1. Mwomwo ika lumbapachiso lwapwila lwalulemu? (Talenu muvwimbimbi wakulivanga.)

MWAKA himwaka vatu vavavulu vaze veji kulinangulanga Mbimbiliya veji kuvambapachisanga. Hali ava vatu veji kumbapachisanga, vavavulu vapwa vanyike navakweze vaze vanalinangula muchano kuli visemi javo. Kutala omu mukiko chapwa nakuli yenu tahi? Nge mukiko kaha tuli nakumisakwilila. Vaka-Kulishitu vosena vatela kuvambapachisa numba vakawane ulwilo nakukayoya myaka yosena.—Mateu 28:19, 20; Petu. 1, 3:21.

2. Mwomwo ika katwatela kwivwa woma kulihana kuli Yehovako?

² Numba tuhu lumbapachiso lweji kunehanga kutokwa chachivulu, oloze lweji kunehanga nawa milimo yayinene. Mujila muka? Halikumbi vamimbapachishile mwakumbulwile chihula chino ngwavo, “Kutala munalikonekela milonga yenu yashili nakulihana enu vavene kuli Yehova mangana mulingenga mwaya muchima wenyi, mwomwo yakulihana chaYesu Kulishitu mwachimuna wakuvatula tahi?” Lumbapachiso lweji kumisololanga nge munalihane kuli Kalunga. Lwapwa hilushiko luze mwashikile Yehova ngwenu namumuzanganga nakuhaka kulutwe vyuma asaka kuhambakana vyuma vyeka. Chikupu vene lushiko  kana lwapwa lwalulemu chikuma. Kutala mwatela kuliveya nakwamba ngwenu kachi kamwamushikileko tahi? Nduma. Kulihana kuli Yehova chapwa chuma chamwaza chikuma mukuyoya chamutu. Tachikizenu ngwenu, mutu uze kapandama kuli Yehovako veji kumuyulanga kuli Satana. Liyavolo kasaka mukayovokeko. Eji kuwahililanga chikuma nge namufumbukila wata waYehova mangana mujimbalise lutalililo lwenu lwakuyoya chahaya myaka yosena.

3. Kulihana kuli Yehova chikwechi nganyo muka?

³ Mwatela kushinganyeka havyuma vyamwaza muli nakulivwisa kuwaha mwomwo yakulihana kuli Kalunga nakumimbapachisa. Hakuwana nge mwalihana lyehi kuli Yehova, munahase kuhanjika natwima ngwenu: “Yehova ali nayami, kangweshi kwivwa womako. Mutu mwangulinga ikaze?” (Samu 118:6) Kupwa kusali yaKalunga nakutwivwila uselewa kuli ikiye hichuma chachilemu chikuma kuhambakana vyuma vyosena.

4, 5. (a) Kulihana kuli Yehova chapendamina ngachilihi hali mutu ivene? (b) Vyeseko muka vyeji kuwananga vaka-Kulishitu vosena?

⁴ Hakupwa muvaka-Kulishitu vakumbapachisa, kamwatela kumona usoko wenu naKalunga kupwa nge hikutwama muzuvo yakufwetela yize vali nakufwetela visemi jenuko. Oloze mwatela kuzachila ulwilo wenu enu vavene numba tuhu vachili nakumilela kuli visemi jenu. Mwomwo ika? Mwomwo kamweshi kuhasa kutachikiza vyeseko navimiwanako. Chakutalilaho, nge vamimbapachishile oku muchili muvanyike, kaha vyeseko vinahase kuvulilako chipwe kutohwelako omu namuputuka kuya nakukola. Kanyike umwe wapwevo ambile ngwenyi: “Chinjiho chaYehova wakanyike nahase kuhonesa cheseko chakutambula vyakulya navamuhana hashikola hachilika chakwanuka likumbi lyakusemuka. Oloze omu mwaputuka kukola chinahase kumukaluhwila kuhonesa cheseko chakulinga ujila nge kafwelelele ngwenyi kukavangiza jindongi jaYehova chapwa chamwaza chikuma lwola lwosenako.”

