka twatela kumbata? (b) Vyuma muka natushimutwila muchihande chino, kaha mwomwo ika?

³ Tangenu Wavaka-Ngalesha 6:5. Paulu avulukile vyuma vimwe  twatela kumbata. Asonekele ngwenyi, “mutu himutu mwalimbachila vyuma vyenyi ivene.” Hano, Paulu atalishile kuvyuma vize Kalunga asaka mutu himutu alimbachile ivene, vize kaveshi kuhasa kutulingila kuli mutu wekako. Muchihande chino, natushimutwila vyuma vyaliweza mumazu akwamba ngwavo “vyuma vyenyi ivene,” nomwo tunahase kuvimbata. Kaha natushimutwila nawa havyuma vize pamo tunambate vize kavyeshi vyavilemuko, nakulinangula mwakuvizulila. Kumbata vyuma vyetu nakuzula vize kavyeshi vyavilemuko nachitukafwa tulahe kanawa mukulaha chetu chakuya kukuyoya.

4. Mwomwo ika lushiko lwetu lwakulihana kuli Kalunga kalwapwila lwalukaluko? (Talenu nawa muvwimbimbi.)

⁴ Lushiko lwetu lwakulihana kuli Yehova. Omu twalihanyine kuli Yehova, twamushikile kumulemesa nakulinga mwaya muchima wenyi. Shikaho, twatela kutesamo lushiko kana. Numba tuhu kuyoya kweseka nakulihana chetu wapwa himulimo waulemu, oloze kawapwa waukalu chikumako. Wapwa wawashi mwomwo Yehova atutenga tulingenga mwaya muchima wenyi. (Kuso. 4:11) Atutenga namuchima wakusaka kumutachikiza nakumulemesa, kaha nawa  atutenga muchifwanyisa chenyi. Echi cheji kutulingisanga tupandame kuli ikiye nakulivwisa kuwaha kulinga mwaya muchima wenyi. (Samu 40:8) Kaha nawa nge natulinganga mwaya muchima waKalunga nakukavangiza Mwanenyi, kaha natupwa “vakuhizumuka.”—Mateu 11:28-30.

5. Vyuma muka navimikafwa mutesemo lushiko lwenu? (WaYowano 1, 5:3)

⁵ Uno munahase kumbata ngachilihi vyuma vyenu? Kuli vyuma vivali vize vinahase kumikafwa. Chatete, twalenuho lika kuzanga chikuma Yehova. Munahase kulinga ngocho hakushinganyekanga havyuma vyamwaza namilingila nahavyuma vize mwakamilingila kulutwe. Nge namuzanga chikuma Kalunga, kaha namuchiwana kupwa chachashi kumwononoka. (Tangenu WaYowano 1, 5:3.) Chamuchivali, londezezenunga Yesu. Ahashile kulinga mwaya muchima waKalunga mwomwo amulombelenga amukafwe nakushinganyeka hafweto mwakatambula. (Hepe. 5:7; 12:2) Ngana muze alingile Yesu, nayenu lombenunga Yehova amihane ngolo nakutwalaho lika kushinganyeka hakuyoya chahaya myaka chize natukapwa nacho. Shikaho, omu namutwalaho lika kuzanga Kalunga hakulondezeza Mwanenyi, kaha namutesamo lushiko lwenu lwakulihana kuli Yehova.

6. Mwomwo ika twatela kuzachila mulimo wakuzakama tanga? (Talenu nawa muvwimbimbi.)

⁶ Mulimo wetu wakuzakama tanga. Mukulaha chetu chakuya kukuyoya, twatela kuzanga chikuma Yehova naYesu kuhambakanomu twazanga vausoko wetu. (Mateu 10:37) Echi kacheshi nakulumbununa nge twatela kusuvilila mulimo wetu wakuzakama tanga, kwijiva nge mulimo kana ukiko uli nakutulingisa tuhone kwivwisa Kalunga naKulishitu kuwahako. Oloze hakusaka Kalunga naKulishitu vatwitavile, twatela kuzata mulimo wetu wakuzakama tanga. (Chimo. 1, 5:4, 8) Nge natulinga ngocho, kaha natupwa vakuwahilila. Shikaho Yehova atachikiza ngwenyi jitanga najipwanga jakuwahilila nge valunga napwevo navalisolwelanga zangi nakavumbi, kaha nawa nge visemi navazanganga vana vavo nakuvanangula, nge vana nawa navononokanga visemi javo.—Efwe. 5:33; 6:1, 4.

