Kutala munalivwisanga kuwaha kutanga jimangazini jauno mwaka jaKaposhi Kakutalila tahi? Nge mukiko, kaha tumonenu omu munahase kukumbulula vihula vino vinakavangizaho:

Mukanda WaYakova 5:11 watukafwa tutachikize ika hakwamba ngwawo Yehova “atwama nazangi chikuma” kaha nawa “muka-kutetela”?

Twatachikiza ngwetu Yehova hakupwa muka-kutetela eji kutukonekelanga jishili jetu. Mukanda WaYakova 5:11 watufwelelesa nawa ngwawo Yehova asaka kutukafwa. Ngocho twatela kumulondezezanga.—w21.01, li. 21.

Mwomwo ika Yehova ahakilako wata?

Auhakileko mwomwo yazangi. Weji kulingisanga tanga yaYehova yitwame mukuunda nakuzata vyuma mukulonga. Mutu himutu mutanga uze eji kuvumbikanga echi kulongesa kana atachikiza owo atela kutunga jishimbi nowo atela kujikavangiza.—w21.02, li. 3.

Mwomwo ika vaka-Kulishitu vatela kuvanguluka hakulitumina mijimbu kuzachisa jipolongalamu jahamakina?

Kachi nge mutu mwasakula kuzachisa jipolongalamu kana, atela kusakula kanawa masepa mwashimutwilanga navo. Cheji kupwanga chachikalu chikumanyi nge mwatunga lizavu lyavatu vavavulu, lize mweji kulituminanga mijimbu. (Chimo. 1, 5:13) Chapwa nawa chaponde kutandakanyisa mujimbu uze katwatachikijile mashina namasongoko, nakuzachisa vandumbwetu mangana tunganyalileho.—w21.03, li. 31.

Mwomwo ika Yehova etavishile Mwanenyi uze azanga vamuyanjise nakumujiha?

Chatete, Yesu vatelelele kumusukika hachitondo mangana asokole vaYuleya kuchangu. (Ngale. 3:10, 13) Chamuchivali, Yehova etavishile Yesu vamuyanjise mangana atengamo kukazata mulimo wakupwa Kapilishitu Wakulitulaho. Chamuchitatu, Yesu hakutwalaho kushishika palanga nakukufwa, asolwele nge vatu vanahase kupwa lika vakushishika kuli Yehova numba tuhu vali nakumona ukalu waunene. (Yopa 1:9-11)—w21.04, mafwo 16-17.

Namulinga ngachilihi nge chinakumikaluhwilanga kuwana vatu muwande?

Esekenu kuvatambukilanga halwola luze navapwa hamembo avo. Munahase nawa kweseka kuzachila kuchihela cheka. Kaha nawa munahase kuzachisa jila yeka yakufwana nge, kusoneka mikanda.—w21.05, mafwo 15-16.

Uno kaposetolo Paulu alumbunwine ika hakwamba ngwenyi: “Ami ngwafwile kujishimbi kuhichila mujishimbi”? (Ngale. 2:19)

Jishimbi jize Kalunga ahanyine Mose vajihakileko mangana kuhona kukupuka chavatu chisoloke hatoma, nakukafwa vaIsalele vatachikize Kulishitu. (Ngale. 3:19, 24) Echi chakafwile Paulu etavile Kulishitu. Paulu ‘afwile kuhichila mujishimbi,’ ngocho jishimbi kajapwile nangolo hali ikiyeko.—w21.06, li. 31.

Uno Yehova atuhana ngachilihi chakutalilaho chakupwa nalukakachila?

Yehova nasololanga lukakachila omu vatu vanasaulanga lijina lyenyi, nomu vanafumbukilanga wata wenyi, nomu vana venyi vamwe mwilu valikangile, nomu Satana natwaleho kumuvangijikila, nomu vangamba jenyi vanakuyanda. Nasololanga nawa lukakachila hakushinganyeka vangamba jenyi vaze vafwa, nahakumona omu vatu vali nakuvayanjisa, nomu vatu vali nakwenyeka vyuma vyakutenga.—w21.07, mafwo 9-12.

Uno Yosefwe ahana ngachilihi chakutalilaho chakupwa namuchima wakutalilila chikoki?

Yosefwe asolwele muchima walukakachila omu vamulingile mwamupi kuli vandumbwenyi. Kahomu apwile muEjipitu vamuvangijikilile vyuma vimwe nakumukasa mukamenga hamyaka yayivulu.—w21.08, li. 12.

Mujimbu muka wakunyikisa vaka-mafuchi mujila yachifwanyisa vavulukilile chimweza hali Hangai 2:6-9, 20-22?

Vaka-mafuchi vali nakukana mujimbu waWangana, chipwe ngocho vatu vavavulu vali nakwitavila nakwiza mumuchano. Kalinwomu vaka-mafuchi vavanyikise omu navavanongesa.—w21.09, mafwo 15-19.

Mwomwo ika twatela kutwalaho kwambulula mujimbu?

Yehova eji kumonanga kukilikita chetu kupwa chachilemu. Nge natutwalaho kwambulula kaha natukawana kuyoya chahaya myaka yosena.—w21.10, mafwo 25-26.

Uno mukanda waVyavaLevi kapetulu 19 unahase kutukafwa ngachilihi tukavangize mazu akwamba ngwavo: “Pwenunga vajila mutwamiso yenu yosena”? (Petu. 1, 1:15)

Chasoloka nge mazu aha vesi kana afuma hali VyavaLevi kapetulu 19:2. Kapetulu kana asolola vyakutalilaho vyavivulu vize navitukafwa tukavangize mazu atwama hamukanda WaPetulu 1, 1:15 mukuyoya chetu.—w21.12, mafwo 3-4.