1, 2. Mwomwo ika visemi vamwe vanahase kulizakamina nge vana vavo navasaka kulihana kuli Yehova nakuvambapachisa?

MWAKA himwaka vatu vavavulu vaze veji kulinangulanga Mbimbiliya veji kulihananga kuli Yehova nakuvambapachisa. Hali ava vatu veji kumbapachisanga heji kupwanga navanyike vaze vanalinangula muchano kuli visemi javo. (Samu 1:1-3) Nge mwapwa muvisemi, kaha nawa muVinjiho jaYehova kaha twafwelela ngwetu muli nakutalilila kulikumbi navakambapachisa mwanenu.—Esekesenuko WaYowano 3, 4.

² Chipwe ngocho munahase kulizakamina. Pamo munamononga vanyike vamwe navavambapachisa oloze kutwala muze navaputuka kuhuhwasana kulema chakukavangiza jindongi jaKalunga. Vakweze vamwe vanaseze namuchano. Shikaho munahase kulizakamina ngwenu pamo mwanenu nahase kuputuka kuzovoloka kanawa oloze kutwala muze zangi yenyi yakuzanga muchano yinahase kuhola.  Mwanenu nahase kupwa ngana muze chapwile kuli vaka-Kulishitu vamulikulukaji lyamyaka lyakulivanga vamuchikungulwilo chamuEfwesu vaze Yesu alwezele ngwenyi: “Unaseze zangi yize wapwile nayo hakavanga.” (Kuso. 2:4) Uno namukafwa ngachilihi mwanenu ahone kwingila muukalu kana mangana ‘akole nakuheta kuulwilo’? (Petu. 1, 2:2) Hakusaka tukumbulule chihula kana, tuchishimutwilenu chakutalilaho chaChimoteu.

3. (a) Lwola muka Chimoteu alinangwile muchano, kaha akwile ngachilihi kuvyuma alinangwilenga? (b) Paulu alwezele Chimoteu jijila muka jitatu jakulinangwilamo?

³ Pamo Chimoteu alinangwile muchano mu 47 C.E. omu Paulu ayile kuLusutala haungeji wenyi watete. Numba tuhu halwola kana pamo Chimoteu apwile kanyike, oloze chasoloka nge akavangijilenga vyuma alinangwilenga. Omu mwahichile myaka yivali, Chimoteu aputukile kuzachila hamwe naPaulu. Omu mwahichile myaka 16, Paulu asonekelele Chimoteu ngwenyi: “Kavangizanga lika vyuma vize walinangwile, vize nawa vakukunywile nakuvitavila hakutachikiza vaze vakunangwilevyo, kaha nawa kufuma kuukemba wove unatachikiza mikanda yajila yize yinahase kukulingisa upwenga namangana akukutwala kuulwilo hakufwelela Kulishitu Yesu.” (Chimo. 2, 3:14, 15) Tachikizenu ngwenu Paulu ahanjikile ngwenyi Chimoteu (1) atachikijile mikanda yajila, (2) akunyukile nakwitavila vyuma alinangwile (3) nakupwa namangana akutwala kuulwilo hakufwelela Kulishitu Yesu.

4. Vinoma muka mweji kuzachisanga hakunangula vana venu nakuvaheta kumichima? (Talenu muvwimbimbi wakulivanga.)

⁴ Hakupwa muvaka-Kulishitu kaha nawa muvisemi, nayenu mwasaka vana venu vatachikize mikanda yajila yaVisoneka VyachiHepeleu naVisoneka VyachiHelase vyaVaka-Kulishitu. Numba mwana wamundende nahase kulinangula hamijimbu navatu vasoneka muMbimbiliya kweseka nauhashi wenyi. Liuka lyaYehova likwechi vinoma vyavivulu vyakukafwa visemi vanangule vana vavo. Kutala munejivako vinoma vimwe vili mulilimi lyenu tahi? Tachikizenu ngwenu chinyingi chakutachikiza Visoneka chikiko cheji kukafwanga mutu apwenga nausoko naYehova.

5. (a) Uno ‘kukunyuka nakwitavila’ chalumbununa ika? (b) Twatachikiza ngachilihi ngwetu Chimoteu akunyukile nakwitavila mujimbu wamwaza wakuvuluka Yesu?

