1, 2. (a) Yehova atusolwela vyuma muka? (b) Mukanda waIsaya 46:10, 11 na 55:11 watufwelelesa vyuma muka?

MBIMBILIYA yaputuka namazu ano ngwayo: “Hakuputuka Kalunga atangile melu namavu.” (Kupu. 1:1) Twatachikiza vyuma vyavindende kaha havyuma atenga Kalunga, vyakufwana nge utangatanga, musana, nangolo jatwama mumavu. Twamonako nawa vyuma vyavindende kaha. (Kwambu. 3:11) Oloze Yehova atusolwela vyuma ajinyine hakutenga mavu navatu. Mavu atelelele kupwa limbo lyamwaza lyavatu vaze atengele Kalunga muchifwanyisa chenyi. (Kupu. 1:26) Vatelelele kupwa vana vaYehova, kaha ikiye atelelele kupwa Sevo.

² Ngana muvalumbununa mukapetulu 3 mumukanda waKuputuka, vyuma ajinyine Yehova kavyateselemoko. (Kupu. 3:1-7) Oloze echi kachahonesele Yehova kulinga vyuma ajinyineko. Kakweshi mutu mwahasa kuhonesa Yehova kulinga vyuma nasakeko. (Isa. 46:10, 11; 55:11) Ngocho twatela kufwelela ngwetu, vyuma ajinyine Yehova hakavanga mwakavitesamo halwola atongola.

3. (a) Vyuma muka vyamuchano yahanjika Mbimbiliya twatela kutachikiza? (b) Mwomwo ika twatela kushimutwila havyuma kana oholyapwa? (c) Vihula muka natushimutwila?

³ Twatachikiza vyuma yahanjika Mbimbiliya havyuma ajinyine  Kalunga hakutenga mavu navatu, namulimo atwama nawo Yesu Kulishitu hakutesamo vyuma ajina Kalunga. Vyuma kana vyapwa vyavilemu, kaha pamo vikiko twavangilile kutachikiza omu twaputukile kulinangula Mazu aKalunga. Nayetu nawa twasaka kukafwa vatu vamwaza michima vatachikize vyuma kanevi yanangula Mbimbiliya. Shikaho omu tuli nakushimutwila chihande chino mwachikungulwilo, tufwilenu kusanyika vatu vavavulu vakeze kuKwanuka Kufwa chaKulishitu. (Luka 22:19, 20) Vaze navakapwako navakalinangula vyavivulu havyuma ajina Kalunga. Ngocho, hamakumbi awa anasaleko shimbu kanda Kwanuka Kufwa chaMwata, nachiwaha kushinganyeka havihula natuzachisa muwande mangana tukunyule vilongesa vyetu vyaMbimbiliya navatu veka vakeze kuchilika echi chachilemu. Tushimutwilenu havihula vino vitatu: Vyuma muka ajinyine Kalunga hakutenga mavu navatu? Ukalu muka wasolokele? Mwomwo ika ndando yakusokola yaYesu yapwila hijila yakuteselamo vyuma ajina Kalunga?

4. Uno vyuma vyakutenga vyeji kuvilikanga ngachilihi upahu waYehova?

⁴ Yehova apwa Tengi wakulitulaho. Vyuma vyosena atenga vyapwa vyakulipwila. (Kupu. 1:31; Yele. 10:12) Vyuma muka natulinangula kuvyuma vyamwaza vize atenga mujila yakulonga? Omu tweji kutalanga vyuma vyakutenga, tweji kwivwanga kuwaha hajila Yehova atengelamo vyuma mangana vitunganyalise. Kutala katweshi kulikomokela omu azata maselusi, nomu eji kusolokanga kemba, chipwe omu lyehi kusolokanga likumbi hakulaukako tahi? Tweji kwivwanga kuwaha hakumona vyuma vyakutenga mwomwo vatutenga nauhashi wakutachikiza vyuma vyamwaza.—Tangenu Samu 19:1; 104:24.

