HAMARCH 26, 1937, malunga vavali vaze vayile ungeji vakindulukile nachimbayambaya chavo munganda yaSydney, Australia. Kufuma haze vafumine munganda kana mwahichile mwaka wamuundu, kaha vatambukile tunda yajikilomita kafwe 19,300 numba jino vahete kuze vapwile nakuya. Ava malunga kavapwile vaka-kutambwojoka nakutala lifuchi kahako. Arthur Willis naBill Newlands vapwile vapayiniya vatwima vaze vafwililile kutandakanyisa mujimbu wamwaza waWangana waKalunga nakuvihela vyakwakusuku vyamulifuchi lyaAustralia.

Muji 1920 Vaka-Kulinangula Mbimbiliya * muAustralia vambulililenga chikuma mujimbaka najingalila jize japwilenga kungenge yakalwiji. Oloze kujingalila jakwakusuku jamuAustralia naumwe ambulwililengako wauchi. Chipwe ngocho, vandumbwetu vatachikijile ngwavo hakupwa vaka-kukavangiza Yesu vatelelele kwambulula unjiho wakuvuluka Yesu “nakuvihela vyakwakusuku vyahamavu,” kuhakilako vene navihela vyamuAustralia vyakwakusuku. (Vili. 1:8) Uno mulimo kana vauteselemo ngachilihi? Vafwelelele ngwavo Yehova mwavakafwa vambulwile kuvihela vyosena vyakwakusuku.

Mu 1929 vikungulwilo vyamuQueensland namuWestern Australia valizangile kuya najiminyau nakwambulwila kuvihela vyakwakusuku vyamuAustralia. Eji jiminyau vajizachishilenga kuli vapayiniya vaze vahashile kutambukisa mumikwakwa muze kamwapwile mwamwazako, kaha nawa vaze vatachikijile kuwahisa jiminyau kachi nge jinafu. Ava vapayiniya vayilenga kujingalila jakulisezaseza kuze kanda lyehi vambulwilengako.

Vapayiniya vaze kavapwile najiminyauko vazachishilenga jikinga. Chakutalilaho, mu 1932, Bennett Brickell wamyaka 23 afumine muRockhampton, Queensland nakinga nakuya nakwambulwila kujingalila jakwakusuku hatukweji 5. Kukinga yenyi ambachilililengako vyakulifwika, navyakuvwala, navyakulya navikasha vyamikanda. Omu tufumbo twakinga vatotokele, atwalileho naungeji wenyi nakufwelela ngwenyi Yehova mwamukinga. Ashinjikile kinga yenyi tunda yajikilomita 320, tunda yize malunga vamwe  vafwile kulipwila. Hamyaka 30 yakavangijileho Ndumbwetu Brickell atambukile jitunda jajisuku jamuAustralia hakinga, nahamutukutuku naminyau. Ou ndumbwetu yikiye watete kwambulila vatu vamuAustralia mujimbu, asokolwele vikungulwilo vyavivya, kaha vatu vamutachikijile chikuma mwomwo yakulisuula chenyi nakuzachila kuvihela vyakwakusuku vyamuAustralia.

Mulifuchi lyaAustralia kamwatwama vatu vavavuluko, kaha nawa vatu kavalihata chikumako. Oloze Vinjiho jaYehova vanafwilanga kuheta kuvihela kana mangana vambulile vatu vosena.

Stuart Keltie naWilliam Torrington vaze vapwile vapayiniya, vasolwele muchima kanou. Mu 1933 vapulasanyine likundu lyaSimpson hakuya nakwambulwila mumbaka yaAlice Springs. Omu minyau yavo yafwile, Ndumbwetu Keltie uze apwile nakutambukila halihinji lyamutondo, azachishilenga ngamela nakutwalililaho namulimo wenyi wakwambulula. Kukilikita chava vapayiniya chemine mihako omu vawanyine Charles Bernhardt hachitulilo chamasuhwa chaWilliam Creek. Kufumaho Charles Bernhardt etavilile muchano, ngocho alanjishile hotela yenyi kaha azachile upayiniya uka wenyi hamyaka 15 kujingalila jakwakusuku muAustralia kuze kakwatwama meyako.

Chikupu vene vapaniya vakulivanga vapwile vakumika nalukakachila numba vahonese ukalu vapwile nakumona. Chakutalilaho, Arthur Willis naBill Newlands vaze twavulukanga mukujimbula chihande chino, vatambukile tunda yajikilomita 32 havyalumingo vivali mwomwo vula yalingishile mumukwakwa mupwenga meya chikuma naulova. Shimbu jimwe vafulyangililenga hakushinjika minyau yavo omu yakakachililenga muulova. Lwola lumwe nge minyau yili naukalu, kaha vatambukilenga hamavu chipwe hakinga, vatambukilenga hamakumbi amavulu numba vahete kumbaka nakutonda jino vikungo vyakuwahishisa minyau yavo. Chamokomoko naukalu vapwile nakumona, oloze vatwalileho kwambulula. Arthur Willis, asonekele mujimbu wenyi mukavatu mumangazini yaThe Golden Age, yize jino tunakuvuluka ngwetu Tonenu! ngwenyi: “Kakweshi chuma nachihonesa Vinjiho jaYehova kwambulwila kuvihela vyosenako.”

Charles Harris uze nazatenga upayiniya hamyaka yayivulu alumbunwine ngwenyi, ukalu amwene omu ambulwililenga kuvihela vyakwakusuku wamulingishile apandame chikuma kuli Yehova. Ambile nawa ngwenyi: “Chapwa chamwaza kutwama chakuzeneka vikumba vyavivulu. Kachi nge Yesu alisuwile kusavalanga muweluka, kaha nayetu twatela kuwahilila kulinga mwomumwe kachi nge chili nakusakiwa kulinga ngocho.” Omu mukiko valingilenga vapayiniya vavavulu. Tweji kuvasakwililanga hakukilikita chavo, mwomwo mujimbu wamwaza unahete kumafuchi osena nakulingisa vatu vavavulu vasakule kukundwiza Wangana waKalunga.