1. Mwomwo ika mweji kusakwililanga vatu vaze vatwama namuchima wakutalilila chikoki?

 TUVOSENA twazanga vatu vaze vatwama namuchima wakutalilila chikoki. Mwomwo ika? Twavumbika vatu vaze veji kuvandaminanga chakuzeneka kusulakana. Kaha tweji kusakwililanga vatu hakututalilila chikoki nge tunalimbenje. Tweji kusakwililanga nawa mutu uze atunangwile Mbimbiliya omu atutalililenga chikoki halwola chatukaluhwililenga kulinangula vyuma yanangula Mbimbiliya nakuvitavila chipwe kuvikavangiza. Chachinenenyi, tweji kusakwililanga Yehova hakututalilila chikoki.—Loma 2:4.

2. Vyuma muka vize vinahase kulingisa chitukaluhwile kupwa namuchima wakutalilila chikoki?

² Numba tuhu twavumbika vatu vaze vatwama namuchima wakutalilila chikoki, oloze chinahase kutukaluhwila kupwa namuchima kana. Chakutalilaho, chinahase kutukaluhwila kuunda muchima nge tuli nakutambukisa minyau mumukwakwa muze muli jiminyau jajivulu, chikumanyi nge tunachelewa. Kaha nawa tunahase kupihilila nge vakwetu vanatulingi mwamupi. Lwola lumwe nawa chinahase kutukaluhwila kuvandamina kaye kakahya kaze atushika Yehova. Uno muli nakufwila kusolola chikuma muchima wakutalilila chikoki tahi? Muchihande chino natushimutwila omwo chalumbunukila kupwa namuchima wakutalilila chikoki novyo chapwila chachilemu kupwa namuchima kana. Natushimutwila nawa havyuma vinahase kutukafwa tusolole chikuma muchima wakutalilila chikoki.

3. Uno mutu ukwechi muchima wakutalilila chikoki eji kulinganga ngachilihi nge vanamulingi mwamupi?

³ Talenu jijila jiwana jize tunahase kusolwelamo muchima wakutalilila chikoki. Chatete, mutu ukwechi muchima wakutalilila chikoki  eji kushipwokelanga kukwata utenu. Eji kufwilanga kuundanga muchima nakulihenda kukulinga sambanjinga nge vanamusangumuna chipwe nge ali muukalu. Hanjikiso yakwamba ngwavo “kushipwokela kukwata utenu” yasoloka chatete muMbimbiliya haze Yehova vamuvuluka ngwavo “Kalunga wakeke nakutetela, wakushipwokela kukwata utenu, wazangi yakwilila, wamuchano.”—Kulo. 34:6.

4. Uno mutu ukwechi muchima wakutalilila chikoki eji kulinganga ngachilihi nge ali nakuvandamina chuma?

⁴ Chamuchivali, mutu ukwechi muchima wakutalilila chikoki eji kuvandaminanga namuchima wakuunda. Kapihililako numba nge chuma apwanga nakuvandamina kachalingiwile mulwolako. (Mateu 18:26, 27) Kuli vyuma vyavivulu vize twasakiwa kuvandamina namuchima wakuunda. Chakutalilaho, twatela kutalililanga chikoki nge mukwetu ali nakuhanjika, chakuzeneka kumuvatwijiza. (Yopa 36:2) Twasakiwa nawa kutalilila chikoki nge tuli nakukafwa chilongesa chetu evwishise vyuma vimwe yanangula Mbimbiliya chipwe kumbila tato yenyi.

5. Jila muka yikwavo yakusolwelamo muchima wakutalilila chikoki?

⁵ Chamuchitatu, mutu ukwechi muchima wakutalilila chikoki kalusuka kulinga vyumako. Chipwe ngocho vyuma vimwe vyasakiwa kuvizata muwashi. Oloze, mutu wamuchima wakutalilila chikoki nge kuli chuma chimwe chachilemu ali nakusaka kutesamo, keshi kulusuka kuchizata chipwe kufwila kuchizata washiwashiko. Eji kunonekanga lwola lwakutamo mangana ahunanane kanawa hachuma atela kulinga. Kufumaho eji kuchizatanga kweseka nalwola nanoneka.