5. Vyuma muka alinga Yehova mangana vyuma vyosena atenga vizate mukulonga?

⁵ Nganomu tunamono, vyuma vyosena atenga Yehova vikwechi milimo yavyo. Ahakako jishimbi mangana vyuma vyosena vizate mukulonga. (Samu 19:7-9) Shikaho, vyuma vyosena atenga Kalunga vikwechi chihela namulimo vyazata kweseka nomu ajina Kalunga. Avinoneka kanawa mangana vizachilenga hamwe. Chakutalilaho, ngolo jatwama mumavu jemika peho hamavu, nakulingisa tulungalwiji vatambuke mukulonga, chakuhona ngolo kana kachi kuyoya hamavu chauchi. Shikaho vyuma vyosena atenga, kuhakilako vene navatu, vyeji kuzatanga mukulonga. Echi chasolola hatoma vyuma ajinyine Kalunga hakutenga mavu navatu. Omu natuyanga mumulimo wamuwande, twatela kulweza vatu vatachikize Tengi ou atengele vyuma kanevi vyakulipwila.—Kuso. 4:11.

6, 7. Yehova ahanyine Alama naEve mawana muka?

⁶ Yehova hakutenga vatu asakile vatwamenga hamavu myaka yosena. (Kupu. 1:28; Samu 37:29) Ahanyine Alama naEve mawana akulisezaseza mangana valivwise kuwaha kuyoya. (Tangenu WaYakova 1:17.) Yehova avahanyine wana wakulisakwila vyakulinga, nauhashi wakushinganyeka, kaha nawa avatengele namuchima wakupwa namasepa nakuvasolwela zangi. Tengi ahanjikilenga naAlama nakumulweza mwakupwila namuchima wakwononoka. Alama alinangwile nawa mwakulizakamina yivene, namwakulamina tunyama namavu. (Kupu. 2:15-17, 19, 20) Yehova nawa atengele Alama naEve nauhashi wakumona, nakwivwa, nakuhumbika, nakukwata nakumakila vyuma. Shikaho vatelelele kulivwisa kuwaha kuyoya mulimbo lyavo lyaPalachise. Chapundu vene, vapwile namilimo yakuzata  yayivulu yize vatelelele kulivwisa kuwaha, nakulinangula nawa vyuma vyeka myaka yosena.

⁷ Vyuma vyeka muka ajinyine Kalunga hakutenga mavu navatu? Yehova atengele Alama naEve nauhashi wakusema vana vakukupuka. Kalunga asakile kachi vaze vana vavo navakiko vakaseme nakusemunwina, swi nomu hamavu hosena nahakazala navatu. Asakile Alama naEve navisemi vosena kuzanga vana vavo ngana muze Ikiye azangile vana venyi vatete omu vapwile vakukupuka. Mavu navyuma vyosena vyatwamaho vyatelelele kupwa vyavo myaka yosena.—Samu 115:16.

8. Mwomwo ika vahakilileko lushimbi vavuluka hali Kuputuka 2:16, 17?

⁸ Vyuma kavyapwile ngana muze ajinyine Kalungako. Mwomwo ika? Yehova ahanyine Alama naEve lushimbi lwalwashi luze lwavakafwile vamone vyuma vatelelele kulinga navize kavatelelele kulingako hakuzachisa lisesa avahanyine. Ahanjikile ngwenyi: “Kumitondo yoseneyi yili mumilemba unahase kulyangako tuhu. Oloze kumutondo wakutachikijila kuwaha nakupihya kanda ukalyakoko, mwomwo halikumbi lize naukalyako naukafwa chakufwa.” (Kupu. 2:16, 17) Kachapwile chachikalu kuli vakiko kwivwishisa lushimbi kana chipwe kulwononokako, mwomwo vapwile navyakulya vyavivulu vize vatelelele kulya.

9, 10. (a) Vyuma muka Satana avangijikilile Yehova? (b) Alama naEve vasakwile kulinga ika? (Talenu muvwimbimbi wakulivanga.)

⁹ Satana Liyavolo azachishile linoka nakwonga Eve alikange kuli Ise Yehova. (Tangenu Kuputuka 3:1-5; Kuso. 12:9) Satana akatwile chihande ngwenyi, Kalunga akanyishile vana venyi hamavu vahone kulya ‘kumitondo yosena mumilemba.’ Chapwile kwijiva nge apwile nakuhanjika ngwenyi: ‘Kumana kamwatela kulinga vyuma muli nakusakako tahi?’ Kufumaho amwongele ngwenyi: “Kufwa kamweshi kufwako.” Kaha akunywile Eve ngwenyi katela kwivwilila kuli Kalungako, hakwamba ngwenyi: “Kalunga natachikiza ngwenyi halikumbi lize namukalyako, meso enu nawakatona.” Satana alumbunwine nge Yehova kasakile valyenga kuze kumuhakoko kuchina navapwa nachinyingi chakwijiva vyuma vyavivulu. Satana ambile cheka ngwenyi: “Namukapwanga nge Kalunga, kaha namukatachikizanga kuwaha nakupihya.”

