1. Uno kuhomba chinahase kuneha ukalu muka?

HAKUMBI HAKUMBI tweji kumonanga ukalu, oloze tweji kukilikitanga mangana tumike. Kuhanjika muchano, chapwa chachikalu kufungulula ukalu kana nge tunahombo. Shikaho twatela kutachikiza ngwetu kuhomba chinahase kutulingisa tulivwe kupwa vamokomoko nakuhona kupwa vakuwahilila. Hali Vishimo 24:10 nakwinyikila chamwishi, vasonekaho ngwavo: “Kachi nge nauhomba halwola lwaukalu, kaha ngolo jove najikeha.” Chikupu vene, kuhomba chinahase kutulingisa tuhone kupwa nangolo jakutukafwa tumike muukalu.

2. Vyuma muka vinahase kutuhombesa, kaha natushimutwila ika muchihande chino?

² Kuli vyuma vyavivulu vinahase kutuhombesa, vyakufwana nge kulimona kupwa tuvamokomoko, natutenga twetu, nakuviza. Vyuma vikwavo shina, kuhona kutuhana mulimo twasaka muliuka, chipwe kwambulwila mungalila muze vatu kaveshi nakwakula kanawa kumujimbu wetuko. Muchihande chino, natushimutwila vyuma vimwe vize navitukafwa tuhonese ukalu wakuhomba.

3. Vyuma muka vinahase kutukafwa tuhonenga kulimona kupwa tuvamokomoko?

³ Chapwa chachashi kulimona kupwa tuvamokomoko, nakuhomba mwomwo yatutenga twetu. Echi chinahase kutulingisa tushinganyeke ngwetu Yehova keshi kukatwitavisa tukengile muPalachiseko. Vishinganyeka kana vinahase kutunehela ukalu. Uno twatela kumona ngachilihi tutenga twetu? Mbimbiliya yatulweza ngwayo, vatu vosena “vanalingi shili” kufumisaho kaha Yesu Kulishitu. (Loma 3:23) Oloze Yehova kapwa muka-kutuwanyina tutengako, kaha nawa ejiva ngwenyi katweshi kuhasa kulinga vyuma mujila yakukupukako. Apwa chisemi  wazangi uze afwila kutukafwa. Eji kututalililanga nawa chikoki. Kaha nawa eji kumonanga kukilikita chetu hakusaka tulinge vyuma vyakwoloka, nakuhonesa vishinganyeka vyakulimona kupwa tuvamokomoko. Ngocho afwila kutukafwa.—Loma 7:18, 19.

4-5. Kweseka naWaYowano 1, 3:19, 20, vyuma muka vyakafwile vandumbwetu vavali vahone kuhomba chikuma?

⁴ Talenu hachakutalilaho chaTumba naChilombo. * Omu Tumba apwile kanyike, vausoko wenyi kavamusolwelelenga zangiko, kahechi chamuhombesele chikuma. Kavamusangejekelengako. Ngocho alimwenenga kupwa wamokomoko. Ashinganyekelenga ngwenyi wakukuminamo, numba nge nalimbenje chachindende kaha. Chilombo nawa apwile naukalu woumwe. Vausoko wenyi kavamumwenenga kupwa wamulemuko, ngocho alimwenenga kupwa wamokomoko. Nahanyima yakumumbapachisa, ashinganyekelenga ngwenyi katelemo kupwa chinjiho chaYehovako.

⁵ Chipwe ngocho, ava vandumbwetu kavalitwaminyinyine kuzachila Yehovako. Mwomwo ika? Vambililenga chiteli chavo hali Yehova, kuhichila mukulomba. (Samu 55:22) Vatachikijile ngwavo Setu wamwilu wazangi ejiva ngwenyi vyuma twahichilemo kunyima vinahase kutulingisa tulimone kupwa tuvamokomoko. Oloze eji kumonanga nawa vilinga vyamwaza twatwama navyo vize pamo katwejiva etu vaveneko.—Tangenu WaYowano 1, 3:19, 20.