6. Uno mutu wamuchima wakutalilila chikoki eji kulinganga ngachilihi nge ali nakumona vyeseko?

⁶ Chamuchiwana, mutu ukwechi muchima wakutalilila chikoki eji kumikanga muvyeseko chakuzeneka kuyayavala. Shikaho muchima wakutalilila chikoki watambukila hamwe nalukakachila. Chipwe ngocho, kachapwa chakuhenga kulweza sepa lyove omwo uli nakwivwa haukalu uli nakumonako. Oloze mutu wamuchima wakutalilila chikoki eji kutwalangaho lika kukakachila chakuzeneka kuhomba. (Kolo. 1:11) Omwo mukiko  twatela kupwa etu vaka-Kulishitu. Mwomwo ika? Tutalenu vyuma vimwe vyatela kutulingisa tusololenga muchima wakutalilila chikoki.

7. Kweseka naWaYakova 5:7, 8, mwomwo ika muchima wakutalilila chikoki wapwila waulemu? (Talenu nawa muvwimbimbi.)

⁷ Kuyovoka chetu chapendamina hakupwa namuchima wakutalilila chikoki. Twatela kuvandamina Kalunga namuchima wakutalilila chikoki, mangana atesemo jishiko jenyi, ngana muze valingile vangamba jenyi vakushishika vakushikulu. (Hepe. 6:11, 12) Mbimbiliya yafwanyisa yetu vaka-Kulishitu kuli njimi. (Tangenu WaYakova 5:7, 8.) Numba tuhu njimi eji kukilikitanga hakutumba nakutukumwina mbuto jenyi, oloze katachikiza lwola luvene najikasokako. Chipwe ngocho, eji kutalililanga chikoki nakufwelela ngwenyi mwakaha. Nayetu tweji kutwalangaho lika kuzata milimo yakushipilitu, numba tuhu “[katwatachikijile] likumbi mweza Mwata [wetuko].” (Mateu 24:42) Tweji kuvandaminanga namuchima wakutalilila chikoki nakufwelela ngwetu Yehova mwakatesamo vyuma vyosena atushika halwola lwakutamo. Shikaho nge katweshi kupwa namuchima wakutalilila chikokiko, kaha tunahase kuzeya kuvandamina nakuputuka kusosoloka kumuchano. Kaha nawa tunahase kuputuka kufwila vyuma vize navitusuulwisa hakashimbu kakandende. Oloze nge natupwa namuchima wakutalilila chikoki, kaha tunahase kukakachila palanga nakusongo nakukatulwila.—Mika 7:7; Mateu 24:13.

8. Uno muchima wakutalilila chikoki nautukafwa ngachilihi hakutwamanga navakwetu? (Wavaka-Kolose 3:12, 13)

⁸ Muchima wakutalilila chikoki weji kutukafwanga tutwame kanawa navakwetu. Weji kutukafwanga twivwililenga kanawa nge vakwetu vali nakuhanjika. (Yako. 1:19) Weji kutukafwanga nawa tutwame mukuunda navakwetu. Kaha nge tunahombo, muchima kana weji kutukafwanga tuzeneke kulusuka kukumbulula nakuhanjika vyuma vize navivwisa vakwetu kumuchima kupihya. Kaha nawa nge tuli namuchima wakutalilila chikoki, katweshi kupihililanga washiko, nge mukwetu natulingi mwamupi. Katweshi kulinganga sambanjingako, oloze ‘natwitavilanga lika tutenga twavakwetu, nakulikonekelanga namuchima wakusuuluka.’—Tangenu Wavaka-Kolose 3:12, 13.

9. Uno muchima wakutalilila chikoki weji kutukafwanga ngachilihi nge tuli nakusaka kusakula vyakulinga? (Vishimo 21:5)

⁹ Kutalilila chikoki nachitukafwa nawa tusakulenga kanawa vyakulinga. Katweshi kulusukanga kusakula vyumako, oloze natuvangilanga kuhehwojola nakupezalisa kanawa vyuma. (Tangenu Vishimo 21:5.) Chakutalilaho, nge tuli nakutonda milimo, tunahase kufwila kwingila kala mulimo naulivanga kusoloka, numba tuhu mulimo kana nautuhonesa kulemesa Yehova. Oloze nge tuli namuchima wakutalilila chikoki, natuvangila kutwama hamavu, nakushinganyeka kwakuzachila mulimo kana, nakuvula chajola jakuuzata, nomwo unahase kuneha ukalu mutanga yetu nahausepa wetu naYehova. Nge natupwanga namuchima wakutalilila chikoki, kaha katweshi kusakulanga vyuma vyakuhengako.

