1-2. (a) Chilika muka veji kulinganga mumafuchi amwe? (Talenu lipwata lyakwamba ngwavo, “ Uno Mwaka waKusokoka Wapwile Uka?”) (b) Chuma muka ahanjikile Yesu chize vasoneka hali Luka 4:16-18?

MUMAFUCHI amwe nge mwangana nayulu hamyaka 50, veji kulinganga chilika chakulipwila. Chilika kana veji kuchilinganga halikumbi limwe chipwe hachalumingo chamuundu, chipwe kuhambakanyisaho. Oloze kuwahilila veji kupwanga nacho hachilika kana cheji kupwanga chakashimbu kakandende kaha.

² Natushimutwila hachilika cheka chakulipwila chinahambakana nachize vene valingilenga vaIsalele hamwaka wamuunduwakusokesa 50. Mwaka kana walingishilenga vaIsalele kupwa vakulihehwa. Jino mwomwo ika tuli nakushimutwila hachihande kana? Mwomwo mwaka uze vaIsalele vapwilenga nachilika chakulipwila weji kutwanukisanga chuma chize atulingila Yehova mangana atusokole, chize nawa ahanjikile Yesu.—Tangenu Luka 4:16-18.

3. Uno mukanda waVyavaLevi 25:8-12 wasolola ngachilihi nge Mwaka waKusokoka wanganyalishilenga vaIsalele?

³ Tushimutwilenu hamwaka wakusokoka uze vapwilenga nawo vatu jaKalunga vakushikulu, mangana chitukafwe kwivwishisa mazu ahanjikile Yesu kutalisa kukusokoka. Yehova alwezele vaIsalele ngwenyi: “Mukajilika mwaka wakusokesa 50, kaha mukavilika kusokoka mulifuchi lyosena. Mwaka kana naukapwa Mwaka waKusokoka kuli enu. Mutu himutu akakinduluke kumavu auswana wenyi nakutanga yenyi.” (Tangenu VyavaLevi 25:8-12.) Muchihande chinafumuho, twashimutwilanga omu vaIsalele vanganyalilenga hakulinga Sambata chalumingo hichalumingo. Uno Mwaka waKusokoka wanganyalishile ngachilihi vaIsalele? VaIsalele vaze vapwile  namikuli valanjishilenga misuka yavo yamavu mangana vafwete mikuli kana. Oloze omu wahetelenga Mwaka waKusokoka, vavakindulwishililenga misuka yavo yamavu. Ngocho mutu kana ‘akindulukilenga kumavu auswana wenyi,’ mangana nge nafu vana venyi vakawaswane. Veka nawa vahonenenga kufweta mikuli yambala ngocho vahanyinengako vana vavo chipwe vavene kupwa vandungo. Kaha omu Mwaka waKusokoka wahetelenga, vandungo vosena ‘vakindulukilenga kujitanga javo.’ Shikaho vatu kavapwilenga vandungo haya myaka yosenako. Echi chasolwele nge Yehova azakaminenga chikuma vatu jenyi.

4-5. Mwomwo ika twatela kutachikiza kanawa vyuma vyasolokelenga haMwaka waKusokoka?

⁴ Uno mujila muka yikwavo muze mwaka wakusokoka wanganyalishilenga vaIsalele? Yehova avalwezele kuhichila muli Mose ngwenyi: “Yehova mwakamikisula mulifuchi lize mwakamihana Yehova Kalunga kenu kupwa uswana wenu, kaha kuli enu kakweshi kukapwa muka-kuhutwako.” (Lushi. 15:4) Chuma kana chalihandununa chikuma navyuma vili nakusoloka mukaye, mwomwo vaka-luheto vali nakupichilako lika, kaha vihutu nawa vali nakuhutwilako lika.

