1, 2. (a) Zangi nalufwelelo vyatambukila ngachilihi hamwe? (b) Vyuma muka natushimutwila?

MBIMBILIYA yamba ngwayo twazanga Yehova mwomwo “ikiye alivangile kutuzanga etu.” (Yowa. 1, 4:19) Yehova eji kukisulanga vangamba jenyi vakushishika mwomwo avazanga. Kachi nge natuzanga Kalunga kaha lufwelelo lwetu muli ikiye naluzama, hakutachikiza ngwetu eji kufwetanga vosena vaze vamuzanga.—Tangenu WavaHepeleu 11:6.

² Yehova apwa muka-kufweta vosena vaze vamusaka. Lufwelelo lwetu naluzama kachi nge natwijiva ngwetu Kalunga apwa muka-kufweta vaze veji kumutondanga, mwomwo “lufwelelo lwapwa kuvandamina namuchima wakukunyuka vyuma vize twatalilila.” (Hepe. 11:1) Enga, kushinganyeka havyuma atushika Kalunga nachizamisa lufwelelo lwetu. Uno nachipwa ngachilihi ngocho? Yehova nakisula ngachilihi vangamba jenyi kunyima namakumbi ano? Tushimutwilenu havyuma kana.

3. Vyuma muka vatushika vize vyatwama hali Malaki 3:10?

³ Yehova Kalunga alihana kufweta vangamba jenyi vakushishika,  kaha atulweza tulisuule nakulihana kuli ikiye mangana atukisule. Tweji kutanga muMbimbiliya ngwavo: “‘Ngwesekenu, . . . mumone numba nge kangweshi kumisokolwela vikolo vyamwilu nakumihingunwina jikisu palanga nomu namuhona mwakujitambwila.’ Omu mukiko mwanambe Yehova wamayongomena.” (Mala. 3:10) Nge natukavangiza awa mazu atulweza Yehova, kaha natusolola ngwetu twasakwilila havyuma atulingila.

4. Mwomwo ika twatela kufwelela mazu aYesu ahali Mateu 6:33?

⁴ Yesu afwelelesele tumbaji twenyi ngwenyi nge navahaka mulimo waWangana kulutwe, kaha Kalunga mwavakafwa. (Tangenu Mateu 6:33.) Yesu afwelelesele tumbaji twenyi vyuma kana, mwomwo ejivile ngwenyi Yehova eji kutesangamo vyuma eji kuhanjikanga. Atachikijile ngwenyi jishiko jaKalunga jeji kutesangamo lwola lwosena. (Isa. 55:11) Nayetu twamona ngwetu nge natufwelela chikuma Yehova kaha mwatesamo mazu enyi akwamba ngwenyi: “Kangweshi kukakusezako, kangweshi kukakumbilako.” (Hepe. 13:5) Mazu kana alifwana nawaze ahanjikile Yesu akwamba ngwenyi, twatela kutonda lika chatete Wangana nakwoloka chaKalunga.

5. Mazu ahanjikile Yesu kuli Petulu nawatukolezeza ngachilihi?

⁵ Likumbi limwe kaposetolo Petulu ahulishile Yesu ngwenyi: “Etu tunaseze vyuma vyosena nakukukavangiza, vyuma muka natukawanyinaho?” (Mateu 19:27) Yesu katenukilile Petulu hakumuhulisako, oloze alwezele tumbaji twenyi vosena ngwenyi navakavakisula hakulisuula chavo, kaha vakiko  navakwavo veka navakayula mwilu nge navapwa lika vakushishika. Oloze noholyapwa vali nakunganyala. Yesu ambile ngwenyi: “Weshowo naseze jizuvo, chipwe vandumbwenyi vamalunga, chipwe vamapwevo, chipwe ise, chipwe naye, chipwe vana, chipwe mande mwomwo yalijina lyami, mwakatambula vyuma vyavivulu chikuma, kaha mwakaswana nawa kuyoya chahaya myaka yosena.” (Mateu 19:29) Tumbaji twenyi vali nakunganyala mwamunene hakulisuula chavo. Tunawane tanga yayinene yakushipilitu, kaha tuli navisemi, navasongo jetu, navayaya jetu, navana vaze tunawane mwomwo yakulisuula nakuhaka Wangana kulutwe.

