“Sakwililenunga haVyuma Vyosena”
UNO mwatwama namuchima wakusakwilila tahi? Mutu himutu atela kulihulisa chihula kana. Mbimbiliya yahanjikile chimweza ngwayo, mumakumbi akukuminyina, vatu navakapwa “vaka-kuhona kusakwilila.” (Chimo. 2, 3:2) Pamo mwatachikizako vatu vamwe vaze vasaka kaha vakwavo vavahanenga vyuma. Vashinganyeka ngwavo chinatemo kuvahana vyuma kana, kaha kavatela kusakwililako. Twafwelela ngwetu kamweshi kusaka kulikata navatu kanako.
Vangamba jaYehova vavalweza ‘vasololenga kusakwilila chavo.’ Shikaho, twatela kusakwililanga “havyuma vyosena.” (Kolo. 3:15; Teso. 1, 5:18) Kuli vyuma vyavivulu vyasolola nge chapwa chamwaza kusolola muchima wakusakwilila. Shikaho twatela kusololanga muchima kana.
MUCHIMA WAKUSAKWILILA NAUTULINGISA TUPWENGA VAKUSUULUKA
Kusolola muchima wakusakwilila cheji kutulingisanga tupwenga vakusuuluka mukuyoya. Mutu uze eji kusakwililanga vakwavo eji kupwanga wakusuuluka, kaha cheji kulingisanga navaze vanamukafwe vapwenga vakuwahilila. Mwomwo ika chapwila ngocho? Kachi nge vakwenu navalisuula kumilingilako chuma chimwe, kaha tachikizenu ngwenu vamizakama. Ngocho namwivwa kuwaha chikuma. Omu mukiko pamo chapwile kuli Lute. Mbowaze amusolwelele chisambo nazumbu. Kaha twafwelela ngwetu Lute evwile kuwaha chikuma hakutachikiza ngwenyi kwapwile mutu amuzakamine.—Lute 2:10-13.
Chapwa chachilemu chikumanyi kusakwililanga Kalunga. Kalunga amihana mawana amavulu kushipilitu nakumujimba, kaha achili lika nakumihanawo. (Lushi. 8:17, 18; Vili. 14:17) Shikaho, mwatela kushinganyekanga chikuma havyuma vyosena eji kumihananga Yehova. Kushinganyeka havyuma kana nachimilingisa mumusakwililenga nakutachikiza ngwenu amizanga chikuma.—Yowa. 1, 4:9.
Kachi nge munashinganyeka lyehi havyuma amilingila Yehova, kaha mwatela kumusakwilila hakuwaha chenyi. (Samu 100:4, 5) Vatu vamwe vamba ngwavo, “nge natusakwilila vakwetu, kaha natuvalingisa vapwenga vakuwahilila.”
KUSAKWILILA CHEJI KUZAMISANGA USEPA
Chuma chikwavo twatela kupwila namuchima wakusakwilila, shina mangana tuzamise usepa wetu navakwetu. Tuvosena twasaka vakwetu vatusakwililenga. Kachi nge namusakwilila mutu uze namilingila chuma, kaha namulizanga chikuma. (Loma 16:3, 4) Chuma chikwavo nawa, vatu vaze vatwama namuchima wakusakwilila, vavula kukafwanga vakwavo. Veji kumonanga vyuma vyamwaza veji kuvalingilanga vakwavo, kahechi cheji kuvalingisanga vakafwe vakwavo. Chikupu vene kukafwa vakwetu cheji kunehanga kuwahilila, ngana muze ahanjikile Yesu ngwenyi: “Kuhana cheji kunehanga kuwahilila chikuma kuhambakana kutambula.”—Vili. 20:35.