10. Chuma muka nachikafwa muka-Kulishitu apwenga namuchima wakutalilila chikoki nakutwala kupwa nawo?

¹⁰ Lombenu Kalunga amikafwe musolole chikuma muchima wakutalilila chikoki. Muchima wakutalilila chikoki wapwa muhako washipilitu. (Ngale. 5:22, 23) Shikaho tunahase kulomba Yehova atuhane shipilitu yenyi nakutukafwa tupwenga namihako yayo. Nge tuli mucheseko chakusaka kulinga vyuma mukulusuka, twatela ‘kulombanga lika’ Kalunga atuhane shipilitu yajila yitukafwe tupwenga namuchima wakutalilila chikoki. (Luka 11:9, 13) Tunahase nawa kulomba Yehova atukafwe tumonenga vyuma ngana muze avimona ikiye. Kaha nge tunalombo lyehi, twatela kuzata nangolo tusololenga muchima wakutalilila  chikoki hakumbi hakumbi. Nge natulombanga chikuma nakukilikita tupwenga vaka-kutalilila chikoki, kaha nachipwa jino chachashi kusolola muchima kana mwomwo unazame muli etu.

11-12. Uno Yehova nasololanga ngachilihi muchima wakutalilila chikoki?

¹¹ Shinganyekenunga havyakutalilaho vyamuMbimbiliya. MuMbimbiliya mwatwama vyakutalilaho vyavivulu vyavatu vaze vapwile namuchima wakutalilila chikoki. Nge natuhunanananga havyakutalilaho kana, kaha natuwana jijila jakusolwelamo muchima wakutalilila chikoki. Shimbu kanda tushimutwile havyakutalilaho vimwe, tuvangilenu kutala hachakutalilaho chakulipwila chamuchima waYehova wakutalilila chikoki.

¹² Satana apihishile lijina lyaYehova mumilemba yaEtene nakulingisa Eve ashinganyeke ngwenyi Yehova apwa Muka-kuyula wamukalu muchima, wakuhona zangi. Muchishishisa chakutomesa lijina lyenyi hahaze vene, Yehova asolwele muchima wakutalilila chikoki nawakulikanyisa, hakutachikiza ngwenyi chasakiwile lwola numba asolole ngwenyi chiyulo chenyi chikiko kaha chakwoloka. Kaha shimbu ali nakuvandamina lwola lwakutamo, lijina lyenyi vachili lika nakulisaula. Kaha nawa Yehova natalililanga chikoki mangana vatu vavavulu vapwenga nalisesa lyakusakula kuyoya chahaya myaka. (Petu. 2, 3:9, 15) Echi chinalingisa jimiliyoni javatu vamutachikize. Nge natushishikanga hakuwaha chamuchima waYehova wakutalilila chikoki, kaha chinahase kutwashiwila kuvandamina lwola atongola lwakunongesa kano kaye.

13. Uno Yesu alondezezele ngachilihi kanawa muchima waIse wakutalilila chikoki? (Talenu nawa muvwimbimbi.)

¹³ Yesu eji kulondezezanga Ise mujila yakukupuka hakusolola muchima wakutalilila chikoki, kaha mukiko alingilenga nomu apwile hano hamavu. Kachapwilenga chachashi kusolola muchima kana lwola lwosenako, chikumanyi kuusolola kuli vaka-kusoneka navaFwaliseu  vaze vapwile vaka-kulyonga. (Yowa. 8:25-27) Oloze ashipwokelenga kukwata matoto ngana muze apwa Ise. Kalingilenga sambanjingako omu vamutukanyinenga chipwe kumwivwisa kupihya. (Petu. 1, 2:23) Yesu omikilenga muvyeseko chakuzeneka kuyayavala. Echi chikiko Mbimbiliya yatulwezela ‘tushinganyekenga chikuma mutu uze omikile hamazu autenu avaka-shili.’ (Hepe. 12:2, 3) Yehova mwatukafwa nayetu tumike mukala vyeseko navituwana.

14. Chishina muka natulinangula kumuchima waApalahama wakutalilila chikoki? (WavaHepeleu 6:15) (Talenu nawa muvwimbimbi.)