7. Vyuma muka navimikafwa mutesemo mulimo wenu mwatwama nawo mutanga?

⁷ Uno munahase kumbata ngachilihi vyuma vyenu? Kala mulimo mwatwama nawo mutanga, fwelelenu mumangana amuMbimbiliya, keshi kupendamina havishinganyeka vyenu, chipwe hachisemwa chipwe havatu vaze valivuluka kupwa vakuluwa mumanganako. (Vishi. 24:3, 4) Kavangizenunga vyuma vyatwama mumikanda yetu yahanjika haMbimbiliya. Mumikanda kana mwatwama vyuma vize navitukafwa tuwane mwakuzachishila jindongi jamuMbimbiliya. Chakutalilaho, hachihanda chakwamba ngwavo “Vyuma Navikafwa Tanga” hali vihande vyahanjika haukalu veji kumonanga valunga napwevo, navisemi navana makumbi ano. b Fwilenunga kukavangiza vyuma yahanjika Mbimbiliya numba tuhu vamwe mutanga kaveshi nakukavangiza vyuma kanako. Nge namulinga ngocho, kaha tanga yenu nayipwa yakuwahilila, kaha nawa Yehova mwamikisula.—Petu. 1, 3:1, 2.

8. Uno vyuma muka vinahase kufuma muvyuma tunasakula?

⁸ Kulipika naukalu weji kufumanga hakusakula vyuma vyakuhenga. Yehova atuhana lisesa lyakulisakwila vyakulinga, kaha nawa asaka tulivwise kuwaha cheji kufumanga hakusakula kanawa vyakulinga. Oloze nge natusakula kulinga vyuma vyakuhenga, kaha keshi kuhonesa ukalu uze naufumamoko. (Ngale. 6:7, 8) Ngocho  katweshi kukahana mutu mulonga haukalu natumona mwomwo yavyuma vyakuhenga natusakula kulinga, chipwe mwomwo yakuhanjika mazu amapi chipwe kulinga vyuma mukulusukako. Tunahase kulihana mulonga kweseka navyuma tunalingi. Oloze kutachikiza ngwetu vyuma tunasakula vinahase kutunehela ukalu etu vavene, nachitukafwa tulitavile shili tunalingi nakwolola vyuma nakulihenda kukulinga cheka vyuma kana. Kulinga vyuma kana nachitukafwa tutwaleho lika kulaha mujila yakuya kukuyoya.

9. Vyuma muka namulinga nge munasakula kulinga chuma chakuhenga? (Talenu nawa muvwimbimbi.)

⁹ Uno munahase kumbata ngachilihi vyuma vyenu? Namulinga ngachilihi nge munasakula chuma chakuhenga? Tachikizenu ngwenu kamweshi kuhasa kwalumuna vyuma vinasoloka lyehiko. Kanda kwenyeka ngolo jenu navishinganyeka vyenu hakufwila kulihakwila chipwe kulihana milonga enu vavene chipwe vakwenu havyuma yakuhenga mwasakwileko. Oloze yitavilenu vyuma munalimbenje nakuzata nangolo kweseka nomwo vili vyuma. Lombenu Yehova nakumulweza vyuma munalimbenje nakumulomba amikonekele, kachi nge muli nakulihana mulonga. (Samu 25:11; 51:3, 4) Likonekelenu kuli vatu vaze pamo mwavulumwine, kaha nge chinahase lwezenu vakulwane vamikafwe. (Yako. 5:14, 15) Linangulenu kuvyuma mwalimbenjele nakufwila kulihenda kukuvilinga cheka. Nge namulinga ngocho, kaha Yehova mwamitetela nakumikafwa.—Samu 103:8-13.