6. Mwomwo ika Yehova ashika kukafweto vangamba jenyi?

⁶ Fweto yize Yehova ashika vaka-kumulemesa yeji kujikijisa lufwelelo lwavo nge vali muvyeseko. Vangamba jaYehova Kalunga vali nakulivwisa kuwaha vyuma ali nakuvakisula oholyapwa, kaha nawa vali nakutalilila vyuma vyamwaza mwakavalingila kulutwe. (Chimo. 1, 4:8) Enga, nge natufwelela chikupu ngwetu Yehova “apwa muka-kufweta vaze vali nakumutondatonda chikuma” kaha natupwa vakuzama mulufwelelo.—Hepe. 11:6.

7. Lufwelelo lwapwa ngachilihi nge chikungo chakwimikisa wato?

⁷ Omu Yesu ahanyine Chihande ChahaPili ambile ngwenyi: “Wahililenu, lisambenu, mwomwo fweto yenu yinapu yayinene mwilu, mwomwo mukiko vene vayanjishile navapolofweto vaze valivangile kupwako shimbu kanda enu muchisemuke.” (Mateu 5:12) Numba tupwa nalutalililo lwakukayoyela mwilu chipwe mupalachise hamavu, tuvosena twatela ‘kuwahilila nakulisamba.’ (Samu 37:11; Luka 18:30) Lufwelelo lwetu “lunapu nge chikungo chawato chakwimikisa myono yetu, lunapu lwamwenemwene, lwakuzama mbe.” (Hepe. 6:17-20) Ngana muze chikungo chawato cheji kwimikanga wato nge kuli peho, nalufwelelo lwetu lunahase kutukafwa tuzame kushipilitu namuvishinganyeka vyetu. Nalutukafwa nawa tuzame mulwola lwaukalu.

8. Vyuma twatalilila vyeji kutuhana ngachilihi ngolo jakumika muukalu?

⁸ Vyuma twatalilila vyeji kutuhana ngolo jakumika muukalu tunakumonanga mukuyoya. Jishiko jaKalunga jeji kutuhizumunanga kushipilitu ngana muze maji eji kuwahisanga mujimba. Chikupu vene nge ‘natumbila chiteli chetu hali Yehova, kaha mwatuzamikisa.’ (Samu 55:22) Tunafwelela chikupu ngwetu Kalunga mwalinga “vyuma vyakuhambakana chikuma havyuma tunamulombo chipwe tunashinganyeka.” (Efwe. 3:20) Enga, Kalunga mwatulingila “vyuma vyakuhambakana chikuma.”

9. Vyuma muka twatela kulinga numba Yehova atukisule?

⁹ Twatela kufwelela Yehova nakumwononoka numba ahase kutukisula. Mose alwezele muyachi wavaIsalele ngwenyi: “Yehova mwakamikisula mulifuchi lize mwakamihana Yehova Kalunga kenu kupwa uswana wenu, kaha kuli enu kakweshi kukapwa muka-kuhutwako, chikalu kaha kumunevwilila mulizu lyaYehova Kalunga kenu nakulama jishimbi joseneji nguli nakumilweza likumbi lyalelo. Yehova Kalunga kenu mwakamikisula ngana muze namishiki.” (Lushi. 15:4-6) Kutala mwafwelela ngwenu Yehova mwamikisula nge namutwalaho kumuzachila mukashishi tahi? Mwatela kufwelela jishiko kana.

10, 11. Yehova akiswile ngachilihi Yosefwe?

¹⁰ Mijimbu yamuMbimbiliya vayisonekela kutunanguletu. Yasolola omu Kalunga akiswile  vatu jenyi vakushishika. (Loma 15:4) Chakutalilaho chimwe shina chaYosefwe. Vamufumbukilile kuli vandumbwenyi, kufumaho pwevo lyamwata wenyi muEjipitu amukashilile chihande, kaha hinavamutwala mukamenga. Uno Kalunga amumbile nyima tahi? Nduma. “Yehova apwilenga lika naYosefwe nakumusolwela zangi yakwilila . . . Yehova apwilenga lika naYosefwe, kaha Yehova alingishile vyuma vyosena alingilenga Yosefwe vifukile.” (Kupu. 39:21-23) Yosefwe atalililile kuli Kalunga mulwola luze apwile muukalu.