⁵ Chipwe ngocho keshi vanyike kaha veji kumonanga vyesekoko. Navakulwane vaze vambapachishile oku vanakolo lyehi veji kumonanga vyeseko. Vyeseko kana vinahase kupwa vyamuulo chipwe kuhona kulikangula kumujimba chipwe kuhona kupwa hamilimo. Mutu himutu eji kuhitanga muvyeseko chamokomoko namyaka ali nayo. Oloze twatela kupwa vakushishika kuli Yehova.—Yako. 1:12-14.

6. (a) Mujila muka lushiko lwenu lwapwila lwahaya myaka yosena? (b) Chuma muka munalinangula hamukanda Wavaka-Fwilipi 4:11-13?

⁶ Kutachikiza ngwenu lushiko mwashikile Yehova lwahaya myaka nachimikafwa mutwaleho kupwa vakushishika. Echi chasolola nge mwalwezele Mwata wakulitulaho ngwenu namutwalaho kumuzachila numba tuhu visemi jenu chipwe masepa jenu navalitwamina kumuzachila. (Samu 27:10) Lombenunga Yehova amihane ngolo mangana mutesemo kulihana chenu.—Tangenu Wavaka-Fwilipi 4:11-13.

7. Uno kuzachila ulwilo “nawoma nakuchikima” chalumbununa ika?

⁷ Yehova asaka mupwenga mumasepa jenyi. Oloze mwatela kuzata nangolo numba muzamise usepa kana nakuzachila ulwilo wenu. Mukanda Wavaka-Fwilipi 2:12 wamba ngwawo: “Zachilenunga lika ulwilo wenu nawoma nakuchikima.” Mazu kana asolola nge mwatela kukekesanga mwakuzamishila usepa wenu naYehova nakutwalaho kupwa vakushishika kuli ikiye chamokomoko navyeseko namumona. Kamwatela nawa kulifwelela enu vaveneko. Tachikizenu ngwenu navatu vaze vanazachila Kalunga hamyaka yayivulu vanasezenga muchano mwomwo yakulifwelela vavene. Uno vyuma muka mwatela kulinga mangana muzachile ulwilo wenu?

8. Vyuma muka vyaliweza muchilongesa chahauka, kaha mwomwo ika chapwila chachilemu kulinga ngocho?

⁸ Usepa naYehova wasakiwa kwivwilila kuli ikiye nakuhanjika nenyi. Kupwanga nachilongesa  chaMbimbiliya chahauka ikiko jila tweji kwivwililangamo kuli Yehova. Echi chasakiwa kupwa nachinyingi chamuMbimbiliya namikanda yahanjika haMbimbiliya hakuyitanganga nakushinganyeka hamazu namutanga. Tachikizenu nawa ngwenu chilongesa chaMbimbiliya kachapwa kutanga nganomu veji kutanganga kushikolako. Kamwatela kutanga kwijiva nge munakusoneka vyeseko mangana mukapaseko. Hakusaka munganyale kuchilongesa chenu chahauka, mwatela kuhehwojola muwane vilinga vyeka vyaYehova vize kamwejivako. Echi nachimikafwa mupandame kuli Kalunga, kaha ikiye nawa mwapandama kuli yenu.—Yako. 4:8.

