CHIHANDE CHAKULINANGULA 51
Uno Yehova Mwamutachikiza Kanawa Tahi?
“Vaze vatachikiza lijina lyove navafwelelanga muli ove. Ove Yehova, ove kaweshi kukaseza vaze vali nakukutondatondako.”—SAMU 9:10.
MWASO 56 Linangulenu Muchano Nakuwitavila
VYUMA NATUSHIMUTWILA *
1-2. Chishina muka tunalinangula kumujimbu waAngelito?
UNO visemi jenu vapwa Vinjiho jaYehova tahi? Nge mukiko, kaha ijivenu ngwenu kamweshi kuhasa kupwa masepa jaYehova mwomwo yavisemi jenuko. Numba nge visemi jetu veji kuzachilanga Kalunga chipwe chiku, oloze mutu himutu atela kulitungila usepa wenyi naYehova.
2 Visemi jandumbwetu walunga Angelito, vapwilenga Vinjiho. Oloze omu Angelito apwile kanyike, kapwile nausepa wakukola naKalungako. Ambile ngwenyi, “Ngwazachililenga Yehova mwomwo vosena mutanga vapwile Vinjiho jaYehova.” Chipwe ngocho, Angelito alitomenene kutanganga Mazu aKalunga shimbu yosena nakushinganyekaho, kaha nawa aputukile nakulomba chikuma. Vyuma muka vyafuminemo. Angelito ambile ngwenyi: “Ngwatachikijile jino ngwami, hakusaka ngupandame chikuma kuli Yehova, ngwatelelele kukilikita mangana ngumutachikize.” Mujimbu waAngelito unahase kutulingisa tulihulise ngwetu: Chihandwa muka chatwama hakutachikiza Yehova nakumutachikiza kanawa? Vyuma muka twatela kulinga mangana tumutachikize kanawa Yehova?
3. Uno kutachikiza Yehova chalihandununa ngachilihi nakumutachikiza kanawa?
3 Tunahase kushinganyeka ngwetu twatachikiza Kalunga mwomwo twatachikiza lijina lyenyi navyuma ahanjikilenga navize alingilenga. Oloze kuli vyuma vyavivulu twatela kulinga mangana tutachikize kanawa Yehova. Twatela kupwanga nalwola lwakulinangula hali Yehova navilinga
vyenyi. Echi nachitukafwa tutachikize ovyo vyeji kumulingisanga ahanjike chipwe kulinga vyuma, nakwijiva numba nge ali nakwivwila kuwaha vishinganyeka vyetu navilinga vyetu navyuma tweji kusakulanga. Nge tunatachikiza vyuma asaka Yehova tulingenga, kaha twatela kuvilinga.4. Uno kushimutwila vyakutalilaho vyamuMbimbiliya nachitukafwa ngachilihi?
4 Vatu vamwe vanahase kutusekeleka nge tuli nakusaka kuzachila Yehova, kaha nawa veji kutuhunganga omu tweji kuputukanga kukunguluka navatu jaYehova. Oloze nge natufwelela Yehova, kaha natutunga usepa uze kaweshi kukakumako, ngocho keshi kukatusezako. Uno chapwa chachashi kutachikiza Yehova mujila kana tahi? Eyo, mwomwo mukiko alingile naMose naMwangana Ndavichi. Omu natushimutwila mijimbu yavo, natukumbulula vihula vino: Vyuma muka valingile numba vatachikize Yehova? Kaha vyuma muka natulinangulako?
MOSE AMWENE “UZE VAHONA KUMONA”
5. Chuma muka asakwile Mose?
5 Mose akavangijilenga vyuma vize alinangwilenga. Omu apwile namyaka yakusemuka 40, asakwile kulikata navaHepeleu vaze vapwile vatu jaKalunga, muchishishisa chakumuvuluka ngwavo “mwana wamwanaFwalo wapwevo.” (Hepe. 11:24) Mose asezele chihela chaulemu apwilenga nacho. Hakuwana nge alikachile navaHepeleu vaze vapwile vandungo muEjipitu, ngocho ejivile ngwenyi Fwalo mwapihilila. Fwalo apwile muka-kuyula wangolo uze vamwenenga kupwa kalunga muEjipitu. Chikupu vene, Mose afwelelele chikuma Yehova. Kaha lufwelelo kana lukiko lwamukafwile apwenga nausepa wakukola naYehova mukuyoya chenyi chosena.—Vishi. 3:5.