¹¹ Kutwala muze, Fwalo afumishile Yosefwe mukamenga nakumutongola kupwa muhato wenyi muEjipitu. (Kupu. 41:1, 37-43) Omu asemene vana vavali, “mwanenyi watwatwa amulukile lijina ngwenyi Manase, mwomwo alyambile ngwenyi, ‘Kalunga nangulingisa nguvulyame malwa ami osena, navakuzuvo yatata vosena.’ Mwanenyi wamuchivali amulukile lijina ngwenyi Efwalime, mwomwo alyambile ngwenyi, ‘Kalunga nanguhane lusemo mulifuchi ngunayanjila.’” (Kupu. 41:51, 52) Yosefwe apwile lika wakushishika kuli Kalunga, ngocho vamukiswile kupwa muka-kuyovola myono yavaIsalele navaEjipitu. Yosefwe atachikijile ngwenyi Yehova yikiye amukiswile nakumuhana fweto.—Kupu. 45:5-9.

12. Vyuma muka vyakafwile Yesu omike muvyeseko?

¹² Yesu Kulishitu nayikiye atwalileho lika kwononoka kuli Kalunga mulwola lwavyeseko, kaha vamukiswile. Vyuma muka vyamukafwile omike muvyeseko? Mazu aKalunga atulweza ngwawo: “Mwomwo yakuwahilila chize vamuvulukilile ngwavo mwakevwa kulutwe, omikile hachitondo chakuyanjishila, alumbilishile sonyi.” (Hepe. 12:2) Yesu awahililile hakujilika lijina lyaKalunga. Kaha Kalunga amwivwilile uselewa nakumukisula, nakumuhana milimo yayinene. Mbimbiliya yamba ngwayo, “natwame lyehi kuchilyo kulitanda lyaKalunga.” Yamba nawa ngwayo: “Kalunga amuzezwile nakumuhaka hachihela chahelu, kaha mulikoji lyenyi amuhanyine lijina lize lyahambakana majina eka osena.”—Fwili. 2:9.

13, 14. Yehova eji kwivwanga ngachilihi havyuma tweji kumulingilanga?

¹³ Twatela kwanuka ngwetu Yehova eji kusakwililanga chikuma milimo tweji kumuzachilanga. Atachikiza ukalu tweji kumonanga nakulizakamina chetu. Eji kutwivwilanga keke nge tuli naukalu wakufwana nge kuviza, kuhona jimbongo, naukalu weka uze unahase kuhonesa milimo yetu yakushipilitu. Twatela kufwelela ngwetu Yehova eji kukafwanga vangamba jenyi mangana vatwaleho lika kupwa vakushishika kuli ikiye.—Tangenu WavaHepeleu 6:10, 11.

¹⁴ Twatela kutachikiza nawa ngwetu tunahase kulomba kuli “muka-kwivwilila kukulomba,” nakufwelela ngwetu mwatwivwa. (Samu 65:2) “Setu muka-kutetela, kaha nawa Kalunga muka-kuvendejeka chosena” mwatukafwa kushipilitu nakumujimba kuhichila muli vandumbwetu. (Koli. 2, 1:3) Yehova eji kwivwanga kuwaha nge natutetela vakwetu. “Ou mwevwila muka-kuhutwa uselewa ali nakulevanyisa Yehova, kaha Kalunga mwakamufweta hakulinga ngocho.” (Vishi. 19:17; Mateu 6:3, 4) Shikaho nge natukafwa vakwetu vali muukalu, kaha Yehova mwamona nge tunamukongwesa. Ashika ngwenyi mwakatufweta.

15. Mwatalilila fweto muka? (Talenu muvwimbimbi wakulivanga.)

¹⁵ Vaka-Kulishitu vawavisa vavashika “muchama wakwoloka uze Mwata, muka-kuyula  wakwoloka [mwakavahana] kupwa fweto halikumbi lize.” (Chimo. 2, 4:7, 8) Kacheshi kupwa chakuhengako nge yenu mwapwa nalutalililo lweka. “Mikoko veka” vatalilila fweto yakukayoyela mupalachise hamavu. Kaha “navakalivwisa kuwaha kuunda chamwenemwene.”—Yowa. 10:16; Samu 37:11.