¹⁰ Alama naEve vatelelele jino kusakula vyakulinga. Uno vononokele Yehova, nyi vevwililile linoka? Vasakwile kulikanga kuli Kalunga. Ngocho vakundwijile kulikanga chaSatana. Vakanyine Yehova kupwa Sevo, nakukana nawa mukingo wenyi.—Kupu. 3:6-13.

11. Mwomwo ika Yehova ahonena kwechelela vilinga vyakulikanga?

¹¹ Alama naEve kavapwile jino vakukupukako mwomwo valikangile kuli Yehova. Kulikanga chavo chavalingishile valihandule kuli Yehova, mwomwo ikiye ‘apwa utoma, kaha kasaka kumona vyuma vyavipiko.’ Shikaho, keshi “kwechelela vilinga vyakuhukako.” (Hamba. 1:13) Kachi nge echelelele upi kana chakuhona kulingaho chuma numba chimwe, kachi vyuma vyamumelu navyahamavu vyalyenyeka. Chuma chachinenenyi kachi naumwe wauchi amufwelela. Oloze Yehova eji kutesangamo vyuma eji kuhanjikanga, keshi kwalumukako. (Samu 119:142) Ngocho lisesa vahanyine Alama naEve lyakulisakwila vyakulinga kalyasolwele nge vatelelele kuhumbula jishimbi jaKalungako. Kulikanga kuli Yehova chavalingishile  vafwenga nakukinduluka kulukungulu kuze vafumine.—Kupu. 3:19.

12. Vyuma muka vyasolokele kuvana vaAlama?

¹² Omu Alama naEve valile kuze kumuhako, kavapwile jino mutanga yaKalungako. Kalunga avahangile muEtene, kaha kavahashile kuhilukamoko. (Kupu. 3:23, 24) Ngocho Yehova avechelele vayande mwomwo yavyuma valisakwilile. (Tangenu Lushimbi lwamuchivali 32:4, 5.) Hakuwana nge vatu jino kavapwa vakukupukako, ngocho kaveshi kuhasa kusolola kanawa vilinga vyaKalungako. Alama kajimbalishile kaha kuyoya chenyi chamwazako, oloze alingisa jino vana venyi vahone kupwa vakukupuka, nakuswana shili nakufwa. (Loma 5:12) Alingisa nawa vana venyi vahone kupwa nalutalililo lwakuyoya chamyaka yosena. Alama naEve kavasemene vana vakukupukako, kaha nawa vana vavo kavatwama navana vakukupukako. Kufuma vene haze Satana Liyavolo ongele Alama naEve, chatwalaho lika kuhungumwisa vatu.—Yowa. 8:44.

13. Vyuma muka Yehova asaka kuli vatu?

¹³ Kalunga chatwalaho lika kuzanga vatu. Numba Alama naEve valikangile, oloze Yehova asaka vatu vapwenga nausoko wakukola nayikiye. Kasaka mutu naumwe akanongeko. (Petu. 2, 3:9) Ngocho, halwola vene luze vatu vatete valikangile, Kalunga awahishile vyuma mangana vatu vapwenga cheka nausoko nayikiye, oku hanga chakavangiza jishimbi jenyi jakwoloka. Uno Yehova alingile ngachilihi ngocho?

14. (a) Kweseka naYowano 3:16, vyuma muka alingile Kalunga mangana asokole vatu? (b) Chihula muka natushimutwila navatu vakuwahilila?

¹⁴ Tangenu Yowano 3:16. Vatu vavavulu vaze tweji kusanyikanga kuKwanuka Kufwa chaMwata vatachikiza kanawa mazu atwama hachisoneka kana. Oloze jino tulihulisenu ngwetu, Wana waYesu watulingisa ngachilihi tupwenga nalutalililo lwakuyoya chamyaka yosena? Omu tunakulanya vatu kuKwanuka Kufwa chaMwata, nomu navakevwilila kuchihande, nahalwola natukakindulukila kuvatu kana hanyima yachilika, nachitulingisa tukafwe vaze vamichima yamwaza vevwishise muvakumbulwila chihula kanechi chachilemu. Vatu kana navawahilila omu navevwishisa zangi yaYehova namangana enyi asolola kuhichila mundando yakusokola. Uno vishina muka natukashimutwila handando yakusokola?

