1, 2. Mwomwo ika Vinjiho jaYehova vamwena chisoneka chaWavaka-Loma 5:12 kupwa chachilemu?

ACHISHINGANYEKENU munakusaka kusoneka visoneka vize vatachikiza nakuzachisa chikuma Vinjiho jaYehova. Kutala namusonekaho namukanda Wavaka-Loma 5:12 tahi? Pamo munazachisanga chikuma mazu awa akwamba ngwavo: “Nge muze shili yengilile mukaye kuhichila muli mutu umwe nakufwa nawa kuhichila mushili, ngocho kufwa chatanda kuli vatu vosena mwomwo vosena valingile shili.”

² Mazu kana vawazachisa chikuma mumukanda waUno Chikupu Mbimbiliya Yanangula Vyuma Muka? Omu namulinangula mukanda kana navana venu chipwe navatu veka, pamo namutanga mukanda Wavaka-Loma 5:12 hakushimutwila vyuma ajina Kalunga hakutenga mavu, nandando yakusokola, novyo vyeji kusolokanga kumutu nge nafu—mukapetulu 3, 5, na 6. Kutala mwashinganyekaho lyehi omu chisoneka kana chakwata hali yenu, nahavilinga vyenu, nahakuyoya chenu chakulutwe tahi?

3. Vyuma muka twatela kwanuka hakupwa tuvaka-shili?

³ Twatela kwijiva ngwetu, tuvosena twapwa tuvaka-shili. Tweji kulimbenjanga hakumbi hakumbi. Oloze twatela kwanuka ngwetu Kalunga atachikiza ngwenyi atutenga kufuma kulukungu, kaha eji  kutwivwilanga keke. (Samu 103:13, 14) Evi vikiko Yesu avulukilile mukulomba chenyi ngwenyi: “Tukonekele jishili jetu.” (Luka 11:2-4) Shikaho, kanda natwivwanga kupihya hashili twalingile kunyima yize Kalunga atukonekela lyehiko. Chipwe ngocho, tunahase kunganyala chikuma hakwanuka omu vatukonekela hashili twavulumwine.

4, 5. (a) Tunahase kwivwishisa ngachilihi ulumbunwiso wahali Wavaka-Loma 5:12? (b) Uno ‘likoji muka lyalinene’ vavuluka hali Wavaka-Loma 3:24?

⁴ Tweji kuwananga mijimbu yikwavo yayilemu mutupetulu valihata namazu akaposetolo Paulu vasoneka hali Wavaka-Loma 5:12, chikumanyi mukapetulu 6. Echi nachitukafwa twivwishise kanawa omu Yehova eji kutukonekelanga. Mukapetulu 3, vasonekamo ngwavo: “Vosena vanalingi shili . . . , kaha kwoloka chize vali nakuvavulukila chinapu chawana wakanyombo halikoji lyenyi lyalinene kuhichila mukuvasokola nandando yakusokola yaKulishitu Yesu.” (Loma 3:23, 24) Uno Paulu alumbunwine ika hakwamba ngwenyi ‘likoji lyalinene’? Azachishile lizu lyachiHelase lize lyalumbununa “kukafwa mutu hawana wakanyombo chakuzeneka kushinganyeka nge mwakakukindulwishila chipwe kukuhanako vyuma vimwe.” Chikupu vene, katweshi kuhasa kufweta Kalunga halikoji kanako.

⁵ Mutu alinangula chikuma John Parkhurst ambile ngwenyi: “Omu veji kuhanjikanga vyaKalunga chipwe Kulishitu, mazu kana veji kuwatalisanga kumuchima wakulisuula nakuhana, chipwe kukeke, chipwe kukusokola vatu kushili.” Ngocho, Mbimbiliya yaKaye Kakahya yalumbununa mwakwoloka mazu “likoji lyenyi lyalinene.” Uno Kalunga asolwele ngachilihi likoji lyenyi lyalinene? Kaha likoji kana lyakwata ngachilihi halutalililo lwenu nahausoko wenu nayikiye? Tushimutwilenu hachihande kana.

