Puwami apwile wakuvanguluka, ngocho anguyevetelele ngwenyi: “Nevi naulishina vene vyauchi mwomwo tupokola mwaka vanahete lyehi.” Minyau yatupokola yejile haweluka wahotela, kaha nakushimbula chiku, vatukwachile kuli maswalale. Ngweji kumusakwililanga puwami hakunguyevetela mwomwo changulingishile nguhane mapapilo amwe kuli ndumbwetu weka walunga.

Omu twapwile nakuya kuofesi yatupokola, ngwaputukile kushinganyeka hakutokwa ngwapwile nacho chakumbata pwevo wakumika wakuhya kushipilitu. Chipwe ngocho, elu keshi lukiko kaha lwola ami naDanièle twazachilile hamweko. Ivwililenu ngumilweze chuma chatulingishile tuyenga mumafuchi muze vakanyishile mulimo wetu wakwambulula.

Ngwasemukilile mutanga yavaka-Katolika mu 1930 mumbaka yaCroix, mulifuchi lyaFrance. Chalumingo hichalumingo twayilenga kuMisa, kaha tata apwilenga kapilishitu. Oloze omu ngwapwile namyaka yakusemuka 14, kwasolokele chuma chimwe chize changukafwile ngutachikize ngwami ngwapwile mukwitava chamakuli.

Halwola kana kwapwile jita yakaye yamuchivali, kaha maswalale javaka German vejilenga muFrance. Kapilishitu anangwilenga ngwenyi twatelele kukundwiza liuka lyavaka-Nazi lize lyapwile munganda yaVichy. Vyuma anangwilenga vyatwivwishilenga kupihya. Twevwilililenga kuchisaji chahapeho chaBBC kuze vambulwilenga mijimbu yamafuchi aze alifutwile mangana vazungise vaka-kole javo. Nakushimbula chiku ou kapilishitu aputukile kukundwiza aze mafuchi alifutwile, kaha alongesele vyuma mangana kupwenga chilika muSeptember 1944 chakuwahilila hamafuchi aze alifutwile. Vyuma kana vyangukomwesele chikuma. Echi changulingishile nguputuke kuhuhwasana vatwamina vamukwitava.

Omu mwahichile katando kufuma haze yakumine jita, tata afwile. Halwola kana yayami wapwevo asombokele, kaha vapwile nakutwama kuBelgium, shikaho ngwapwile jino namulimo wakulama mama. Ngwawanyine milimo oloze mukulwane wami wamilimo navana venyi vapwilenga vaka-Katolika. Numba tuhu ngwamwene ngwami vyuma navipwa jino kanawa, oloze ngwapwile nakwingila mucheseko.

Kuheta mu 1953 yaya wapwevo Simone uze apwile Chinjiho ejile nakutumeneka. Kaha aputukile kungulumbunwina kuzachisa Mbimbiliya havyuma vyamakuli veji kunangulanga vaka-Katolika vyakwamba ngwavo vatu navakavambila mukakahya kahelo, kwatwama Tulunga vatatu, kaha nawa ngwavo mwono kawafwako. Hakavanga ngwamuhamikile mwomwo kapwile nakuzachisa  Mbimbiliya yaKatolikako, oloze kutwala muze ngwamwene jino ngwami apwile nakuhanjika muchano. Mukuhita chalwola, angunehelele Kaposhi Kakutalila wamwaka kaha ngwamutangile wosena wamuundu naufuku mukapete kami kakusavala. Ngwatachikijile vene ngwami ngunawane muchano, oloze ngwevwilenga woma kupwa kusali yaYehova mwomwo ngwashinganyekele ngwami nangutokesamo mwono wami namilimo yami.

Ngwatwalileho lika kulinangula Mbimbiliya navihande vyeka vyaKaposhi Kakutalila hauka. Kaha mukuhita chalwola ngwaputukile kuya kuZuvo yaWangana. Chisambo vapwile nacho vatu kuchikungulwilo changusuulwishile chikuma. Kaha hanyima yakulinangula Mbimbiliya nandumbwetu umwe walunga hatukweji 6, vangumbapachishile muSeptember 1954. Nakushimbula chiku mama nasongo yami navakiko vapwile Vinjiho jaYehova.