9. Vinoma muka vyeji kumikafwanga hachilongesa chenu chahauka?

⁹ Liuka lyaYehova lyawahisa vinoma vyakulisezaseza vize navimikafwa mupwenga nachilongesa chize nachiminganyalisa. Chakutalilaho, vihande vyatwama hakeyala yetu yaInternet hachihanda chaVanyike haze vavuluka ngwavo “VyaKulinga Hakulinangula Mbimbiliya,” navimikafwa mulinangule vishina vyavilemu kumijimbu yamuMbimbiliya. Kaha nawa namulinangula vihande vyeka vyavilemu mumukanda “[wa]Mbimbiliya Nayitunangula Vyuma Muka?” vize vyatwama hakeyala yetu hachihanda chakwamba ngwavo study guides. Vihande kana navimikafwa muzamise lufwelelo lwenu nakumikafwa nawa mulumbunwine vakwenu vyuma mwafwelela. Vihande vyeka munahase kuviwana hachihande chakwamba ngwavo “Vakweze Veji Kuhulisa Ngwavo . . . Vyuma Muka Ngwatela Kulinga Numba Ngulivwise Kuwaha Kutanga Mbimbiliya?” muTonenu! yaJuly 2009. Kutanga nakushinganyeka havyuma namutanga nachimikafwa muzachile ulwilo wenu.—Tangenu Samu 119:105.

10. Mwomwo ika kulomba chapwila chachilemu kuli muka-Kulishitu wakumbapachisa?

¹⁰ Jila yimwe tweji kwivwililangamo kuli Yehova shina kupwa nachilongesa chahauka, oloze tweji kuhanjikanga naikiye kuhichila mukulomba. Muka-Kulishitu katela kumona kulomba nge hichijililo kaha chipwe mangana anganyalilehoko. Oloze atela kumona ngwenyi yapwa hijila yakushimutwilamo naTengi yetu. Yehova asaka kwivwa vyuma namumulweza. (Wavaka-Fwilipi 4:6.) Shikaho, nge munalizakamina, kaha mwatela kukavangiza punga yamuMbimbiliya yize yamba ngwayo, “mbila chiteli chove hali Yehova.” (Samu 55:22) Uno mwetavila mazu kana tahi? Nge namuhulisa vandumbwetu vakulisezaseza navamilweza chikupu ngwavo navakiko vananganyala chikuma hakulomba kuli Kalunga. Shikaho nayenu namunganyala.

11. Mwomwo ika mwatela kusakwililanga Yehova shimbu yosena?

 ¹¹ Kulomba kachapwa kulweza kaha Yehova vyuma tunakusakako. Mbimbiliya yamba ngwayo: “Sololenunga kusakwilila chenu.” (Kolo. 3:15) Shimbu jimwe nge tuli muukalu chinahase kutuzeyesa nakutulingisa tuvulyame vyuma vyamwaza atulingila Yehova. Ngocho mwatela kulitomena vyuma vitatu chipwe kuhambakanyisaho vize namusakwilila Yehova hakumbi hakumbi. Kaha sakwililenu Yehova mukulomba havyuma kanevi namilingila. Abigail kanyike wapwevo uze vambapachishile omu apwile namyaka 12, ambile ngwenyi: “Ngwamona ngwami twatela kusakwilila chikuma Yehova kuhambakana kala mutu. Shimbu yosena twatela kumusakwilila mwomwo atuhana mawana akulisezaseza. Likumbi limwe ngwevwile mazu aze angukwachile kumuchima, akwamba ngwavo: Kachi nge natufwilanga kusakwilila Yehova havyuma vize eji kutulingilanga hakumbi hakumbi, natuwana ngwetu vyuma eji kutulingilanga mukuyoya chetu vyavivulu chikuma.” *

12, 13. Mwomwo ika kushinganyeka hajila munamakililamo kuwaha chaYehova hauka wenu chapwila chachilemu?