6. Chishina muka natulinangula kuli Mose?
6 Chishina muka natulinangulako? Nayetu tunahase kusakula kuzachila Yehova nakulikata navatu jenyi, ngana muze alingile Mose. Kachi nge tunasakula kuzachila Kalunga mukuyoya chetu, kaha vatu vaze kavatachikiza Yehovako vanahase kutufumbukila. Oloze nge natufwelela Setu wamwilu Yehova, kaha mwatukafwa.
7-8. Vilinga muka vyaYehova vize amwene Mose?
7 Mose amwene vilinga vyaYehova nakulinga mwaya muchima wenyi. Chakutalilaho, omu vamuhanyine mulimo wakutetekela vaIsalele kufuma muundungo, kalimwene nge nahase kuzata mulimo kanako, ngocho alwezelenga Yehova ngwenyi katelemo kuuzatako. Yehova asolwele ngwenyi apwa muka-kutetela mwomwo ahanyine Mose mutu wakumukafwa. (Kulo. 4:10-16) Echi chakafwile Mose ahase kwambulila Fwalo mujimbu wakusopesa. Kaha nawa amwene ngwenyi Yehova atwama nangolo omu ayowele vaIsalele nakunongesa Fwalo namaswalale jenyi haKalungalwiji Uchila.—Kulo. 14:26-31; Samu 136:15.
8 Omu Mose atwaminyinyine vaIsalele kufuma muEjipitu, vaIsalele vayayavalilenga havyuma vyavivulu. Chipwe ngocho, Mose amwene omu Yehova atalililile chikoki vatu vaze asokwele muundungo. (Samu 78:40-43) Omu Yehova asakile kunongesa vaIsalele, Mose amulembelelele ahone kulinga chuma kana, kaha Yehova alumwine vishinganyeka vyenyi. Echi chakafwile Mose atachikize ngwenyi Yehova apwa wakulinyisa.—Kulo. 32:9-14.
9. Uno mukanda WavaHepeleu 11:27 wasolola ngachilihi ngwawo Mose apwile nausepa wakukola naYehova?
9 Usepa waMose naYehova wakolele chikuma omu vafumine muEjipitu, ngocho WavaHepeleu 11:27.) Mbimbiliya yalumbununa kanawa usepa waMose naYehova ngwayo: “Yehova ahanjikile naMose meso nameso ngana muze mutu mwahanjika namukwavo.”—Kulo. 33:11.
chapwile kwijiva nge ali nakumona Ise wamwilu Yehova. (Tangenu10. Vyuma muka twatela kulinga mangana tutachikize kanawa Yehova?
10 Chishina muka natulinangulako? Hakusaka tutachikize kanawa Yehova, twatela kutachikiza vilinga vyenyi nakulinga mwaya kujina chenyi. Ajina ngwenyi, “vatu vosena vavalwile, ngwenyi, vapwenga nachinyingi chakwoloka chakutachikiza muchano.” (Chimo. 1, 2:3, 4) Jila yimwe yakulingilamo mwaya muchima waKalunga shina, kunangula vatu vamutachikize.
11. Uno kunangula vakwetu cheji kutukafwanga tutachikize vilinga muka vyaYehova?
11 Kakavulu, tweji kumutachikizanga kanawa Yehova omu tweji kunangulanga vakwetu. Chakutalilaho, tweji kumonanga muchima wenyi wakutetela, omu eji kututwaminyinanga tuwane vatu vamwaza michima. (Yowa. 6:44; Vili. 13:48) Kaha nawa tweji kumonanga ngwetu Mazu aKalunga atwama nangolo, omu vatu vaze tweji kunangulanga Mbimbiliya veji kumbilanga jitato jajipi nakupwa jino navilinga vyamwaza. (Kolo. 3:9, 10) Tweji kumonanga nawa muchima wenyi wakutalilila chikoki mwomwo nahane vatu lwola lwakulinangula hali ikiye mangana vakayovoke.—Loma 10:13-15.
12. Chuma muka alombele Mose chize vasoneka hali Kulovoka 33:13, kaha mwomwo ika?
12 Mose amwenenga usoko wenyi naYehova kupwa waulemu. Numba tuhu Mose alingilenga vyuma vyakukomwesa vize amulwezele Kalunga, oloze alombele Yehova atwaleho kumunangula jijila jenyi. (Tangenu Kulovoka 33:13.) Mose apwile namyaka yakuzomboka 80 halwola alombele chuma kana. Chipwe ngocho, kwapwile vyuma vyavivulu vize atelelele kulinangula hali Ise wamwilu.
