Nduma, omu keshi mukiko yahanjika Mbimbiliya chipwe mijimbu yeka yakushikuluko.

Jila valumwinyinemo jiMbimbiliya jajivulu yikiko yalingisa vatu vamwe vashinganyeke ngwavo vaka-Kulishitu vamwe mumakumbi aPaulu vapwilenga nakuvambapachisa mangana vemanyineko vatu vakufwa. Chakutalilaho, Mbimbiliya yaLuvale Bible, 1970, yamba ngwayo: “Kachi nge vafu kaveshi kukasangukako, kaha ikaze navavambapachishilavo?”

Oloze ivwenu vyuma vahanjikile vatu vavali vaze valinangula chikuma Mbimbiliya. Gregory Lockwood ambile ngwenyi, muMbimbiliya chipwe mumikanda yeka yakunyima kamwatwama unjiho wasolola nge kunyima vatu vambapachishilenga vemanyineko vafuko. Kaha nawa Gordon D. Fee asonekele ngwenyi, muMbimbiliya chipwe mumikanda yeka yakunyima kavahanjikamo vyalumbapachiso kanako. Tesetamende Yayihya nawa kayahanjika hachihande kanako. Kaha nawa kakweshi unjiho wakusolola nge muchachi yaOrthodox yavaka-Kulishitu chipwe mujichachi jeka, vambapachishilenga vatu mujila kanako.

Mbimbiliya yamba ngwayo, vaka-kukavangiza Yesu vatela ‘kunangula vatu vakumafuchi osena vapwenga tumbaji, nakuvambapachisa . . . nakuvanangula valamenga vyuma vyosena vize avalwezele’ Yesu. (Mateu 28:19, 20) Shimbu kanda mutu apwenga kambaji wakumbapachisa, atela kulinangula vyaYehova naMwanenyi nakuvafwelela nakuvononokanga. Mutu uze nafu lyehi ali mufuka, keshi kuhasa kulinga vyuma kanako. Kaha nawa kaveshi kuhasa kumulingilavyo kuli mutu wamutonyiko.—Kwambu. 9:5, 10; Yowa. 4:1; Koli. 1, 1:14-16.

Jino Paulu apwile nakulumbununa ika?

Vaka-Kolinde vamwe vakanyinenga ngwavo vafu kaveshi kukasangukako. (Koli. 1, 15:12) Paulu ahanjikile ngwenyi vishinganyeka kana vyapwile vyakuhenga. Ambile ngwenyi ‘alitalasanyinenga nakufwa hakumbi hakumbi.’ Oloze chamokomoko najiponde amwenenga, afwelelele ngwenyi numba nge mwafwa mwakasanguka nakuya mwilu, ngana muze chapwile kuli Yesu.—Koli. 1, 15:30-32, 42-44.

Vaka-Kolinde vatelelele kutachikiza ngwavo hakupwa vaka-Kulishitu vakuwavisa, vatelelele kumona vyeseko hakumbi hakumbi nakufwa numba jino vakavasangule. Kumbapachisa mutu “muli Kulishitu Yesu,” mwaliwezele kumbapachisa mutu “mukufwa chenyi.” (Loma 6:3) Shikaho kuvambapachisa mujila kaneyi yachifwanyisa chavalingishile vafwenga nakukasanguka nakuya mwilu.

Omu mwahichile myaka yakuzomboka hayivali kufuma haze Yesu vamumbapachishile mumeya, alwezele vaposetolo jenyi vavali ngwenyi: “Lumbapachiso elu vali nakungumbapachisa ami, [nayenu] navamimbapachisalwo.” (Mako 10:38, 39) Echi kachalumbununa nge Yesu vapwile nakumumbapachisa halwola kanako. Oloze alumbununwine ngwenyi vatu navamujiha mwomwo yakupwa wakushishika kuli Kalunga. Paulu nawa asonekele ngwenyi vawavisa ‘navakayanjila hamwe naYesu mangana vakavatohwesele nawa hamwe.’ (Loma 8:16, 17; Koli. 2, 4:17) Shikaho, vawavisa vatela kufwa numba vakasanguke nakuya mwilu.

Shikaho mazu akwoloka ahanjikile Paulu shina akwamba ngwavo: “Mokomoko vaze vali nakumbapachisa mangana vapwenga vafu navakalinga mukaze? Kachi nge vafu kaveshi kukasangukako, kaha ikaze vali nakuvambapachishila mangana vapwenga vafu?”