6. Vatu vanganyala ngachilihi kulikoji lyalinene lyaKalunga?

⁶ Shili nakufwa “yengilile mukaye” kuhichila muli “mutu umwe” Alama. Ngocho “kuvilinga vyakuhenga vyayauze mutu umwe, kufwa chayulile nge mwangana.” Paulu ahanjikile nawa ngwenyi “likoji lyalinene [lyaKalunga] lyalivulu” lyejile “kuhichila muli mutu umwe, Yesu Kulishitu.” (Loma 5:12, 15, 17) Likoji kana lyalingisa vatu vosena vatokwe. Vavavulu navavalingisa “kupwa vakwoloka hakwononoka chayauze mutu umwe [Yesu].” Likoji lyalinene lyaKalunga nalikalingisa vatu vakawane “kuyoya chahaya myaka yosena muli Mwata wetu Yesu Kulishitu.”—Loma 5:19, 21.

7. Mwomwo ika wana wandando yakusokola yapwila hilikoji lyalinene lyaKalunga?

⁷ Kakweshi mutu numba umwe ashinjilile Yehova mangana atume Mwanenyi kwiza hano hamavu nakutusokola kushiliko. Kweseka nashili yavatu, Kalunga naYesu kavatelele kusokola vatu nakuvakonekela shili yavoko. Shikaho hakutukonekela nakupwa nalutalililo lwakuyoya haya myaka yosena, chasolola likoji lyalinene lyaKalunga. Ngocho twatela kumona likoji lyalinene lyaKalunga kupwa lyalilemu chikuma, kaha lyatela kutulingisa tumusakwililenga mukuyoya chetu.

8. Vishinganyeka muka vyakuhenga vanahase kupwa navyo vatu vamwe hakupwa tuvaka-shili?

⁸ Hakuwana nge twafuma kuli Alama, ngocho tweji kuvulumunanga milonga nakulinga shili. Chipwe ngocho nachipwa chakuhenga kukukulula ngwetu: ‘Tunahase tuhu kuvulumuna mulonga washili mwomwo naKalunga atachikiza vene ngwenyi kala lwola tunahase kulinga shili, kaha Yehova mwatukonekela.’ Chaluvinda, omu mukiko chapwile kuli vaka-Kulishitu vamwe nahalwola kwapwile  vaposetolo. (Tangenu Yuta 4.) Numba tuhu katwapwa namuchima kanako, oloze twatela kuzangama kuchina vishinganyeka vyavipi naviputuka kuyangilila mumichima yetu.

9, 10. Paulu navakwavo vavasokwele ngachilihi kushili nakukufwa?

⁹ Paulu alumbunwine ngwenyi twatela kulihenda kuvishinganyeka vyakuvuluka ngwetu: ‘Kalunga atachikiza vilinga vyami, kaha mwangukonekela.’ Mwomwo ika twatela kulihenda kumuchima kana? Mwomwo Paulu asonekele ngwenyi, vaka-Kulishitu ‘vafwa lyehi kushili.’ (Tangenu Wavaka-Loma 6:1, 2.) Mwomwo ika natwambila ngwetu vaka-Kulishitu ‘vafwa lyehi kushili’ okunyi vachili vavatonyi hamavu?

¹⁰ Kalunga azachishile ndando yakusokola kuli Paulu navatu veka vapwileko halwola luze. Ngocho avakonekelele jishili javo, nakuvawavisa nashipilitu yenyi yajila, kaha vapwile jino vana venyi vakushipilitu. Shikaho, vapwile jino nalutalililo lwamwilu. Nge vashishikile palanga nakusongo, kaha navakayula hamwe naKulishitu mwilu. Oloze Paulu avulukile vaka-Kulishitu kana omu vapwile vavatonyi nakuzachila Kalunga hano hamavu ngwenyi, ‘vafwa lyehi kushili.’ Azachishile chakutalilaho chaYesu uze afwile namujimba wautu, nakumusangwila mwilu namujimba wakushipilitu. Ngocho kufwa kachapwile nangolo hali Yesuko. Omu mukiko chapwa nakuli vaka-Kulishitu vawavisa vaze valimona kupwa ‘vakufwa lyehi kushili, oloze vayoyela Kalunga kuhichila muli Kulishitu Yesu.’ (Loma 6:9, 11) Kuyoya chavo chalumukile. Kavapwile cheka nakuvayula kuvishinganyeka vyavo vyashiliko, mwomwo vafwile lyehi kuvishinganyeka kana.

