Yehova alwezele vaIsalele vapwenga vajila. Hakuvakafwa vatesemo lushimbi kana, avalwezele ngwenyi: “Kanda mukahitangana muvatu nakuvangila vakwenuko. Kanda mukemanyina kuyoya chavakwenu nakoleko. Ami yami Yehova.”—Levi 19:2, 16.

Mazu akwamba ngwavo, ‘kwimanyina kuyoya chamukwenu nakole,’ vawalumuna kanawa muchiHepeleu. Uno awa mazu alumbununa ika? Mukanda umwe wavaYuleya wahanjika hachisoneka chaVyavaLevi ngwawo: “Mazu kana apwa amakalu kwivwishisa mwomwo ulumbunwiso wamazu achiHepeleu akwamba ngwavo, ‘kanda mukemana kwakamwihi’ waukalu kwivwishisa.”

Vatu vamwe vaze valinangula chikuma vamona ngwavo mazu kana alikwatasana nawaze atwama muvesi 15 akwamba ngwawo: “Kanda mukahengesa hakusopesa vakwenuko. Kanda mukatetela muka-kuhutwa mwomwo yakuhutwa chenyiko, chipwe kuhakwila muka-luheto mwomwo yaluheto lwenyiko. Mukasopesa vakwenu mwaya chiyulo chakwoloka.” (Levi 19:15) Nge mukiko, kaha lushimbi lwatwama havesi 16 lwakwamba ngwavo “kanda mukemanyina kuyoya chavakwenu nakoleko,” lwalumbunwine nge vaIsalele kavatela kulinga chuma numba chimwe chachipi kuli vakwavo hakuyula vihande, mukusekasana, namutangako. Kaha nawa mutu katelelele kuhona kupwa nakashishi hakusaka kulinganyalisa iveneko. Chikupu vene katwatela kulinga vyuma kanako, oloze kuli jila yeka yamwaza tunahase kwivwishishilamo mazu amuvesi 16.

Tutalenu mazu amaputukilo amuvesi kana. Kalunga alwezele vatu jenyi ngwenyi kavatela kuhitangana muvatu nakuvangila vakwavoko. Twatachikiza ngwetu kuyongola mutu chinahase kuneha ukalu, oloze kuvangila mutu cheji kunehanga ukalu waunene chikuma. (Vishi. 10:19; Kwambu. 10:12-14; Chimo. 1, 5:11-15; Yako. 3:6) Muka-kuvangila vakwavo eji kuhanjikanga mazu aze natachikiza ngwenyi amakuli mangana apihise lijina lyamukwavo. Eji kuhanjikanga unjiho wamakuli numba tuhu natachikiza ngwenyi vyuma mwahanjika navihaka mukwavo muponde. Anukenu ngwenu Navote vamwashile malolwa nakumujiha mwomwo yamalunga vaze vahanyine unjiho wamakuli hali ikiye. (Vamya. 1, 21:8-13) Chikupu vene, muka-kuvangijikila vakwavo eji kwimanyinanga kuyoya chavakwavo nakole, ngana muze vasoneka hali VyavaLevi 19:16.

Mutu nahase nawa kuvangijikila mukwavo mwomwo yakuhona kumuzanga. Hali WaYowano 1, 3:15 vasonekaho ngwavo: “Weshowo ahunga ndumbwenyi napu muka-kujiha vatu, kaha munatachikiza ngwenu muka-kujiha vatu keshi nakuyoya chahaya myaka yosenako.” Kaha nawa omu Yehova ahanjikile mazu akwamba ngwawo, “kanda mukemanyina kuyoya chavakwenu nakoleko,” ahanjikile nawa ngwenyi: “Kanda mukahunga vandumbwenu mumichima yenuko.”—Levi 19:16, 17.

Lushimbi lwatwama hali VyavaLevi 19:16 lwahuhumuna chikuma vaka-Kulishitu. Ngocho twatela kulihenda kukushinganyekanga vyuma vyavipi hali vakwetu nakuvavangijikila. Shikaho nge ‘natwimanyina kuyoya chavakwetu nakole’ kulumbununa kuvavangijikila mwomwo yakuhona kuvazanga chipwe kuvevwila lushiushiu, kaha nachisolola nge vatu kana twavahunga. Chikupu vene vaka-Kulishitu vatela kulihenda kumuchima kana.—Mateu 12:36, 37.