1, 2. (a) Mwomwo ika katwatela kulikomokelako nge natulizakamina havyuma vimwe? (Talenu muvwimbimbi wakulivanga.) (b) Vyuma muka natushimutwila muchihande chino?

TULI nakuyoyela mulwola luze vatu vanakulizakamina chikuma. Satana Liyavolo ali namatoto chikuma kaha “eji kuhitangana nge ndumba wakutahwoka, nakutondatonda weshowo mwawana amulye.” (Petu. 1, 5:8; Kuso. 12:17) Echi chikiko cheji kulingisanga nayetu vangamba jaKalunga lwola lumwe tulizakamine. Shimbu jimwe navangamba jaKalunga vakushishika kunyima vakufwana nge Mwangana Ndavichi ‘valizakaminyinenga.’ (Samu 13:2) Nakaposetolo Paulu nayikiye alizakaminyine “havikungulwilo vyosena.” (Koli. 2, 11:28) Uno vyuma muka twatela kulinga nge tunalizakamina chikuma?

² Setu wamwilu wazangi akafwilenga vangamba jenyi kunyima, kaha nahase kutukafwa nayetu nge tunalizakamina. Mbimbiliya yatukolezeza ngwayo: “Mbilenu kulizakamina chenu chosena [“ukalu wenu wosena,” kwinyikila chamwishi] hali ikiye, mwomwo amizakama.” (Petu. 1, 5:7) Uno munahase kulinga ngachilihi ngocho? Tushimutwilenu hajijila jiwana, kulomba chakufuma  kumuchima, kutanga Mazu aKalunga nakushinganyekaho, kulomba shipilitu yajila yaYehova nakulwezako mutu twafwelela ukalu tuli nawo. Omu natushimutwila hajijila kaneji, shinganyekenu vyuma mwatela kulinga mangana vimikafwe.

3. Kulomba chinahase kumikafwa ngachilihi ‘mumbile chiteli chenu hali Yehova’?

³ Chuma chatete twatela kulinga shina kulomba kuli Yehova. Nge munalizakamina mwomwo yaukalu munakumona kaha lombenu kuli Senu wamwilu. Muka-kwimba jisamu Ndavichi alombele kuli Yehova ngwenyi: “Ove Kalunga, ivwilila kukulomba chami.” Kaha ambile nawa ngwenyi: “Mbila chiteli chove hali Yehova, kaha ikiye mwakuzamikisa.” (Samu 55:1, 22) Nge munazate nangolo mangana mukumise ukalu, kaha kamwatela kulizakaminako oloze lombenu. Mujila muka kulomba chinahase kumikafwa muhone kulizakamina haukalu muli nawo?—Samu 94:18, 19.

4. Mwomwo ika chapwila chachilemu kulomba nge tunalizakamina?

⁴ Tangenu Wavaka-Fwilipi 4:6, 7. Yehova mwakumbulula kulomba chetu chakulembelela chakufuma kumuchima. Mujila muka? Mwatuhana kuunda chize nachitukafwa tuhone kulizakamina. Vatu vavavulu vanahase kwitavila mazu kana, kweseka navyuma vanahichimo. Kalunga avakafwile vapwenga nakuunda chize chahambakana kunangakana chosena. Nayenu nawa munahase kuwana kuunda kanechi. Ngocho “kuunda chaKalunga” nachifungulula kala ukalu namumona. Kaha namufwelela mazu atushika Yehova ngwenyi: “Kanda naulizakaminako, mwomwo nguKalunga kove. Nangukujikijisa, nangukukafwa.”—Isa. 41:10.

5. Mazu aKalunga anahase kutunehela ngachilihi kuunda?

⁵ Chuma chamuchivali nachitukafwa tupwenga vakuunda shina kutanga Mbimbiliya nakushinganyekaho. Mwomwo ika chapwila chachilemu? Mbimbiliya yikwechi jindongi jize jinahase kumikafwa mukeheseko kulizakamina chipwe vene kuchihonesa. Tachikizenu ngwenu Mbimbiliya yinahase kumikafwa mwomwo mwatwama mazu akufuma kuli Kalunga uze atutengele. Kushinganyeka haMazu aKalunga musana chipwe ufuku, nakumona omu munahase kuwakavangiza nachimijikijisa. Yehova afwanyishile kutanga Mazu enyi ‘kukumika nakukujikiza’ keshi ‘kukulizuzukila chipwe kwivwa womako.’—Yoshu. 1:7-9.

