Kutala munalivwisanga kuwaha kutanga jimangazini jakalinwaha jaKaposhi Kakutalila nyi? Nge mukiko, kaha tumonenu omu namuhasa kukumbulula vihula vino vinakavangizaho:

Shili muka avulukile Yesu hakuhanjika mazu atwama hali Mateu 18:15-17?

Apwile nakuvuluka vihande vize vanahase kukumisa vatu vavali. Oloze nge chihande kana vanahono kuchikumisa, chinahase kulingisa mutu vamufumise muchikungulwilo. Chakutalilaho, shili kana shina yakufwana nge kuvangila mutu chipwe kumulyapula.—w16.05, li. 7.

Vyuma muka mwatela kulinga mangana munganyale kukutanga Mbimbiliya?

Munahase kulinga vyuma vino: Tangenu namuchima wenu wosena, nakumona omu munahase kuzachishila vishina kana. Lihulisenu ngwenu, ‘Vishina muka vili mumujimbu kana vize nanguzachisa hakukafwa vakwetu?’, kaha hehwojolenu havyuma munatange.—w16.05, li. 24-26.

Uno chapwa chakwoloka muka-Kulishitu kulishona numba tuhu afwelela mukusanguka?

Kufwelela mukusanguka kacheshi kukumisa kuviza eji kwivwanga muka-Kulishitu nge nafwisako. Apalahama alishonene omu afwile Sala. (Kupu. 23:2) Oloze mukuhita chalwola, ushona weji kukehanga.—wp16.3, li. 4.

Uze lunga apwile nachinoma chavyuma vyakusonekesa chamuka-kusoneka, navaze malunga 6 vapwile nachuma chakupuzwisa mumavoko avo vavuluka hali Ezekele kapetulu 9 vemanyinako veya?

Vemanyinako mazavu amwilu aze vazachishile hakunongesa Yelusalema aze nawa navakazachisa hakunongesa kaye kaSatana kakuhuka haAlamangetone. Makumbi ano, lunga kana emanyinako Yesu Kulishitu uze mwakafunjika vaze navakayovoka.—w16.06, li. 16-17.

Mbimbiliya yayovokele kuvyuma muka?

Yayovokele (1) kukupola, mwomwo vyuma vize vazachishile kavyapoleleko, vyakufwana nge mateve namalambu; (2) kuvatwamina vamukwitava navamapolitiki vaze vasakile kuyenyeka; (3) kuli vaka-kole vaze vasakile kuyalumuna mweka.—wp16.4, li. 4-7.

Muka-Kulishitu nahase kwashiwisa ngachilihi chiyoyelo chenyi?

Atela kutachikiza vyuma vyavilemu mukuyoya chenyi, nakuhona kulandanga vyuma chamulanjila. Atela kusoneka mwakuzachishila kanawa jimbongo jenyi. Atela kulanjisa vyuma vize keshi nakuzachisako, nakufweta mikuli. Atela kuzata milimo nayimuhana lwola, nakunoneka mwakuzachila muwande.—w16.07, li. 10.

Vyuma muka vize Mbimbiliya yavuluka kupwa vyavilemu kuhambakana ulu napalata?

Mukanda waYopa 28:12, 15 wasolola nge mangana akufuma mwilu apwa amalemu kuhambakana ulu napalata. Mwatela kupwa vakulinyisa nalufwelelo omu namusakasaka mangana kana.—w16.08, li. 18-19.

Uno chapwa chakutamo ndumbwetu makumbi ano kulama wevu tahi?

Muvisemwa vimwe, malunga vanahase kuvetavisa kulama wevu chikalu kaha vali nakuulama mujila yaunyoji, kaha nawa kacheshi kulingisa vatu vahone kwivwilila kumujimbu wamwaza waWanganako. Oloze vandumbwetu vamwe vanahase kuteula wevu. (Koli. 1, 8:9) Muvisemwa vimwe chipwe mujingalila jimwe, vamona wevu kupwa chuma chize kavatela kulama vaka-Kulishituko.—w16.09, li. 21.

Mwomwo ika twatela kufwelela ngwetu mujimbu wamuMbimbiliya waNdavichi naNgolyate wapwa wamuchano?

Ngolyate asuwile najisendimita 15 kuhambakana mutu uze vawana ngwavo wamusuku chikuma mukaye. Kaha nawa Ndavichi kwapwile chikupu, ngana muze vasolola halilolwa vavumbwile lyakushikulu haze vasonekele zuvo yaNdavichi navyuma ahanjikile Yesu. Mazu kana vawetavila nakumijimbu yikwavo yakushikulu.—wp16.5, li. 13.

Uno chinyingi, nakunangakana, namangana vyalihandununa ngachilihi?

Mutu uze atwama nachinyingi eji kutachikizanga vyuma vyavivulu. Kaha mutu wakunangakana atachikiza mwakuhandunwina vyuma kana. Oloze mutu wamangana atwama nachinyingi nakunangakana, kaha atachikiza mwakuvizachishila kanawa.—w16.10, li. 18.