6. Uno mutu uze ali nakulimbenja mapapa kakavulu nahase kwivwa ngachilihi?

⁶ Mutu nahase kukilikita chikuma mangana ambile vilinga vyavipi. Oloze nahase kulimbenja hachuma chochimwe mapapa kakavulu, ngocho chinahase kumuhombesa. Chapwa chakutamo kulihana mulomba kachi nge tunalingi shili. (Koli. 2, 7:10) Oloze katwatela kulihana chikuma mulonga, nakushinganyeka ngwetu Yehova keshi kuhasa kutukonekelako. Vishinganyeka kana vyapwa vyakuhenga, kaha nawa vinahase kutulingisa twechenga kuzachila Yehova. Anukenu mazu tweji kutanganga hali Vishimo 24:10, ngwavo nge natuhomba, kaha ngolo jetu najikeha. Shikaho, muchishishisa chakuhomba, twatela ‘kusungamisa vyuma’ hakulomba kuli Yehova mangana atukonekele. (Isa. 1:18) Yehova mwatukonekela, nge mwatumona tunapihilila nakwalumuka. Chuma chikwavo mwatela kulinga shina, kuya kuli vakulwane. Navamikafwa muputuke cheka kuzachila Yehova.—Yako. 5:14, 15.

7. Mwomwo ika katwatela kuhomba chikumako kachi nge chili nakutukaluhwila kulinga vyuma vyakwolokako?

⁷ Ndumbwetu Jean-Luc uze apwa mukulwane muchikungulwilo muFrance eji kulwezanga vaze cheji kukaluhwilanga kumbila tutenga  twavo, ngwenyi: “Mutu wakwoloka kuli Yehova, kapwa mutu uze kalimbenjako, oloze apwa uze eji kupihililanga nakwalumuka.” (Loma 7:21-25) Shikaho, nge chili nakumikaluhwila kumbila tutenga twenu, kanda kulimona ngwenu muvamokomokoko. Hakuwana nge tuvosena tweji kulimbenjanga, ngocho twasakiwa Yehova atusolwele likoji lyenyi lyalinene kuhichila mundando yakusokola.—Efwe. 1:7; Yowa. 1, 4:10.

8. Veya vanahase kutukafwa, nge tunahombo?

⁸ Vandumbwetu muchikungulwilo navatukolezeza. Vanahase kutwivwilila kanawa kachi nge tuli nakuhanjika, kaha navatukolezeza. (Vishi. 12:25; Teso. 1, 5:14) Ndumbwetu Joy wamuNigeria, uze nalipikinga naukalu wakuhomba ambile ngwenyi: “Vandumbwetu vakiko vanangukafwenga mangana ngumike muukalu. Kaha chuma kana chinasolola nge Yehova eji kukumbululanga kulomba chami. Ngunalinangula kuli vakiko mwakukolezezela vaze vanahombo.” Twatela kutachikiza ngwetu lwola lumwe vandumbwetu kaveshi kuhasa kutachikiza ngwavo tuli nakusakiwa kutukolezezako. Shikaho, twatela kuya kuli ndumbwetu wakuhya kushipilitu nakumulweza ngwetu tuli nakusakiwa kutukafwa.

9. Uno chisoneka chaSamu 41:3 na 94:19 cheji kutuvendejekanga ngachilihi?

⁹ Yehova mwatukafwa. Nge tunaviji, chikumanyi nge tunalipiki namusongo wakutekeleka halwola lwalusuku, chinahase kutukaluhwila kushinganyeka vyuma vyakwoloka. Numba tuhu Yehova keshi kutuka mujila yakukomwesako, oloze eji kutuvendejekanga nakutuhana ngolo jakumika. (Tangenu Samu 41:3; 94:19.) Chakutalilaho, nahase kuzachisa vakwetu vaka-Kulishitu mangana vatuzachileko milimo yimwe yahakanda chipwe kuya nakutulanjilako vyuma tuli nakusaka. Nahase nawa kuvalingisa vezenga nakutulombelako. Chipwe nahase kutwanukisa mazu akutuvendejeka atwama muMbimbiliya, akufwana nge aze ahanjika halutalililo lwakukayoya kanawa chakuzeneka kuviza mukaye kakahya.—Loma 15:4.