Kuheta mu 1958 mama afwile. Halwola kana kwasalile kaha vyalumingo vyavindende mangana kupwenga kukunguluka chamafuchi muNew York kuze ngwayile nayami. Hakuwana nge kangwapwile cheka nakulama mutuko, ngwalitwaminyine milimo yize ngwazachilenga nakuputuka jino kuzata upayiniya. Mukuhita chalwola, twalifwelelesele kulimbata nandumbu Danièle Delie uze apwile payiniya. Kaha kuheta muMay 1959 twalimbachile.

Danièle aputukile mulimo washimbu yosena mungalila yakumembo yize yapwililile kwakusuku nakwimbo lyavo. Hakuwana nge mungalila kana mwavulile kwitava chaKatolika, kaha nawa atelelele kuvuwa kinga hakuya nakwambulula, ngocho asakiwile kupwa wakumika. Ngana mwayami naikiye atachikijile ngwenyi mulimo kana wapwile nakusakiwa kuuzata mukapachapacha mwomwo katwatachikijile lwola nakakuma kayeko. (Mateu 25:13) Muchima wakulisuula apwile nawo watukafwile tuzate mulimo washimbu yosena natwima.

Omu mwahichile makumbi amandende kufuma hakulimbata chetu, twaputukile kuzata mulimo wakutambwojoka. Twaputukile jino kwalumunako chiyoyelo chetu. Chikungulwilo chatete twatambukilile chapwile navaka-kwambulula 14. Vandumbwetu kuchikungulwilo kana vapwile vakuhutwa, kaha kavapwile nazuvo yakutuhana tusavalemoko. Shikaho twayile nakusavala hautenda waZuvo yaWangana. Numba tuhu haze twasavalile hapwile hakola, oloze yapwile hijila yimwe yakwolwelamo mitanda.

Numba tuhu twapwile namilimo yayivulu yakuzata, oloze Danièle alumwineko vyuma vimwe. Kakavulu anguvandaminyinenga muminyau omu twapwilenga kukuliwana chavakulwane, kaha kayayavalilengako. Twazachile mulimo wakutambwojoka hamyaka yivali. Kaha mumyaka vene yize twalinangwile jino ovyo chapwila chachilemu kuli vaze valimbata kuhanjikanga muchano nakuzachila hamwe.—Kwambu. 4:9.

Kuheta mu 1962 vatusanyikile kuya kushikola yaNgileyate yakusokesa 37 hatukweji 10 yize yapwilile kuBrooklyn, muNew York. Vaka-shikola vosena vapwile 100, kaha vaze vapwile muulo vapwile 26. Shikaho chapwile hikutokwa chachinene kuya kushikola kana. Twalivwishile kuwaha kupwa hamwe nandumbu Frederick Franz, naUlysses Glass naAlexander H. Macmillan malunga vaze vapwile nalufwelelo lwakukola.

 Hamakumbi osena aze twapwile kushikola vatukolezezelenga mangana tuzachisenga uhashi wetu wakumona vyuma. HajiSateli jimwe namusana omu twakumishilenga kulinangula, twayilenga nakutala vihela vyamwaza munganda yaNew York. Twalingilenga ngocho mwomwo halikumbi lyaMonday twasonekelenga mijimbu yavyuma twamwenenga. Kakavulu lyaSateli nachingoloshi twazeyelenga nge tunakinduluka. Chipwe ngocho, ndumbwetu wahaMbetele uze atujingulwishilenga kuvihela kana, atuhulishilenga vihula vize vyatukafwilenga kwanuka vishina vyavilemu twatelele kusoneka. HaSateli yimwe twajingulukile nganda kana musana wosena. Twayile kuchihela chimwe kuze twakalinangwile vyamalolwa navatanganyika vaze vyeji kuholokanga mwilu. Omu twahetele kuzuvo valamina vyuma vyakushikulu yimwe twalinangwile miyachi yavangandu vakulisezaseza. Kahomu twahetele haMbetele, uze ndumbwetu apwile nakutujingulwisa nganda kana atuhulishile ngwenyi, “Chihandwa muka chatwama havatanganyika namalolwa vize vyeji kuholokanga mwilu?” Kaha Danièle oku nazeye himwakumbulula ngwenyi, “malolwa aze eji kuholokanga mwilu atwama namazo amasuku.”