6. Mazu aYesu anahase kumikafwa ngachilihi?

⁶ MuMbimbiliya mwatwama mazu aYesu akutukolezeza. Kunangula chenyi namazu ahanjikilenga ahizumwinenga vaka-kumwivwilila. Mayongomena avatu ejilenga kuli ikiye mwomwo avavendejekelenga nakukolezeza vaze vakuhehela. (Tangenu Mateu 11:28-30.) Azakaminenga vakwavo kushipilitu nakumujimba. (Mako 6:30-32) Mazu ahanjikile Yesu nawatukafwa nayetu, ngana muze akafwilenga vaposetolo vaze atambukilenga navo. Kachasakiwa kupwa hamwe naYesu meso nameso numba amikafweko. Hakupwa Mwangana, Yesu achili lika nakutetela vatu. Shikaho, nge munalizakamina ‘nahase kumikafwa halwola lwakutamo.’ Eyo, Yesu nahase kumikafwa mumike muukalu nakumihana lutalililo.—Hepe. 2:17, 18; 4:16.

7. Namunganyala ngachilihi nge namulomba Kalunga amihane shipilitu yajila?

⁷ Yesu atushikile ngwenyi Setu wamwilu  mwahananga shipilitu yajila kuli vaze navamulombayo. (Luka 11:10-13) Echi chasolola nge mihako yakushipilitu yikiko chuma chamuchitatu chinahase kumikafwa mukumise kulizakamina. Evi vilinga vyeji kwizanga kuhichila mushipilitu yaKalunga, kaha navitukafwa tupwenga navilinga ngana vize vyaKalunga. (Tangenu Wavaka-Ngalesha 5:22, 23; Kolo. 3:10) Omu namufwila kupwa navilinga kana, namutwama kanawa navakwenu. Kaha kakweshi kupwa vyuma navimilingisa mulizakamineko. Tuchikekesenu omu mihako yashipilitu yinahase kumikafwa.

8-12. Uno kupwa navilinga vyashipilitu yajila yaKalunga nachimikafwa ngachilihi mulihende kukulizakamina?

⁸ “Zangi, kuwahilila, kuunda.” Nge namuhanjikanga navatu mukavumbi, kaha nachipwa chachashi kuhonesa muchima wenu waupi. Mwomwo ika? Mwomwo hakusaka kusolwela vakwenu zangi, nalikoji, nakavumbi, kamweshi kulinga vyuma vize navimilingisa mulizakamineko.—Loma 12:10.

⁹ “Kutalilila chikoki, likoji, kuwaha.” Namutwama navakwenu mukuunda nge namukavangiza mazu akwamba ngwavo: “Pwenunga valikoji kuli vakwenu, nakulivwilanga keke, nakulikonekelanga navakwenu namuchima wakusuuluka.” (Efwe. 4:32) Nge namulinganga vyuma kana, kaha namulihenda kukulinga vyuma vize vinahase kumilingisa mulizakaminenga. Namuhonesa nawa ukalu uze vanahase kuminehela vatu mwomwo yakuhona kukupuka.

¹⁰ “Lufwelelo.” Makumbi ano, tweji kulizakaminanga mwakuwanyina jimbongo navyuma vyeka vyakulikafwa navyo mukuyoya. (Vishi. 18:11) Kufwelela ngwetu Yehova mwatuzakama nachitukafwa tuhonese muchima wakulizakamina. Mujila muka? Namuhonesa kulizakamina nge namukavangisa mazu akaposetolo Paulu akwamba ngwavo, ‘suulukenu navyuma muli navyo.’ Paulu ambile nawa ngwenyi: “Mwomwo [Kalunga] nambe ngwenyi: ‘Kangweshi kukakusezako, kangweshi kukakumbilako.’ Ngocho natuhasa kumika chikuma nakwamba ngwetu: ‘Yehova ikiye muka-kungukafwa, kangweshi kwivwa womako. Mutu mwangulinga ikaze?’”—Hepe. 13:5, 6.