15. Yesu alihandunwine ngachilihi naAlama?

¹⁵ Yehova atumine mutu wakukupuka mangana asokole vatu. Mutu kana atelelele kupwa wakushishika kuli Yehova, nakulisuula kuhana kuyoya chenyi hali vatu. (Loma 5:17-19) Yehova anungulwile kuyoya chaMwanenyi watwatwa kufuma mwilu nakumuneha hamavu. (Yowa. 1:14) Ngocho, Yesu apwile mutu wakukupuka ngana muze apwile Alama. Oloze Yesu alihandunwine naAlama hakulinga vyuma asakile Yehova mukuyoya chenyi. Namuvyeseko vyavinene, Yesu kalingile shili chipwe kuhokola jishimbi jaKalungako.

16. Mwomwo ika ndando yakusokola yapwila wana waulemu?

¹⁶ Hakupwa wakukupuka, Yesu ahashile kusokola vatu kushili nakukufwa hakuvafwila. Alitombwele nakuyoya chakukupuka chize atelelele kupwa nacho Alama, nakushishika kuli Kalunga nakumwononoka. (Chimo. 1, 2:6) Yesu apwile ndando yakusokola yize yalingisa vatu “vavavulu” vakayoye. (Mateu 20:28) Chikupu vene, ndando yakusokola yaYesu yapwa hijila yakuteselamo vyuma ajina  Kalunga. (Koli. 2, 1:19, 20) Ndando yakusokola yahana vatu vakushishika lutalililo lwakuyoya myaka yosena.

17. Ndando yakusokola yatunehela kutokwa muka?

¹⁷ Yehova atuhanyine ndando yakusokola yize yapwile wana waulemu chikuma kuli yikiye. (Petu. 1, 1:19) Azanga chikuma vatu, ngocho alisuwile kuvahana Mwanenyi umwe kaha wakulipwila mangana avafwile. (Yowa. 1, 4:9, 10) Yesu ashishile muli Alama uze apwile chisemi chetu wakukupuka hakavanga. (Koli. 1, 15:45) Hakulinga ngocho, Yesu atukafwa tuwane kuyoya nakukapwa cheka nausoko naKalunga. Enga, kuhichila muwana waYesu, Yehova eji kutambulanga vatu vapwenga cheka nausoko nayikiye. Kutala katweshi kukevwa kuwaha omu vatu vakushishika vosena navakapwa vakukupukako tahi? Tanga yaKalunga yahamavu nayikalinunga hamwe natanga yenyi yamwilu, kaha tuvosena natukapwa tuvana vaKalunga.—Loma 8:21.

18. Lwola muka Yehova mwakapwa “vyuma vyosena kuli vosena”?

¹⁸ Kulikanga chaSatana kachahonesele Yehova kusolwela vatu zangi chipwe kuhonesa vatu vakuhona kukupuka kupwa vakushishika kuli Yehovako. Yehova mwakalingisa vana venyi vosena kupwa vakwoloka kuhichila mundando yakusokola. Chiyoyelo nachikawaha omu vatu vosena vaze ‘vamona Mwana nakumufwelela’ navakayoya myaka yosena. (Yowa. 6:40) Yehova mwakalingisa vatu hamavu vakakupuke mwosena mwomwo yazangi namangana enyi kweseka navyuma ajinyinyine hakavanga. Halwola kana, Yehova Setu mwakapwa “vyuma vyosena kuli vosena.”—Koli. 1, 15:28.

19. (a) Kumona ndando yakusokola kupwa yayilemu chatela kutulingisa tulinge ika? (Talenu lipwata lyakwamba ngwavo “ Tutondenunga Lika Vaze Vatela.”) (b) Vyuma muka natushimutwila muchihande nachikavangizaho?

¹⁹ Kumona ndando yakusokola kupwa yayilemu chatela kutulingisa tuzate nangolo jetu josena nakukafwa vatu vatachikize ngwavo vanahase kunganyala kuwana kanou. Vatu vatela kutachikiza ngwavo ndando yakusokola yikiko kaha jila Yehova ahanyinamo vatu vosena lutalililo lwakuyoya myaka yosena. Chipwe ngocho, ndando yakusokola yatesamo nawa vyuma vikwavo. Chihande nachikavangizaho nachishimutwila nawa omu wana waYesu wakumishile chihande akatwile Satana mumilemba yaEtene.