Kutala munalivwisanga kuwaha kutanga jimangazini jakalinwaha jaKaposhi Kakutalila nyi? Nge mukiko, kaha tumonenu omu namuhasa kukumbulula vihula vino vinakavangizaho:

Mwomwo ika visemi vavamwiza vatela kukekesa lilimi navazachisa hakukafwa vana vavo vazovoloke kushipilitu?

Vana vanahase kulinangula lilimi lyamungalila vatwama kushikola nomu navayanga nakuhema navakwavo. Nge mwana mwalinangula malimi amavulu kaha mwanganyala chikuma. Visemi vatela kukekesa vamone numba nge vana vavo navazovoloka kushipilitu hakupwa muchikungulwilo chazachisa lilimi lyamungalila vatwama chipwe chize chazachisa lilimi lyavo. Visemi vaka-Kulishitu vatela kumona kuzovoloka chavana vavo kushipilitu kupwa chachilemu kuhambakana kuhaka kulutwe lilimi lyavo.—w17.05, mafwo 9-11.

Omu Yesu ahulishile Petulu ngwenyi: “Kutala wanguzanga kuhambakana ava tahi?” Uno apwile nakuhanjika hali veya? (Yowa. 21:15)

Chasoloka nge Yesu apwile nakuvuluka vyavaishi chipwe mulimo wakuta vaishi. Omu afwile Yesu, Petulu akindulukile cheka kumulimo wakuta vaishi. Vaka-Kulishitu vatela kukekesa vamone numba nge vahaka chikuma kulutwe milimo yamukuyoya.—w17.05, mafwo 22-23.

Mwomwo ika Apalahama alwezelele Sala alyonge ngwenyi apwile ndumbwenyi? (Kupu. 12:10-13)

Chikupu vene, Sala apwile songo yaApalahama. Nge Sala ambile ngwenyi apwile pwevo lyaApalahama, kachi Apalahama vamujihile ngocho kachi kahashile kusema mwana uze vamufwelelesele kuli Kalungako.—wp17.3, mafwo 14-15.

Jila muka yakulipwila azachishile Elias Hutter hakusaka kukafwa vatu vaze vasakile kulinangula lilimi lyachiHepeleu?

Asakile vaka-kulinangula vatachikize kanawa mazu amuchiHepeleu. Ngocho apulitile sona wakulivanga kulizu hilizu muvasona vavanene, oloze mazu osena awasonekele mwomumwe. Mbimbiliya yaNew World Translation of the Holy Scriptures—With References yazachisa jila kaneyi mukwinyikila chamwishi.—wp17.4, mafwo 11-12.

Vyuma muka vyatela kulingisa vaka-Kulishitu vahone kulama uta wakulikingisa kuvihwanga?

Vyuma vimwe shina vino: Kalunga amona kuyoya kupwa chachilemu. Yesu kalwezele vaka-kumukavangiza vambate jipoko jamikwale jakulikinga najoko. (Luka 22:36, 38) Twatela kufululula jipoko jetu kupwa matemo akulimisa. Kuyoya chamutu chapwa chachilemu kuhambakana vyuma vyamukuyoya. Tweji kuvumbikanga vivezu vyavakwetu nakusaka kuvahana chakutalilaho chamwaza. (Koli. 2, 4:2)—w17.07, mafwo 31-32.

Mwomwo ika mijimbu asonekele Mateu naLuka hali Yesu yalihandunwina?

Mujimbu asonekele Mateu wahanjika omu evwile Yosefwe hakutachikiza ngwenyi Maliya ali nalijimo, nomu kangelo ejile nakumulweza vachinyine kuEjipitu nomu amulwezele akinduluke kuIsalele. Oloze Luka asonekele vyomu Maliya ayile kuli kausoko kenyi Elizaveta, nomu evwile omu mwanenyi asalile kutembele.—w17.08, li. 32.

Mazu aKalunga anelilanga chamokomoko navyuma muka?

Ulumbunwiso wamazu namikuku vazachisa muMbimbiliya vinalumuka mukuhita chamyaka. Kwalumuka chaviyulo chinalingisanga malimi aze vanahanjikanga vatu vavavulu alumuke. Kaha nawa vaka-kole vanesekanga kuhonesa vatu kwalumuna Mbimbiliya mumalimi aze vahanjika vatu vavavulu.—w17.09, mafwo 19-21.

Uno twatwama nakangelo uze eji kutukinganga tahi?

Nduma. Yesu ambile ngwenyi vangelo jatumbaji twenyi veji kumonanga kumeso aKalunga. (Mateu 18:10) Yesu kapwile nakulumbununa ngwenyi mutu himutu atwama nakangelo uze eji kumukingangako, oloze alumbunwine ngwenyi vangelo veji kuzakamanga chikuma tumbaji twenyi.—wp17.5, li. 5.

Zangi muka yapwa yakulipwila?

Zangi ya a·gaʹpe yize yazama hajindongi yikiko yapwa yakulipwila. Yeji kulingisanga mutu apwenga navilinga vyamwaza, vyakufwana nge kuhona lifwi.—w17.10, li. 7.