11. Mujila muka etu twatalilila kukayoya myaka yosena muPalachise ‘twafwa lyehi kushili’?

¹¹ Nyi ngachilihi yetu? Shimbu kanda tupwenga vaka-Kulishitu, twalingilenga shili, pamo katwatachikijile omu Kalunga amwenenga vilinga kanako. Twapwile nge “vandungo kumajilo nakuupapwoki.” Twapwile chikupu “vandungo jashili.” (Loma 6:19, 20) Oloze twalinangwile muchano wamuMbimbiliya, nakwalumuna chiyoyelo chetu, kaha twalihanyine kuli Kalunga nakutumbapachisa. Kufuma vene haze, twafwila ‘kwononoka namichima yetu yosena’ kuvyuma anakutunangula Kalunga nakujindongi jenyi. Vatulingishile “kupwa vakulihehwa kushili” nakupwa jino “vandungo kukwoloka.” (Loma 6:17, 18) Ngocho nayetu nawa ‘twafwa lyehi kushili.’

12. Mutu himutu atela kusakula vyuma muka?

¹² Achishinganyekenu Paulu anakuhanjika kuli enu ngwenyi: “Kanda namwechelela shili yiyulenga lika nge mwangana mumijimba yenu yize yeji kufwanga nakumilingisa mwononokenga kukufwila chayoko.” (Loma 6:12) Tunahase kwechelela “shili yiyulenga lika” muli etu hakulinga kala vyuma natushinganyeka mumichima yetu. Hakuwana nge tunahase ‘kwechelela’ shili yituyule chipwe nduma, shikaho, natusakulaho yika? Lihulisenu ngwenu: ‘Kutala ngweji kulingisanga vishinganyeka vyami vyakuhona kukupuka vingulweze vyuma vyakuhenga nakuvilinga tahi, nyi ngwafwa lyehi kushili? Uno ngwayoyela Kalunga kuhichila muli Kulishitu Yesu tahi?’ Vyuma tweji kulinganga navisolola nge twamona likoji lyalinene lyaKalunga hakutukonekela shili kupwa lyalilemu nyi chiku.

13. Mazu muka atukafwa tufwelele ngwetu vatu vanahase kuseza vilinga vyashili?

¹³ Vatu jaYehova valihenda ‘kumihako vapwilenga nakwima’ shimbu kanda vatachikize Kalunga, nakumuzanga, nakumuzachila. Chiyoyelo chavo chakunyima chapwile ‘navyuma vize vali nakwivwila sonyi oholili,’ vize kachi vinavanehela kufwa. (Loma 6:21) Oloze valumuka. Omu mukiko chapwile nakuli  vatu vamuKolinde vaze Paulu asonekelele ngwenyi, vamwe vapwile vaka-kulemesa makombelo, vaka-ukoji, veji, vaka-kulisavala navatu vausonyi umwe, navilinga vyeka vyamuyachou. Oloze ‘vavasanyisa lyehi nakuvatomesa.’ (Koli. 1, 6:9-11) Omu mukiko chapwile kuli vaka-Kulishitu vamwe muchikungulwilo chamuLoma. Paulu vamuhwiminyinyine avasonekele ngwenyi: “Kanda namuhananga lika mijimba yenu kushili kupwa vitwa vyamilimo yakuhengako, oloze lihanenu enu vavene kuli Kalunga nge vaka-kuyoya vaze vanafumu kuvafu, nakuhana nawa mijimba yenu kuli Kalunga kupwa vitwa vyamilimo yakwoloka.” (Loma 6:13) Paulu afwelelele ngwenyi vanahase kupwa vatoma kushipilitu nakutwalaho kunganyala lika kulikoji lyalinene lyaKalunga.

