1-2. Vyuma muka vyamwaza vatalilila vangamba jaKalunga?

LUTALILILO lwapwa lwalulemu chikuma. Vatu vamwe vatalilila kukapwa naulo wakufukila, chipwe kupwa navana vakulikangula chipwe kuvoka kumusongo waupi. Nayetu vaka-Kulishitu tunahase kutalilila vyuma kana. Oloze twatalilila vyuma vyavilemu chikuma kuhambakana evi tunavuluka. Vyuma kana shina, kuyoya chahaya myaka yosena nakukamona vatu twazanga vaze vafwa.

² Kaposetolo Paulu ambile ngwenyi: “Nguli nalutalililo muli Kalunga, . . . ngwami nakukapwa kusanguka chavaka-kwoloka navaka-kuhenga.” (Vili. 24:15) Paulu keshi ikiye apwile watete kuhanjika hakusangukako. Yopa nawa ahanjikile hakusanguka. Afwelelele ngwenyi Kalunga mwakamwanuka nakukamusangula.—Yopa 14:7-10, 12-15.

3. Mukanda Wavaka-Kolinde wakulivanga kapetulu 15 unahase kutukafwa ngachilihi?

³ “Kusanguka chavafu” chatwama ‘hakunangula chamaputukilo’ chavyuma vafwelela vaka-Kulishitu. (Hepe. 6:1, 2) Vyuma ahanjikile Paulu kutalisa kukusanguka vyatwama mumukanda Wavaka-Kolinde wakulivanga kapetulu 15. Chasoloka nge vyuma asonekele vyakolezezele vaka-Kulishitu vakulivanga. Kapetulu kana nahase kutukolezeza nayetu mangana tufwelele ngwetu chikupu vene vafu navakasanguka.

4. Lutalililo lwakusanguka chavafu lwapendamina haka?

⁴ Kusanguka chaYesu chatukafwa tufwelele ngwetu vatu twazanga navakasanguka. Kusanguka chaYesu chapwile ‘hamujimbu wamwaza’ uze ambulwile Paulu kuli vaka-Kolinde. (Koli. 1, 15:1, 2) Ambile ngwenyi, kachi nge muka-Kulishitu kafwelelele mukusanguka chaYesuko, kaha lufwelelo lwenyi lwamokomoko.  (Koli. 1, 15:17) Lutalililo lwavaka-Kulishitu lwapendamina hakusanguka chaYesu.

5-6. Uno mazu ahali Wavaka-Kolinde 1, 15:3, 4, alemena halihi kuli etu?

⁵ Paulu ashindakanyine havyuma vitatu kutalisa kukusanguka. Ambile ngwenyi: (1) “Kulishitu afwililile jishili jetu.” (2) “Vamufunjile.” (3) “Vamusangwile halikumbi lyamuchitatu nganomu vyahanjika Visoneka.”—Tangenu Wavaka-Kolinde 1, 15:3, 4.

⁶ Uno kufwa chaYesu, nakumufunda nakusanguka chenyi vyalemena halihi kuli etu? Kapolofweto Isaya ahanjikilile chimweza ngwenyi Meshiya ‘navakamuteta muli vaze vavatonyi,’ kaha nawa ‘fuka yenyi nayikapwa hamwe navaka-kuhuka.’ Ahanjikile nawa hachuma chikwavo nachikasoloka ngwenyi, Meshiya ‘mwakambata shili yavatu vavavulu.’ Yesu alingile chuma kana hakuhana ndando yakusokola. (Isa. 53:8, 9, 12; Mateu 20:28; Loma 5:8) Shikaho, kufwa chaYesu nakumufunda nakusanguka chenyi, vyatulingisa tufwelele ngwetu navakatusokola kushili nakukufwa nakukamona vatu twazanga vaze vafwa.

7-8. Vyuma muka vyeji kulingisanga vaka-Kulishitu vafwelele ngwavo Yesu asangukile?

⁷ Lutalililo lwetu mukusanguka lwatambukila hamwe nakusanguka chaYesu, shikaho twatela kufwelela chikupu ngwetu Yesu asangukile. Mwomwo ika twatela kufwelela ngwetu Yehova asangwile Yesu?

