1, 2. Uno chakutalilaho tunashimutwila chasolola ngachilihi nge tunahase kwalumunako vyuma mukuyoya?

MUKWEZE umwe walijina lyaTony uze kapwile naiseko, apwile navishinganyeka vyakusaka kwecha shikola. Ou mukweze kazangile shikolako, kaha nawa kusongo yavyalumingo ayilenga nakutala mivwimbimbi chipwe kuya nakuhema namasepa jenyi. Kapwile chilyanyiko, kaha nawa kanwinenga mauundu akupendesako. Chipwe ngocho, katachikijile ovyo tweji kuyoyelangako. Tony ahuhwasanyinenga numba nge Kalunga kwatwama nyi chiku. Mukuhita chalwola aliwanyine nalunga umwe napuwenyi vaze vapwile Vinjiho jaYehova, kaha avahulishile vamulweze numba nge Kalunga kwatwama nakukumbulula vihula vize apwile navyo. Vaze Vinjiho vamuhanyine jimbuloshuwa jaChingeleshi jivali jakwamba ngwavo, The Origin of Life—Five Questions Worth Asking nayakwamba ngwavo, Was Life Created?

² Omu vaze valunga napwevo vakindulukilile kuli Tony, vawanyine nalumuna vishinganyeka vyenyi. Vawanyine nakumisa kutanga jimbuloshuwa josena najikiko kwijiva jinalifunyufunyu. Kaha avalwezele ngwenyi “Ngwafwelela jino ngwami Kalunga kwatwama.” Ngocho etavilile kulinangula Mbimbiliya, nakuputuka jino kutachikiza kanawa omwo chapwa kuyoya. Numba tuhu hakavanga Tony kalingilenga kanawa kushikolako, oloze aputukile jino kulinga kanawa chikuma  kuhambakana vaka-shikola vosena. Mukulwane washikola nawa alikomokelele chikuma hakumona vilinga vyaTony vinalumuka. Shikaho amuhulishile ngwenyi: “Uno kulikata naVinjiho jaYehova chikiko chinakulingisa walumune vilinga vyove nakuputuka kulinga kanawa kushikola tahi?” Tony ambile ngwenyi eyo, kufumaho amwambulilile. Tony akumishile shikola yenyi, kaha apwa jino payiniya washimbu yosena, kaha nawa muka-kuzachila muchikungulwilo. Apwa wakuwahilila mwomwo atachikiza ngwenyi ali jino naIse Yehova uze amuzanga.—Samu 68:5.

3. Chuma muka Yehova asaka vakweze valingenga?

³ Chakutalilaho chaTony chasolola chikupu nge Yehova azakama enu vakweze muvosena. Asaka mufukile nakupwa nachiyoyelo chamwenemwene. Evi vikiko Yehova ali nakumikolezezela ngwenyi: ‘Anukenu Tengi yenu Wamunene hamakumbi aukweze wenu.’ (Kwambu. 12:1) Numba tuhu makumbi ano, kachapwa chachashi kulinga chuma kanako, oloze Kalunga nahase kumikafwa mufukile muukweze wenu namukuyoya chenu chosena. Hakusaka twivwishise chishina kanechi, tushimutwilenu havyuma vyakafwile vaIsalele vahase kwingila muLifuchi lyaLushiko navize vyakafwile Ndavichi afungulule Ngolyate.

4, 5. Vyuma muka natulinangula kuli vaIsalele vaze vafungulwile vaKanane naNdavichi uze afungulwile Ngolyate? (Talenu mivwimbimbi yakulivanga.)

⁴ Omu vaIsalele vapwile kwakamwihi naLifuchi lyaLushiko, Kalunga kavalwezele vaputuke kulinangula mwakuzungila jitako. (Lushi. 28:1, 2) Oloze avalwezele ngwenyi vatelelele kwononoka jishimbi jenyi nakumufwelela. (Yoshu. 1:7-9) Etu vatu tunahase kumona vyuma ahanjikile Kalunga kupwa vyamokomoko. Oloze vyuma kana vyapwile vyavilemu mwomwo Yehova akafwile vatu jenyi vafungulule vaKanane. (Yoshu. 24:11-13) Chikupu vene hakusaka twononoke kuli Kalunga, twatela kupwa nalufwelelo, kaha lufwelelo kana nalutukafwa tufukile. Chishina kana chapwa chachilemu namakumbi ano, kaha chinahase kutukafwa.