10. Mwomwo ika Isang ahonene kutwalaho kuhomba hanyima yakupwa muponde?

¹⁰ Ndumbwetu Isang wamuNigeria apwile muponde yize yamusezele nautonji. Ngocho ndotolo yenyi amulwezele ngwenyi keshi kukatambuka chekako. Ndumbu Isang ambile ngwenyi ahombele nakulyonyinga mumuchima. Kutala atwalileho kuhomba tahi? Nduma. Uno vyuma muka vyamukafwile? Ambile ngwenyi, “Ami napuwami katwalitwaminyine kulomba kuli Yehova nakulinangula Mazu enyiko. Kaha nawa twatwalileho lika kumusakwilila havyuma vyamwaza atuhana, vyakufwana nge lutalililo lwakukayoyela mukaye kakahya kaKalunga.”

11. Vyuma muka vyakafwile Cindy omu apwile nakuviza?

¹¹ Ndumbwetu Cindy wamuMexico vamuwanyine namusongo waupi chikuma, ngocho ndotolo amulwezele ngwenyi musongo kana naumulya. Vyuma muka alingile ou ndumbwetu mangana omike? Omu apwile muchipatela, afwililile kwambululanga hakumbi hakumbi. Ambile ngwenyi: “Echi changukafwile nguhake chikuma muchima kuli vakwetu keshi hambandu yami, nakukola ngwapwile nakwivwa chipwe hakutohwa chamusongoko. Chuma ngwalingilenga shina, nge nguli nandotolo chipwe nase, ngwamuhulishilenga chihindu chavaka-tanga yenyi. Kaha ngwavahulishilenga ovyo vasakwilile mulimo waukalu ngana. Echi changukafwilenga nguwane vihande vyakushimutwila navo nakuvaheta kumichima. Vamwe vahanjikilenga ngwavo kavavula kuvameneka kuli vavejiko. Kaha vavavulu vangusakwilililenga hakuvazakama. Vamwe vanguhanyine najikeyala javo. Shikaho halwola kanelu lwalukalu, Yehova angulishile nguwahilile chikuma, kuhambakana  nomwo ngwashinganyekele.”—Vishi. 15:15.

12-13. Jijila muka vanazachisanga vandumbwetu vamwe vakuviza hakwambulula mujimbu, kaha nganyo muka yinafumumo?

¹² Vatu vaze vali nakuviza vanahase kuhomba mwomwo yakuhona kuzata chikuma mulimo wakwambulula. Chipwe ngocho, vamwe vanawanengako jijila jakwambulwilamo. Chakutalilaho, ndumbwetu Laurel wamuUnited States vamuhakile mulikina lyakumukafwa kuhwima hamyaka 37. Avijilenga musongo wakasa namusongo wachikova kaha vamupulile mapapa kakavulu. Oloze ukalu kanou kawamulingishile alitwamine kwambululako. Apwilenga nakwambulila vanase navatu vaze vejilenga nakumumenekela. Nganyo muka yafuminemo? Akafwile vatu kafwe 17 vapwenga Vinjiho jaYehova. *

¹³ Ndumbwetu Richard, mukulwane muchikungulwilo muFrance ahanjikile mazu aze anahase kukafwa vaze vatwama muluuta navaze veji kulaminanga muzuvo yakulamina vaveji. Ambile ngwenyi: “Nachiwaha nge navahakanga mikanda yetu hatoma, mangana nge nakupwa vamwe navahulisa, kaha nachipwa chachashi kushimutwila navo. Jila kana yinahase kukafwa vandumbwetu vaze vatwama muluuta vambulule mujimbu wamwaza.” Kaha nawa vandumbwetu vaze kavahasa kuya kuzuvo hizuvoko, vanahase kwambulila vatu hakuvasonekela mikanda nakuvatumina shinga.