⁵ Kutachikiza mikanda yajila chapwa chachilemu. Oloze mwatela kunangula vana venu vapwenga nachinyingi chamuMbimbiliya keshi kwijiva kuvalwezanga kaha mijimbu navatu vasonekamoko. NaChimoteu ‘akunyukile nakwitavila’ vyuma alinangwilenga. MuchiHelase mazu akwamba ngwavo ‘kukunyuka nakwitavila’ alumbununa “kufwelela” chipwe “kwitavila vyuma kupwa vyamuchano.” Chimoteu atachikijile Visoneka VyachiHepeleu kufuma kuukemba wenyi. Oloze halwola lumwe kwapwile unjiho wamukunywile etavile ngwenyi Yesu ikiye Meshiya. Hakuwana nge Chimoteu etavilile mujimbu wamwaza, ngocho vamumbapachishile, kaha aputukile kuzata naPaulu mumulimo waumishonali.

6. Namuhasa kukafwa ngachilihi vana venu mangana vakunyuke nakwitavila vyuma navalinangula muMazu aKalunga?

⁶ Namuhasa kukafwa ngachilihi vana venu vetavile vyuma navalinangula nakukunyuka ngana muze chapwile kuli Chimoteu? Mwatela kuvatalilila chikoki. Mwanenu keshi kuhasa kukunyuka mulikumbi lyangongo chipwe kuchitambula kuli yenu visemi jenyi mwomwo yenu mwakunyuka nakwitavilako. Mwana himwana atela kuzachisa ‘uhashi wenyi wakushinganyeka’ mangana etavile muchano wamuMbimbiliya. (Tangenu Wavaka-Loma 12:1.) Shikaho mwatela kuzata nangolo hakupwa muvisemi chikumanyi nge mwanenu eji kuhulisanga vihula. Tuchitalenu hachakutalilaho chino.

7, 8. (a) Ndumbwetu umwe eji kutalililanga ngachilihi chikoki mwanenyi hakumunangula? (b) Munahase kumulondezeza ngachilihi?

 ⁷ Ndumbwetu Thomas uze atwama namwana wapwevo wamyaka yakusemuka 11 ambile ngwenyi: “Mwanami eji kuhulisanga ngwenyi, ‘Uno vyuma vize tweji kwambanga ngwetu Yehova ikiye avitengele vyalijililile vivene tahi?’ chipwe ngwenyi, ‘Mwomwo ika twahonena kwazana muvyuma vyamulifuchi vyakufwana nge kuvwota?’ Shimbu jimwe ngweji kuliunjikanga nakuhona kulusuka kumukumbulula. Mwomwo ngwatachikiza ngwami mutu kwitavila muchano kachasakiwa kulinangula vyuma vyakujiminyinako.”

⁸ Ndumbu Thomas atachikiza ngwenyi kunangula mutu chasakiwa kumutalilila chikoki. Kaha nawa kutalilila chikoki chapwa chachilemu kuli vaka-Kulishitu vosena. (Kolo. 3:12) Atachikiza nawa ngwenyi atela kunangula mwanenyi hatando yayisuku. Atela kuzachisa Visoneka hakukafwa mwanenyi mangana etavile vyuma mwalinangula. Ou ndumbwetu ambile nawa ngwenyi, “chuma chachilemu tweji kufwilanga yami napuwami shina kwijiva numba nge mwanetu nafwelela nakwitavila chikupu vyuma ali nakulinangula. Oloze nge mwahulisa vihula havyuma ali nakulinangula kaha chamwaza. Mwomwo ngunahase kulizakamina nge mwetavila kaha vyuma ali nakulinangula chakuhona kuhulisa vihula.”

9. Munahase kunangula ngachilihi vana venu Mazu aKalunga?

⁹ Nge visemi navatalililanga chikoki vana vavo hakuvanangula, kaha mukuhita chalwola vanahase kumona kanawa mwaya vyuma “muwihi, namuusuku, namukujindama helu, namukukunama.” (Efwe. 3:18) Vatela kuvevwishisa kweseka nauhashi wavo naseteko yamyaka vali nayo. Omu navakunyuka nakwitavila vyuma vali nakulinangula, kaha vanahase kuhakwila lufwelelo lwavo kachi nge vatu chipwe vakwavo vaka-shikola navavahulisa. (Petu. 1, 3:15) Chakutalilaho, kutala vana venu vanahase kulumbunwina vakwavo vyuma vyeji kusolokanga kumutu nge nafu tahi? Kutala vyuma yahanjika Mbimbiliya hachihande kana vavifwelela tahi? * Numba tuhu kunangula vana venu Mazu aKalunga chasakiwa kuvatalilila chikoki, oloze cheji kunehanga nganyo.—Lushi. 6:6, 7.