⁵ Ngolyate apwile chindume. Apwile wamusuku jimita kafwe 2.9, kaha nawa apwile nawa navitwa vyakwashisa jita vyosena. (Samwe. 1, 17:4-7) Oloze Ndavichi apwile kaha navyuma vivali. Apwile nachikapa, kaha nawa afwelelele ngwenyi Yehova Kalunga mwamukafwa. Vatu vaze kavapwile nalufweleloko pamo vamwene ngwavo Ndavichi apwile nakazamuzamu hakusaka kuzunga naNgolyate. Oloze vishinganyeka kana vyapwile vyakuhenga. Ngolyate ikiye apwile nakazamuzamu.—Samwe. 1, 17:48-51.

6. Vyuma vyeka muka natushimutwila muchihande chino?

⁶ Muchihande chinafumuho twashimutwilanga havyuma viwana vize vyeji kutulingisanga tuwahilile nakufukila mukuyoya. Vyuma kana shina kulya chakushipilitu, namasepa vaze atuhana Kalunga, nakulitomena vyuma vize navitunganyalisa, nalisesa lize atuhana Kalunga hakupwa tuvatu jenyi. Muchihande chino natushimutwila havyuma vyeka vize vyeji kutulingisanga tuwahilile nakufukila mukuyoya. Tushimutwilenu jino hajindongi jimwe jahali Samu 16.

7. (a) Uno mutu wakuhya kushipilitu apwa ngachilihi? (b) Uno “chazano” chaNdavichi chapwile chika, kaha chamunganyalishile ngachilihi?

⁷ Mutu wakuhya kushipilitu eji kufwelelanga Kalunga, kaha nawa amona vyuma nganomu avimona ikiye. Asaka Kalunga amutwaminyine, kaha nawa afwila kwononoka jishimbi jaKalunga. (Koli. 1, 2:12, 13) Ndavichi atuhana chakutalilaho chamwaza. Embile ngwenyi: “Yehova ikiye chazano chami vananguhane, ikiye lupasa lwami.” (Samu 16:5) “Chazano” chize avulukile Ndavichi chalumbunwine usoko uze apwile nawo naKalunga, uze apwile uchinyino wenyi. (Samu 16:1) Evi vikiko vyamulingishile ambenga ngwenyi: “Ngweji kulisambanga.” Chikupu vene, kulikata naKalunga chikiko chalingishile Ndavichi apwenga wakuwahilila.—Tangenu Samu 16:9, 11.

8. Vyuma muka vinahase kulingisa mutu awahilile?

⁸ Vatu vaze veji kufwilanga luheto naviseke kavapwa vakuwahilila ngana muze apwile  Ndavichiko. (Chimo. 1, 6:9, 10) Ndumbwetu umwe wamuCanada ambile ngwenyi, “kuwahilila chamwenemwene kacheza mwomwo yaluheto ali nalwo mutuko, oloze mwomwo yavyuma tweji kuhananga Yehova Kalunga uze eji kutuhanga mawana amwaza osena.” (Yako. 1:17) Chikupu vene, kufwelela Yehova nakumuzachila nachimilingisa muwahilile nakupwa vakufukila mukuyoya. Vyuma muka navimikafwa mupwenga nalufwelelo lwakukola? Mwatela kuwanangako lwola lwakupwa hamwe naYehova kuhichila mukutanga Mazu enyi, nakutalanga vyuma atenga, nakushinganyekanga havilinga vyenyi vyakufwana nge zangi.—Loma 1:20; 5:8.