14. Chakutalilaho muka atusela Ndavichi?

¹⁴ Kuli vyuma vyavivulu vinahase kulingisa vahone kutuhana milimo yimwe twasaka muliuka lyaYehova, pamo mwomwo yaushinakaji, chipwe kuviza, chipwe ukalu weka. Kachi nge tuli muukalu kanou, kaha twatela kwanuka mujimbu waMwangana Ndavichi. Afwililile kutunga tembele yaKalunga, oloze vamulwezele ngwavo keshi ikiye mwayitungako. Chipwe ngocho akundwijile chikuma mutu uze vasakwile kuli Kalunga azate mulimo kana. Ndavichi akungulwile ulu napalata yayivulu yakuzachisa kumulimo kana. Ngocho atusela chakutalilaho chamwaza chikuma.—Samwe. 2, 7:12, 13; Miji. 1, 29:1, 3-5.

15. Ndumbwetu Hugues ahonesele ngachilihi ukalu wakuhomba?

¹⁵ Ndumbwetu Hugues wamuFrance echele kuzata mwamukulwane muchikungulwilo mwomwo yakuviza. Kaha nawa kahashilenga kuzata namilimo yahemboko. Ambile ngwenyi: “Hakavanga ngwalivwile kupwa nguwamokomoko, kaha ngwahombele. Oloze mukuhita chalwola, ngwatachikijile jino ngwami kangwatelelele kwivwa kupihya havyuma vize ngwahonenenga kulingako.  Ngocho ngwapwile jino nguwakuwahilila hakuzachila Yehova kweseka nahakumina ngolo jami. Nguli nakutwalaho lika kumika. Kaha ngana muze Ngiteyone namalunga 300 vaze apwile navo vatwalileho lika kulwa numba tuhu vazeyele, nayami nawa nangutwalaho lika kukakachila palanga nakusongo.”—Kuyu. 8:4.

16. Chishina muka natulinangula kuchuma valingile vangelo?

¹⁶ Vangelo vakushishika vatuhana chakutalilaho chamwaza. Chakutalilaho, muchiyulo chaMwangana Ahave, Yehova ahulishile vangelo vahanjike jila yize vanahase kuya nakwongelamo mwangana kanou wakuhuka. Vangelo vavavulu vahanjikile jijila jakulisezaseza. Oloze Yehova asakwileho chuma ahanjikile kangelo umwe kaha, nakumufwelelesa ngwenyi jila kana nayizata. (Vamya. 1, 22:19-22) Uno vaze vangelo vakwavo vahombele nakwamba ngwavo, ‘Tunenyeka lwola lwetu’ tahi? Nduma, kavalingile ngochoko. Vangelo vapwa vakulinyisa, kaha vasaka kutohwesa kaha Yehova.—Kuyu. 13:16-18; Kuso. 19:10.

17. Vyuma muka twatela kulinga kachi nge tunahombo mwomwo yakuhona kutuhana milimo yimwe muliuka?

¹⁷ Tachikizenu ngwenu chapwa hikutokwa kupwa tuVinjiho jaYehova nakuvilika Wangana wenyi. Vanahase kutuhana mulimo muliuka chipwe kututambulawo, oloze milimo kana keshi yikiko yeji kutulingisanga tupwenga tuvavalemu kuli Kalungako. Yehova navandumbwetu veji kutuzanganga mwomwo yakupwa tuvakulinyisa. Shikaho lombenunga Yehova amikafwe mupwenga muvakulinyisa. Shinganyekenunga havatu vaze vasoneka muMbimbiliya vaze vapwile vakulinyisa. Lisuulenu kuzachilanga vandumbwenu kweseka noho hakumina ngolo jenu.—Samu 138:6; Petu. 1, 5:5.