¹⁴ Etu vamwe tunavandaminanga kukuma chakaye halwola lwalusuku. Ngocho tunahase kulizakamina ngwetu pamo natufwa chakuzeneka kumona kukuma chakaye. Chuma muka nachitukafwa tutwaleho kuvandamina namuchima wakutalilila chikoki. Tutalenu hachakutalilaho chaApalahama. Omu Apalahama apwile namyaka yakusemuka 75 chakuzeneka mwana, Yehova amufwelelesele ngwenyi: “Nangukakulingisa kupwa umuyachi waunene.” (Kupu. 12:1-4) Uno Apalahama amwene omu lwateselemo lushiko kana tahi? Amweneko maputukilo kaha. Hanyima yakuzauka Kalwiji Yufwalate, hahichile myaka 25, kaha Apalahama amwene mwanenyi Isaka uze asemukile mukukomwesa. Hahichile nawa myaka 60 numba vazukulu jenyi vaEsau naYakova vasemuke. (Tangenu WavaHepeleu 6:15.) Oloze kamwene omu vaka-tanga yenyi vejile nakupwa muyachi waunene nakuswana Lifuchi lyaLushikoko. Chipwe ngocho, ou lunga wakushishika alivwishilenga kuwaha usoko wakukola naTengi yenyi. (Yako. 2:23) Kaha omu Apalahama mwakasanguka, mwakawahilila chikuma kumulweza ngwavo lufwelelo lwenyi namuchima wenyi wakutalilila chikoki vyalingishile vaka-mafuchi vosena vavakisule. (Kupu. 22:18) Chishina muka natulinangulako? Nayetu pamo katweshi kumona kutesamo chavyuma vyosena atushika Yehova hahaze veneko.  Oloze nge natupwa namuchima wakutalilila chikoki ngana mwaApalahama, kaha natukunyuka ngwetu mwatufweta oholyapwa nakukatukisula chikuma mukaye kenyi kakahya.—Mako 10:29, 30.

15. Vyuma muka tunahase kulinangula hachilongesa chetu chauka?

¹⁵ MuMbimbiliya mwatwama vyakutalilaho vyavivulu vyavatu vaze vapwile namuchima wakutalilila chikoki. (Yako. 5:10) Nachiwaha nge namunoneka lwola lwakulinangula vyakutalilaho kana. b Chakutalilaho, numba tuhu Ndavichi vamuwavishile omu apwile kanyike mangana akapwe mwangana wavaIsalele, oloze atelelele kuvandamina hamyaka yayivulu numba vamuswanyise. Kaha nawa Shimeyone naAna valemeselenga Yehova nakashishi oku vali nakuvandamina Meshiya uze vashikile. (Luka 2:25, 36-38) Omu namulinangula mijimbu kana, fwilenu kuwana mwakukumbulwila vihula vino: Vyuma muka vyakafwile ou mutu asolole muchima wakutalilila chikoki? Uno muchima kana wamunganyalishile ngachilihi? Mujijila muka nangumulondezezelamo? Munahase kunganyala nawa nge namulinangula havatu vaze kavapwile namuchima wakutalilila chikokiko. (Samwe. 1, 13:8-14) Munahase kulihulisa ngwenu: ‘Vyuma muka vize pamo vyavahonesele kupwa namuchima wakutalilila chikoki? Kaha ukalu muka vamwene?’

16. Nganyo muka yatwama hakupwa namuchima wakutalilila chikoki?

¹⁶ Shinganyekenu hanganyo yakupwa namuchima wakutalilila chikoki. Nge tuli namuchima wakutalilila chikoki, kaha natupwa vakuwahilila nakuunda. Shikaho, muchima kana nautukafwa tupwenga vakulikangula kumujimba namuvishinganyeka. Nautukafwa nawa tutwamenga kanawa navakwetu. Chikungulwilo nachipwa chakulinunga chikuma. Nge katweshi kukwata washi matotoko mwomwo yakutwivwisa kupihya kuli vakwetu, kaha katweshi kutohwesa chihandeko. (Samu 37:8, kwinyikila; Vishi. 14:29) Chachilemunyi, muchima wakutalilila chikoki nautukafwa tulondezeze Setu wamwilu nakupandama chikuma kuli ikiye.

17. Chuma muka twatela kufwila kulinga?

¹⁷ Chikupu vene, muchima wakutalilila chikoki himuchima wamwaza uze weji kutunganyalisanga. Numba tuhu kachapwa chachashi kuusololanga lwola lwosenako, oloze Yehova mwatukafwa tutwaleho kupwa nawo. Kaha shimbu tuli nakuvandamina kaye kakahya, twatela kufwelela ngwetu “meso aYehova eji kutalanga vaze vamwivwa woma, vaze vavandamina zangi yenyi yakwilila.” (Samu 33:18) Shikaho, tufwilenu kutwalaho kuvwala muchima wakutalilila chikoki.