⁵ Etu vaka-Kulishitu katwatwama mujishimbi jize Kalunga ahanyine Moseko. Shikaho katwatwama namwaka wakusokola vandungo, nakukonekela vaka-mikuli, nakukindulwisa misuka yamavu ngana muze valingilenga vatu jaKalunga kushikuluko. (Loma 7:4; 10:4; Efwe. 2:15) Chipwe ngocho, chapwa chachilemu kutachikiza kanawa vyuma vyasolokelenga haMwaka waKusokoka. Mwomwo ika? Mwomwo nayetu tunahase kupwa vakulihehwa ngana muze chapwilenga kuli vaIsalele.

6. Uno vatu vosena vasakiwa kuvasokola kuchuma muka?

⁶ Tuvosena twasakiwa kutusokola mwomwo twatwama muundungo washili. Hakuwana nge twapwa tuvaka-shili, tweji kushinakajiwanga nakuviza nakufwa. Vatu vavavulu veji kwitavilanga chuma kana omu veji kulitalilanga hachitalilo, chipwe nge vanaviji.  Kaha nawa tweji kuhombanga nge tunalingi shili. Kaposetolo Paulu ahanjikile hatoma ngwenyi apwile “muufunge walushimbi lwashili” luze lwapwile mumujimba wenyi. Kaha alinyengele ngwenyi: “Omu ngwavindama ami! Iyaze mwanguyovola kumujimba uno uli nakungutwala kukufwa kanechi?”—Loma 7:23, 24.

7. Vyuma muka apolofwetele Isaya kutalisa kukusokoka?

⁷ Kalunga awahishile vyuma mangana atusokole kushili kuhichila muli Yesu. Kafwe myaka yakuzomboka 700 shimbu kanda Yesu ezenga, kapolofweto Isaya apolofwetele vyakusokoka chize nachikeza kulutwe. Kusokoka kana nachikapwa chamwaza kuhambakana chize vapwilenga nacho vaIsalele. Asonekele ngwenyi: “Shipilitu yaMwata Wakulitulaho Yehova yili hali ami, mwomwo Yehova anguwavishile mangana nguvilike mujimbu wamwaza kuvatu vavavwovu. Angutumine ngukase hajimbandu javaze vali nakulyonyinga mumichima, nguvilike kuli vafunge mujimbu wakuvasokola.” (Isa. 61:1) Uno mutu muka mwakalinga vyuma vavuluka muupolofweto kana?

8. Uno iya ateselemo mazu amuupolofweto waIsaya?

⁸ Upolofweto kana waputukile kutesamo omu Yesu aputukile kuzata mulimo wenyi hano hamavu. Omu apwile musunangonga yamwimbo lyenyi muNazaleta, emanyine kumeso avaYuleya vaze vakungulukile nakutanga mazu aze asonekele Isaya. Yesu ambile ngwenyi ikiye ateselemo mazu amuupolofweto waIsaya akwamba ngwavo: “Shipilitu yaYehova yili hali ami mwomwo anguwavishile mangana nguvilike mujimbu wamwaza kuli vaka-kuhutwa. Angutumine nguvilike kuli vafunge mujimbu wakuvasokola, nakutonesa tupuputa, nakusokola vaze vanahombo, [nakwambulula] mwaka waYehova wakwivwila vatu uselewa.” (Luka 4:16-19) Uno Yesu ateselemo ngachilihi upolofweto kana?

9. Vatu vavavulu mumakumbi aYesu vashinganyekelenga ngwavo Yesu mwavasokola kuchuma muka?

⁹ Kusokoka chize apolofwetele Isaya, chize nawa atangile Yesu musunangonga, chaputukile kutesamo mulikulukaji lyamyaka lyakulivanga. Twatachikiza ngocho mwomwo yamazu ahanjikile Yesu ngwenyi: “Lelo echi chisoneka munevu ngana chinatesamo.” (Luka 4:21) Vatu vavavulu vaze vevwile mazu ahanjikile Yesu, vashinganyekele ngwavo pamo Yesu mwavasokola kuchiyulo chavaLoma. Pamo vevwile ngana muze vevwile malunga vavali vaze vambile ngwavo: “Etu  twafwelelanga ngwetu, ou mutu ikiye mwakasokola vaIsalele.” (Luka 24:13, 21) Oloze Yesu kalwezelenga vaka-kumukavangiza valikange kuchiyulo chavaLomako. Avalwezele vahanenga “vyuma vyaKesale kuli Kesale.” (Mateu 22:21) Uno Yesu asokwele ngachilihi vatu halwola kana?

