Kutala munalivwisanga kuwaha kutanga jimangazini jauno mwaka jaKaposhi Kakutalila tahi? Nge mukiko, kaha tumonenu omu munahase kukumbulula vihula vino vinakavangizaho:

Uno twatela kumona ngachilihi vandumbwetu vawavisa?

Twamona lufwelelo lwavo kupwa lwalulemu, oloze katwavavumbika chipwe kuvasangejeka nakuhambakanyisahoko. (Yuta 16) Katwatela nawa kuvahulisanga vihula vize navivafutwisako.—w20.01, li. 29.

Vyuma muka navimikafwa mufwelele ngwenu Yehova amitachikiza?

Mbimbiliya yasolola ngwayo amitachikijile shimbu kanda musemuke. Eji kwivwililanga kukulomba chenu. Atachikiza vishinganyeka vyamumuchima wenu, nakwivwa kuwaha havyuma vyamwaza mweji kulinganga. (Miji. 1, 28:9; Vishi. 27:11) Kaha nawa amikokele mupwenga kusali yenyi.—w20.02, li. 12.

Lwola muka twatela kuhanjika chipwe kuhola kulu?

Tweji kuhanjikanga hali Yehova. Tweji kuhanjikanga nge tuli nakusaka kwolola mukwetu uze ali nakuseuka mujila. Vakulwane muchikungulwilo nawa veji hanjikanga hakuhuhumuna vandumbwavo. Katwahanjika hajijila vali nakuzachilamo mulimo wakwambulula mumafuchi muze vakanyisa mulimo wetuko. Kaha nawa katwambulula vihande vyakuswekako.—w20.03, li. 20-21.

Uno vambimba vahali Yowele kapetulu 2 valihandunwina halihi navaze vahali Kusoloka kapetulu 9?

Hali Yowele 2:20-29 vasonekaho ngwavo, Kalunga mwakahangila vambimba kwakusuku, nakushishishilamo vatu havyuma venyekele vambimba. Kufumaho, mwakavahana shipilitu yenyi. Vyuma kana vyateselemo omu vaka-Mbavilone valukukile vaIsalele, kaha vyateselemo nawa kulutwe. Mukanda waKusoloka 9:1-11 wahanjika hali vawavisa vamumakumbi ano vaze vafwanyisa kuvambimba, vaze veji kuvilikanga mujimbu waKalunga wakusopesa katwamino kano kakuhuka, nakulingisa vatu vamukaye vevwenga kupihya.—w20.04, li. 3-6.

Iya emanyinako mwangana wakunote makumbi ano?

Lifuchi lyaRussia navaka-kulikundwiza. Vali nakuyanjisa vatu jaKalunga, nakukanyisa mulimo wakwambulula nakusolola ngwavo vahunga Vinjiho jaYehova. Mwangana wakunote nalipikinga namwangana wakusulo.—w20.05, li. 13.

Uno vilinga vasoneka hali Wavaka-Ngalesha 5:22, 23 vikiko kaha vyapwa “mihako yashipilitu” tahi?

Chiku. Shipilitu yajila yeji kutukafwanga tupwenga namihako yikwavo yakufwana nge muhako wakwoloka. (Efwe. 5:8, 9)—w20.06, li. 17.

Ponde muka yatwama hakuhaka vyuma haInternet?

Vyuma namuhakaho vinahase kumisolola nge muvaka-kulitukwojola, keshi muvakulinyisako.—w20.07, li. 6-7.

Vyuma muka vanahase kulinangula vaka-kwambulula kuli vaka-kuta ishi?

Veji kuyanga kuchihela nahalwola vanamono ngwavo navawana vaishi. Veji kuzachisanga vinoma vyakutamo. Veji kuzatanga mulimo wavo numba nge vyuma vinakaluhwa. Nayetu tunahase kulinga mwomumwe hakuzata mulimo wakwambulula.—w20.09, li. 5.

Vyuma muka vinahase kukafwa vilongesa vaMbimbiliya vazange chikuma Yehova?

Twatela kuvakolezeza vatangenga Mbimbiliya hakumbi hakumbi nakuhunanananga havyuma vanatange. Twatela nawa kuvanangula mwakulombela.—w20.11, li. 4.

Mazu akwamba ngwavo, “Muli Kulishitu mukiko vene navakayoyela vosena,” atalisa kuli veya?—Koli. 1, 15:22.

Kaposetolo Paulu kapwile nakulumbununa ngwenyi vatu vosena navakasangukako. Apwile nakuhanjika hali vaka-Kulishitu vawavisa, vaze “vajilika lyehi muli Kulishitu Yesu.” (Koli. 1, 1:2; 15:18)—w20.12, li. 5-6.

Uno vawavisa navakazata mulimo muka hanyima ‘yakuvalumuna mukukemwina chaliso, omu nalukavuma luneta lwamakumishilo’?—Koli. 1, 15:51-53.

Navakapwanga hamwe naKulishitu nakufunga vatu nambwechi yafwelu. (Kuso. 2:26, 27)—w20.12, li. 12-13.