10. Chuma muka chachilemu vatela kwanuka visemi hakunangula vana vavo?

¹⁰ Mwatela kwanuka nawa ngwenu chakutalilaho chenu chinahase kukafwa vana venu vetavile nakukunyuka havyuma vali nakulinangula. Ndumbwetu Stephanie chisemi wapwevo uze atwama navana vamapwevo vatatu ambile ngwenyi: “Kufuma vene halwola vana vami vapwile vavandende, ngwalihulishilenga ngwami, ‘Kutala ngweji kulwezanga vana vami vyuma vyangulingisa ngwitavile ngwami Yehova kwatwama, kaha akwechi zangi, novyo vyangulingisa ngufwelele ngwami jijila jenyi japwa jakwoloka tahi? Uno vatachikiza ngwavo chikupu vene ngwazanga Yehova tahi?’ Vana vatela kumona ngwavo ngwakunyuka nakwitavila vyuma ngweji kulinangulanga numba navakiko vakunyuke.”

11, 12. Uno mangana apwa chuma muka, kaha mwomwo ika natwambila ngwetu kawapendamina hamyaka ali nayo mutuko?

¹¹ Nganomu tunalinangula, Chimoteu (1) atachikijile chinyingi chamuVisoneka (2) nakwitavila vyuma afwelelele. Jino Paulu atwalile mulihi hakwamba ngwenyi mikanda yajila yinahase kukafwa Chimoteu apwenga “namangana akutwala kuulwilo”?

¹² Mukanda waInsight on the Scriptures, Volume 2, walumbununa ngwawo muMbimbiliya, mutu wamangana eji kuzachisanga kanawa “chinyingi nauhashi wenyi hakukumisa ukalu, nakulihenda kujiponde, nakutesamo vyuma  mwalitomena chipwe kukafwa vakwavo valinge mwomumwe. Mangana alihandununa nauleya.” Mbimbiliya yamba ngwayo, “mumuchima wamwana mwatwama uleya.” (Vishi. 22:15, kwinyikila chamwishi.) Hakuwana nge mangana alihandununa nauleya, shikaho mangana akiko eji kusololanga nge mutu anakuzovoloka. Kuzovoloka kushipilitu kachapendamina hamyaka ali nayo mutuko, oloze veji kuchimwenanga hakwivwa Yehova woma nahakwononoka jishimbi jenyi.—Tangenu Samu 111:10.

13. Uno vanyike navahasa ngachilihi kusolola ngwavo vali namangana akutwala kuulwilo?

¹³ Vanyike vaze vanakolo kushipilitu kaveshi “kuhungwomwoka noku noku kwijiva nge namakimba” mwomwo yavyuma vafwila chipwe mwomwo yakuvashinyinyika kuli vakwavoko. (Efwe. 4:14) Oloze veji kuzovolokanga hakuzachisa “uhashi wakukekesa vyuma uze valongesa lyehi mwomwo yakuuzachisa mangana vahandunune kwoloka nakuhenga.” (Hepe. 5:14) Kuzovoloka chavo cheji kusolokanga hatoma omu veji kusakulanga kulinga vyuma vyakwoloka numba tuhu vali kwauka wavo. (Fwili. 2:12) Awa akiko mangana aze eji kutwalanga kuulwilo. (Tangenu Vishimo 24:14.) Uno namukafwa ngachilihi vana venu vapwenga namangana kana? Chatete, lwezenunga vana venu jindongi jamuMbimbiliya jize mwafwelela. Vana venu vatela kumona ngwavo mwavumbika jindongi jamuMbimbiliya kuhichila muvilinga vyenu.—Loma 2:21-23.

14, 15. (a) Vihula muka atela kulihulisa kanyike uze mwasaka kumumbapachisa? (b) Munahase kukafwa ngachilihi mwanenu ashinganyeke hanganyo yatwama hakwononoka jishimbi jaKalunga?

¹⁴ Kaha nawa chasakiwa kulingako vyuma vyeka keshi kulweza kaha vana venu vyuma vyakwoloka nevi vyakuhengako. Mwatela kuvakafwa vashinganyeke havihula vyakufwana nge: ‘Mwomwo ika Mbimbiliya yakanyishila vyuma vimwe vize vatu mukaye vamona kupwa vyamwaza? Mwomwo ika ngwetavila ngwami kukavangiza jindongi jamuMbimbiliya chapwa chamwaza?’—Isa. 48:17, 18.