¹¹ “Kuvova, namuchima wakulikanyisa.” Achishinganyekenu omu munahase kunganyala hakupwa navilinga kana. Nachimikafwa mulihende kumuchima waupi uze unahase kuminehela ukalu nakulizakamina, wakufwana nge “matoto, nautenu, nakukalwomwoka, nahanjikiso yakasautu.”—Efwe. 4:31.

¹² Mwatela kulinyisa numba mwitavile ‘ngolo jaKalunga’ nakumbila “kulizakamina chenu chosena hali ikiye.” (Petu. 1, 5:6, 7) Omu namulinyisa, Yehova mwamivwila kuwaha. (Mika 6:8) Nge namutachikiza kanawa hakumina ngolo jenu navyuma munahase kulinga, kaha kamweshi kulizakaminangako mwomwo namupendamina hali Kalunga.

13. Yesu alumbunwine ika hakwamba ngwenyi: “Kanda namulizakamina[ko]”?

¹³ Hali Mateu 6:34 (tangenu), hatwama mazu aYesu akwamba ngwavo: “Kanda namulizakamina[ko].” Pamo munahase kumona ngwenu chapwa chachikalu kukavangiza mazu kana. Uno Yesu atalishile mulihi hakwamba ngwenyi: “Kanda namulizakamina[ko]”? Kapwile nakulumbununa ngwenyi vangamba jaKalunga kavalizakamina shimbu jimweko, mwomwo tunawane nge Ndavichi naPaulu navakiko valizakaminyine. Oloze Yesu apwile nakukafwa tumbaji twenyi vatachikize ngwavo kulizakamina chikuma kachakumisa  ukalu wamutuko. Likumbi hilikumbi likwechi ukalu walyo, ngocho kamwatela kukoka ukalu wakunyima nou wakulutwe nakuputuka kulizakaminawo leloko. Uno kukavangiza awa mazu atuhuhumuna Yesu nachimikafwa ngachilihi muhonese ukalu wakulizakamina?

14. Vyuma muka navimikafwa muhone kulizakamina havyuma mwalingile kunyima?

¹⁴ Kulizakamina chimwe cheji kwizanga nge mutu mwashinganyeka havyuma vyakunyima. Nahase kushinganyeka havyuma alingile kumyaka yakunyima. Lwola lumwe, Mwangana Ndavichi evwile ngwenyi, ‘jishili jenyi javulile chikuma hamutwe wenyi.’ Kaha ambile ngwenyi: “Nguli nakulikemenena mikemo mwomwo yakulyonyinga mumuchima wami.” (Samu 38:3, 4, 8, 18) Vyuma muka atelele kulinga Ndavichi? Kaha alingile ika? Afwelelele Yehova ngwenyi mwamutetela nakumukonekela. Ambile ngwenyi: “Awahilila mutu uze vanakonekela lyehi mulonga wenyi wakuzombwojoka jishimbi.”—Tangenu Samu 32:1-3, 5.

15. (a) Mwomwo ika kamwatela kulizakamina haukalu muli nawoko? (b) Mwatela kulinga ika hakusaka kukehesako kulizakamina? (Talenu lipwata “ Jijila Jimwe Jakukeheselamo Kulizakamina.”)

¹⁵ Shimbu jikwavo munahase kulizakamina haukalu muli nawo lelo. Chakutalilaho, Ndavichi apwile nakwivwa woma halwola asonekele Samu 55. (Samu 55:2-5) Oloze ketavishile kulizakamina chimuhonese kufwelela muli Yehovako. Ndavichi alwezele Yehova ukalu wenyi kuhichila mukulomba, oloze nawa alingileko vyuma vimwe mangana akumise ukalu kana. (Samwe. 2, 15:30-34) Vyuma muka namulinangula kuli Ndavichi? Muchishishisa chakutwama kaha nakushinganyeka haukalu wenu, lingenuko vyuma vimwe mangana muukumise, nakuhaka kulizakamina chenu hali Yehova.