9. Uno Mazu aKalunga anahase kumyalumuna ngachilihi ngana muze chapwile kuli Ndavichi?

⁹ Lwola lumwe Kalunga eji kusololanga zangi yenyi kuhichila mukutuhuhumuna. Ndavichi naikiye etavililenga kumuhuhumuna. Ambile ngwenyi: “Nangwalisa Yehova uze nangulweze mangana. Vishinganyeka vyami vyeji kungwololanga numba vene naufuku.” (Samu 16:7) Chikupu vene, Ndavichi ashinganyekelenga havyuma vamuhuhumwinenga. Echi chasolwele nge etavililile Yehova amwalumune. Kachi nge nayenu namwitavilanga kuhuhumuna chaKalunga, kaha namumuzanga chikuma nakufwila kumwononoka. Namupwa nawa muvakuhya kushipilitu. Ndumbwetu Christin ambile ngwenyi, “Nge nguli nakuhehwojola nakushinganyeka havyuma nguli nakutanga, ngweji kumonanga chikupu ngwami vyuma kana Yehova navisonekela yami.”

10. Kweseka nachisoneka chaIsaya 26:3, uno kumona vyuma vyakushipilitu kupwa vyavilemu nachiminganyalisa ngachilihi?

¹⁰ Chapundu vene, kumona vyuma vyakushipilitu kupwa vyavilemu cheji kulingisanga nawa mutu apwenga namangana nachinyingi, nakumukafwa nawa atachikize omu kali kaye navyuma navikasoloka kulutwe. Mwomwo ika Kalunga eji kumihanyinanga mangana nachinyingi kana? Asaka musakule kanawa vyakulinga mukuyoya, nakutalilila nawa vyuma navikasoloka kulutwe chakuzeneka kwivwa woma. (Tangenu Isaya 26:3.) Ndumbwetu Joshua wakuUnited States ambile ngwenyi: “Kupandama kuli Yehova nachimikafwa mumone vyuma vyavilemu navize kavyapwa vyavilemuko.” Echi chinahase kumilingisa muwahilile.

11. Uno Ndavichi asolwele ngachilihi mwakupwila namasepa vamwenemwene?

¹¹ Tangenu Samu 16:3. Ndavichi atachikijile kanawa mwakupwila namasepa vamwenemwene. ‘Alivwishilenga kuwaha chikuma’ kupwa hamwe navatu vaze vazanga Yehova. Avavulukilenga ngwenyi vapwile “vaka-kujila” kulumbununa nge vapwile vatoma vakusungama. Muka-kwimba jisamu weka naikiye ahanjikile mazu wowamwe kutalisa kukusakula masepa ngwenyi: “Ngwapwa ngusepa lyavosena vaze vakwivwa woma, navaze veji kulamanga jindongi jove.” (Samu 119:63) Ngana muze twalinangulanga muchihande chinafumuho, nayenu munahase kuwana masepa vamwenemwene vaze veji kwivwanga Yehova woma nakumwononoka. Kaha nawa vanahase kupwa vamyaka yakulisezaseza.

12. Vyuma muka vyalingishile Ndavichi naYonatane vapwenga masepa?

¹² Muka-kwimba jisamu Ndavichi kapwile kaha namasepa vaze vapwile namyaka yakweseka hamwe nayikiyeko. Kutala munahase kwanuka lijina lyamutu “wangolo” uze apwile sepa lyenyi tahi? Apwile ikiye Yonatane. Usepa wavo wapwile wakulipwila chikuma, vausoneka muMbimbiliya. Uno mwatachikiza ngwenu Yonatane ahambakanyine Ndavichi namyaka 30 tahi? Kaha vyuma muka chavalingishile vapwenga masepa? Vyuma vyavalingishile shina kupwa nalufwelelo muli Kalunga, kulivumbika umwe namukwavo, nakumona nawa omu vosena vapwile vakumika halwola vazungilenga navaka-kole jaKalunga.—Samwe. 1, 13:3; 14:13; 17:48-50; 18:1.

13. Chuma muka nachimilingisa mulikwata usepa navatu vakulisezaseza? Hanenu chakutalilaho.

¹³ Ngana muze chapwile kuli Ndavichi naYonatane, nayetu nawa tweji ‘kulivwisanga kuwaha chikuma’ kuzanga vaze vazanga Yehova vaze nawa vamufwelela. Kiera uze nazachilanga Kalunga hamyaka yayivulu ambile ngwenyi, “Ngwalikwata usepa navatu vamukaye kosena, vakuvisemwa  nachiyoyelo chakulisezaseza.” Kachi nge namufwila kulikwata usepa navatu vakulisezaseza, namumona omu ngolo jaMazu aKalunga nashipilitu yenyi navimikafwa.