¹⁵ Mwana uze mwasaka vamumbapachise vatela kumukafwa ashinganyeke hachuma chikwavo chachilemu. Vatela kumuhulisa avalweze vyuma vyasakiwa kuli mutu uze mwasaka  kupwa muka-Kulishitu. Atela kwijiva nganyo yakupwa muka-Kulishitu, navyeseko nahase kumona. Atela kwijiva nawa ngwenyi numba tuhu mwamona vyeseko oloze nahase kunganyala mwamunene. (Mako 10:29, 30) Evi vikiko vyuma nahase kumona mutu nge vanamumbapachisa lyehi. Shikaho, nachiwaha kushinganyekela chimweza havyuma kana shimbu kanda vamumbapachise. Nge vana navavakafwa vatachikize nganyo yatwama hakwononoka jishimbi jaKalunga naponde yatwama hakuhona kujononoka, kaha nachivalingisa vakunyuke nakulitavila vavene ngwavo jishimbi jamuMbimbiliya japwa jamwaza lwola lwosena, kaha jeji kutunganyalisanga.—Lushi. 30:19, 20.

16. Vyuma muka vatela kulinga visemi nge mwanavo wakumbapachisa mwaputuka kukakasana muchano?

¹⁶ Namulinga ngachilihi nge mwanenu mwaputuka kukakasana hanyima yakumumbapachisa? Chakutalilaho, kanyike wakumbapachisa nahase kuhungukila kuvyuma vyakulifuchi chipwe kuputuka kuhuhwasana hajindongi jamuMbimbiliya? (Samu 73:1-3, 12, 13) Hakupwa muvisemi, mwatela kumona ngwenu jila namukumbulwilamo vihula kana chinahase kulingisa mwanenu etavile muchano chipwe nduma. Kamwatela kushinjila mwanenu etavile vyuma mwafwelela numba apwa wamundende chipwe wakukolako. Enu mwatela kaha kumukafwa mujila yazangi yize nayimulingisa azange muchano.

17, 18. Visemi navahasa kukafwa ngachilihi mwanavo uze ali nakukakasana vyuma afwelela?

¹⁷ Kanyike uze vanambapachisa eji kusololanga hatoma kulihana chenyi kuli Yehova. Kulihana kana chapwa lushiko lwakuzanga Kalunga nakumona vyuma azanga kupwa vyavilemu mukuyoya chenyi chosena. (Tangenu Mako 12:30.) Yehova amona lushiko kana kupwa lwalulemu, kaha nawa mutu uze vanambapachisa atela kulumona kupwa lwalulemu. (Kwambu. 5:4, 5) Ngocho mwatela kwanukisa mwanenu vyuma kana halwola lwakutamo kaha nawa mujila yalikoji. Mwatela nawa kuzachisa vinoma vize liuka lyaYehova lili nakuwahishila visemi mangana vakavangize hakunangula vana vavo. Nge namulinga ngocho, nachikafwa vana venu vatachikize kulema nanganyo yatwama hakulihana kuli Yehova nakupwa vaka-Kulishitu.

¹⁸ Chakutalilaho, talenu vihande vyakuhakilako hamutwe wakwamba ngwavo, “Questions Parents Ask” mumukanda waQuestions Young People Ask—Answers That Work, Volume 1. Vasonekaho ngwavo: “Kanda kukukulula ngwenu mwanenu nakane vyuma mwafwelelako. Pamo kuli vyuma vimwe vinakumulingisa ahone kwitavila.” Pamo vali nakumushinyinyika kuli vakwavo. Vyuma vikwavo vinahase kumulingisa shina, kwivwa uli chipwe kwivwa sonyi mwomwo yakushinganyeka ngwenyi vakwavo vanyike muchikungulwilo vali nakuzovoloka kuhambakana ikiye. Vasonekaho nawa ngwavo, “ukalu kanou kaweshi nakulumbununa nge mwanenu nakane vyuma mwafwelelako. Atela kwijiva ukalu unahase kuzeyesa lufwelelo lwenyi.” Shikaho evi vihande vyakuhakilako vikwechi jijila jajivulu vatela kukavangiza visemi hakukafwa mwanavo uze ali nakukakasana vyuma yanangula Mbimbiliya.

19. Uno visemi navahasa kukafwa ngachilihi vana vavo vapwenga ‘namangana akutwala kuulwilo’?

¹⁹ Shikaho enu visemi mwatwama namulimo waunene wakulela vana venu “mukuvazangamisa namukuhuhumuna chakuli Yehova.” (Efwe. 6:4) Nganomu tunashimutwila, kulinga chuma kana kachasakiwa kuvalweza kaha vyuma yahanjika Mbimbiliyako, oloze chasakiwa kuvakafwa vafwelele vyuma navalinangula. Vatela kwitavila vyuma navalinangula numba jino valihane kuli Yehova nakumuzachila namuchima wosena. Tunakulomba ngwetu, kukilikita chenu nangolo, naMazu aKalunga nashipilitu yenyi vimikafwe munangule vana venu vapwenga ‘namangana akutwala kuulwilo.’