10. Yesu asokwele vatu kuchuma muka?

¹⁰ Yesu ejile nakusokola vatu kuvyuma vivali. Chatete, asokolwele jila yakusokwelamo vatu kukunangula chamakuli chize vanangwilenga vatwamina vamukwitava. VaYuleya vavavulu halwola kana vapwilenga muundungo wakukavangiza visemwa vyavatu nakunangula chamakuli. (Mateu 5:31-37; 15:1-11) Vatu vaze vambile ngwavo vapwile nakutwaminyina vakwavo, vapwile tupuputa kushipilitu mwomwo kavazachililenga Kalunga mujila yakwolokako. Hakuwana nge vakanyine Yesu namuchano uze anangwilenga, shikaho vatwalileho lika kupwa mumilima namuundungo washili. (Yowa. 9:1, 14-16, 35-41) Vyuma vyamuchano vize anangwilenga navize alingilenga, vyakafwile vatu vavavwovu michima vasokoke kukunangula chamakuli.—Mako 1:22; 2:23–3:5.

11. Kusokoka muka chikwavo chize aneha Yesu?

¹¹ Yesu asokwele nawa vatu kuundungo washili yize twaswana. Kalunga eji kukonekelanga vaze vafwelela mundando yakusokola nakusolola lufwelelo lwavo muvilinga. (Hepe. 10:12-18) Yesu ambile ngwenyi: “Kachi nge Mwana mwamilingisa kupwa vakulihehwa, kaha namupwanga vakulihehwa chikupu.” (Yowa. 8:36) Kulihehwa kana chapwa chachinene kuhambakana chize vapwilenga nacho vaIsalele haMwaka waKusokoka. Chakutalilaho, vatu vamwe vaze vasokokelenga haMwaka waKusokoka, kutwala muze vapwilenga cheka vandungo, kaha nawa vafwilenga.

12. Vatu muka vatete kunganyala kukusokoka chize avilikile Yesu?

¹² Halikumbi lyaPendekoseta mumwaka wa 33 C.E., Yehova azachishile shipilitu hakuwavisa vaposetolo navatu veka vakushishika. Avetavilile vapwenga vana venyi mangana kulutwe vakayule hamwe naYesu mwilu. (Loma 8:2, 15-17) Ava vakiko vatu vatete kunganyala kukusokoka chize ahanjikile Yesu musunangonga yamuNazaleta. Vatu kana kavapwilenga cheka muundungo kukunangula chamakuli nakuvisemwa vize vahakileko vatwamina vamukwitava chavaYuleyako. Shikaho kuli Kalunga chapwile kwijiva nge vanasokoka lyehi kushili. Ou Mwaka waKusokoka wachifwanyisa  uze waputukile mu 33 C.E., omu vawavishile vaka-kukavangiza Kulishitu, naukakuma kusongo yaChiyulo chaYesu chaMyaka Likombakaji. Uno vyuma muka vyamwaza navisoloka kufuma oholyapwa nakuheta kulwola kana?

13-14. Vatu veka muka veji kunganyalanga kukusokoka chize avilikile Yesu?

¹³ Kwatwama nawa lizavu lyalinene ‘lyamikoko veka’ vakufuma kumafuchi osena, vaze vali nakuzachila Kalunga. (Yowa. 10:16) Vatu kana kavavasakula mangana vakaye nakuyula hamwe naYesu mwiluko. Oloze vatwama nalutalililo lwakukayoyela hano hamavu haya myaka yosena. Uno nayenu mukwechi lutalililo kana tahi?

