Kutala namuhasa kukumbulula evi vihula vinapendamina hajimangazini jaKaposhi Kakutalila jamu 2019 tahi?

Uno Kalunga alumbunwine ika hakwamba ngwenyi: “Vyeshovyo vitwa navakafula mangana vakakuzungise, kavyeshi kukafukilako”? (Isa. 54:17)

Twatela kufwelela ngwetu Kalunga mwatukinganga ‘kuvikenya vaze navatwivwila matoto.’ (Isa. 25:4, 5) Vaka-kole jetu kaveshi kuhasa kutulemekako.—w19.01, mafwo 6-7.

Uno vyuma alingilenga Kalunga kuli vaka-Kanane navaIsalele vakulikanga vyasolola ngachilihi nge atwama nachiyulo?

Kalunga azangamishilenga vaze valingilenga ujila nakuyanjisa mapwevo navanyike. Oloze akiswilenga vaze vamwononokelenga nakutwama kanawa navakwavo.—w19.02, mafwo 22-23.

Uno natulinga ngachilihi nge mutu uze kapwa Chinjihoko ikiye ali nakulomba?

Tunahase kumwecha alombe, oloze katweshi kwitava ngwetu “amene” chipwe kulikwata kumavoko navakwetuko. Kaha tunahase kulomba hauka wetu mumuchima.—w19.03, lifwo 31.

Uno mulonga wakusavala kanyike wapwa waunene tahi?

Eyo, mwomwo wapwa mulonga kuli uze vanasavala, nakuchikungulwilo, nakufulumende nakuli Kalunga. Shikaho tulama veji kukavangizanga lushimbi lwafulumende luze lwahanjika vyakwambulula chihande chakusavala kanyike.—w19.05, mafwo 9-10.

Uno munahase kwalumuna ngachilihi vishinganyeka vyamichima yenu?

Lombenunga kuli Yehova. Shinganyekenu havyuma mwatela kwalumunako. Sakulenunga kanawa vatu vakulikata navo.—w19.06, lifwo 11.

Uno natuhasa ngachilihi kulizanga vyaluyanjisa luli nakwiza kulutwe?

Twatela kuzamisa usoko wetu naYehova nakufwelela ngwetu atuzanga, kaha nawa keshi kukatumbilako. Tangenunga Mbimbiliya hakumbi hakumbi nakulombanga chikuma. Mwatela nawa kufwelela ngwenu Wangana waKalunga naukeza. Laminenu mumutwe visoneka vize mwazanga namyaso yize mwazanga.—w19.07, mafwo 2-4.

Natuhasa kukafwa ngachilihi vausoko wetu vakayovoke?

Twatela kuvevwila keke, nakupwa navilinga vize navivakunyula. Kaha nawa tuvatalililenunga chikoki nakuvambulila mujila yakuzangama.—w19.08, mafwo 15-17.

Kweseka nachisoneka chaMateu 11:28, Yesu eji kutuhizumunanga ngachilihi?

Eji kuzachisanga tulama vaze vatuzanga, namasepa vamwenemwene, namulimo uze weji kutwivwisanga kuwaha.—w19.09, lifwo 23.

Uno Kalunga eji kutuhananga ngachilihi muchima wakufwila kulinga vyuma nangolo jakulingamo? (Fwili. 2:13)

Eji kulinganga ngocho omu tweji kutanganga Mazu enyi nakuhunananaho. Kaha nawa shipilitu yenyi yeji kutukafwanga tutesemo vyuma tuli nakufwila kulinga.—w19.10, lifwo 21.

Vyuma muka navitukafwa tusakule kanawa vyakulinga?

Lingenu vyuma vino vitanu: Vangilenu kuhehwojola. Lombenu Yehova amihane mangana. Shinganyekenu ovyo muli nakusakila kulinga vyuma kana. Tachikizenu vyuma munalitomena kulinga. Tachikizenu hakumina ngolo jenu.—w19.11, mafwo 27-29.

Uno kunangula chamwono wakuhona kufwa chaputukilile muEtene, kweseka namazu ahanjikile Satana kuli Eve tahi?

Nduma. Satana kambile ngwenyi Eve mwasoloka kaha nge nafuko, oloze amulwezele ngwenyi keshi kufwako. Kaha nawa kwitava chamakuli chosena chanongele halivaji lyamumakumbi aNowa. Shikaho chasoloka nge kunangula chamwono wakuhona kufwa chaputukile shimbu kanda Kalunga amwange vatu vaze vapwile nakutunga kaposhi kaMbavele.—w19.12, lifwo 15.