Kufumaho vatutumine kuya nakuzachila hamutango wakuFrance, kaha twazachilileho myaka yakuhambakana 53. Kuheta mu 1976 vangutongwele kupwa ngumuka-kuwanyisa Komiti yaMutango nakungutuma nawa kuya nakutambukila mafuchi akuAfrica nakuMiddle East kuze vakanyishile mulimo wetu wakwambulula. Aha hakiko twayile nakuGabon kuze twakamwene ukalu uze ngunavuluka kumaputukilo achino chihande. Kuhanjika muchano ngwalivwilenga ngwami kangwatelemo kuzata milimo kanako. Chipwe ngocho, puwami Danièle angukafwile nguhase kuzata milimo yosena yize vanguhanyinenga.

Tuvosena twazangile chiyoyelo chahaMbetele. Puwami Danièle alinangwile Chingeleshi mutukweji vatanu shimbu kanda tuyenga kushikola yaNgileyate, kaha apwile jino muka-kwalumuna mikanda yetu wakwipangweji. Twalivwishile kuwaha kuzachila haMbetele, kaha nawa kwazana mumilimo yamuchikungulwilo chatulingishile tuwahilile chikuma. Ngweji kwanukanga omu ngwayile naDanièle nakwambulwila kuchihela chasanga chaParis metro naufuku. Numba tuhu twazeyele, oloze twawahililile chikuma mwomwo twatwaminyinyine vilongesa vyaMbimbiliya vaze vazovolokele. Chaluvinda, Danièle aputukile kuviza, kaha kahashile cheka kuzata natwima nganomu asakilengako.

Kuheta mu 1993 vamuwanyine namusongo wakasa yakumavele. Chapwile chachikalu kuka musongo kana mwomwo vamupulile nakumuhana vitumbo vyavisasu chikuma. Omu mwahichile myaka 15, musongo kana wamukwachile cheka, kaha watohwele kuhambakana muze avijile hakavanga. Hakuwana nge azangile mulimo wakwalumuna, alikakile nakuputuka cheka kuzata halwola evwileko kanawa.

Numba tuhu puwami avijilenga chikuma, oloze katwashinganyekele vyakuseza Mbeteleko. Chipwe ngocho, kuvijila haMbetele chikwechi ukalu, chikumanyi nge vakwenu kavatachikijile kutohwa chaukalu wenuko. (Vishi. 14:13) Numba tuhu Danièle apwile namyaka yakusemuka 70, oloze apwilenga lika wakuwahilila. Ahakilenga mangana kukukafwa vakwavo mwomwo atachikijile ngwenyi nachivanganyalisa mwamunene. (Vishi. 17:17) Numba tuhu Danièle kapwilenga muka-kukafwa vatuko, oloze ahanjikilenga havyuma ahichilemo mangana akafwe  vandumbwetu vamapwevo vazenekenga kwivwa woma musongo wakasa.

Kwapwile nawa ukalu weka twamwenenga. Numba tuhu Danièle kahashile cheka kuzata chikuma lwola lwosenako, oloze atwalileho lika kunguzakama. Alingilenga vyuma vize vyangukafwile chikuma, kahechi changukafwile nguhase kutwalaho lika kupwa ngumuka-kuwanyisa Komiti yaMutango hamyaka 37. Chakutalilaho, hakumbi hakumbi awahishilenga kulya chamusana mangana tuhase kulila muzuvo yetu nakunokako chachindende.—Vishi. 18:22.