13. Natusolola ngachilihi ngwetu twamona usoko wetu naYehova kupwa waulemu?
13 Chishina muka natulinangulako? Twatela kutwalaho kumonanga usoko wetu naYehova kupwa waulemu chamokomoko nakuvula chamyaka tunamuzachila. Jila yimwe tunahase kusolwelamo ngwetu twamona usoko wetu naYehova kupwa waulemu, shina kulombanga kuli ikiye.
14. Uno kulomba chinahase kutukafwa ngachilihi tutachikize kanawa Kalunga?
14 Usepa weji kuzamanga kachi nge vasepa namutu veji kushimutwilanga. Shikaho, pandamenu kuli Kalunga hakulombanga kuli ikiye shimbu yosena nakumulweza vyosena vili kumuchima wenu. (Efwe. 6:18) Ndumbwetu Krista wakuTurkey ambile ngwenyi: “Nge ngunalombo kuli Yehova nakumona omu mwangukumbulula, kaha ngweji kumuzanganga chikuma nakumufwelela. Shikaho ngwamumona kupwa hichisemi chami, kaha nawa sepa lyami.”
LUNGA UZE VEVWILILILE KUWAHA KULI YEHOVA
15. Yehova amwenenga ngachilihi Mwangana Ndavichi?
15 Mwangana Ndavichi asemukilile kumuyachi wavatu vaze valemeselenga Yehova Kalunga. Oloze ikiye kalemeselenga Yehova mwomwo yakukavangiza kaha vaka-tanga yenyiko. Atungile usoko wakukola naKalunga, kaha Yehova amuzangile chikuma. Yehova ambile ngwenyi Ndavichi apwile ‘lunga uze evwililile kuwaha kumuchima.’ (Vili. 13:22) Vyuma muka vyakafwile Ndavichi apandame chikuma kuli Yehova?
16. Uno vyuma vyakutenga vyakafwile Ndavichi alinangule ika hali Yehova?
Samu 19:1, 2) Kaha nawa kushinganyeka hajila Yehova atengelamo vatu, chakafwile Ndavichi atachikize ngwenyi Kalunga atwama namangana akukomwesa. (Samu 139:14) Shikaho, kushinganyeka hamilimo yaYehova chamulingishile amone ngwenyi apwile wakukuminamo.—Samu 139:6.
16 Ndavichi alinangwilenga kuvyuma atenga Yehova. Omu Ndavichi apwile kanyike, afungilenga mikoko jaise. Pamo halwola kana hakiko aputukile kuhunanana havyuma atenga Yehova. Chakutalilaho, omu atalilenga mwilu naufuku, amwenenga makombakaji avatanganyika. Kahechi chamulingishilenga atachikize vilinga vyauze avatengele, ngocho asonekele ngwenyi: “Melu eji kuvilikanga upahu waKalunga, kaha utangatanga weji kwambululanga milimo yamavoko enyi.” (17. Natunganyala ngachilihi nge natushinganyekanga havyuma atenga Yehova?
17 Chishina muka natulinangulako? Mwatela kuzanga vyuma vyakutenga. Wanenunga lwola lwakutalanga vyuma vyamwaza atenga Yehova, nakuvivwila kuwaha. Hakumbi hakumbi, mwatela kushinganyekanga havyuma vyakufwana nge mitondo, natunyama navatu, mangana muwane vishina namulinangula hali Yehova. Echi nachimikafwa mumutachikize kanawa Senu wazangi. (Loma 1:20) Ngocho, zangi yenu yakuzanga Yehova nayitohwelangako lika hakumbi hakumbi.
18. Kweseka namukanda waSamu 18, chuma muka atachikijile Ndavichi?
18 Ndavichi ejivile ngwenyi Yehova apwile nakumukafwa. Chakutalilaho, omu ajihile ndumba naulusu hakukinga mikoko jaise, atachikijile ngwenyi Yehova ikiye amukafwilenga numba ahase kujiha vaze tunyama vaulyanyi. Kahomu ajihile Ngolyate nawa amwene hatoma ngwenyi Yehova ikiye apwile nakumutwaminyina. (Samwe. 1, 17:37) Kaha nawa hakuchina Mwangana Saulu uze asakile kumujiha, Ndavichi atachikijile ngwenyi Yehova ikiye amuyowele. (Samu 18, mazu akujimbula) Nge Ndavichi apwile wakulivwimba kachi amwene ngwenyi vyuma kana avilingile mungolo jenyi. Oloze apwile wakulinyisa ngocho amwene ngwenyi Yehova ikiye amukafwile.—Samu 138:6.