¹⁴ Namakumbi ano muli nakulivwisa kuwaha vyuma vimwe vize vali nakulivwisa kuwaha vaze vawavisa. Chakutalilaho, nge namumulomba Kalunga amikonekele jishili jenu, kaha mwalinga vene ngocho, mwomwo mwafwelela mundando yakusokola yaYesu. Echi nachimikafwa muzamise usoko wenu naKalunga nakupwa nachivezu chitoma. (Efwe. 1:7; Kuso. 7:14, 15) Achishinganyekenu nawa hakuwaha muli nakwivwa hakumisokola kukunangula chamakuli. Yesu ambile ngwenyi: “Namutachikiza muchano, kaha muchano naumilingisa kupwa vakulihehwa.” (Yowa. 8:32) Chikupu vene,  twawahilila chikuma kutusokola kukunangula chamakuli.

15. Vyuma muka vyamwaza tuli nakutalilila?

¹⁵ Mwatela kutalilila nawa kusokoka cheka chakuhambakana echi tunashimutwila. Kalinwomu Yesu afumiseko kwitava chamakuli naviyulo vyavatu. Oloze Kalunga mwakakinga “liyongomena lyalinene” lyavatu vaze veji kumuzachilanga nakukavalingisa vakalivwise kuwaha kuyoyela mupalachise. (Kuso. 7:9, 14) Mayevuyevu avatu vaze vafwa nawa navakavasangula, nakukavasokola kushili yize aneha Alama.—Vili. 24:15.

16. Kusokoka muka chakulipwila nachikapwako kulutwe?

¹⁶ MuChiyulo chaKulishitu chaMyaka Likombakaji, Yesu navaze mwakayula navo, navakalingisa vatu vakapwe vakukupuka nakuzachila Kalunga mujila yamwenemwene. Lwola kana nalukapwa ngana mwaMwaka waKusokoka uze vapwilenga nawo vaIsalele. Vatu vosena vaze vali nakuzachila Yehova nakashishi, navakavasokola kushili nakupwa vakukupuka.

17. Vyuma muka vafwelelesa vatu jaKalunga vize vasoneka hali Isaya 65:21-23? (Talenu muvwimbimbi wahalipapilo lyahelu.)

¹⁷ Upolofweto wakusolola omwo nachikapwa chiyoyelo hano hamavu, vausoneka hali Isaya 65:21-23. (Tangenu.) Vatu kaveshi kukatwamanga kahako, mwomwo Mbimbiliya yasolola ngwayo vatu jaKalunga navakazatanga milimo yamwenemwene yize nayikavasuulwisanga. Tunafwelela chikupu ngwetu, omu nayikakuma myaka likombakaji, “vyuma vyakutenga navikiko nawa [navakavilingisa] kupwa vyakulihehwa kuundungo wakuya nakupola, nakwingila mukulihehwa chaupahu chavana vaKalunga.”—Loma 8:21.

18. Twatachikiza ngachilihi ngwetu natukalivwisa kuwaha kuyoya kulutwe?

¹⁸ Yehova alwezele vaIsalele vazatenga milimo nakuwanangako nawa lwola lwakunoka, kahomu mukiko nachikapwa nakuli vatu jenyi muChiyulo chaKulishitu chaMyaka Likombakaji. Nakukapwanga nawa nalwola lwakuzata vyuma vyakushipilitu. Hakuwana nge natukalemesanga kanawa Yehova mukaye kakahya, ngocho natukapwa vakuwahilila. Chikupu vene, natukalivwisa kuwaha kuzata milimo nakulemesa Yehova omu vatu vosena navakapwa muChiyulo chaKulishitu chaMyaka Likombakaji.