⁸ Kwapwile vatu vavavulu vaze valimwenenene nameso avo kapu ngwavo Yesu vamusangwile. (Koli. 1, 15:5-7) Mutu watete havatu avulukile Paulu shina Petulu (uze vavulukilenga nawa ngwavo Kefwase). Kaha lizavu lyatumbaji vavavulu vetavilile ngwavo Petulu amwene Yesu hanyima yakumusangula. (Luka 24:33, 34) Paulu ambile nawa ngwenyi “vaze 12,” kulumbununa vaposetolo, vamwene Yesu hanyima yakumusangula. Kufumaho Kulishitu “asolokele kuli vandumbwetu vakuhambakana 500 halwola lwolumwe,” pamo kukuliwana chize chapwile muNgalileya, chize vasoneka hali Mateu 28:16-20. Yesu ‘asolokele nawa kuli Yakova.’ Pamo ou Yakova, apwile songo yenyi uze ahonene kufwelela muli Meshiya hakavanga. (Yowa. 7:5) Omu Yakova amwene Yesu nasanguka, amufwelelelele jino. Kaha nawa halwola Paulu asonekele ou mukanda mu 55 C.E., vatu vaze vamwene Yesu nasanguka vapwile vachili vavatonyi, ngocho vatu vaze vapwile nakuhuhwasana vahashilenga kuya nakuvahulisa.

9. Kweseka naVilinga 9:3-5, Paulu atachikijile ngachilihi ngwenyi Yesu asangukile?

⁹ Kutwala muze, Yesu asolokele kuli Paulu. (Koli. 1, 15:8) Paulu (uze vavulukilenga nawa ngwavo Saulu) apwile haungeji wakuya kuNdamashiku, kaha evwile lizu lyaYesu nakumumona ali mwilu. (Tangenu Vilinga 9:3-5.) Chuma chasolokele kuli Paulu chasolwele nge chikupu vene Yesu asangukile.—Vili. 26:12-15.

10. Vyuma muka alingile Paulu mwomwo yakufwelela ngwenyi Yesu asangukile?

¹⁰ Chasoloka nge vatu vavavulu vevwile kuwaha havyuma avalwezele Paulu, mwomwo hakavanga apwilenga muka-kuyanjisa vaka-Kulishitu. Oloze omu atachikijile ngwenyi Yesu nasanguka, akilikichile chikuma kunangula vatu vetavile ngwavo chikupu vene Yesu asangukile. Omikile chamokomoko nakumuveta, nakumukasa mukamenga, nakuvomba hakalungalwiji, omu ayilenga nakwambulula mujimbu wakusanguka chaYesu. (Koli. 1, 15:9-11; Koli. 2, 11:23-27) Paulu akunyukile ngwenyi Yesu asangukile, ngocho alisuwile vamujihe tuhu, mwomwo asakile kuhakwila mujimbu kanou wamuchano. Uno vyuma kana kavyamilingishile mwitavile ngwenu Yesu asangukileko tahi? Kaha, kutala kavyamilingishile mufwelele ngwenu vafu navakasangukako tahi?

11. Vyuma muka vize pamo vyalingishile vaka-Kolinde vapwenga navishinganyeka vyakuhenga kutalisa kukusanguka?

¹¹ Vatu vamwe munganda yaKolinde yavaHelase vapwile navishinganyeka vyakuhenga kutalisa kukusanguka. Vahetele nakuseteko yakwamba ngwavo “kusanguka chavafu chauchiko.” Mwomwo ika? (Koli. 1, 15:12) Vatu vamunganda yaAtene yavaHelase vaze valinangwile mangana autu, vakanyinenga ngwavo Yesu kasangukileko. Vishinganyeka kana pamo vyahungumwishile vatu vamwe vamuKolinde. (Vili. 17:18, 31, 32) Vatu vamwe vashinganyekelenga ngwavo kusanguka kana chapwile chachifwanyisa, ngwavo vatu vapwilenga ‘vafu’ hakupwa vaka-shili oloze vasangukilenga omu valumukilenga nakupwa vaka-Kulishitu. Numba tuhu katwatachikiza chuma chivene chavalingishile vapwenga navishinganyeka kanako, oloze lufwelelo lwavo lwapwile lwamokomoko mwomwo kavafwelelele mukusangukako. Nge Kalunga kasangwile Yesuko, kachi kakwapwile ndando yakusokolako, kaha kachi kavavakonekelele jishili javoko. Shikaho vatu vaze vahonene kufwelela mukusanguka, lutalililo lwavo lwapwile lwamokomoko.—Koli. 1, 15:13-19; Hepe. 9:12, 14.