19. Chishina muka natulinangula kumujimbu waNdavichi?
19 Chishina muka natulinangulako? Nge tunalombo kuli Yehova atukafwe, twatela kukekesa tumone lwola mwatukumbulula najila mwatukumbulwilamo. Kachi nge twapwa tuvakulinyisa, kaha natutachikiza hakumina ngolo jetu nakwijiva nawa ngwetu Yehova ikiye eji kutukafwanga. Nge natumonanga omwo Yehova eji kutukafwilangamo, kaha usepa wetu naikiye nauzama chikuma. Ndumbwetu walunga Isaac, wakuFiji uze nazachila Yehova hamyaka yayivulu etavilile chishina kana. Ambile ngwenyi: “Omu ngweji kushinganyekanga hachiyoyelo chami, ngweji kumonanga hatoma ngwami Yehova nangukafwenga chikuma kufuma vene halwola ngwaputukile kulinangula Mbimbiliya. Echi chinangukafwe ngupandame chikuma kuli Yehova.”
20. Vyuma muka natulinangula kuli Ndavichi hausoko apwile nawo naYehova?
20 Ndavichi alondezezelenga Yehova. Yehova atutenga nauhashi wakuhasa kumulondezeza. (Kupu. 1:26) Shikaho nge natutachikiza kanawa vilinga vyenyi, kaha nachipwa chachashi kumulondezeza. Ndavichi atachikijile kanawa Ise wamwilu, ngocho amulondezezelenga hakutwama kanawa navakwavo. Chakutalilaho, omu alingile shili kuli Yehova hakulinga ukoji naMbate-sheva, nakujihisa nawa lunga lyaMbate-sheva, Yehova amutetelelele, mwomwo naikiye atetelelenga vakwavo. (Samwe. 2, 11:1-4, 15) Hakuwana nge Ndavichi apwile nausoko wamwaza naYehova, ngocho vamuzangile chikuma muIsalele, kaha nawa vakwavo vamyangana vakavangijilenga chakutalilaho chenyi.—Vamya. 1, 15:11; Vamya. 2, 14:1-3.
21. Kweseka nachisoneka chaWavaka-Efwesu 4:24 na 5:1, uno ‘kulondezeza Kalunga’ nachitunganyalisa ngachilihi?
21 Chishina muka natulinangulako? Twatela ‘kulondezezanga Kalunga.’ Kachi nge natulinganga ngocho, kaha natunganyala nakumutachikiza kanawa. Nge natulondezezanga vilinga vyaKalunga, kaha natusolola ngwetu twapwa tuvana venyi.—Tangenu Wavaka-Efwesu 4:24; 5:1.
TWALENUHO KULINANGULA VYAYEHOVA NAKUMUTACHIKIZA KANAWA
22-23. Kachi nge natulinganga vyuma twalinangula, kaha vyuma muka navifumamo?
22 Nganomu tunalinangula, tweji kutachikizanga Yehova kuhichila muvyuma atenga nahakutanga Mazu enyi Mbimbiliya. Mbimbiliya yikwechi vyakutalilaho vyavangamba jaKalunga vakushishika vaze tunahase kulondezeza vakufwana nge Mose naNdavichi. Yehova nalisolola hatoma kuli etu, ngocho twatela kukilikita mangana tulinangule vyavivulu hali ikiye.
23 Natutwalangaho lika kulinangula vyavivulu hali Yehova. (Kwambu. 3:11) Numba tupwa nachinyingi chachindende, numba chachivulu, chuma chachilemu shina kuzachisa vyuma tunalinangula. Nge natuzachisanga vyuma twalinangula nakulondezeza Setu wazangi, kaha mwapandama chikuma kuli etu. (Yako. 4:8) Mazu enyi atufwelelesa ngwawo keshi kukaseza vaze veji kumutondatondangako.
MWASO 80 ‘Makilenu Mumone Ngwenu Yehova Apwa Wamwaza’
^ par. 5 Vatu vavavulu vafwelela ngwavo Kalunga kwatwama, oloze kavamutachikiza kanawako. Uno kutachikiza Yehova chalumbununa ika, kaha tunahase kutunga ngachilihi usepa wakukola naikiye, ngana muze alingile Mose naMwangana Ndavichi? Vihula kana navavikumbulula muchihande chino.