14, 15. Vyuma muka twatela kulinga mangana ‘twononoke namichima yetu’ yosena?

¹⁴ Omu mukiko chili namakumbi ano. Vandumbwetu vamwe vapwile navilinga vyavipi ngana muze chapwile kuli vaka-Kulishitu muKolinde. Oloze valumwine vilinga vyavo vyashili kaha ‘vavasanyishile nakuvatomesa.’ Chiyoyelo chenu chili ngachilihi makumbi ano omu munakuzachila Kalunga, hakuchesekesa namuze chapwile kunyima? Jino hakuwana nge Kalunga namisolwela likoji lyalinene hakumikonekela jishili jenu, kutala muli nakufwila kulihenda kutato ‘yakuhana mijimba yenu kushili’ tahi? Uno ‘namulihana enu vavene kuli Kalunga nge vaka-kuyoya vaze vanafumu kuvafu’ tahi?

¹⁵ Hakusaka tulinge ngocho, katwatela kulisakila kulinga shili yize valingilenga vamwe muKolindeko. Echi nachitulingisa twitavile likoji lyalinene lyaKalunga nakumona ngwetu ‘shili kayeshi nangolo hali etuko.’ Kutala tunakufwila ‘kwononoka namichima yetu’ yosena hakukilikita nangolo mangana tulihende kushili yize vanahase kumona vatu ngwavo yayindende tahi?—Loma 6:14, 17.

16. Twatachikiza ngachilihi ngwetu kupwa vaka-Kulishitu chasakiwa vyuma vyavivulu keshi kwecha kaha jishili jajineneko?

¹⁶ Achishinganyekenu hali kaposetolo Paulu. Twafwelela ngwetu ikiye kalingilenga jishili jajinene vavuluka hali Wavaka-Kolinde 1, 6:9-11. Oloze ahanjikile ngwenyi apwile namulonga wakulinga shili. Ngocho asonekele ngwenyi: “Ami ngumutu wakumujimba, valanjisa lyehi muundungo washili. Mwomwo ami kangwatachikijile vyuma nguli nakulingako. Mwomwo kangweshi kulinga vyuma ngwasaka kulingako, oloze ngweji kulinganga vyuma ngwahunga.” (Loma 7:14, 15) Echi chosolola nge kwapwile vyuma vyeka vize amwene kupwa shili, shikaho afwililile kuvifungulula. (Tangenu Wavaka-Loma 7:21-23.) Nayetu nawa tufwilenu kufungulula vilinga kanevi omu tunakusaka ‘kwononoka namichima yetu’ yosena.

17. Mwomwo ika mwatela kufwila kupwa vakashishi?

¹⁷ Chakutalilaho, tushimutwilenu hakupwa vakashishi. Vaka-Kulishitu vosena vatela kupwa vakashishi. (Tangenu Vishimo 14:5; Wavaka-Efwesu 4:25.) Satana apwa “ise yamakuli.” Ananyiya napuwenyi vafwile mwomwo yakuhanjika makuli. Katwatela kulondezeza vatu kanako. (Yowa. 8:44; Vili. 5:1-11) Uno echi chikiko kaha chatela kutulingisa tupwenga vakashishi tahi? Nduma, kashishi nawa twatela kukasolola hakumona likoji lyaKalunga lyalinene kupwa lyalilemu.

18, 19. Mwomwo ika natwambila ngwetu kupwa vakashishi kachapwa kuhanjika makuli kahako?