12. Kweseka naWaPetulu 1, 3:18, 22, kusanguka chaYesu chalihandunwine ngachilihi nachavaze vasangukilenga kunyima?

¹² Paulu alimwenenene nameso enyi kapu, ngwenyi ‘Kulishitu vamusangwile kuvafu.’ Kusanguka kana chapwile chachilemu kuhambakana chavatu vaze vasangwilenga shimbu kanda Yesu, mwomwo vatu kana vafwile cheka. Paulu ambile ngwenyi Yesu “ikiye mihako yatete yavaze vanasavala lyehi tulo twakufwa.” Mujila muka Yesu apwililile watete? Mwomwo ikiye apwile watete kusangukila kushipilitu, kaha nawa ikiye mutu watete kuya mwilu.—Koli. 1, 15:20; Vili. 26:23; tangenu WaPetulu 1, 3:18, 22.

13. Chihandwa muka ahanjikile Paulu chize chatwama hali Alama naYesu?

¹³ Uno kufwa chamutu umwe chinahase kulingisa ngachilihi makombakaji avatu vakayoye? Paulu akumbulwile chihula kana mujila yayashi. Alumbunwine chihandwa chapwile havyuma anehele Alama, navize anehele Kulishitu. Ahanjikile hali Alama ngwenyi: “Kufwa chejile kuhichila muli mutu umwe.” Omu Alama alingile shili, alinehelele ukalu navana venyi. Namakumbi ano tuli nakumona ukalu mwomwo yakulikanga chenyi. Oloze twatalilila vyuma vyamwaza mwomwo Kalunga asangwile Mwanenyi. Shikaho “kusanguka chavafu nawa cheza kuhichila muli mutu umwe [Yesu].” Paulu ambile ngwenyi: “Mwomwo nganomu vali nakufwa vosena muli Alama, ngocho nawa muli Kulishitu mukiko vene navakayoyela vosena.”—Koli. 1, 15:21, 22.

14. Uno Alama navakamusangula tahi? Lumbununenu.

¹⁴ Uno Paulu alumbunwine ika hakwamba ngwenyi, “vali nakufwa vosena muli Alama”? Apwile nakushinganyeka havana vaAlama vaze vaswanyine shili nakuhona kukupuka, ngocho navafwanga. (Loma 5:12) Alama katwama hali vaze ‘navakayoyako.’ Keshi kukanganyala kundando yakusokola yaKulishituko, mwomwo apwile mutu wakukupuka uze alisakwilile kulikanga kuli Kalunga. Omu mukiko nachikapwa nakuli vaze mwakasopesa “Mwanamutu” kupwa “vapembe,” kulumbununa nge “navakavatetako haya myaka yosena.”—Mateu 25:31-33, 46; Hepe. 5:9.

15. Veya vatwama hali “vosena” vaze ‘navakayoya’?

¹⁵ Tachikizenu ngwenu Paulu ambile ngwenyi “muli Kulishitu mukiko vene navakayoyela vosena.” (Koli. 1, 15:22) Ou mukanda ausonekelele vaka-Kulishitu vakuwavisa muKolinde vaze vapwile nalutalililo lwakukasanguka nakuya mwilu. Ava vaka-Kulishitu  ‘vavajilikile muli Kulishitu Yesu, nakuvasanyika kupwa vaka-kujila.’ Paulu avulukile nawa vaze ‘vasavala tulo twakufwa muli Kulishitu.’ (Koli. 1, 1:2; 15:18; Koli. 2, 5:17) Mumukanda weka nawa vamuhwiminyinyine asoneke ngwenyi vaze ‘vanunga hamwe naYesu mukufwa chakufwana nge chize chenyi,’ “[navakavanunga] nawa naikiye hamwe mukusanguka chakufwana nge chize chenyi.” (Loma 6:3-5) Yesu asangukilile kushipilitu nakuya mwilu. Omu mukiko nachikapwa nakuli vosena vaze ‘valikata naKulishitu,’ kulumbununa vaka-Kulishitu vosena vaze vawavisa nashipilitu.

16. Uno Paulu alumbunwine ika hakuvuluka Yesu ngwenyi “mihako yatete”?

¹⁶ Paulu asonekele ngwenyi Kulishitu vamusangwile kupwa “ikiye mihako yatete yavaze vanasavala lyehi tulo twakufwa.” Tachikizenu ngwenu numba tuhu vatu vamwe vakufwana nge Lazalu vavasangwile nakuyoyela hamavu, oloze Yesu ikiye apwile watete kusangukila kushipilitu nakutambula kuyoya chahaya myaka yosena. Vamufwanyishile kumihako yatete yize vahanyinenga vaIsalele kuli Kalunga. Kaha nawa Paulu hakuvuluka Yesu ngwenyi “mihako yatete,” alumbunwine ngwenyi nakukapwa veka vaze navakasanguka nakuya mwilu. Vaposetolo navatu veka vaze ‘valikachile naKulishitu,’ vamukavangijile mwilu. Kaha nawa vasangukile ngana muze asangukile Yesu. Omu mukiko chapwa nakuli vaze valikata naKulishitu makumbi ano.