¹² Mwangana Ndavichi uze vayowele kuvyeseko vyakulisezaseza ahanjike ngwenyi: “Makilenu mangana mumone ngwenu Yehova apwa wamwaza. Awahilila mutu uze eji kuchinyinanga muli ikiye.” (Samu 34:8) Vesi kana yasolola nganyo yatwama hakulimwena mutu yivene vyuma vimwe. Hakutanga Mbimbiliya namikanda yetu, nomu mweji kuyanga kukukunguluka chetu, mweji kwivwanga omu Kalunga nakafwenga vangamba jenyi vakushishika. Oloze jino omu namupwa vasachitetahundu kuvyuma vyakushipilitu, mwatela kulimwena yenu vavene omu Yehova ali nakumikafwa mukuyoya chenu. Uno munamakila ngachilihi kuwaha chaYehova hauka wenu?

¹³ Kuli jila yimwe yize vaka-Kulishitu vosena vanamakililangamo kuwaha chaYehova. Jila kana shina yakuvasanyika vapandame kuli Kalunga nakuli Mwanenyi. Yesu ambile ngwenyi: “Kakweshi mutu mwahasa kwiza kuli amiko kuvanga vanamukoko kuli Tata uze angutumine.” (Yowa. 6:44) Uno mwashinganyeka ngwenu mazu kana azata nakuli yenu tahi? Mukweze nahase kuhanjika ngwenyi, ‘Yehova akokele visemi jami oloze ami ngwavakavangijile kaha.’ Oloze jino omu mwalihanyine enu vavene kuli Yehova nakumimbapachisa, mwatungile jino usoko wakukola naikiye. Ngocho vanamijiva jino kuli Yehova. Mbimbiliya yatukolezeza ngwayo: “Nge mutu azanga Kalunga, mutu kana vamutachikiza kuli Kalunga.” (Koli. 1, 8:3) Shimbu yosena mwatela kumona chihela mwatwama nacho muliuka lyaYehova kupwa chachilemu.

14, 15. Uno mulimo wakwambulula naumikafwa ngachilihi muzamise lufwelelo lwenu?

¹⁴ Jila yikwavo munahase kumakililamo kuwaha chaYehova shina hakumona omu mwamikafwa nge muli nakwambulila vatu vyalufwelelo lwenu. Munahase kulinga ngocho omu namuzata mulimo wakwambulula chipwe nge muli kushikola. Vamwe cheji kuvakaluhwilanga kwambulila vakwavo vaka-shikola. Pamo nayenu munejiva ngwenu chapwa chachikalu vene mwomwo kamweshi kwijiva omu vanahase kukumbululako. Kaha nawa chinahase kupwa chachashi kwambulila mutu umwe kuhambakana kwambulila lizavu lyalinene. Jino vyuma muka navimikafwa?

¹⁵ Chakavanga, shinganyekenu ovyo vyamilingisa mwitavile vyuma mwafwelela. Uno vihande vyatwama hakeyala yetu ya jw.org vize vyahanjika havakweze muli navyo mulilimi lyenu tahi? Nge kamwejivile mwakuviwanyinako, kaha mwatela kuhehwojola kanawa mangana muviwane.  Vihande kana navimikafwa mushinganyeke havyuma mwafwelela, novyo vyamilingisa muvifwelele, nomu munahase kulumbunwina vakwenu vyuma mwafwelela. Kachi nge lufwelelo lwenu lunazame kaha nawa munalizange nachimikafwa muhamuke kulwezako vakwenu vyaYehova.—Yele. 20:8, 9.

