NGWAPUTUKILE kuzanga muchano wamuMbimbiliya shimbu ngwapwile ngukanyike. Mama atambwilenga mikanda yahanjika haMbimbiliya, kaha ngwayitangilenga nakuzanga chikuma mivwimbimbi yapwilemo. Tata kazangile mama angulwezenga vyuma apwile nakulinangulako. Oloze ngwapwile navihula vyavivulu, kahomu ngwahulishilenga mama angukumbulwilenga nakungunangula omu tata afuminenga hazuvo. Nayami ngwasakile jino kulihana kuli Yehova. Ngocho vangumbapachishile muBlackpool, England, mu 1943 omu ngwapwile namyaka 10.

Kufuma vene, haze ami namama twaputukile kuyanga hamwe muwande. Twazachishilenga jifwonongalafu hakujimbula mujimbu wamuMbimbiliya. Jifwonongalafu kana japwile jajilemu kafwe jikilongalamu 4.5. Achishinganyekenu kulema ngwevwile hakuzundula chisaji kana oku nguchili ngukanyike.

Omu ngwapwile namyaka 14 ngwasakile kuzata upayiniya, kaha mama angulwezele nguvangile kuhanjika nakalama wakujinguluka. Jino kalama angulwezele nguvangile  kulinangulako milimo yimwe yize nayikangukafwa kuzata kanawa upayiniya. Kahomu mukiko ngwalingile. Ngwazachile milimo yakukaye hamyaka yivali, kaha ngwahulishile cheka kalama vyakuzata upayiniya. Angulwezele ngwenyi: “Mulinga kanawa kulisonekesa.”

MuApril 1949, ami namama twalanjishile vyuma vyamuzuvo yetu nakuya kumbaka yaMiddleton, kwakamwihi naManchester, kaha twaputukile kuzata upayiniya. Omu mwahichile tukweji vawana, ngwaputukile kuzata upayiniya nandumbwetu umwe walunga. Ofesi yamutango yatulwezele tuyenga nakuzachila kuchikungulwilo cheka chachihya muIrlam. Mama azachilenga nandumbwetu weka wapwevo wamuchikungulwilo cheka.

Numba tuhu ngwapwile namyaka 17, ami nauze ndumbwetu vatuhanyine mulimo wakutwaminyina kukunguluka mwomwo vandumbwetu vamalunga kavapwile vavavuluko. Kutwala muze, vangulwezele nguyenga nakuzachila kuchikungulwilo chaBuxton chize chapwile navaka-kwambulula vavandende. Vyuma kanevi ngwahichilemo vyangunangwile kuzata kanawa milimo yakulutwe.

Mu 1951, ngwalisonekesele kuya kuShikola yaNgileyate Yakulinangula Mbimbiliya. Oloze muDecember 1952, fulumende yangulwezele kuya kumilimo yauswalale. Ngwalombele vangufumise hamukana kana mwomwo ngwapwile ngumuka-kwambulula washimbu yosena, oloze zango yakanyine kaha vangukashile hatukweji  6. Omu ngwapwile mukamenga, vangusanyikile kushikola yaNgileyate yakusokesa 22. Kaha muJuly 1953, ngwayile kuNew York nambopolo vavulukilenga ngwavo Georgic.

Omu ngwahetele kuze, ngwakungulukile navo kukunguluka chachihanda mu 1953 chakwamba ngwavo, New World Society Assembly. Kufumaho ngwanyinyine masuhwa nakuya kuSouth Lansing, New York, kuze kwapwililile shikola. Kangwapwile najimbongo jajivuluko mwomwo halwola kana hakiko ngwafumine mukamenga. Omu ngwasulukile, ngwanyinyine musacha mangana nguyenga kuSouth Lansing, oloze kangwapwile najimbongoko, kaha ngwakongwele jimbongo kuli mukwetu ngwatwamine nenyi jakufweta kusacha.

Shikola yaNgileyate yatunangwile tupwenga “vyuma vyosena kuvatu vakulisezaseza vosena” hakuzata mulimo waumishonali. (Koli. 1, 9:22) Yami, naPaul Bruun, naRaymond Leach, vatutumine kuPhilippines. Twavandaminyine hatukweji vavavulu numba jino vatuhane vitupa vyakuya navyo kumafuchi eka. Twazachishile mbopolo nakuhita kuRotterdam, kuMediterranean Sea, nakuSuez Canal, nakuIndian Ocean, nakuMalaysia, nakuHong Kong. Twatambukile makumbi 47 mumbopolo, kaha twahetele jino kuManila haNovember 19, 1954.

Twaputukile jino kulijilila navatu vakuze, nakulinangula lilimi lyavo. Tuvosena tuvatatu vatutumine muchikungulwilo chamumbaka yaQuezon muze vatu vavavulu vahanjikilenga Chingeleshi. Ngachize, twalinangwile kaha mazu amandende alilimi lyaTagalog hatukweji 6. Oloze ukalu kana wakumine omu vatuhanyine mulimo weka.

Likumbi limwe muMay 1955, omu twafumine muwande nandumbwami Leach twawanyine mukuta wamikanda muzuvo. Hakuyitanga, twawanyine nge vanatutongola kupwa tulama vakujinguluka. Ngwapwile kaha namyaka 22, oloze ou mulimo wangukafwile ngupwenga “vyuma vyosena kuvatu vakulisezaseza vosena” mujijila jeka.