¹⁸ Makuli apwa kuhanjika vyuma vize kavyeshi vyamuchanoko. Yehova asaka vatu jenyi vahone kuhanjikanga makuli numba amandende. Alwezele vaIsalele ngwenyi: “Pwenunga mwajila mwomwo ami Yehova Kalunga kenu ngwajila.” Kaha avalwezele omu vatela kupwa vajila. Ambile ngwenyi: “Kanda mukevako, kanda mukatangisako, kanda mukonga vakwenuko.” (Levi 19:2, 11) Vatu vamwe kaveshi kuhanjika  makuliko, oloze vanahase kupwa vaka-kutangisa vakwavo.

¹⁹ Chakutalilaho, mutu umwe nahase kulweza mukulwane wenyi wamilimo ngwenyi hamene keshi kukeza kumilimoko chipwe ngwenyi mwakakomboka washi mangana akaye kuchipatela nakumona ndotolo. Oloze kumana nalyongo, mwakahita kuchipatela mangana akambate vitumbo chipwe akafwete jimbongo javitumbo. Pamo nahanjika vyuma kana mangana akahambakane nakuya nakulinga vyenyi chipwe akatwale tanga yenyi nakulihizumuna. Tunahase kwamba ngwetu ayanga vene kuchipatela, oloze kutala ahanjikanga muchano tahi, nyi ahanjikanga mukutangisa? Pamo mwamonaho lyehi vatu veji kutangisanga vakwavo. Vatu vamwe veji kulyonga mangana vahone kuvazangamisa chipwe valile vakwavo hamitwe. Numba tuhu kahanjikile makuliko, oloze Mazu aKalunga amba ngwawo: “Kanda mukatangisako.” Kaha nawa Wavaka-Loma 6:19 wamba ngwawo: “Hanenu vilyo vyamijimba yenu vipwenga vandungo kukwoloka chakutwala kukujila.”

20, 21. Likoji lyalinene lyaKalunga lyatela kutulingisa tulinge vyuma muka?

²⁰ Kumona likoji lyaKalunga lyalinene kupwa lyalilemu kachalumbununa kaha kulihenda kuukoji, kukupenda chipwe kuvilinga vyeka vyashili vize valingilenga vamwe muKolindeko. Kwitavila likoji lyalinene lyaKalunga chalumbununa nawa kulihenda kuujila nakuhonesa tato yakutalanga mivwimbimbi yauselesele. Nge natuhana vilyo vyamijimba yetu vipwenga vandungo kukwoloka, kaha natulihenda kukupenda nakukunwa wala wauvulu. Numba tuhu chasakiwa kuzata nangolo mangana tuhonese vilinga kana, oloze tunahase kufungulula chikupu.

²¹ Twatela kufwila kulihenda kushili yayinene nayize vatu vamona ngwavo yayindende. Numba tuhu katweshi kulinga vyuma vyosena mukwolokako, oloze twatela kufwila kulinga vyuma mukwoloka nge muze alingile Paulu. Akolezezele vandumbwenyi ngwenyi: “Kanda namwechelela shili yiyulenga lika nge mwangana mumijimba yenu yize yeji kufwanga nakumilingisa mwononokenga kukufwila chayoko.” (Loma 6:12; 7:18-20) Nge natufwila kulihenda kukala vyuma navitulingisa tulinge shili, kaha natusolola nge twamona likoji lyaKalunga lyalinene kupwa lyalilemu kuhichila muli Kulishitu.

22. Nganyo muka navakawana vaze vamona likoji lyaKalunga lyalinene kupwa lyalilemu?

²² Kalunga atukonekela jishili jetu, kaha mwatwalaho lika kutukonekela mwomwo yalikoji lyenyi lyalinene. Shikaho, tufwilenu kuhonesa tato yakulinganga shili yize vamona vatu kupwa yayindende. Paulu ahanjikile nganyo natukawana ngwenyi: “Omu vanamilingisa lyehi kupwa vakulihehwa kushili nakupwa jino muvandungo kuli Kalunga, muli nakwima mihako yakutwala kukujila, kaha hakukuminyina hikuyoya chahaya myaka yosena.”—Loma 6:22.