Robert Emmons, mukulwane wahaYunivesiti yaCalifornia, uze ahehwojwele hamuchima wakusakwilila, ambile ngwenyi: “Kutachikiza ngwetu mutu himutu apendamina hali mukwavo, chatela kutulingisa tupwenga namuchima wakusakwilila. Lwola lumwe tweji kukafwanga vakwetu, kaha lwola lukwavo nawa vakwetu veji kutukafwanga.” Chuma twatela Koli. 1, 12:21) Mutu akwechi muchima wakusakwilila eji kumonanga vyuma veji kumulingilanga vakwavo kupwa vyavilemu. Shikaho fwilenu kusakwililanga vakwenu havyuma navamilingilanga.
kutachikiza shina echi: hakusaka tupwenga vakuwahilila mukuyoya, twasakiwa kutukafwa kuli vakwetu. Chakutalilaho, vanahase kutuhana vyakulya chipwe vitumbo. (MUCHIMA WAKUSAKWILILA NAUTUKAFWA TUHONE KULIZAKAMINA
Kupwa namuchima wakusakwilila chinahase nawa kumikafwa muhone kulizakaminanga. Munahase kusakula kushinganyeka havyuma vimwe nakulihenda kuvikwavo, ngana muze lunyungo lweji kuhandununanga unga najiseke. Echi chili nakulumbununa nge namushinganyekanga kaha havyuma vyamwaza muchishishisa chakulizakamina haukalu. Kachi nge namupwa namuchima wakusakwilila, kaha namushinganyekanga havyuma vyamwaza nakumilingisa mutwaleho kupwa namuchima kana. Kushinganyekanga havyuma vyamwaza vize vamilingila vakwenu nachimikafwa mutesemo mazu ahanjikile kaposetolo Paulu ngwenyi: “Wahililenunga muli Mwata shimbu yosena.”—Fwili. 4:4.
Kupwa namuchima wakusakwilila nachimikafwa nawa muhone kushinganyekanga havyuma vyavipi. Nge natupwa namuchima wakusakwilila, kaha katweshi kwivwilanga vakwetu lwiso, nakuhomba chipwe kukwata matotoko. Kakavulu, vatu vaze vatwama namuchima wakusakwilila, kavasaka kufwila luhetoko, mwomwo vasuuluka navyuma vali navyo.—Fwili. 4:12.
SHINGANYEKENUNGA HAVYUMA VAMILINGILA
Hakupwa muvaka-Kulishitu, mwatela kutachikiza ngwenu Satana asaka kumimona munahombo hakuhita muukalu mumakumbi ano akukuminyina. Ngocho mwevwa kuwaha kachi nge namuhomba nakuyayavala haukalu namumona. Nge namupwa namuchima kana, kaha nachipwa chachikalu vatu kumivwilila nge muli nakuvambulila mujimbu wamwaza. Muchima wakusakwilila watambukila hamwe namihako yashipilitu yaKalunga. Chakutalilaho, tweji kuwahililanga havyuma vyamwaza vize atuhana Kalunga nakufwelela ngwetu vyuma atushika navikatesamo.—Ngale. 5:22, 23.
Hakupwa muvatu jaYehova, tunafwelela ngwetu munamono vyuma tunashimutwila muchihande chino kupwa vyamuchano. Chipwe ngocho katwasemuka namuchima wakusakwililako. Oloze kamwatela kulizakaminako. Nayenu munahase kupwa namuchima wakusakwilila. Mujila muka? Hakumbi hakumbi, shinganyekenunga havyuma vimwe vize navimilingisa musakwilile. Kachi nge namulinga ngocho kaha namupwa nachijililo chakusakwililanga vakwenu havyuma navamilingila. Echi nachimilingisa mupwenga vakuwahilila chikuma. Shikaho, shinganyekenunga havyuma vyamwaza amilingila Kalunga navize vamilingila vakwenu. Nge chinahase, kaha munahase kusoneka vyuma kana. Munahase kusoneka vyuma vivali chipwe vitatu vize navimilingisa musakwililenga.
Vatu vamwe valinangula chihande kanechi vamba ngwavo, “nge natulijilisa kusakwililanga vakwetu, kaha nachilingisa wongo wetu wijilile kushinganyekanga havyuma vyamwaza nakulivwisa kuwaha kuyoya.” Mutu uze akwechi muchima wakusakwilila, apwa wakuwahilila. Shikaho shinganyekenunga havyuma amilingila Kalunga navize vamilingila vakwenu nakwanukanga vyuma munalivwisanga kuwaha mukuyoya chenu, kaha namupwa namuchima wakusakwilila. Vyuma muli navyo vyapwa vyavilemu, shikaho “musakwililenunga Yehova, mwomwo apwa wamwaza.” Chikupu vene, ‘tusakwililenunga havyuma vyosena.’—Miji. 1, 16:34; Teso. 1, 5:18.