Vihula Vyakufuma Kuli Vaka-Kutanga
Uno Satana hakulweza Eve ngwenyi nge mwalya kumutondo wakutachikijila kuwaha nakupihya keshi kufwako, alumbunwine ngwenyi mwono kawafwako nganomu vashinganyeka vatu vavavulu makumbi ano tahi?
Nduma. Liyavolo kalwezele Eve ngwenyi, nge mwalya kumutondo wakutachikijila kuwaha nakupihya kaha mwakasoloka kaha nge nafu okunyi chihanda chimwe chamujimba wenyi nachitwalaho lika kuyoyela kuchihela chekako. Chihanda kana chikiko vavuluka vatu makumbi ano ngwavo mwono wakuhona kufwa. Oloze Satana hakuhanjika kuhichila muli linoka ngwenyi, ‘Eve keshi kufwako,’ alumbunwine ngwenyi, Eve mwatwalaho lika kuyoya nakulivwisa kuwaha kutwama hamavu chakuhona kumuyula kuli Kalunga.—Kupu. 2:17; 3:3-5.
Nge kunangula chize chinalisale makumbi ano chakwamba ngwavo, mwono weji kutwalangaho lika kuyoya kachaputukilile muEteneko, kaha chaputukilile kulihi? Katwatachikijile kanawako. Twejiva ngwetu kunangula chamakuli chosena vachinongesele halivaji lyamumakumbi aNowa. Halwola kana kakwapwile kunangula chamakuli chize chayovokele halivajiko, mwomwo Nowa natanga yenyi vakiko kaha vayovokele.
Shikaho kunangula chamakuli chakwamba ngwavo mwono kawafwako, pamo chaputukile hanyima yalivaji. Omu Kalunga aluwanganyishile malimi kuMbavele, vatu valimwangile “kumavu kwosena.” Chakuzeneka kukakasana, halwola kanelu vatu vapwile navishinganyeka vyakwamba ngwavo mwono kawafwako, kaha vishinganyeka kana vayile navyo kuvihela vyosena kuze vavamwangililile. (Kupu. 11:8, 9) Numba tuhu katwejiva lwola chaputukile kunangula kanechi chamakuliko, oloze twafwelela ngwetu, “ise yamakuli” Satana Liyavolo ikiye anehele kunangula kana, kaha awahililile hakumona omu chatanjile kwosena.—Yowa. 8:44.