14. (a) Chuma muka nachimikafwa mulitomene kulinga vyuma vyamwaza mukuyoya chenu? (b) Vakweze vamwe vamona ngachilihi kulitomena kuzata milimo yakushipilitu?

¹⁴ Tangenu Samu 16:8. Ndavichi azachililenga lika Kalunga mukuyoya chenyi chosena. Nayenu nawa namulivwisa kuwaha kuyoya kachi nge namuhaka milimo yaYehova kulutwe, nakumulomba amikafwe mukala vyuma namulitomena kulinga. Ndumbwetu Steven ambile ngwenyi, “Kulitomena chuma chimwe, nakuchitesamo, nakushinganyeka havyuma vize ngunazachilaho mangana nguzovoloke cheji kungwivwisanga kuwaha.” Ndumbwetu walunga wakanyike wakuGermany uze azachila kulifuchi lyeka ambile ngwenyi, “Omu nangukashinakajiwa kangwasakile ngukamone ngwami vyuma vyosena ngwazachile mukuyoya chami vyapwile vyakulinganyalisa yami ivene kahako.” Twafwelela ngwetu nayenu mukiko muli nakufwila. Nge mukiko, kaha zachisenu wana wenu muvumbike Kalunga nakuzachilako vakwenu nawa. (Ngale. 6:10) Litomenenu kuzata milimo yakushipilitu, kaha lombenu Yehova amikafwe mutesemo milimo munalitomena. Yehova eji kwivwanga kuwaha kukumbulula kulomba changana.—Yowa. 1, 3:22; 5:14, 15.

15. Vyuma muka munahase kulitomena kuzata? (Talenu lipwata lyakwamba ngwavo “Vyuma Vyamwaza Vyakulitomena Kulinga.”)

¹⁵ Vyuma muka muli nakufwila kulitomena kuzata? Munahase kulitomena mukumbululenga hakukunguluka kuzachisa mazu enu, nakuzata upayiniya chipwe kuya nakuzachila haMbetele. Munahase nawa kweseka kulinangula lilimi lyeka mangana pamo mukazachileko kulifuchi lyeka kuze vazachisa lilimi kana. Ndumbwetu wakanyike Barak uze azata mulimo washimbu yosena ambile ngwenyi, “Ngweji kwivwanga kuwaha hakuwana nge ngolo jami josena nguli nakujizachisa kumilimo yaYehova hakumbi hakumbi. Kakweshi milimo yeka yinahase kungusuulwisa ngana mwamulimo kanako.”

16. Ndavichi amwenenga ngachilihi jindongi jaYehova jakwoloka, kaha mwomwo ika?

¹⁶ Tangenu Samu 16:2, 4. Ngana muze twamonanga muchihande chinafumuho, jishimbi najindongi jaKalunga jatusokola nakutulingisa jino tufwile kuzanga vyuma vyamwaza nakuhunga vyuma vyavipi. (Amo. 5:15) Muka-kwimba jisamu Ndavichi amwene ngwenyi ‘kuwaha chenyi  chafumine kuli Yehova.’ Kuwaha chapwa kulinga vyuma vyamwaza. Ndavichi azachile nangolo mangana alondezeze Kalunga kenyi, nakufwila kupwa nakuwaha ngana chize chaKalunga. Kaha nawa ahungile vyuma vize ahunga Kalunga. Vyakufwana nge, kulemesa makombelo, chuma chize cheji kulingisanga vatu vahone kuhana Yehova kavumbi kaze kamutela.—Isa. 2:8, 9; Kuso. 4:11.

17, 18. (a) Ndavichi avulukile ngwenyi vaze veji kukundwizanga kulemesa chamakuli veji kumonanga ukalu muka? (b) Chuma muka chili nakulingisa vatu makumbi ano ‘valivulishile vyuma vyakuvanehela chinyengo’?

¹⁷ Kushikulu mukulemesa chamakuli mwaliwezele nakulinga ujila. (Hoze. 4:13, 14) Kulemesa kana chevwishilenga kaha vatu kuwaha oloze kachavanehelele kuwahilila chamwenemweneko. Ngana muze ahanjikile Ndavichi ngwenyi “vaze veji kulemesanga tulunga veka veji kulivulishilanga vyuma vyakuvanehela chinyengo.” Kaha nawa vanehelenga ukalu hali vana vavandende vavavulu. (Isa. 57:5) Yehova ahungilenga vilinga kana. (Yele. 7:31) Kachi nge kumwapwile halwola kana twafwelela ngwetu kachi mwevwile kuwaha nge visemi jenu vafwelelele muli Yehova nakumwononoka.

