1, 2. Mwomwo ika chapwila chamwaza kwivwilila kuli Tengi yetu nge tuli nakulitomena vyakulinga mukuyoya? (Talenu mivwimbimbi yakulivanga.)

NGE mwapwa muvakweze, kaha twafwelela ngwetu vatu vali nakumilweza vyuma vyavivulu kutalisa hachiyoyelo chenu chakulutwe. Chakutalilaho, milongeshi, navakulwane vaze veji kuhananga jindongi, navatu veka pamo vali nakumikolezeza mangana muyenga kumashikola ahelu nakukapwa hamilimo yayinene yajimbongo jajivulu. Chipwe ngocho, omu keshi mukiko asaka Yehovako. Yehova asaka muzate nangolo shimbu muchili kushikola mangana omu namukakumisa mukawane mwakuyoyela. (Kolo. 3:23) Oloze kachi nge muli nakusaka kusakula vyuma vyavilemu mwatela kulinga mukuyoya, kaha tachikizenu ngwenu Yehova asaka mukavangize jindongi jamuMbimbiliya jize najimikafwa musakule vyuma vize navimwivwisa kuwaha mumakumbi ano akukuminyina.—Mateu 24:14.

² Anukenu ngwenu Yehova atachikiza vyuma vyosena. Atachikiza vyuma navisoloka kulutwe kukaye kano, nalwola nawa nakakakuma. (Isa. 46:10; Mateu 24:3, 36) Atachikiza nawa vyuma vinahase kutusuulwisa nakutwivwisa kuwaha navize vinahase kutwivwisa kupihya nakutuhombesa. Shikaho, numba tuhu vyuma navamilweza vatu  navisoloka kupwa vyamwaza, oloze nge navilimbalaka naMazu aKalunga, kaha muvyuma kana kamweshi manganako.—Vishi. 19:21.

3, 4. Uno kwivwilila kuvyuma vyamakuli chanehele ukalu muka kuli Alama naEve navana vavo?

³ Kufuma vene halwola luze Satana alikangile kuli Kalunga, vatu vanapunga nakuhanjika makuli kuli vakwavo. Chakutalilaho, omu Satana ongele Eve, ambile ngwenyi kachi nge Eve nalunga lyenyi navasakula kulinga vyuma vanasake, kaha navapwa vakuwahilila mukuyoya chavo. (Kupu. 3:1-6) Oloze vyuma kana vyapwile vyamakuli. Satana asakile Alama naEve navana vavo vaze vatelelele kusema valiluule kuli ikiye nakumulemesa muchishishisa chakulemesa Yehova. Kutala avalingilileko vyuma vimwe vyamwaza tahi? Nduma. Yehova ikiye avahanyine vyuma vyosena vize vapwile navyo, vyakufwana nge milemba yamwaza yize vapwile nakutwamamo, namijimba yakukupuka yize yatelelele kuyoya haya myaka yosena.

⁴ Chaluvinda, Alama naEve valikangile kuli Kalunga. Nganomu mwatachikiza kulinga chuma kana chavanehelele ukalu waunene. Ngana muze lutemo lweji kuzuzanga kachi nge vanalutete, naAlama naEve nawa vaputukile kuzuza chindende chindende, kaha vafwile. Echi chalingishile navana vavo vaswane shili kana. (Loma 5:12) Chipwe ngocho, vatu vavavulu vachili lika nakulikanga kuli Kalunga. Vasaka kulinga vyuma vasaka vavene. (Efwe. 2:1-3) Ukalu veji kumonanga uli nakusolola nge “kakweshi mangana . . . [aze anahase] kuhonesa Yehovako.”—Vishi. 21:30.

