Vihula Vyakufuma Kuli Vaka-Kutanga
Mbimbiliya yahanjika ngwayo kwatela kupwa vinjiho vavali numba chihande chizame. (Kula. 35:30; Lushi. 17:6; 19:15; Mateu 18:16; Chimo. 1, 5:19) Oloze Jishimbi jahanjikile ngwajo nge lunga mwawana pwevo vanahuhu lyehi “muchipapa” nakumupika, kachi nge uze pwevo mwatwa kawelele, kaha kapwile namulonga waukojiko. Jino mwomwo ika azenekelele kupwa namulonga okunyi kakwapwile vinjiho vavaliko?
Lushimbi lwahali Lushimbi lwamuchivali 22:25-27 kalwapwile lwakusaka kusolola nge uze lunga apwile namulongako, mwomwo mulonga wenyi kavauhuhwasanyinengako. Oloze valuhakilileko kukafwa uze pwevo azenekele kupwa namulonga. Tuchitalenu omwo chapwile chihande chosena.
Kapetulu youmwe ahanjika nawa hali lunga uze apikile pwevo “munganda.” Lunga kana vamuwanyine namulonga mwomwo pwevo wakuhuhwa lyehi vamumwenenga ngana muze vamwenenga pwevo uze asomboka. Uze pwevo nawa vamuwanyine namulonga mwomwo yakuhona ‘kutwa kawelele.’ Nge atwile kawelele, kachi vatu vamwivwile nakwiza vamukafwe. Jino hakuwana nge katwile kaweleleko, shikaho nayikiye apwile namulonga waukoji.—Lushi. 22:23, 24.
Oloze lushimbi kana lwalihandununa nalushimbi luno ngwavo: “Nge lunga mwakawana mwanapwevo muchipapa uze vanahuhu lyehi, kaha himwamukwata nakumusavala, uze lunga vakamujihe uka wenyi, oloze uze mwanapwevo kanda vakamujihako, mwomwo kalingile shili yakutela kumujihilako. Mulonga kanou unalifwane namulonga wamutu uze mwalukuka mukwavo nakumujiha. Mwomwo ou mwanapwevo vanahuhu lyehi vamuwananga muchipapa kuli uze lunga, kaha atwanga kawelele oloze kakwapwanga mutu wakumulwilako.”—Lushi. 22:25-27.
Vaka-kuyula vafwelelelenga pwevo kana mwomwo vashinganyekelenga vene ngwavo ‘atwile kawelele, oloze kakwapwile kaha mutu wakumulwilako.’ Shikaho, kavamuwanyinenga namulonga waukojiko. Oloze uze lunga vamuwanyinenga namulonga wakupika nawaukoji mwomwo ‘yakukwata pwevo vanahuhu lyehi nakumusavala.’
Shikaho, numba tuhu lushimbi kana valuhakilileko kukafwa pwevo uze azenekele kupwa namulonga, oloze mujimbu wosena wasolola nawa nge uze lunga amusavalile apwilenga namulonga wakupika nawaukoji. Chipwe ngocho, twafwelela ngwetu vakulwane vavangililenga ‘kuhehwojola kanawa’ chihande nakusopa nawa kweseka nalushimbi luze avalwezelenga Kalunga mapapa kakavulu.—Lushi. 13:14; 17:4; Kulo. 20:14.