DIANA ali namyaka yakusemuka 80. Lunga lyenyi avijilenga musongo wakuwongo (Alzheimer), kaha hamyaka yayivulu vamulaminyinyinenga mulimbo lyakulamina vaze vaviza chikuma swi nakukufwa chenyi. Kufumaho nawa afwishile vana venyi vamalunga vavali, kaha nawa ikiye apwile namusongo wakasa yakumavele. Chipwe ngocho, omu vandumbwetu muchikungulwilo veji kupwanga nenyi kuZuvo yaWangana namumulimo wamuwande, veji kumumonanga kupwa mutu wakuwahilila lwola lwosena.

John nawa apwilenga kalama wakutambwojoka hamyaka yakuzomboka 43. Mulimo kana auzangile chikuma. Oloze katwalileho kuzata mulimo kanako mwomwo yakuya nakuzakama kausoko kenyi uze apwile nakuviza, kaha oholyapwa atwama muchikungulwilo chamungalila yenyi. Vaze vamumwenenga omu azachilenga veji kwivwanga kuwaha omu veji kuliwananga nenyi kukunguluka chachihanda nechi changalila hakumumona achili lika wakuwahilila ngana muze apwilenga kunyima.

Chuma muka cheji kukafwanga Diana naJohn vapwenga vakuwahilila? Jino chuma muka chinahase kukafwa mutu uze ali naukalu muvishinganyeka kaha nawa ali naukalu kumujimba apwenga wakuwahilila? Mutu uze keshi cheka nakuzata mulimo azangileko mwahasa kutwalaho ngachilihi kupwa wakuwahilila? Mbimbiliya ngwayo: “Muka-kwoloka mwawahilila muli Yehova.” (Samu 64:10) Hakusaka twivwishise kanawa echi chishina, tuchitalenu havyuma vyeji kunehanga kuwahilila chamwenemwene navize kavyaneha kuwahilila chamwenemweneko.

Twafwelela ngwetu mwatachikiza ngwenu lwola lwosena kweji kupwanga vyuma vyeji kulingisanga vatu vawahilile. Chakutalilaho, achishinganyekenu hali pwevo nalunga vali nakulimbata chipwe mutu uze naseme mwana chipwe uze vanahane milimo yamuliuka. Vyuma kana vyeji kwivwisanga kuwaha mwomwo Yehova ikiye avihakako. Ikiye ahakileko ulo nakuhana vatu wana wakusema, kaha nawa eji kuhananga vatu milimo muchikungulwilo chavaka-Kulishitu.—Kupu. 2:18, 22; Samu 127:3; Chimo. 1, 3:1.

Chipwe ngocho, kuwahilila chimwe chapwa chakatando kakandende kaha, mwomwo muka-mahyamutu nahase kuhona kupwa wakushishika kuli muka-mahyenyi chipwe nahase kufwa. (Ezeke. 24:18; Hoze. 3:1) Kaha nawa vana vamwe veji kulikanganga kuli visemi javo nakuli Kalunga, kaha vamwe veji kuhetanga nahaseteko yakuvafumisa muchikungulwilo. Chakutalilaho, vana vaSamwele kavazachililenga Yehova chakufuma kumichima yavoko, Ndavichi nawa alingile vyuma vize vyamunehelele ukalu wakufuma kuli vaka-tanga yenyi. (Samwe. 1, 8:1-3; Samwe. 2, 12:11)  Vyuma vyangana kavyaneha kuwahililako oloze vyeji kunehanga chinyengo nakuhomba.

Chochimwe nawa, milimo yamuliuka veji kuzatanga vatu jaKalunga yinahase kukuma, pamo mwomwo yakuviza chipwe mwomwo yakusaka kuzakama tanga chipwe vene kwalumuka chavyuma muliuka. Vandumbwetu vamwe vaze vanahichinga mukwalumuka kanechi veji kuhanjikanga ngwavo veji kwanukanga vyuma vyamwaza valivwishilenga kuwaha.

