• “Ngwevwilenga kwijiva nge lunga lyami nalinginga ukoji mapapa kakavulu.”

• “Ngwevwilenga sonyi nakulimona kupwa nguwamupi musolokeso, kaha nawa nguwamokomoko.”

• “Kangwahanjikilenga namutuko. Ngwalipikilenga naukalu kana ukawami.”

• “Ngwashinganyekelenga ngwami Yehova kanguzakamako.”

Vyuma vanahanjika ava vandumbwetu vyasolola kukola eji kwivwanga pwevo nge lunga lyenyi mwatala vyuma vyakuneha peha yakulisavala. Kaha nge lunga natalenga vyuma kana mukusweka hatukweji chipwe hamyaka yayivulu, cheji kupwanga chachikalu pwevo lyenyi kumufwelela. Pwevo umwe ambile ngwenyi: “Ngweji kwivwanga kwijiva nge lunga lyami kangwamutachikiza kanawako. Uno kuliko vyuma vyeka vize nanguswekela tahi?”

Chino chihande vanachisonekela pwevo uze akwechi lunga ali natato yakutala vyuma vyakuneha peha yakulisavala. a Nachishimutwila hajindongi jamuMbimbiliya jize jinahase kumuvendejeka nakumufwelelesa nge Yehova mwamukafwa. Kaha nawa jindongi kana najimukafwa aunde muchima nakumupandamisa kuli Yehova. b

Numba tuhu kamweshi kuhasa kupwa nangolo havyuma vyosena eji kulinganga lunga lyenuko, oloze kuli vyuma munahase kulinga mangana mukeheseko ukalu wenu nakuunda chikuma muchima. Tushimutwilenu havyuma vino.

Lihendenu kukulihana mulonga. Pwevo nahase kushinganyeka ngwenyi pamo ikiye nalingisa lunga lyenyi atalenga vyuma vyakuneha peha yakulisavala. Alice c ashinganyekele ngwenyi pamo kapwile pwevo wamwaza chikumako. Ngocho alihulishilenga ngwenyi, ‘Mwomwo ika lunga lyami mwatalila mapwevo veka nakuhona kutala yami?’ Mapwevo vamwe veji kulihananga mulonga ngwavo pamo vakiko vali nakulingisa ukalu utohweleko. Chakutalilaho, Danielle ambile ngwenyi, “Ngwashinganyekelenga ngwami ami yami ngwenyekele ulo wetu mwomwo yamatoto.”

Nge omu mukiko mweji kwivwanga nayenu, kaha tachikizenu ngwenu Yehova keshi kumihana mulonga mwomwo yavilinga vyalunga lyenuko. Chisoneka chaWaYakova 1:14 chamba ngwacho: “Mutu himutu eji kupwanga mucheseko omu kufwila chamumuchima wenyi  ivene nachimwonga nakumuzondola.” (Loma 14:12; Fwili. 2:12) Yehova keshi kumihana mulongako, oloze amona kushishika chenu kupwa chachilemu.—Miji. 2, 16:9.

Pwevo atela kutachikiza ngwenyi nge lunga lyenyi ali nakutala vyuma vyakuneha peha yakulisavala, kaha kachalumbunwine nge kapwa wamwaza chikumako. Vatu vaze valinangula chikuma hachihande kana vahanjika ngwavo, kutala vyuma vyakuneha peha yakulisavala cheji kulingisanga mutu apwenga napeha yize navahona kusuulwisa kuli kala pwevo.

Kanda kulizakamina chikumako. Catherine ambile ngwenyi ashinganyekelenga lika hatato yalunga lyami yakutala vyuma vyakuneha peha yakulisavala. Frances ambile ngwenyi: “Ngwalizakaminyinenga chikuma likumbi lyosena nge kangwejivile okwo ali lunga lyamiko.” Mapwevo veka veji kwambanga ngwavo nge ukalu wamalunga javo vanautachikiza kuli vandumbwavo vaze vali navo hamwe, cheji kuvevwisanga sonyi. Kaha veka nawa veji kwambanga ngwavo kakweshi mutu avazakamako mwomwo yakushinganyeka ngwavo ukalu wavo nowo nautachikiza wauchi.

