ACHISHINGANYEKENU halikumbi lize mwawahililile chikuma mukuyoya chenu. Uno likumbi kana lyapwile lize mwalimbachile, chipwe lize mwakwachile mwana watete, chipwe lize vamimbapachishile tahi? Likumbi vamimbapachishile pamo likiko lyalilemu chikuma mukuyoya chenu lize mwawahililile chikuma. Halikumbi kana, vandumbwenu vawahililile chikuma hakumona vanamimbapachisa nakusolola nge mwazanga Kalunga namuchima wenu wosena, namwono wenu wosena, navishinganyeka vyenu vyosena, nangolo jenu josena.—Mako 12:30.

Pamo munalivwisa chikuma kuwaha kuzachila Yehova kufuma halwola vamimbapachishile. Chipwe ngocho, vaka-kwambulula vamwe kaveshi jino vakuwahilila ngana muze vapwilengako. Mwomwo ika? Vyuma muka vyatela kutulingisa tutwaleho lika kuzachila Yehova nakuwahilila?

Mujimbu waWangana weji kutulingisanga tuwahilile chikuma. Mwomwo ika? Mwomwo Yehova ashika ngwenyi Wangana wenyi kalinwomu ufumiseko kano kaye kakuhuka nakuneha jino kaye kenyi kakahya. Mukanda waZefwanyiya 1:14 watulweza ngwawo: “Likumbi lyaYehova lyalinene lili hakamwihi. Lili hakamwihi, kaha lili nakwiza washiwashi.” Oloze nge natushinganyeka ngwetu likumbi kana lichili kwakusuku kuhambakana muze twashinganyekele, kaha katweshi kupwa vakuwahilila ngana muze twapwilengako. Echi chinahase kutulingisa tupwenga nauvwa hakuzata mulimo waKalunga.—Vishimo 13:12.

Kupwanga lwola lwosena navandumbwetu nachitukolezeza tutwaleho lika kuzachila Yehova nakuwahilila. Pamo vilinga vyamwaza vyavatu jaYehova vikiko vyatukunywile twizenga mukwitava chamuchano nakutukafwa tuputuke kuzachila Kalunga nakuwahilila. (WaPetulu 1, 2:12) Uno vandumbwetu vamwe muchikungulwilo vanahase kwivwa ngachilihi nge ndumbwetu umwe vanamuzangamisa mwomwo yakuhona kukavangiza jishimbi jaKalunga? Echi chinahase kuvalingisa vevwenga kupihya nakuhona jino kupwa vakuwahilila.

Kufwila luheto nachikiko chinahase kutulingisa tuhone kupwa vakuwahilila. Mujila muka? Kano kaye kaSatana keji kutushinjilanga tulande vyuma vize katweshi nakusakiwako. Ngocho twatela kwanuka mazu ahanjikile Yesu ngwenyi: “Kakweshi ndungo mwahasa kuzachila vamyata vavaliko, mokomoko mwahunga umwe nakuzanga mukwavo, chipwe mwalipanjika naumwe nakulumbilisa mukwavo. Kamweshi kuhasa kuzachila Kalunga naLuheto hamweko.” (Mateu 6:24) Pundu vene, katweshi kuhasa kupwa vakuwahililako nge natuzachila Yehova oku nawa tuli nakufwila kupwa navyuma vyosena vyamuno mukaye.

Kuzachila Yehova kachapwa chiteli kuli vatu vaze vamuzangako. (WaYowano 1, 5:3) Anukenu mazu ahanjikile Yesu ngwenyi: “Twayenu kuli ami enu muvosena muli nakufulyangila nakulemuwa naviteli, kaha ami nangumihizumuna. Mbatenu toka yami nakulinangula kuli ami, mwomwo ami ngumuvwovu, nguwakulikehesa mumuchima, kaha namupwa vakuhizumuka. Mwomwo toka  yami yayashi kumbata, kaha chiteli chami chachilelu.” (Mateu 11:28-30) Chikupu vene, twapwa vakuhizumuka nakuwahilila mwomwo yakupwa tuvaka-Kulishitu vamuchano. Kuli vyuma vyavivulu vyatela kutulingisa tuwahilile mumulimo waYehova. Tuchishimutwilenu havyuma vitatu.—Hambakuke 3:18.

Tweji kuzachilanga Kalunga wakuwahilila, uze atuhana kuyoya. (Vilinga 17:28; WaChimoteu 1, 1:11) Twatachikiza ngwetu kuyoya chetu chafuma kuli Tengi yetu. Ngocho tutwalenuho lika kumuzachila nakuwahilila, chamokomoko namyaka yinahichimo kufuma halwola vatumbapachishile.

Achishinganyekenu hali ndumbwetu Héctor, uze azachilile Yehova mumulimo wakutambwojoka hamyaka 40. Achili lika nakulivwisa kuwaha kuzachila Yehova “namuushinakaji” wenyi. (Samu 92:12-14) Numba tuhu misongo yapuwenyi yinamulingisa ahone kuzachila chikuma Yehova, oloze Héctor achili lika wakuwahilila. Ambile ngwenyi: “Numba tuhu ngweji kwivwanga kupihya hakumona puwami ali nakuviza chikuma, kaha nawa chinapunga chachikalu kumuzakama, oloze vyuma kana kavyanguhonesele kupwa wakuwahilila hakuzachila Kalunga wamuchanoko. Kutachikiza ngwami kuyoya chami chafuma kuli Yehova uze atengele vatu mangana valingenga mwaya kujina chenyi, chikiko changulingisa ngumuzange chikuma nakumuzachila namuchima wami wosena. Ngocho, ngweji kwesekanga nangolo jami josena kuzata mulimo wakwambulula nakushinganyeka havyuma mwakatulingila Kalunga kulutwe muWangana wenyi, mangana ngupwenga lika wakuwahilila.”

