Hali Wavaka-Kolinde 2, 12:2, 3, Paulu ahanjikile vyamutu uze “vahukwile nakumutwala kulilu lyamuchitatu.” Uno mutu kana apwile iya? Mumukanda uze Paulu asonekelele vandumbwenyi vamuKolinde, avulukile ngwenyi Kalunga apwile nakumuzachisa hakupwa kaposetolo. (Koli. 2, 11:5, 23) Kufumaho avulukile nawa ‘vyakumwenesa, navize nawa vamusolwelele kuli Mwata.’ Mumazu kana asolola nge Paulu kapwile nakuvuluka vandumbwenyi vekako. Shikaho apwile nakulifwanyisa ivene kumutu uze amwene vyakumwenesa, navize nawa vamusolwelele kuli Mwata.—Koli. 2, 12:1, 5.

Shikaho Paulu ikiye “vahukwile nakumutwala kulilu lyamuchitatu” ikiye nawa ‘vahukwile nakumutwala mupalachise.’ (Koli. 2, 12:2-4) Mazu akwamba ngwavo ‘vize vamusolwelele,’ asolola nge vamulwezele vyuma vize navikasoloka kulutwe.

Uno “lilu lyamuchitatu” lize amwene Paulu lyalumbununa ika?

InMuMbimbiliya lizu “lilu” linahase kulumbununa melu avene aze tweji kumonanga. (Kupu. 11:4; 27:28; Mateu 6:26) Oloze lizu kana linahase nawa kulumbununa vyuma vyeka. Lwola lumwe linahase kulumbununa chiyulo chavatu. (Ndanye. 4:20-22) Chipwe chiyulo chaWangana waKalunga.—Kuso. 21:1.

Uno Paulu apwile nakulumbununa ika hakuhanjika ngwenyi amwene “lilu lyamuchitatu”? Lwola lumwe Mbimbiliya yeji kuzachisanga lizu lyolimwe mapapa katatu hakusaka kushindakanya chishina, chipwe kusolola kulema chalizu kana. (Isa. 6:3; Ezeke. 21:27; Kuso. 4:8) Shikaho Paulu hakuhanjika ngwenyi “lilu lyamuchitatu,” apwile nakuhanjika hachiyulo changolo kulumbununa Wangana wauMeshiya uze ali nakuyula Yesu Kulishitu navaze 144,000. (Talenu mukanda waInsight on the Scriptures, Volyumu 1, mafwo 1059 na 1062.) Ngana muze asonekele kaposetolo Petulu, tuvosena tuli nakutalilila “melu amahya” nge omu atushika Kalunga.—Petu. 2, 3:13.

Nyi ngachilihi “palachise” yize avulukile Paulu?

“Palachise” nayikiko yatwama naulumbunwiso wauvulu. Yinahase kulumbununa (1) limbo lyavatu lyakulivanga, chipwe Palachise yahamavu yize nayikapwako kulutwe. (2) Yinahase nawa kulumbununa kuunda chamwenemwene chize navakalivwisa kuwaha vatu jaKalunga mulifuchi lyalihya. (3) Yatalisa nawa “[ku]palachise yaKalunga,” yamwilu yize vavuluka hali Kusoloka 2:7.—Talenu Kaposhi Kakutalila waJuly 15, 2015, li. 8. pala. 8.

Paulu pamo apwile nakutalisa kuulumbunwiso wosena utatu omwo ahanjikile mazu ahali Wavaka-Kolinde 2, 12:4.

Tukukululenu jino:

“Lilu lyamuchitatu” lize vavuluka hali Wavaka-Kolinde 2, 12:2 valifwanyisa kuWangana wauMeshiya uze ali nakuyula Yesu Kulishitu navaze 144,000 vaze vapwa “melu amahya.”—Petu. 2, 3:13.

Kaha nawa vauvuluka ngwavo “lilu lyamuchitatu” mwomwo Wangana kana wahambakana mawangana osena kaha nawa wakulipwila.

“Palachise” muze vatwalile Paulu omu “vamuhukwile” muchakumwenesa yatalisa pamo (1) kupalachise yize nayikapwa hano hamavu, (2) chipwe palachise yakushipilitu yize nayikapwako, yakuhambakana eyi yiliko makumbi ano, (3) chipwe “palachise yaKalunga,” yamwilu yize nayikapwako omu nakukapwa kaye kakahya.

Shikaho, mukaye kakahya namukapwa melu amahya namavu amahya. Kulongesa kana nachikapwa chakulipwila mwomwo nachikapwa chaWangana wamwilu navatu vaze navakazachilanga Yehova mupalachise hano hamavu.