▪ Muchihande kana twalinangwile nge kwatwama chihande chimwe chachilemu chize chakwata hali vatu vosena navangelo. Chihande kana shina kujilika lijina lyaYehova lyalinene. Chihande chawata waYehova nachihande chakuvuluka kulonga chavatu vyapandama kukujilika lijina lyaYehova.

Mwomwo ika makumbi ano tuli nakushindakanyina chikuma hachihande chalijina lyaYehova nakulijilika? Tukekesenu havyuma vitatu vyatulingisa tulinge ngocho.

Chatete, Satana afumbukilile lijina lyaYehova chipwe ngwetu puho yenyi, mumilemba yaEtene. Chihula chakuleleveka chize Satana ahulishile Eve chasolwele nge apwile nakwamba ngwenyi, Yehova apwa Kalunga walifwi uze eji kuhananga vatu jenyi jishimbi jajikalu kukavangiza. Kufumaho, Satana ahingikile mazu ahanjikile Yehova nakusolola nge ambile ngwenyi Kalunga apwa muka-kwonga. Shikaho apihishile lijina lyaYehova. Kaha apwile jino “Liyavolo” kulumbununa “muka-lusongi.” (Yowa. 8:44) Eve alikangile kuli Kalunga nakuwata wenyi hakwivwilila makuli aSatana. (Kupu. 3:1-6) Kufuma vene haze, Satana napihisanga lika lijina lyaKalunga hakutandakanyisa makuli. Chapwa chachashi kuli vaze veji kwivwililanga kumakuli kana kulikanga kuli Yehova. Shikaho vatu jaKalunga vamona kupihisa lijina lyaYehova lyajila kupwa hichuma chachipi. Echi chikiko chaneha kuyanda chosena navilinga vyosena vyavipi muno mukaye.

Chamuchivali, Yehova afwila kuhakwila lijina lyenyi nakulitomesa mangana anganyalise vyuma vyakutenga vyosena. Chuma kana chapwa chachilemu kuli Yehova. Ambile ngwenyi: “Nangujilika lijina lyami lyalinene.” (Ezeke. 36:23) Kaha nawa Yesu asolwele hatoma chuma chatela kupwa chachilemu mukulomba chavangamba jaYehova vakushishika vosena, hakwamba ngwenyi: “Lijina lyove lipwenga lyajila.” (Mateu 6:9) Mbimbiliya yashindakanya mapapa kakavulu hakulema chakutohwesa lijina lyaYehova. Achitalenu havyakutalilaho vino: “Mutohwesenu Yehova mwomwo yalijina lyenyi.” (Miji. 1, 16:29; Samu 96:8) “Imbenu myaso yakwalisa lijina lyenyi lyaupahu.” (Samu 66:2) “Nangutohwesanga lijina lyove haya myaka yosena.” (Samu 86:12) Yehova ahanjikilenga mapapa kakavulu kufuma mwilu, kaha lwola lumwe shina omu Yesu apwile mutembele muYelusalema omu ahanjikile ngwenyi: “Ove Tata, tohwesa lijina lyove.” Kaha Yehova amukumbulwile ngwenyi: “Lijina lyami ngwalitohwesa lyehi, kaha nangulitohwesa cheka nawa.”—Yowa. 12:28. a

Chamuchitatu, vyuma ajina Yehova navipwanga kaha vyakupandama kulijina lyenyi chipwe ngwetu puho yenyi. Chakutalilaho, chuma muka nachikakavangiza hacheseko chamakumishilo chize nachikeza hakukuma chaChiyulo chaKulishitu chaMyaka 1,000? Kutala vatu navangelo navakatwalaho lika kuhuhwasana chihande chakujilika lijina  lyaYehova tahi? Hakusaka tukumbulule chihula kana, twanukenu vihande vivali vyakulifwana. Vihande kana shina kulonga chavatu nawata waYehova. Halwola kana vatu kaveshi kukasakiwa kusolola kulonga chavoko, mwomwo navakapwa vakukupuka vakweseka lyehi. Navakapwa nakuyoya chahaya myaka. Kaha nawa halwola kana vatu kaveshi kukasakiwa kusolola nge chiyulo chaYehova chikiko chakwoloka nyi chiku, mwomwo vatu navangelo vosena navakalinunga hamwe nakwitavila chiyulo chaYehova. Nyi ngachilihi lijina lyaYehova?

Halwola kana vatu vosena nakuvatachikiza muchano kutalisa hali Yehova, kaha lijina lyenyi navakalijilika chikupu. Chipwe ngocho, lijina lyaYehova nalikapwanga lika lyalilemu kuli vangamba jenyi vosena vamwilu nahamavu. Mwomwo ika? Mwomwo navakamona omu Yehova mwakatwalaho lika kulinga vyuma vyakukomwesa. Chakutalilaho, Yesu mwakakindulwisa chiyulo kuli Yehova, kaha Kalunga mwakapwa “vyuma vyosena kuli vosena.” (Koli. 1, 15:28) Kufumaho, vatu hamavu navakawahilila kupwa “mukulihehwa chaupahu chavana vaKalunga.” (Loma 8:21) Kaha nawa Yehova mwakatesamo vyuma ajinyine vyakulingisa vyuma vyosena vyamwilu nahamavu kupwa mutanga yimwe yakulinunga.—Efwe. 1:10.

Uno tanga yaYehova mwilu nahamavu nayikevwa ngachilihi hanyima yavyuma vyosena evi? Chikupu vene, natukatwalaho lika kupwa namuchima wakufwila kwalisa lijina lyaYehova. Muka-kwimba jisamu Ndavichi asonekele ngwenyi: “Vamwalisenga Yehova Kalunga . . . Lijina lyenyi lyaupahu valyalisenga haya myaka yosena.” (Samu 72:18, 19) Natukatwalaho lika kuwananga vyuma vyatela kutulingisa tulingenga ngocho.

Lijina lyaYehova lyemanyinako vyuma vyosena vyakutalisa kuli ikiye. Chachinenenyi, lyeji kutwanukisanga zangi yenyi. (Yowa. 1, 4:8) Lwola lwosena natwanukanga ngwetu Yehova atutengele mwomwo atuzanga, kaha nawa atuhana ndando yakutusokola mwomwo atuzanga, asolola nawa chiyulo chakwoloka muzangi. Natutwalangaho lika kumona omu Yehova mwatusolwelanga zangi yenyi haya myaka. Kaha nawa natutwalangaho lika kupandama kuli ikiye hakupwa Setu nakwalisanga lijina lyenyi lyaupahu haya myaka.—Samu 73:28.