18-19. Vyuma muka navimikafwa mupwenga vakuwahilila hakwambulula numba tuhu vatu kaveshi nakwakulako kanawako?

¹⁸ Kutala mwahombaho lyehi mwomwo vatu kavakwile kanawa kumujimbu wetuko, chipwe mwomwo yakuhona kuvawana hamembo tahi? Kachi nge chuma kana chinasoloka, vyuma muka vinahase kutukafwa tutwaleho lika kupwa vakuwahilila? Vyuma vimwe vili mulipwata lyakwamba ngwavo, “ Vyuma Navimikafwa Mufukile muMulimo waKwambulula.” Chapwa nawa chachilemu kumona mulimo wakwambulula mujila yamwaza. Uno vyuma muka vinahase kutukafwa?

 ¹⁹ Tachikizenu ngwenu chuma chachilemu tweji kwambulwilanga mujimbu wamwaza shina kuvilika lijina lyaKalunga naWangana wenyi. Yesu ahanjikile hatoma ngwenyi vatu vavandende kaha vakiko navakawana jila yakuya kukuyoya. (Mateu 7:13, 14) Nge tuli mumulimo wakwambulula, tweji kupwanga nakutokwa chakuzachila hamwe naYehova, naYesu navangelo. (Mateu 28:19, 20; Koli. 1, 3:9; Kuso. 14:6, 7) Yehova eji kukokanga vatu vamichima yamwaza mangana vamuzachile. (Yowa. 6:44) Shikaho, nge mutu kate kumwambulila, pamo nahase kuketavila halwola lukwavo natukashimutwila nenyi.

20. Chisoneka chaYelemiya 20:8, 9 nachitukafwa ngachilihi nge vatu kaveshi nakwakula kanawa kumujimbu wetuko?

²⁰ Kuli vyuma tunahase kulinangula kuli kapolofweto Yelemiya. Apwile nakwambulwila mungalila muze kavamwivwilililengako. Vatu vamungalila kana vapwilenga nakumutukana nakumuhenda “lwola lwosena.” (Tangenu Yelemiya 20:8, 9.) Ngocho lwola lumwe ahombele chikuma, kaha asakile kulitwamina kwambulula. Oloze kalitwaminyinyineko. Mwomwo ika? Mwomwo “mazu aYehova” apwile nge kakahya mutulo yenyi, ngocho kahashile kuhola kuluko. Nayetu nawa katweshi kuhasa kuhola kuluko kachi nge natutanganga chikuma Mazu aKalunga. Shikaho chapwa chachilemu kuwatanganga hakumbi hakumbi nakuhunananangaho. Vyuma kanevi navitulingisa tutwaleho lika kupwa vakuwahilila nakufukila mumulimo wakwambulula.—Yele. 15:16.

21. Uno tunahase kuhonesa ngachilihi ukalu wakuhomba?

²¹ Tumba uze twavulukanga hakavanga ambile ngwenyi: “Muheto waunene eji kuzachisanga Satana shina kutulingisa tuhombe.” Oloze Yehova Kalunga atwama nangolo chikuma kuhambakana Satana. Shikaho nge munahombo mwomwo yakala ukalu, mwatela kulomba kuli Yehova amikafwe. Mwamikafwa muhone kuhomba mwomwo yatutenga twenu nakumikafwa muhone kulimona kupwa muvamokomoko. Mwamikafwa nawa nge munaviji. Mwamikafwa muhonenga kuhomba kachi nge kavamihanyine milimo yimwe muliukako. Kaha nawa mwamikafwa mumonenga mulimo wakwambulula mujila yamwaza. Lombenunga kuli Senu wamwilu nakumulweza omwo muli nakwivwa. Ngocho mwamikafwa muhonese ukalu wakuhomba.