5. Kalunga afwelelele ngwenyi vatu jenyi navalinga ika, kaha vishinganyeka vyenyi vyapwile vyakwoloka tahi?

⁵ Chipwe ngocho, Yehova afwelelele chikupu ngwenyi vatu vamwe kuhakilako navakweze vavavulu vanahase kumutondatonda nakusaka kumuzachila. (Samu 103:17, 18; 110:3) Yehova amona vatu kana kupwa vavalemu chikuma. Kutala nayenu mwatwama hamukana kana tahi? Nge mukiko, kaha twafwelela chikupu ngwetu muli nakulivwisa kuwaha “vyuma vyamwaza” vyakufuma kuli Kalunga vize vili nakumilingisa muwahilile. (Tangenu Samu 103:5; Vishi. 10:22) Nganomu natumona muchihande chino evi “vyuma vyamwaza” vyapwa kulya chakushipilitu, namasepa vamwenemwene, navyuma vyamwaza twatela kulitomena kulinga, nakulihehwa chamwenemwene.

6. Mwomwo ika mwatela kuhaka vyuma vyakushipilitu kulutwe, kaha Yehova eji kumihanangavyo ngachilihi?

⁶ Etu vatu twalihandununa natunyama mwomwo etu twasaka vyuma vyakushipilitu, kaha nawa Tengi yetu ikiye kaha nahase kutukafwa tulinge ngocho. (Mateu 4:4) Nge namwivwililanga kuvyuma vize mwamilweza Kalunga, kaha namupwa nachinyingi, namangana, kaha nawa namuwahilila. Yesu ambile ngwenyi: “Vawahilila vaze vejiva ngwavo vasaka vyuma vyakushipilitu.” (Mateu 5:3) Kalunga eji kumizakamanga kushipilitu kuhichila muMazu enyi nakulya chakushipilitu chize eji kumihananga kuhichila muli “ndungo wakushishika wakuzangama.” (Mateu 24:45) Chikupu vene, kulya kana cheji kutunganyalisanga mwamunene.—Isa. 65:13, 14.

7. Vyuma muka namunganyala nge namulya kulya chakushipilitu chize eji kutuhananga Kalunga?

⁷ Kulya chakushipilitu chize cheji kufumanga kuli Kalunga nachimikafwa mupwenga namangana nauhashi wakushinganyeka. Kaha kupwa navilinga kanevi nachimikinga mujijila jakulisezaseza. (Tangenu Vishimo 2:10-14.) Chakutalilaho, vyuma kana navimikafwa mutachikize kunangula chamakuli chakufwana nge chize chakwamba ngwavo, kakwatwama Kalungako. Navimikinga nawa kuvishinganyeka vyamakuli vyakwamba ngwavo jimbongo naluheto vikiko vyeji kunehanga kuwahilila. Kaha nawa navimikafwa muhone kupwa navilinga vyakuhenga vize navimivwisa kupihya. Shikaho twalenuho lika kupwanga namangana nauhashi wakushinganyeka nakumona vyuma vyakushipilitu kupwa vyavilemu. Omu namutwalaho lika kulinga ngocho, namutachikiza  jino chikupu ngwenu Yehova amizanga, kaha nawa asaka kumilingila vyuma vyamwaza.—Samu 34:8; Isa. 48:17, 18.

8. Mwomwo ika mwatela kupandama chikuma kuli Kalunga oholyapwa, kahechi nachikaminganyalisa ngachilihi kulutwe?

⁸ Kalinwomu kaye kaSatana vakanongese, ngocho Yehova kaha ikiye mwakatukinga. Chikupu vene, ikiye kaha mwakatuhana vyuma vize navikasakiwa mukuyoya chetu. (Hamba. 3:2, 12-19) Shikaho luno lukiko lwola twatela kupandama chikuma kuli Setu wamwilu nakumufwelela chikuma. (Petu. 2, 2:9) Kulinga ngocho, nachimikafwa mupwenga vakumika chamokomoko naukalu namumona. Namwivwa ngana muze evwile muka-kwimba jisamu Ndavichi uze asonekele ngwenyi: “Ngweji kuhakanga Yehova kumeso ami makumbi osena. Kaveshi kukangunyikisako mwomwo ali kulivoko lyami lyachilyo.”—Samu 16:8.