16. Mazu muka akutuvendejeka atwama hali WaYowano 1, 3:19, 20?

¹⁶ Shimbu jimwe tunahase kushinganyeka ngwetu katweshi nakuzata chikuma milimo yaYehovako, chipwe kuhuhwasana numba nge Yehova anakwivwila kuwaha milimo yetu. Tunahase nawa kushinganyeka ngwetu pamo katwatelemo kukatufwetako. Oloze twatela kwanuka ngwetu, “Kalunga ahambakana michima yetu, kaha atachikiza vyuma vyosena.” (Tangenu WaYowano 1, 3:19, 20.) Eji kufwetanga vosena vaze veji kumuzachilanga namuchima wavo wosena mwomwo yazangi nalufwelelo, numba vavene vashinganyeka ngwavo kaveshi nakuzata chikumako.—Mako 12:41-44.

17. Vyuma muka tuli nakulivwisa kuwaha oholyapwa?

¹⁷ Yehova ali nakukisula vatu jenyi namumakumbi ano akukuminyina atulingilo twatupi twaSatana. Anakuvazakamanga chikuma kushipilitu kuhambakana muze chapwile kunyima. (Isa. 54:13) Ngana muze ahanjikile Yesu, Yehova ali nakutukisula oholyapwa hakupwa natanga yakushipilitu yamukaye kosena. (Mako 10:29, 30) Kaha nawa veji kutukisulanga nakupwa vakuunda mumuchima, vakusuuluka nakuwahilila.—Fwili. 4:4-7.

18, 19. Vangamba jaYehova veji kwivwanga ngachilihi havyuma navakisula?

¹⁸ Vangamba jaYehova mwahita kaye kosena vamona mazu kana kupwa amuchano. Chakutalilaho, ndumbwetu Bianca wakuGermany ambile ngwenyi: “Ngweji kusakwililanga Yehova hakupwa nayami shimbu yosena nakungukafwa ngukeheseko kulizakamina. Vatu mukaye valizakamina chikuma, oloze ami ngwapwa nguwakukingiwa hakuzata naYehova. Omu ngweji kulisuulanga nakumuzachila eji kungukisulanga chikuma.”

¹⁹ Tutalenu nawa hachakutalilaho chandumbwetu Paula wakuCanada wamyaka 70 uze aviza musongo wamitanda. (spina bifida) Ambile ngwenyi: “Kuhona kutambuka kachalumbununa nge kaweshi kwambulula mujimbuko. Ngocho ngweji kuzachisanga jijila jeka jakwambulwilamo jakufwana nge kwambulwila hashinga chipwe mukutulukila. Ngwasoneka vishina vyamumikanda yetu navisoneka vize ngweji kutanganga kuswakumwe mangana vingukolezeze. Mukanda kana ngwauvuluka ngwami ‘Mukanda Wakungukafwa muKuyoya Chami.’ Kushinganyeka hajishiko jaYehova nachitukafwa tuhone kuhomba chikuma. Yehova eji kutukafwanga chamokomoko naukalu tuli nawo.” Yenu pamo kamweshi nakumona ukalu ngana uze waBianca naPaula. Oloze munahase kushinganyeka omu Yehova namikisula hamwe kaha navakwenu. Chapwa chamwaza kushinganyeka omu Yehova anakutukisula oholili, nomwo mwakatukisula kulutwe.

20. Vyuma muka natutalilila nge natutwalaho kuzachila Yehova namuchima wetu wosena?

²⁰ Tachikizenu ngwenu kulomba chenu chakufuma kumuchima nakuhanjika naKalunga nachivezu chitoma “navakamihanyinaho fweto yayinene.” Fwelelenu ngwenu ‘nge munalingi lyehi mwaya muchima waKalunga, namukatambula vyuma vanamishiki.’ (Hepe. 10:35, 36) Shikaho, tutwalenuho lika kuzamisa lufwelelo lwetu, nakuzachila Yehova namuchima wetu wosena. Mwomwo twatachikiza ngwetu Yehova ikiye mwakatufweta.—Tangenu Wavaka-Kolose 3:23, 24.