Shikaho tunahase kuhanjika ngwetu lwola lumwe milimo kana yeji kunehanga kuwahilila chakatando kakandende kaha. Jino kuliko chuma cheka chize cheji kunehanga kuwahilila chamwenemwene chize cheji kwililanga numba nge vyuma vinalumuka tahi? Eyo. Samwele, naNdavichi navakwavo veka vatwalileho kupwa vakuwahilila chamokomoko navyeseko vapwile nakumona.

Yesu atachikijile omwo chapwa kuwahilila chamwenemwene. Shimbu kanda ezenga hano hamavu, ‘awahilililenga kumeso aYehova lwola lwosena,’ omu vyuma vyapwile kaha kanawa. (Vishi. 8:30) Oloze omu apwile hano hamavu, amwenenga ukalu waunene. Chipwe ngocho, evwilenga kuwaha kulinga mwaya muchima waIse. (Yowa. 4:34) Nyi ngachilihi halikumbi lize vamujihile? Mbimbiliya ngwayo: “Mwomwo yakuwahilila chize vamuvulukilile ngwavo mwakevwa kulutwe, omikile hachitondo chakuyanjishila.” (Hepe. 12:2) Shikaho twatela kutala havyuma vivali vize ahanjikile Yesu kupandama kukuwahilila.

Likumbi limwe tumbaji twenyi 70 vakindulukile kufuma mumulimo wakwambulula muze avatumine. Ava tumbaji vawahililile chikuma mwomwo valingile vyuma vyakukomwesa vyavivulu nakufumisa vatu vandemone. Oloze Yesu avakumbulwile ngwenyi: “Kanda namuwahilila ngwenu vashipilitu vanaliluula kuli enuko, oloze wahililenu mwomwo majina enu vanawasoneka lyehi mwilu.” (Luka 10:1-9, 17, 20) Shikaho kavatelelele kuwahilila mwomwo yamilimo vapwile nakuzatako oloze shina kutachikiza ngwavo Yehova navevwila uselewa. Kutachikiza ngwavo mwakavanuka hakushishika chavo, chikiko chatelelele kuvalingisa vawahilile chikuma.

Halwola lukwavo nawa Yesu ahanjikile kulizavu lyalinene. Kaha pwevo umwe wakaYuleya ahanjikile ngwenyi naye yaYesu apwa wakuwahilila  chikuma. Oloze Yesu amukumbulwile ngwenyi: “Nduma, vawahilila shina vaze veji kwivwililanga mazu aKalunga nakuwalamanga.” (Luka 11:27, 28) Chisemi nahase kuwahilila kachi nge mwanenyi ali namangana. Oloze chuma chachilemu chikuma chize chatela kutulingisa tuwahilile shina kupwa nausoko wamwaza naYehova mwomwo yakumwononoka.

Chikupu vene, kutachikiza ngwetu Yehova ali nakutwivwila uselewa chikiko kaha chinahase kutunehela kuwahilila chamwenemwene. Numba tuhu tweji kumonanga vyeseko, oloze twapwa vakuwahilila mwomwo yakutachikiza chishina kana. Kachi nge natukakachila nakulama kulonga chetu, kaha natupwa wakuwahilila chikuma. (Loma 5:3-5) Kaha nawa Yehova eji kuhananga shipilitu kuli vaze vamufwelela, ngocho kuwahilila vachilavila hamihako yashipilitu. (Ngale. 5:22) Echi cheji kutukafwanga twivwishise ovyo chisoneka chaSamu 64:10 chahanjikila ngwacho: “Muka-kwoloka mwawahilila muli Yehova nakuchinyina muli ikiye.”