Kachapwa chakuhenga kushinganyeka ngochoko. Oloze kushinganyeka chikuma havyuma kana nachimihombesa chikuma. Chipwe ngocho, esekenu kushinganyeka hausoko wenu naYehova. Kulinga ngocho nachimikafwa mupwenga vakumika.—Samu 62:2; Efwe. 6:10.

MuMbimbiliya mwatwama mijimbu yahanjika hamapwevo vahombele vaze vavendejekele kuli Yehova mwomwo yakulomba kuli ikiye. Shikaho kutanga mijimbu kana nakushinganyekangaho chinahase kumikafwa. Shimbu jimwe Yehova kakumishilenga ukalu wavava mapwevoko, oloze avakafwile vaunde muchima. Chakutalilaho, Hana “alyonyingile chikuma mumuchima” mwomwo yaukalu amwenenga. Oloze omu “atwalileho lika kulomba kumeso aYehova,” aunjile muchima numba tuhu katachikijile omu navipwa vyumako.—Samwe. 1, 1:10, 12, 18; Koli. 2, 1:3, 4.

Lwezenu vakulwane muchikungulwilo vamikafwe. Vapwa “nge chihela chakuswama peho yanyamanganda, nge uswamo wakuswama vula yamishilinjinji.” (Isa. 32:2) Vanahase kuvuluka ndumbwetu wapwevo uze munahase kushimutwila nenyi kwaukawenu nakumikolezeza.—Vishi. 17:17.

Kutala munahase kukafwa lunga lyenu ahonese tato yakutalanga vyuma vyakuneha peha yakulisavala tahi? Pamo munahase kumukafwa. Mbimbiliya yahanjika ngwayo “vavali vanawahe kuhambakana mutu umwe,” kaha mazu kana vawahanjika kutalisa kukukumisa  ukalu chipwe kukufungulula muka-kole. (Kwambu. 4:9-12) Vatu vaze valinangula chikuma hachihande chakutala vyuma vyakuneha peha yakulisavala vamba ngwavo nge valunga napwevo navazachila hamwe, kaha navafungulula tato kana nakulifwelela muulo wavo.

Chipwe ngocho, hakusaka vyuma kana vitesemo, lunga lyenu atela kulisuula kuzata nangolo mangana ahonese tato yenyi. Kutala nalombo kuli Yehova amuhane ngolo jakufungulula ukalu wenyi nakulweza nawa vakulwane tahi? (Koli. 2, 4:7; Yako. 5:14, 15) Kutala ali nakushinganyekako kulinga vyuma vize navimukafwa alihende kukutalanga vyuma vyakuneha peha yakulisavala tahi? Chakutalilaho, kutala nanoneka kanawa mwakuzachishila makina enyi nakulihenda kuvyuma vize navimwingisa mucheseko chakutala vyuma kana tahi? (Vishi. 27:12) Kutala nalisuula kwitavila vyuma namumukafwa nakufwila kupwa wakushishika kuli yenu tahi? Nge mukiko, kaha munahase kumukafwa.

Mujila muka? Talenu hachakutalilaho chino. Felicia asombokele kuli Ethan uze apwilenga natato yakutalanga vyuma vyakuneha peha yakulisavala putu vene kuunyike wenyi. Felicia alingishilenga lunga lyenyi achiwane kupwa chachashi kushimutwilanga naikiye kutalisa kumuchima wakusaka kukindulukila kutato yenyi. Lunga lyenyi Ethan ambile ngwenyi: “Ngweji kuhanjikanga muchano kuli puwami namuchima wakukasunuka. Eji kungukafwanga ngulihende kuvyuma vize navingwingisa mucheseko, kaha nawa lwola lwosena eji kunguhulisanga evwenga omu vili vyuma. Eji kungukafwanga nawa ngukeheseko kuzachisa Internet.” Kuhanjika muchano, Felicia eji kupihililanga natato yalunga lyenyi yakutalanga vyuma vyakuneha peha yakulisavala. Ambile ngwenyi: “Chipwe ngocho, muchima wami wamatoto kaweshi kumukafwa alihende kutato kanako. Omu twashimutwilile haukalu wenyi, naikiye etavilile kungukafwa nguhonese muchima wami wamatoto.”