Yehova atuhana wana wandando yakusokola mangana tupwenga lika vakuwahilila mukuyoya chetu. “Kalunga azangile chikuma kaye ngocho ahanyine Mwanenyi umwe kaha wakulipwila, mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.” (Yowano 3:16) Nge natufwelela wana atuhana Kalunga wandando yakusokola, kaha mwatukonekela jishili jetu nakukatuhana kuyoya chahaya myaka yosena. Echi hichuma chamwaza chatela kutulingisa tupwenga vakuwahilila. Kaha nawa kusakwilila Yehova handando yakusokola nachitukunyula tumuzachile nakuwahilila.

Ndumbwetu Jesús, uze atwaminenga muMexico, ambile ngwenyi: “Ngwapwilenga ngundungo kumilimo yami, kaha shimbu jimwe ngwazachilenga nahalwola luze kangwatelelele kuzatako, mangana ngutambule jimbongo jajivulu. Kutwala muze, ngwalinangwile hali Yehova nomu atumine Mwanenyi kwiza nakufwila vatu. Kaha ngwafwilile kumuzachila chikuma. Ngocho ngwalihanyine kuli Yehova, kaha hanyima yakuzata hakapani hamyaka 28, ngwalitwaminyine kuzata milimo kana mangana nguputuke kuzata mulimo washimbu yosena.” Omu mukiko Jesús aputukile kuzachila Yehova nakuwahilila.

Twatwama navilinga vitoma vize vyeji kutulingisa tuwahilile. Uno mweji kwanukanga omu chapwile chiyoyelo chenu shimbu kanda mutachikize Yehova tahi? Kaposetolo Paulu anukishile vaka-Kulishitu muLoma ngwenyi ‘halwola lumwe vapwilenga vandungo jashili,’ oloze  ‘vapwile jino vandungo kukwoloka.’ Hakuwana nge vapwile navilinga vitoma mukuyoya chavo, ngocho vatalililenga kukayoya haya myaka yosena. (Wavaka-Loma 6:17-22) Nayetu nawa tweji kukavangizanga jindongi jaYehova, ngocho twapwa vakuwahilila mwomwo katwazana muvilinga vyavipi chipwe vyaulyanyiko. Ocho kuwaha kana tweji kwivwanga enu vayaya!

Achishinganyekenu hali ndumbwetu Jaime, uze kafwelelele muli Kalungako, kaha nawa apwile muka-kuhema chakuzunga jikonyi. Jaime aputukile kwiza kukukunguluka chavaka-Kulishitu, kaha alikomokelele hazangi vamusolwelele. Hakusaka aseze chiyoyelo chize apwile nacho hakavanga, Jaime alombele kuli Yehova amukafwe mangana amufwelele. Jaime ambile ngwenyi: “Kutwala muze, ngwaputukile chindende chindende kutachikiza ngwami Kalunga kwatwama, kaha nawa apwa Setu wazangi. Kukavangiza jindongi jaYehova chinangukingi chikuma. Kachi nge kangwalumwine chiyoyelo chamiko, kachi vangujiha lyehi ngana muze vajiha masepa jami vamwe. Myaka ngunawahilila chikuma mukuyoya chami shina yize ngunazachilanga Yehova.”

Vyuma muka twatela kulinga omu tuli nakuvandamina kunonga chakano kaye kakapi? Tachikizenu ngwenu tuli nakulinga mwaya muchima waKalunga nakutalilila kuyoya chahaya myaka yosena. Mbimbiliya yamba ngwayo: “Shikaho kanda natuzeya kulinganga vyuma vyamwazako, mwomwo kachi nge katweshi kuzeyako, kaha halwola lwakwaha natukaha vene.” (Wavaka-Ngalesha 6:8, 9) Yehova mwatukafwa tukakachile lika nakuzata nangolo mangana tupwenga navilinga vize navikatulingisa tukayovoke “luyando lwalunene,” nakutwalaho lika kuzachila Yehova nakuwahilila.—Kusoloka 7:9, 13, 14; WaYakova 1:2-4.

Twatela kufwelela ngwetu Yehova mwatukisula hakukakachila chetu, mwomwo atachikiza milimo tweji kumuzachilanga nazangi tweji kumusolwelanga nakuzanga lijina lyenyi. Nge natutwalaho lika kuzachila Yehova nakuwahilila, kaha natwivwa ngana muze evwile muka-kwimba jisamu Ndavichi uze ambile ngwenyi: “Ngweji kuhakanga Yehova kumeso ami makumbi osena. Kaveshi kukangunyikisako mwomwo ali kulivoko lyami lyachilyo. Shikaho muchima wami weji kuwahililanga, kaha ngweji kulisambanga. Ngweji kupwanga wakukingiwa.”—Samu 16:8, 9.