10. Mwomwo ika kulitomena vyuma vize katweshi kuhasa kutesamoko chapwila hichiteli? (Wavaka-Ngalesha 6:4)

¹⁰ Kulitomena vyuma vize katweshi kuhasa kutesamoko. Tunahase kulilemuwisa navyuma vize katweshi kuhasa kutesamoko nge natulyesekesa kuli vakwetu. (Tangenu Wavaka-Ngalesha 6:4.) Nge natutwalaho lika kulyesekesa kuli vakwetu, kaha tunahase kuputuka kuvevwila lushiushiu nakuputuka kupwa namuchima wakulipecha. (Ngale. 5:26) Nge natusaka kulinga vyuma vize vali nakulinga vakwetu oku yetu katweshi kuvihasako, kaha tunahase kupwa muponde. Jino “nge vyuma natalilila mutu vinashimbula kutesamo, cheji kwivwisanga kumuchima kukola,” kahanyi kulitomena vyuma vize katweshi kuhasa kutesamoko chinahase kuhombesa chikuma mutu. (Vishi. 13:12) Echi nachituzeyesa nakutulingisa tuhone kulaha kanawa mujila yakuya kukuyoya.—Vishi. 24:10.

11. Vyuma muka navimikafwa mulihende kulitomena vyuma vize kamweshi kuhasa kutesamoko?

¹¹ Uno munahase kuzula ngachilihi chuma kana? Kanda kutalilila chuma chize Yehova namono ngwenyi katweshi kuhasa kutesamoko. Yehova kasaka mulinge chuma chize kamweshi kuhasa kutesamoko. (Koli. 2, 8:12) Tachikizenu ngwenu Yehova kesekesa vyuma namulinga kuvyuma navalinga vakwenuko. (Mateu 25:20-23) Amona kulisuula chenu nakushishika chenu nakumika chenu kupwa hivyuma vyavilemu chikuma. Pwenu vakulinyisa nakutachikiza ngwenu kamweshi kuhasa kulinga vyuma vimwe mwomwo yamyaka yenu nakulikangula chenu chipwe kala ukalu munahase kupwamoko. Ngana muze alingile Mbalajilai, nayenu pwenunga vakukasunuka kukana milimo kachi nge kamweshi vakulikangulako chipwe munashinakajiwa. (Samwe. 2, 19:35, 36) Itavilenu vamikafwe nakuhanako vakwenu milimo nge chinahase, nge muze alingile Mose. (Kulo. 18:21, 22) Kulinyisa mujila kaneyi nachimikafwa muhone kulitomena vyuma vize kamweshi kuhasa kutesamoko, vize vinahase kumilemuwisa mukulaha chenu mujila yakuya kukuyoya.

12. Uno twatela kulihana mulonga havyuma vyavipi navasakula vakwetu kulinga tahi? Lumbununenu.

¹² Kulihana mulonga havyuma vyavipi vasakwile kulinga vakwetu. Katweshi kusakwila vakwetu vyakulingako, chipwe kuvalingisa vahone  kuhita muukalu uze nawiza mwomwo yavyuma vyavipi vasakwileko. Chakutalilaho, mukuhita chalwola mwana nahase kusakula kulitwamina kuzachila Yehova. Chuma kana chinahase kwivwisa visemi kumuchima kukola chikuma. Chipwe ngocho, visemi vaze veji kulihananga mulonga mwomwo yavyuma vyavipi nasakula mwanavo veji kupwanga nachiteli chachilemu. Yehova kasaka visemi vambate chiteli kanako.—Loma 14:12.

13. Uno visemi vanahase kulinga ngachilihi nge mwanavo nasakula vyuma vyakuhenga?

¹³ Uno munahase kuzula ngachilihi chuma kana? Ijivenu ngwenu Yehova atuhana lisesa lyakulisakwila vyakulinga. Asaka mutu himutu alisakwile ivene vyuma nasake, kuhakilako vene nakusakula kumuzachila. Yehova atachikiza ngwenyi enu visemi kamwapwa vakukupukako, oloze asaka mulinge vyuma vize namuhasa kulinga. Ukalu mwamona mwanenu havyuma mwasakula kulinga unapu wenyi, keshi wayenuko. (Vishi. 20:11) Chipwe ngocho, pamo munahase kutwalaho lika kulihana milonga hakupwa muvisemi. Nge chili ngocho, kaha lwezenu Yehova omu muli nakwivwa nakumulomba amikonekele. Atachikiza ngwenyi kamweshi kuhasa kwalumuna vyuma vyasolokele kunyimako. Kaha nawa kashinganyeka ngwenyi namulingisa mwanenu ahone kwaha vize akuvileko. Anukenu ngwenu nge mwanenu mwazata nangolo mangana akinduluke kuli Yehova, kaha mwamutambula.—Luka 15:18-20.