9. (a) Kweseka nachisoneka chaYowano 6:44, vyuma muka eji kulinganga Yehova? (b) Kuliwana navakwenu Vinjiho halwola lwatete nakuliwana navatu vaze kavapwa Vinjihoko chalihandunwina halihi?

⁹ Yehova eji kukafwanga vatu vavavwovu michima vaze asaka ngwenyi vapwenga mutanga yenyi yakushipilitu, hakuvakoka chikoki chikoki mangana vezenga mukwitava chamuchano. (Tangenu Yowano 6:44.) Chakutalilaho, vyuma muka mweji kutachikizanga kachi nge munaliwane namutu uze kapwa Chinjihoko halwola lwatete? Twafwelela ngwetu mweji kutachikizanga kaha vyavindende hali mutu kana. Pamo lijina lyenyi nasolokeso yenyi kaha. Oloze omu keshi mukiko chapwako kachi nge munaliwane namukwenu Chinjiho. Numba tuhu mutu kana wakuchisemwa cheka, chipwe kulifuchi lyeka, chipwe kumuyachi weka, oloze mukwechi vyuma vyavivulu vize mwatachikiza lyehi hali ikiye, kaha ikiye nawa atachikiza vyavivulu hali enu.

10, 11. Vinjiho jaYehova vavatachikijila haka, kahechi nachiminganyalisa ngachilihi?

¹⁰ Chakutalilaho, mweji kutachikizanga washiwashi “lilimi” lyenu kulumbununa “lilimi litoma” lyamuchano. (Zefwa. 3:9) Echi cheji kumikafwanga mutachikize ngwenu muvosena mwafwelela muli Kalunga, nakukavangizanga jishimbi jenyi, kaha nawa mwatalilila vyuma vyovimwe kulutwe. Chikupu vene, kutachikiza vyuma kana hali mutu nachimikafwa muzamise lufwelelo lwenu nakumilingisa mutunge usepa wakukola naikiye.

 ¹¹ Twatachikiza ngwetu, hakupwa muvangamba jaYehova, mukwechi masepa vamwenemwene. Masepa kana vatwama mukaye kosena numba tuhu vavavulu kanda muchiliwanengaho lyehi navo. Kutala kuliko vatu veka vaze veji kulivwisanga kuwaha kutokwa kanechi tahi?

12. Vyuma muka vyakushipilitu vize munahase kulitomena kulinga?

¹² Tangenu Muka-kwambulula 11:9–12:1. Kutala mwalitomena kulingako vyuma vimwe vyakushipilitu tahi? Pamo mwalitomena kutanganga Mbimbiliya hakumbi hakumbi. Nyi pamo muli nakufwila kuhotola uhashi wenu wakuhanjika nakunangula. Kala vyuma namulinga, twafwelela ngwetu mweji kwivwanga kuwaha chikuma kachi nge vakwenu navamisangejeka havyuma vyamwaza muli nakulinga. Mwomwo ika? Mwomwo mwatachikizanga ngwenu muli nakulinga mwaya muchima waKalunga ngana muze alingilenga Yesu.—Samu 40:8; Vishi. 27:11.

13. Mwomwo ika kuzachila Kalunga chapwila chakulipwila kuhambakana kufwila vyuma vyamuno mukaye?

¹³ Nge namuhaka vyuma vyakushipilitu kulutwe, kaha muli nakuzata mulimo uze naumilingisa muwahilile mukuyoya mwomwo kamweshi nakulishinako. Kaposetolo Paulu asonekele ngwenyi: “Pwenunga vakuzama mbe, chakuzeneka kusosoloka, shimbu yosena pwenunga navyuma vyavivulu vyakuzata mumulimo waMwata, hakutachikiza ngwenu kukilikita chenu kacheshi chakulishina tuhuko kutalisa kuli Mwata.” (Koli. 1, 15:58) Chochimwe nawa, numba tuhu vatu vaze vatwama naluheto veji kusolokanga nge veji kulivwisanga kuwaha kuyoya, oloze kukilikita chavo chapwa chakulishina kaha. (Luka 9:25) Omu mukiko ambile naMwangana Solomone, kaha nayetu tunahase kulinangulako vyuma vimwe.—Loma 15:4.