16. Kutachikiza ulumbunwiso walijina lyaKalunga nachizamisa ngachilihi lufwelelo lwenu?

¹⁶ Kulizakamina nawa cheji kwizanga kuli muka-Kulishitu nge mwashinganyeka chikuma haukalu unahase kwiza kulutwe. Oloze kanda namulizakamina havyuma vyakulutwe vize pamo kavyeshi kukasolokako. Mwomwo ika? Mwomwo shimbu jimwe vyuma vyakulutwe vize tweji kulizakaminanga kavyeshi kusolokako. Mwatela kwanuka ngwenu, Kalunga nahase kumikafwa muukalu wenu numba utohwa ngachilihi. Mwomwo lijina lyenyi lyalumbunuka ngwavo, “Eji Kulingisanga Vyuma Kupwako.” (Kulo. 3:14) Ulumbunwiso walijina lyenyi watukolezeza tufwelele ngwetu Kalunga atamo kukafwa vangamba jenyi nge vali muukalu. Fwelelenu ngwenu Kalunga eji kukafwa vangamba jenyi vahonese ukalu wakulizakamina havyuma vyakunyima, navyalelo, navyakulutwe.

17, 18. Kushimutwila navakwenu nachimikafwa ngachilihi muhonese ukalu wakulizakamina?

¹⁷ Jila yamuchiwana munahase kukumishilamo  kulizakamina shina kulwezako mutu mwafwelela ukalu wenu. Muka-mahyenu, chipwe sepa lyenu, chipwe mukulwane muchikungulwilo nahase kumikafwa mukeheseko kulizakamina. Mbimbiliya ngwayo: “Kulizakamina chamutu nachilemuwisa muchima wenyi, oloze mazu amwaza nawahizumuna muchima wenyi.” (Vishi. 12:25) Kuhanjika hatoma ukalu wenu nachimikafwa muwane jila yakuukumishilamo. Mbimbiliya ngwayo: “Kachi nge vatu kavatwamine pungako, vyuma vanajinyi kulinga vyeji kukuminamo, oloze vyuma vyeji kutesangamo nge vaka-kulweza mangana vanavulu.”—Vishi. 15:22.

¹⁸ Yehova eji kukafwanga nawa vangamba jenyi vahonese ukalu wakulizakamina kuhichila mukukunguluka chachikungulwilo. Nge namuya kukukunguluka, namupwanga hamwe navandumbwetu vaze vafwila kumikafwa nakumikolezeza. (Hepe. 10:24, 25) “Kulikolezeza” kana nachimihizumuna kushipilitu nakumikafwa muwane jila yakuhoneselamo ukalu wakulizakamina.—Loma 1:12.

19. Mwomwo ika namufwelela ngwenu usoko wenu naKalunga naumijikijisa?

¹⁹ Mukulwane umwe muchikungulwilo chamuCanada amwene omu chalema kulweza Yehova kulizakamina chetu. Azeyelenga chikuma hakupwa mulongeshi, kaha nawa avijilenga musongo wakuwongo. Uno ou ndumbwetu ahonesele ngachilihi ukalu kana? Ambile ngwenyi: “Chuma changukafwile chikuma nguhonese ukalu wami shina kupwa nausoko wamwaza naYehova. Masepa navandumbwetu nawa veji kungukafwanga chikuma. Ngweji kulwezanga hatoma puwami vyuma ngunalizakamina. Vakwetu vakulwane muchikungulwilo nakalama wakujinguluka vangukafwile chikuma. Ngwayile kuchipatela mangana vanguhane vitumbo, nakunoneka kanawa lwola, kaha ngwawanyinengako lwola lwakuhwima nalwola lwakunyuka mujimba. Kutwala muze ngwaputukile kwivwako kanawa. Nge kuli vyuma vimwe vize ngunahono mwakulingila, kaha ngweji kuvisezanga mumavoko aYehova.”

20. (a) Tunahase kumbila ngachilihi kulizakamina chetu hali Yehova? (b) Vyuma muka natushimutwila muchihande chinakavangizaho?

²⁰ Tunashimutwila omu chalema kumbila kulizakamina chetu hali Kalunga kuhichila mukulomba, nahakutanga Mbimbiliya nakushinganyekaho. Tunashimutwila nawa omu chalema kupwa namihako yakushipilitu, nakulwezako vakwetu ukalu wetu, namwakuzamishila lufwelelo lwetu kuhichila mukukunguluka. Chihande chinakavangizaho nachishimutwila omu Yehova eji kutuzakamanga hakutuhana lutalililo.—Hepe. 11:6.