14. Mwomwo ika kulihana chikuma mulonga chapwila hichuma chakutulemuwisa chize twatela kuzula?

¹⁴ Kulihana chikuma mulonga. Nge tunalingi shili, chapwa chakutamo kulihana mulonga. Oloze Yehova kasaka tulihanenga chikuma mulongako. Nachikiko chapwa hichuma chakutulemuwisa chize twatela kuzula. Natutachikiza ngachilihi ngwetu tuli nakulihana chikuma mulonga? Nge tunalitavila lyehi shili yetu nakupihilila nakwalumuka nakuzata nangolo tulihende kukulinga cheka shili kana, kaha twatela kufwelela ngwetu Yehova natukonekela. (Vili. 3:19) Nge tunalingi lyehi vyuma kana, Yehova kasaka tutwaleho kulihana mulongako. Atachikiza  ngwenyi chuma kana chinahase kutunehela ukalu. (Samu 31:10) Nge natuhomba chikuma, kaha katweshi kuhasa kutwalaho kulaha mujila yakuya kukuyoyako.—Koli. 2, 2:7.

15. Vyuma muka navimikafwa nge muli nakulihana chikuma mulonga? (WaYowano 1, 3:19, 20) (Talenu nawa muvwimbimbi.)

¹⁵ Uno munahase kuzula ngachilihi chuma kana? Nge muchili nakulihana mulonga, kaha shinganyekenu hamuchima waYehova ‘wakukonekela.’ (Samu 130:4) Ahanjika ngwenyi, nge nakonekela vaze vanapihilila nakwalumuka chikupu, “[keshi] kukanuka cheka shili yavoko.” (Yele. 31:34) Echi chalumbununa nge Yehova keshi kukashinganyeka cheka hashili yize namikonekela lyehiko. Shikaho, nge namumona ukalu mwomwo yachuma mwalingile, kanda kushinganyeka ngwenu Kalunga kamikonekeleleko. Kaha nawa kanda kupihililako kachi nge vyuma mwalingile kunyima navimihonesa kutamo kuzata milimo yimwe muchikungulwilo. Yehova katwalaho kushinganyeka hashili yenuko, ngocho nayenu kamwatela kutwalaho kuyishinganyekako.—Tangenu WaYowano 1, 3:19, 20.

16. Hakupwa tuvaka-kulaha, vyuma muka twatela kutachikiza?

¹⁶ Omu tuli nakulaha mukulaha chakuya kukuyoya, twatela ‘kulaha mujila yize nayitulingisa tukatambule fweto.’ (Koli. 1, 9:24) Tunahase kulinga ngocho nge natutachikiza chihandwa chatwama havyuma vize twatela kumbata navyuma vyakutulemuwisa vize twatela kuzula. Muchihande chino, tunashimutwila havyakutalilaho vyavindende kaha vyakusolola vyuma twatela kumbata navize twatela kuzula. Oloze kunahase kupwa navyeka. Chakutalilaho, Yesu ambile ngwenyi tunahase “kulema [michima] mwomwo yakulya chikuma, nakunwa chikuma nakulizakamina havyuma vyamukuyoya.” (Luka 21:34) Chisoneka kana navisoneka vyeka vinahase kumikafwa mumone vyuma mwatela kwalumunako omu muli mukulaha chakuya kukuyoya.

17. Mwomwo ika twafwelela ngwetu natulaha mukulaha chakuya kukuyoya nakuheta kusongo?

¹⁷ Twatela kufwelela ngwetu natulaha kuheta nakusongo mwomwo Yehova mwatuhana ngolo. (Isa. 40:29-31) Shikaho kanda kuzeyako. Londezezenunga kaposetolo Paulu uze azachile nangolo mangana ahete kusongo nakutambula fweto. (Fwili. 3:13, 14) Kakweshi mutu mwamilahila kulaha kanako, shina enu vavene kaha. Chipwe ngocho Yehova mwamikafwa mufukile. Mwamikafwa mumbate vyuma vyenu nakumikafwa nawa muzule vize vili nakusakiwa kuzula. (Samu 68:19) Namulaha nalukakachila nakukatambula fweto mwomwo Yehova ali kusali yenu.