14. Vyuma muka namulinangula kuli Solomone?

¹⁴ Solomone uze apwile naluheto chikuma uze nawa ayile fuma alyambile ngwenyi, “mana ngweseke kwingila muviseke ngumone vyuma vyamwaza vyeji kufumangamo.” (Kwambu. 2:1-10) Atungile jizuvo, nakulima matepa nakulinga vyuma vyosena vize ajinyine. Jino omu akumishile, kutala asuulukile navyuma alingile tahi? Solomone ivene ambile ngwenyi: “Omu ngwashinganyekele hamilimo yosena ngwazachilenga namavoko ami . . . , ngwamwene ngwami vyuma vyosena vyapwile vyaufwefwelekete. . . [Kakwapwile chuma chimwe chize chapwile nanganyo yamwenemweneko].” (Kwambu. 2:11) Kutala nayenu muli nakufwila kuzachisa chishina kana tahi?

15. Mwomwo ika lufwelelo lwapwila lwalulemu, kaha munahase kunganyala ngachilihi kweseka nachisoneka chaSamu 32:8?

¹⁵ Yehova kasaka mulinge vyuma vize navimivwisa kupihya nakumilingisa mukaliveyeko. Asaka mumwononokenga nakulinga mwaya muchima wenyi. Echi chasakiwa kupwa nalufwelelo lwakukola, kaha lufwelelo kana kalweshi kukamilingisa mukaliveyeko. Chikupu vene, Yehova keshi kukavulyama ‘zangi munasolola yakuzanga lijina lyenyiko.’ (Hepe. 6:10) Shikaho, twalenuho lika kuzamisa lufwelelo lwenu nakutachikiza ngwenu Senu wamwilu asaka kumilingila vyuma vyamwaza.—Tangenu Samu 32:8.

16. Mwomwo ika twatela kuvumbikila lisesa lyetu nakulizachisa nawa kanawa?

¹⁶ Paulu asonekele ngwenyi: “Oku kuli shipilitu yaYehova kukiko vene kuli kulihehwa.” (Koli. 2, 3:17) Chikupu vene, Yehova asaka mupwenga muvakulihehwa nakuzachisa nawa lisesa lyenu mujila yamwaza yize nayimikinga. Chakutalilaho, pamo mwatachikizako vakweze vamwe vaze vasaka kutala mivwimbimbi yauselesele nakulinga ujila, nakwazana mukuhema chachipi, nakunwa maundu akupendesa nawala. Vatu kana vanahase kulivwisa kuwaha vyuma kana oloze kulinga ngocho chinahase kuvanehela ukalu wakufwana nge misongo, chipwe vene kufwa.  (Ngale. 6:7, 8) Chikupu vene, vaze veji kwazananga muvyuma kana vanahase kushinganyeka ngwavo vapwa ‘vakulihehwa’ olozenyi chiku.—Chitu. 3:3.

17, 18. (a) Uno kwononoka Kalunga cheji kulingisanga ngachilihi vatu vapwenga vakulihehwa? (b) Uno kulihehwa chize vapwile nacho vaAlama naEve chalihandununa ngachilihi nachize vali nacho vatu makumbi ano?

¹⁷ Vatu vangahi mwevwaho lyehi ngwavo vanaviji mwomwo yakwononoka jindongi jamuMbimbiliya? Naumwe wauchi. Shikaho kwononoka Yehova cheji kulingisanga vatu vapwenga vakulikangula kumujimba nakupwa nawa vakulihehwa. (Samu 19:7-11) Kuzachisa kanawa lisesa lyenu kweseka najishimbi najindongi jaKalunga, nachilingisa Kalunga navisemi jenu vamone ngwavo muli nakuzachisa kanawa lisesa lize vamihana. Kaha nawa Kalunga afwelelesa vangamba jenyi vakushishika ngwenyi, mwakavahana kulihehwa chamwenemwene chize vavuluka muMbimbiliya ngwavo ‘kulihehwa chaupahu chavana vaKalunga.’—Loma 8:21.