Danièle amwenenga kuyoya kupwa chachilemu. Mukuhita chalwola avijile cheka musongo wakasa kamuchitatu. Tuvosena twahombele chikuma. Vaputukile cheka kumuhana vitumbo vyavisasu vize vyamuzeyeselenga, kaha lwola lumwe ahonenenga nakutambuka. Ngwevwile chikuma kukola kumuchima hakumona puwami uze apwilenga muka-kwalumuna wakwipangweji anakuhona kuhanjika.

Numba tuhu twahombele chikuma, oloze twalombelenga lika kuli Yehova nakufwelela ngwetu keshi kutwechelela tuhite muukalu kuhambakana noho hakumina ngolo jetuko. (Koli. 1, 10:13) Twasakwililile chikuma Yehova hakutukafwa kuhichila muMazu enyi, namuli vandotolo vahaMbetele navandumbwetu muchikungulwilo.

Twalombelenga nawa Yehova atukafwe tusakule kanawa mwakutukila. Lwola lumwe kavatuhanyinenga vitumboko. Ndotolo uze okilenga puwami atukafwile hamyaka 23, oloze katulumbunwinyine ovyo vyalingishilenga puwami aputuke kuvulyajama kachi nge vanamuhane vize vitumbo vyavisasuko. Kaha nawa katulwezele jila yeka yize vanahase kumukilamoko. Twevwilenga kwijiva nge vakwetu vanatuhungu, kaha nawa katwatachikijile omu navipwa vyumako. Kutwala muze ndotolo weka uze okilenga musongo wakasa etavilile kuka puwami. Chapwile kwijiva nge hijila yimwe yize Yehova atukafwililemo mangana tuhase kulipika naukalu wetu.

Katwalizakaminyine cheka nahavyuma vize vinahase kutusolokela kulutweko. Yesu ambile ngwenyi, “likumbi hilikumbi lili naukalu walyo.” (Mateu 6:34) Kaha nawa kumona vyuma mujila yamwaza chatukafwile chikuma. Chakutalilaho, omu Danièle valitwaminyine kumuhana vize vitumbo vyavisasu hatukweji vavali, ahanjikile kuli ami oku ali nakumwesa kukanwa ngwenyi, “Musonyi nguli nakuviza.” (Vishi. 17:22) Numba tuhu puwami amwenenga ukalu, oloze azangilenga kulilongesa myaso yaWangana yayihya, kaha embilenga nalizu lyakukanguka.

Chakutalilaho chenyi changukafwile nayami nguhone kuzeya chamokomoko naukalu ngwamwenenga. Kuhanjika muchano, hamyaka yosena 57 yize twatwamine muulo, puwami anguzakaminenga mujijila jajivulu. Kasakilenga numba kungulongesa mwakukangila mauluko. Shikaho omu avijile chikuma, ngwaputukile jino kulilongesa mwakukosela malonga, nauvwalo namwakuwahishila vyakulya. Mulwola vene elu, ngwajihile malonga auma amavulu, olozenyi ngwawahililile chikuma mwomwo ngwalingilenga vyuma vize vyamwivwishilenga kuwaha. *

Ngunalinangula vyuma vyavilemu kutalisa kuukalu weji kwizanga mwomwo yamisongo naushinakaji. Chatete, katwatela kulivulishilanga milimo nakusuvilila vaka-mahyetuko. Twatela kuvazakamanga chikumanyi shimbu tuchili nangolo. (Kwambu. 9:9) Chamuchivali, katwatela kulizakaminanga chikuma nahavyuma vyavindendeko mwomwo tunahase kuvulyama navyuma vyamwaza vize tweji kulivwisanga kuwaha hakumbi hakumbi.—Vishi. 15:15.

Omu ngweji kushinganyekanga hamyaka yoseneyi tunapu mumulimo washimbu yosena, ngunamono chikupu ngwami Yehova natukisula mwamunene. Ngweji kwivwanga ngana muze evwile muka-kwimba jisamu uze ambile ngwenyi: “Yehova nangusolwela likoji.”—Samu 116:7.