Tunatachikiza jino chuma cheji kukafwanga Diana naJohn vatwaleho lika kupwa vakuwahilila chamokomoko nakumona ukalu. Diana ambile ngwenyi: “Ngunachinyina muli Yehova ngana muze mwana eji kuchinyinanga kuli chisemi chenyi.” Uno eji kutachikizanga ngachilihi ngwenyi Kalunga namwivwila uselewa? Ambile ngwenyi: “Ngwamono ngwami nangukisula hakunguhana ngolo jakuzata mulimo wakwambulula lwola lwosena oku ngunawahilila.” John nawa atwalileho kuzata mulimo wakwambulula omu wakumine mulimo azachilenga wakutambwojoka, kaha ambile ngwenyi: “Kufuma vene mu 1998 haze vanguhanyine mulimo wakupwa muka-kunangula muShikola Yakulinangula Milimo YamuLiuka, ngunahakengako jino chikuma mangana kuchilongesa chauka kuhambakana omwo ngwalingilenga kunyima. Ami napuwami tunazatenga kweseka noho hakumina ngolo jetu chamokomoko nakwalumuka chavyuma, mwomwo twazanga kuzachila Yehova. Chikupu vene, katwaliveyako.”

Vandumbwetu vavavulu nawa veji kumonanga kutesamo chamazu ahali Samu 64:10 mukuyoya chavo. Chakutalilaho, vapwevo nalunga vakuUnited States vazachilile haMbetele hamyaka yakuzomboka 30. Kaha vavalwezele vayenga vakazate upayiniya wakulipwila. Chakuzeneka kusweka, vahanjikilenga ngwavo: “Kala mutu eji kulinyenganga nge najimbalisa chuma chize azanga chikuma. Chipwe ngocho chinyengo kana cheji kukumanga.” Ava vapwevo nalunga kavalangishileko oloze vazanyinenga chikuma mumulimo wakwambulula hamwe nachikungulwilo chosena. Vambile ngwavo: “Omu twalombelenga, twavulukilenga vyuma vize twapwile nakusaka Yehova atukafwe. Kaha kumona omu akumbulwilenga kulomba chetu chikiko chatwivwishilenga kuwaha nakutukolezeza. Omu twakahetele kuze vatutumine, vandumbwetu vavavulu vaputukile kuzata upayiniya kaha nawa twanangwilenga vilongesa vyaMbimbiliya vavali vaze vapwile nakuzovoloka.”

Kuhanjika muchano, kachapwa chachashi kupwa vakuwahilila lwola lwosenako kaha nawa lwola lumwe natumonanga ukalu. Shikaho Yehova ahwiminyinyine ngamba yenyi asoneke mazu tweji kutanganga hali Samu 64:10. Numba vene nge tunahombo, twatela kufwelela ngwetu vaze navasolola ngwavo vapwa vakwoloka nakutwalaho kupwa vakushishika chamokomoko nakwalumuka chavyuma, ‘navawahililanga muli Yehova.’ Kaha nawa nachitukafwa tutalilile “melu amahya namavu amahya” aze atushika Yehova. Halwola kana vatu navakapwa vakukupuka. Kaha vatu jaKalunga vosena “[navakawahililanga] haya myaka yosena” havyuma ali nakutulingila.—Isa. 65:17, 18.

Achishinganyekenu omwo nachikapwa chiyoyelo. Vatu navakapwa namijimba yakulikangula kaha nawa chimene hichimene navakahindukanga nangolo jakuzata milimo yavo. Kakweshi kukapwa mutu mwakanuka ukalu tuli nakumona makumbi anoko. Chikupu vene twafwelela ngwetu “vyuma vyakunyima kaveshi kukavyanuka chekako, chipwe kuvivezuka mumichima.” Vatu twazanga vaze vafwa navakavasangula, ngocho mayongomena avatu navakevwa ngana muze vevwile visemi jakanyike wapwevo uze asangwile Yesu. Mbimbiliya ngwayo: “Hahaze vene visemi jenyi vawahililile chikuma.” (Mako 5:42) Chapundu vene, vatu vosena hano hamavu navakapwa ‘vaka-kwoloka’ mujila yakukupuka, kaha ‘navawahililanga muli Yehova’ haya myaka yosena.