¹⁸ Alama naEve navakiko vapwile nakulihehwa kanechi. Chakutalilaho, omu vapwile mumilemba yaEtene, Kalunga avakanyishile vyuma vingahi? Avakanyishile chuma chimwe kaha. Avakanyishile kulya kumutondo umwe kaha. (Kupu. 2:9, 17) Kutala vyuma avalwezele vyapwile vyavikalu kukavangiza tahi? Nduma. Oloze Makumbi ano, vatu vali nakutunga jishimbi jajikalu nakushinjila vatu mangana valinangulejo nakujononoka.

19. Yehova ali nakutunangula ngachilihi mangana tupwenga vakulihehwa?

¹⁹ Yehova azakama vangamba jenyi. Muchishishisa chakututungila jishimbi jajivulu, ikiye eji kutunangulanga namuchima wakutalilila chikoki mangana tuhase kwononoka lushimbi luze lwahanjika hazangi. Asaka tukavangizenga jindongi jamuMbimbiliya nakuhunga vyuma vyavipi. (Loma 12:9) Yesu ahanjikile chishina kana muChihande chenyi ChahaPili, chize chashindakanyine havyuma vyeji kulingisanga mutu alinge vyuma vyavipi. (Mateu 5:27, 28) Hakuwana nge Kulishitu apwa Mwangana waWangana waKalunga, shikaho mwakatunangulanga lika namulifuchi lyalihya mangana tukazange kwoloka nakuhunga upapwoki ngana muze auhunga ikiye. (Hepe. 1:9) Kaha nawa mwakalingisa mijimba navishinganyeka vyetu vikapwe vyakukupuka. Katweshi kukapwa cheka muvyeseko vyakusaka kulinga shili chipwe kumona ukalu mwomwo yashiliko. Halwola kana natukalivwisa jino kuwaha ‘kulihehwa chaupahu’ chize atushika Yehova.

20. (a) Uno Yehova eji kuzachisanga ngachilihi lisesa lyenyi? (b) Kaha natunganyala ngachilihi nge natumulondezeza?

²⁰ Chipwe ngocho, mulifuchi lyalihya katweshi kukapwa nalisesa lyakulinga kala vyumako. Lisesa lyetu nalikapendamina hazangi yakuzanga Kalunga navakwetu vatu. Shikaho Yehova asaka tumulondezezenga. Numba tuhu ikiye atwama nalisesa lyakulinga kala vyuma nasake, oloze asaka kulinga vyuma vyosena muzangi. (Yowa. 1, 4:7, 8) Echi chili nakulumbununa nge, hakusaka tupwenga vakulihehwa twatela kulondezeza Kalunga uze eji kulinganga vyuma vyosena muzangi.

21. (a) Uno Ndavichi evwile ngachilihi havyuma amulingilile Yehova? (b) Vyuma muka natushimutwila muchihande nachikavangizaho?

²¹ Kutala mweji kusakwililanga Yehova hakumihana “vyuma vyamwaza” vyakufwana nge kulya chakushipilitu, namasepa vamwenemwene, nakumikafwa mulitomene kulinga vyuma vyamwaza, nakulihehwa chakukupuka chize amishika kukamihana kulutwe tahi? (Samu 103:5) Nge mukiko, kaha nayenu namuhanjika mazu ahali Samu 16:11 akwamba ngwavo: “Weji kungulwezanga jila yakuyoya. Ngweji kuwahililanga chikuma nge nguli kumeso ove. Kupwa kulivoko lyove lyachilyo cheji kungwivwisanga kuwaha haya myaka yosena.” Chihande nachikavangizaho nachishimutwila cheka havishina vikwavo vyavilemu vize vyatwama hali Samu 16. Vishina kana navishindakanya lika havyuma vize vyeji kunehanga kuwahilila mukuyoya.