17. Uno vatu vaze ‘valikachile naKulishitu’ vatelelele kutambula fweto yamwilu lwola muka?

¹⁷ Omu Paulu asonekelele vaka-Kolinde mukanda, halwola kana vatu vaze ‘valikachile naKulishitu’ kanda vaputuke kusanguka nakuya mwilu. Oloze asonekele kutalisa kulwola lwakulutwe ngwenyi: “Mutu himutu nahenyi: Mihako yatete ivene Kulishitu, kaha namwiza vaze vakuli Kulishitu halwola lwakupwako chenyi.” (Koli. 1, 15:23; Teso. 1, 4:15, 16) Tuli nakuyoyela mulwola ‘lwakupwako’ chaKulishitu. Shikaho, vaposetolo navaka-Kulishitu veka vakuwavisa vaze vafwilenga vatelelele kuvandamina kupwako chaKulishitu numba jino vatambule fweto yavo yamwilu “[nakulinunga nenyi] hamwe mukusanguka chakufwana nge chize chenyi.”

18. (a) Mwomwo ika twafwelela ngwetu nakukapwa kusanguka chikwavo? (b) Kweseka naWavaka-Kolinde 1, 15:24-26, vyuma muka navikasoloka mwilu?

¹⁸ Jino vyuma muka navikasoloka kuli vaka-Kulishitu vaze kavatwama nalutalililo lwakukayoyela  mwilu naKulishituko? Navakiko vatalilila kukasanguka. Mbimbiliya yamba ngwayo Paulu navatu veka vaze veji kuyanga mwilu vatwama “hakusanguka chakulivanga kufuma kuvafu.” (Fwili. 3:11) Mazu kana asolola nge nakukapwa kusanguka chikwavo. Kaha nawa alitombola namazu ahanjikile Yopa havyuma navikasoloka kuli ikiye. (Yopa 14:15) Vatu “vaze vakuli Kulishitu halwola lwakupwako chenyi” navakapwa naYesu mwilu omu mwakeza nakunongesa jifulumende josena, namawata osena, nangolo jeka josena. Kaha nawa “kufwa chize chapwa muka-kole wakukuminyina, navakachifumisako.” Chikupu vene kufwa kacheshi kukapwa nangolo hali vaze navakasanguka nakuya mwiluko. Jino vyuma muka navikasoloka kuli vatu veka?—Tangenu Wavaka-Kolinde 1, 15:24-26.

19. Chuma muka vatela kutalilila vaze navakayoyela hano hamavu?

¹⁹ Chuma muka vatela kutalilila vaze navakayoyela hano hamavu? Vatela kutalilila chuma avulukile Paulu hakuhanjika ngwenyi: “Nguli nalutalililo muli Kalunga, lutalililo luze vali nalwo navava vatu, ngwami nakukapwa kusanguka chavaka-kwoloka navaka-kuhenga.” (Vili. 24:15) Hakuwana nge mwilu kamwaya vaka-kuhengako, shikaho awa mazu atalisa kuvatu vaze navakasangukila hano hamavu.

20. Uno chino chihande chinazamisa ngachilihi lutalililo lwenu?

²⁰ Kuhanjika muchano, “nakukapwa kusanguka.” Vatu vaze navakasangukila hano hamavu, vatalilila kukayoya haya myaka yosena. Nayenu munahase kutalilila chuma kana. Lutalililo lwakusanguka nalumivendejeka nge munanuka vatu mwazanga vaze vafwa. Navakiko vanahase kukavasangula omu Kulishitu navaze mwakayula navo navakapwa “vamyangana . . . hamyaka 1,000.” (Kuso. 20:6) Nayenu munahase kufwelela ngwenu nge namufwa shimbu kanda chiyulo chaYesu chamyaka Likombakaji chiputuke, navakamisangula. Kaha nawa “lutalililo kana kalweshi kukatutwala kukupayako.” (Loma 5:5) Lutalililo kana lwatela kumijikijisa nakumilingisa mupwenga vakuwahilila hakuzachila Kalunga. Oloze kuli vyuma vikwavo vize tunahase kulinangula mumukanda Wavaka-Kolinde wakulivanga kapetulu 15. Vyuma kana natuvishimutwila muchihande nachikavangizaho.