16. Vyuma muka navimikafwa muhone kwivwa woma kwambulila vatu vyuma mwafwelela?

¹⁶ Numba vene nge munaliwahisa kanawa chinahase kumikaluhwila kuhamuka kwambulila vakwenu vyuma mwafwelela. Ndumbwetu wapwevo wamyaka yakusemuka 18 uze vambapachishile omu apwile namyaka 13 ambile ngwenyi, “Ngwatachikiza vyuma ngwafwelela, oloze shimbu jimwe cheji kungukaluhwilanga kuhanjika vyuma kana.” Uno chuma muka cheji kumukafwanga ahonese ukalu kana? Ambile ngwenyi, “Ngweji kuundanga muchima. Vakwetu vaka-shikola veji kuhanjikanga namuchima umwe vyuma vize veji kulinganga. Shikaho nayami ngwatela kuunda hakuhanjika vyuma ngwafwelela. Ngocho ngweji kuputuka kuhanjika hakwamba ngwami, ‘Zau ngwapwanga nakunangula vatu Mbimbiliya, kaha . . . ’ Echi cheji kungujikijisanga ngutwaleho kushimutwila chihande nguli nakuhanjika. Numba tuhu mujimbu nanguputuka kuhanjika kawahanjikile haMbimbiliyako, oloze vakwetu veji kufwilanga kutachikiza omwo ngwapwanga nakunangula vatu Mbimbiliya. Shimbu jimwe veji kunguhulisanga nguvalumbunwine vyaMbimbiliya. Kuzachisa jila kana cheji kungukafwanga nguhonese woma. Jino nge ngunashimutwila lyehi navatu, ngweji kwivwanga kuwaha kumuchima.”

17. Namuhasa ngachilihi kuhanjika navakwenu vyuma mwafwelela mangana vavitavile?

¹⁷ Nge namuvumbikanga vakwenu nakuvamona kupwa vavalemu, kaha vanahase kwivwilila mujila yalikoji nge muli nakuvambulila. Ndumbwetu wapwevo Olivia wamyaka yakusemuka 17, uze vambapachishile omu apwile kanyike chikuma, ambile ngwenyi: “Lwola lwosena ngwalizakaminyinenga ngwami nge nangushimutwila navatu vihande vyamuMbimbiliya kaha navangumona nge ngwazanga chikuma vyaMbimbiliya.” Jino mukuhita chalwola aputukile kwalumuna vishinganyeka vyenyi. Muchishishisa chakwivwa woma ou ndumbwetu ashinganyekele ngwenyi, “Vakweze vavavulu kavejiva Vinjiho jaYehova vavavuluko. Yetu kaha vatachikiza. Shikaho vilinga vyetu vinahase kuvalingisa vetavile muchano chipwe nduma. Jino ngachilihi nge twatwama nasonyi, chipwe nge tweji kwivwanga woma kuhanjika vyuma twafwelela? Echi nachivalingisa vamone nge katwazanga vyuma twafwelelako. Kaha nawa vanahase kukana kuvambulila mwomwo yetu vavene tunasoloka nge katwavifweleleleko. Oloze nge natuhanjika nakukunyuka chakuhona woma, kaha nachivalingisa vatufwelele nakwitavila vyuma natuvalweza.”

18. Vyuma muka vyaliweza mukuzachila ulwilo wenu?

¹⁸ Nganomu tunamono, kuzachila lika ulwilo wenu chapwa chachilemu. Vyuma vyaliweza mukuzachila ulwilo shina kutanga Mazu aKalunga nakuwashinganyekanga, nakulomba kuli Yehova nakushinganyeka havyuma namilingila mukuyoya chenu hauka wenu. Kulinga vyuma kanevi nachimikafwa muzamise usepa wenu naYehova. Echi nachimilingisa mwambulile vakwenu vyuma mwafwelela.—Tangenu Samu 73:28.

19. Mwomwo ika mwatela kukilikita nangolo hakuzachila ulwilo wenu?

¹⁹ Yesu ambile ngwenyi: “Kachi nge mutu mwasaka kungukavangiza, alikane ivene nakumbata chitondo chenyi chakuyanjishila, kaha angukavangizenga lika.” (Mateu 16:24) Chapundu vene, mutu uze mwasaka kupwa muka-Kulishitu atela kulihana nakumumbapachisa. Kaha mutu kana eji kupwanga wakutokwa mujijila jajivulu makumbi ano, kaha nawa mwakapwa nakuyoya chahaya myaka yosena mukaye kakahya. Shikaho mwatela kutwalaho lika kukilikita mangana muzachile ulwilo wenu.