Kushimutwila mujila kana nachikafwa lunga alihende kukutala vyuma vyakuneha peha yakulisavala nakukafwa nawa pwevo afwelele cheka lunga lyenyi. Nge lunga mwapwa wakukasunuka kulweza puwenyi jitato jenyi, navyuma eji kulinganga hakumbi hakumbi nokwo ali, kaha nachipwa chachashi puwenyi kumufwelela mwomwo keshi cheka nakumuswekela vyumako.

Kutala mwafwelela ngwenu nayenu munahase kukafwa lunga lyenu mujila yoyimwe tahi? Nge mukiko, kaha munahase kutangila hamwe chihande chino nakushimutwilaho. Vyuma mwafwila lunga lyenu shina kumbila tato yakutala vyuma vyakuneha peha yakulisavala nakumilingisa nawa mumufwelele. Katela kupihilila ngwenyi muli nakusaka kuhanjika haukalu wenyiko, oloze atela kufwila kutachikiza omwo muli nakwivwa mwomwo yaukalu wenyi. Mukafwenu ambile tato yenyi nakumuhana nawa lwola lwakulinga vyuma vize navimikafwa mumufwelele cheka. Muvosena mwatela kutachikiza vyuma vyeji kulingisanga vatu vaputuke kutala vyuma vyakuneha peha yakulisavala, nomwo mutu nahase kwecha kulinga chuma kana. d

 Nge munashinganyeka ngwenu pamo enu nalunga lyenu kamweshi kushimutwila mukuundako, kaha lwezenuko mukulwane umwe muchikungulwilo uze mwafwelela mangana apwengako omu namushimutwila hachihande kana. Tachikizenu ngwenu numba tuhu muka-zuvo yenu nambili tato yakutala vyuma vyakuneha peha yakulisavala, chinahase kumbata lwola numba mumufwelele. Olozenyi, kanda kuzeyako. Lingenuko vyuma vyeka vize vinahase kuzamisa ulo wenu. Ijivenu ngwenu nge muvosena muli namuchima wakutalilila chikoki, kaha mukuhita chalwola ulo wenu nauzama cheka.—Kwambu. 7:8; Koli. 1, 13:4.

Uno nge lunga lyenu mwakindulukila kutato yenyi, chili nakulumbununa nge kapihililile nakwalumukako kaha nawa keshi kukechako tahi? Nduma. Nge tato kana yinamushimbula, kaha nahase kulipika nayo mukuyoya chenyi. Mutu nahase kukindulukila kuchuma numba tuhu munahichi myaka kufuma haze echele. Shikaho, atela kutwalaho lika kukilikita numba tuhu nachisoloka nge ukalu kana unakumu. (Vishi. 28:14; Mateu 5:29; Koli. 1, 10:12) Atela kulilingisa kupwa wamuhya ‘muvishinganyeka vyamumuchima wenyi’ nakulinangula ‘kuhunga vyuma vyavipi,’ kuhakilako vene navyuma vyakuneha peha yakulisavala navilinga vyeka vyamajilo vyakufwana nge kulisokota kuusonyi. (Efwe. 4:23; Samu 97:10; Loma 12:9) Kutala nalisuula kulinga ngocho tahi? Nge mukiko, kaha mukuhita chalwola nahase kukambila tato kana. e

Uno namwivwa ngachilihi nge muka-zuvo yenu keshi nakusaka kwecha tato yenyiko? Munahase kwivwa kupihya nakushinganyeka ngwenu vanamisaula. Mbilenu kulizakamina chenu hali Yehova amikafwe muunde muchima. (Petu. 1, 5:7) Pandamenu lika kuli Yehova hakulinangulanga, nakulombanga nakushinganyekanga havyuma munalinangula. Ngocho, naikiye mwapandama kuli enu. Mukanda waIsaya 57:15 wahanjika ngwawo, eji kutwamanga “navaze vanayanjiwa, vaze vanahombo,” mangana avakafwe vapwenga cheka vakuwahilila. Kilikitenu mupwenga vaka-Kulishitu vamwenemwene. Lwezenu vakulwane vamikafwe. Kaha fwelelenu ngwenu kulutwe lunga lyenu mwakalumuka.—Loma 2:4; Petu. 2, 3:9.