¹⁸ Makumbi ano nawa mukulemesa chamakuli mwaliweza kulinga ujila nakulisavala chavatu vausonyi woumwe. Chikupu vene vilinga vyavipi chivitwalaho lika namakumbi ano. (Koli. 1, 6:18, 19) Ngana muze muli nakumona, vatu ‘chivalivulishila vyuma vyakuvanehela chinyengo.’ Shikaho enu vakweze mwatela kwivwilila kuli Senu wamwilu. Mwatela kumona ngwenu chapwa chachilemu kuli yenu kumwononoka ikiye. Tachikizenu ngwenu ukalu weji kufumanga hakulinga vyuma vyavipi wapwa waunene kuhambakana kuwaha chize namulivwisa hakatando kakandende kaha. (Ngale. 6:8) Joshua uze twavulukanga lyehi ambile ngwenyi, “Tunahase kuzachisa lisesa lyetu mukala jila, oloze kulizachisa mujila yakuhenga kachapwa chamwazako.”

19, 20. Vyuma muka vyamwaza navakalivwisa kuwaha vakweze vaze vafwelela muli Yehova nakumwononoka?

¹⁹ Yesu alwezele vaka-kumukavangiza ngwenyi: “Kachi nge namutwamanga mumazu ami, kaha chikupu vene munapu mutumbaji twami. Namutachikiza muchano, kaha muchano naumilingisa kupwa vakulihehwa.” (Yowa. 8:31, 32) Lisesa lyetu lyeji kutukafwanga tulihende kukukundwiza kwitava chamakuli hamwe kaha nakupanda. Kaha nawa lyeji kutukafwanga namuvyuma vyeka nawa. Ngana muze tunamono, nalikatukafwa tukapwe “mukulihehwa chaupahu chavana vaKalunga.” (Loma 8:21) Noholyapwa vene munahase kumona kuwaha chatwama mukulihehwa kana kachi nge namukavangiza mazu aKulishitu chipwe ngwetu kunangula chenyi. Nge namulinga ngocho, kaha “namutachikiza muchano” keshi hakuutanga kahako oloze hakutwama mumuchano.

²⁰ Enu vakweze, monenunga lisesa lyenu amihana Kalunga kupwa lyalilemu. Zachisenu kanawa lisesa lyenu mangana mukayoye kanawa kulutwe. Ndumbwetu umwe walunga wamukweze ambile ngwenyi: “Kachi nge vakweze navazachisa kanawa lisesa lyavo mujila yamwaza, kaha nachikavakafwa kulutwe kachi nge navakasaka kusakula kulinga vyuma vyavilemu, vyakufwana nge kwingila milimo, chipwe kusakula kwingila muulo chipwe kutwama ujike hakatando kakandende.”

21. Chuma muka nachimikafwa mangana mutwaleho lika kutambuka mujila yakuya “kukuyoya chamwenemwene”?

²¹ Vyuma vize veji kwambanga ngwavo vyamwaza mukaye kano kakuhuka kavyapwa vyamwaza chikumako, mwomwo vyapwa kaha vyakashimbu kakandende. Katweshi kutachikiza ovyo navikatuwana hameneko. (Yako. 4:13, 14) Shikaho chuma chachilemu twatela kulinga shina kupwa mujila yize nayitutwala “kukuyoya chamwenemwene” kulumbununa kuyoya chahaya myaka yosena. (Chimo. 1, 6:19) Chipwe ngocho, Kalunga keshi kutushinjila tutambuke mujila kanako. Mutu himutu atela kulisakwila ivene. Shikaho mwatela kulingisa Yehova kupwa “chazano” chenu. Mwatela kumona “vyuma vyamwaza” amihana kupwa vyavilemu. (Samu 103:5) Kaha nawa fwelelenu ngwenu mwamikafwa mupwenga ‘vakuwahilila haya myaka yosena.’—Samu 16:11.