Chakutalilaho, ngwahanyine chihande chatete chalikungumbuwa hembo muweluka. Ngwawanyine jino nge vatu vamuPhilippines vamwene ngwavo chihande chalikungumbuwa vatela kuchihanjikila kaha hasanga. Omu ngwatambukililenga vikungulwilo, ngwahanyinenga vihande kuvihela vyakuhemena, havisakano, kujizuvo jajinene jamunganda, kuvivaza vyakwashila ngunja, kwakukunjikila jiminyau nahamikwakwa. Likumbi limwe omu twapwile munganda yaSan Pablo ngwahonene kuhanjika chihande hachisakano mwomwo kwapwile vula yayinene chikuma, ngocho ngwalwezele vakulwane mangana ngukahanyine chihande kana muZuvo yaWangana. Kaha vakulwane vahulishile numba nge chihande kana navachivuluka ngwavo chihande chalikungumbuwa hakuwana nge vachihanjikilile muZuvo yaWangana keshi hasangako.

Twatwaminenga kujizuvo javandumbwetu. Jizuvo kana japwile jaunyoji numba tuhu japwilenga jajindende. Ngwasavalilenga hachisalo hamavu. Kakwapwilenga lilapa lyakusanyinako, ngocho ngwasanyinyinenga muweluka. Hakuya hamatungu ngwazachishilenga wato chipwe sacha. Hamyaka yosena yize ngwazachilenga, kangwapwile naminyauko.

Kutambukila vikungulwilo nakuzata mumulimo wamuwande changukafwile ngwijive lilimi lyaTagalog. Kakwapwile vatu vakungunangula lilimiko, oloze ngwevwilililenga kaha omu vandumbwami vahanjikilenga hakukunguluka namuwande. Oloze vandumbwetu vamwe vangukafwilengako hamwe nahamwe, kaha ngwavasakwilililenga hakulisuula chavo.

 Mukuhita chalwola vanguhanyine mulimo weka, kaha chasakiwile cheka kwalumunako vyuma vimwe. Mu 1956 omu Ndumbwetu Nathan Knorr atutambukilile, vanguhanyine mulimo wakutala hamijimbu yakukunguluka changalila. Kangwatachikijile kanawa mulimo kanako, oloze vandumbwami valisuwile kungukafwa. Omu mwahichile tukweji vavandende, vawahishile kukunguluka chikwavo, kaha ndumbwetu Frederick Franz atutambukilile kufuma kuchikota. Omu ngwapwile kalama wakukunguluka changalila, ngwalinangwile kumuchima wamwaza wandumbu Franz. Vandumbwetu vawahililile hakumona Ndumbwetu Franz navwale uvwalo wachisemwa chavaka-Philippines hakuhana chihande.

Ngwasakiwile kwalumunako vyuma vimwe omu vangutongwele kupwa kalama wangalila. Twatalishilenga sinima yakwamba ngwavo The Happiness of the New World Society, haweluka muvihela vyasanga. Shimbu jimwe tututu vatuyanjishilenga. Vapwilenga nakwingila muprojector hakufwila kukava kumunyika. Ngocho twapwile namulimo wakuwahisa projector nge tunakumisa kutala sinima. Numba tuhu chapwilenga chachikalu kulongesa vyuma kana, oloze twawahililile hakumona vatu navatachikiza kanawa liuka lyaYehova mukaye kosena.

Vapilishitu vamuKatolika valwezelenga tupokola vahone kutuhana lisesa lyakukunguluka chachihanda. Shimbu jimwe vembilenga ngezo yakuchachi nge tunakukunguluka  mangana vatutangule. Oloze mulimo wetu wazovolokele, kaha vatu vavavulu mungalila kana vapwa jino vaka-kulemesa Yehova.

Mu 1959, ngwatambwile mukanda wakungusanyika kuya nakuzachila kumutango. Echi changukafwile ngulinangule vyuma vyavivulu. Omu ngwapwile kuze, vangutuminenga kumafuchi eka nakuzachilako. Lwola lumwe omu ngwapwile kulifuchi lyaThailand, ngwaliwanyine naJanet Dumond uze apwile nakuzata umishonali. Twalisonekelelenga mikanda, kaha kutwala muze twalimbachile. Tunatwame jino muulo myaka 51, kaha tunalivwisa kuwaha kuzachila Yehova.

Ngunalivwisanga kuwaha kutambukila vatu jaYehova mumafuchi 33. Milimo ngwazachilenga hakavanga yinangukafwe ngupwenga namuchima wamwaza hakuzata navatu vakuvisemwa vyakulisezaseza. Kutambukila mafuchi akulisezaseza chinangukafwe ngumone omu Yehova azanga vatu vakuvisemwa vyosena.—Vili. 10:34, 35.

Ngunalivwisa kuwaha kuzachila vandumbwetu mulifuchi lyaPhilippines. Kuvula chavaka-kwambulula chinalisambula mapapa 10 kufuma haze ngwaputukile kuzachila mulifuchi kana. Ami namuka-zuvo yami Janet tuchili lika nakuzachila hamutango wamuPhilippines munganda yaQuezon. Numba tuhu ngunazachila kumafuchi eka hamyaka yakuzomboka 60, oloze nguchili lika nakulinangula vyaYehova. Vyuma vinakwalumuka muliuka vinasolola hatoma nge chapwa chamwaza kupwa namuchima wauvwovu hakuzachila Kalunga navandumbwetu.

Tunetavilanga milimo yosena yize vanatuhanenga muliuka lyaYehova, kahechi chinatusuulwisa chikuma. Kaha nawa tunalumunanga vyuma mukuyoya chetu mangana tuhase kuzachila kanawa vandumbwetu. Enga tunakufwila kulinga mwaya muchima waYehova nakufwila kupwa “vyuma vyosena kuvatu vakulisezaseza vosena.”