1. Ndando yakusokola yaneha kutokwa muka?

NDANDO YAKUSOKOLA yaYesu Kulishitu yaneha kutokwa chachinene. Vana vaAlama vakushishika vosena navakapwa mutanga yaKalunga mwomwo yandando yakusokola. Kaha nawa natukatwama myaka yosena mukuwahilila. Oloze ndando ahanyine Kulishitu yalingila vatu vakwoloka vyuma vyeka vyavilemu. Kulisuula chaYesu kwiza nakufwa hano hamavu nakuhakwila kwoloka chaYehova chavatula nawa vihande vyeka vyavilemu mwilu nahamavu.—Hepe. 1:8, 9.

2. (a) Vyuma muka vyavilemu avulukile Yesu mukulomba chenyi? (Talenu muvwimbimbi wakulivanga.) (b) Vyuma muka natushimutwila muchihande chino?

² Omu kwasalile myaka yivali shimbu kanda Yesu afwenga, anangwile tumbaji twenyi valombenga ngwavo: “Ove Setu uli mwilu, lijina lyove lipwenga lyajila. Wangana wove wizenga. Mwaya muchima wove mulingiwe mwilu, nahamavu nawa.” (Mateu 6:9, 10) Hakusaka tusolole kusakwilila chetu hawana wandando yakusokola, twatela kuvangila kutachikiza omu  wana kana wazachila hamwe nakulingisa lijina lyaKalunga kupwa lyajila, nachiyulo chaWangana waKalunga, nakutesamo chavyuma ajina Kalunga.

3. Lijina lyaYehova lyasolola vyuma muka, kaha Satana asawile ngachilihi eli lijina lyajila?

³ Yesu ahanjikile chatete vyakulingisa lijina lyaKalunga kupwa lyajila mukulomba chenyi. Lijina lyaYehova lyapwa lyajila, kaha nawa lyasolola ulemu nangolo atwama najo. Mukulomba chikwavo, Yesu avulukile Yehova ngwenyi: “Ove Tata Wajila.” (Yowa. 17:11) Hakuwana nge Yehova apwa wakujila, vyuma vyosena eji kulinganga najishimbi ahakako vyapwa vyajila. Numba tuhu vyuma kana vyajila, oloze mumilemba yaEtene, Satana ambile ngwenyi jishimbi jize Kalunga ahanyine vatu kajapwile jakwolokako. Hakuvangijikila Yehova, Satana asawile lijina lyaKalunga lyajila.—Kupu. 3:1-5.

4. Uno Yesu alingishile ngachilihi lijina lyaKalunga lipwenga lyajila?

⁴ Oloze Yesu azangile lijina lyaYehova. (Yowa. 17:25, 26) Yesu alingishile lijina lyaKalunga kupwa lyajila. (Tangenu Samu 40:8-10.) Kuyoya chenyi chakukupuka hano hamavu chasolola nge chapwa chakutamo kaha nawa chakwoloka Yehova kuhakako jishimbi jize jeji kutwaminyinanga vyuma atenga. Yesu apwile lika wakushishika kuli Ise wamwilu nahalwola vamuyanjishile kuli Satana swi nomu afwile. Kushishika chenyi chasolwele nge mutu wakukupuka nahase kwononoka kujishimbi jaKalunga jakwoloka.

5. Tunahase kulingisa ngachilihi lijina lyaKalunga kupwa lyajila?

⁵ Uno natusolola ngachilihi ngwetu twazanga lijina lyaYehova? Vilinga vyetu vyatela kupwa vitoma, mwomwo Yehova asaka tupwenga vajila. (Tangenu WaPetulu 1, 1:15, 16.) Echi chalumbununa nge twatela kulemesa kaha Yehova nakumwononoka namuchima wetu wosena. Numba nge vanakutuyanjisa, twatela kulihakilako mangana tutwame kweseka namwaya jishimbi najindongi jaKalunga. Hakupwa navilinga vyakwoloka, natulingisa mumunyi wetu umunyike nakutohwesa lijina lyaYehova. (Mateu 5:14-16) Hakupwa tuvatu vakujila, vilinga natwamiso yetu vyatela kusolola hatoma ngwetu twazanga jishimbi jaYehova, nakusolola nawa ngwetu Satana ahanjikile makuli. Nge tunalimbenje, hakuwana nge tuvosena tweji kulimbenjanga, twatela kupihilila nakwalumuka nakuseza vilinga vize navivwisa Yehova kupihya.—Samu 79:9.

6. Mwomwo ika Yehova atumwena kupwa vakwoloka numba tuhu katwakupukako?

⁶ Yehova eji kukonekelanga jishili javatu valufwelelo kuhichila mundando yakusokola yaKulishitu. Eji kwitavilanga vatu vaze navalihana kuli ikiye mangana vapwenga mutanga yenyi. Yehova avulukila vaka-Kulishitu vawavisa kwoloka hakupwa vana venyi, kaha “mikoko veka” nawa avavulukila kwoloka hakupwa masepa jenyi. (Yowa. 10:16; Loma 5:1, 2; Yako. 2:21-25) Namakumbi ano, ndando yakusokola yatulingisa tupwenga nausoko wamwaza naSetu nakulingisa lijina lyenyi lipwenga lyajila.

7. Ndando yakusokola nayikaneha kutokwa muka omu naukayula Wangana?

⁷ Kamuchivali mukulomba chenyi kuli Kalunga, Yesu avulukile ngwenyi: “Wangana wove wizenga.” Uno ndando yakusokola yakundwiza ngachilihi Wangana waKalunga? Ndando yakusokola yalingisa kupwenga vaze 144,000 vakazate mwavamyangana  navapilishitu mwilu hamwe naKulishitu. (Kuso. 5:9, 10; 14:1) Yesu navaze mwakayula navo, vaze navakayula muWangana waKalunga, navakakafwa vatu vakwononoka vakanganyale kundando yakusokola hamyaka likombakaji. Mavu navakawalumuna kupwa palachise, kaha vatu vakushishika navakapwa vakukupuka nakuvavuluka jino ngwavo vana vaKalunga ngana muze chapwa kuvana venyi mwilu. (Kuso. 5:13; 20:6) Yesu mwakachika mutwe walinoka nakufumisako upi wosena uze weza mwomwo yakulikanga chaSatana.—Kupu. 3:15.

8. (a) Yesu akafwile ngachilihi tumbaji twenyi vamone kulema chaWangana waKalunga? (b) Tunahase kusolola ngachilihi ngwetu twakundwiza Wangana makumbi ano?

⁸ Omu Yesu apwile hano hamavu, akafwile tumbaji twenyi vamone kulema chaWangana waKalunga. Omu vamumbapachishile, ambulwilenga “mujimbu wamwaza waWangana waKalunga” kujingalila josena. (Luka 4:43) Shimbu kanda akinduluke mwilu, alwezele tumbaji twenyi vapwenganga vinjiho jenyi “kuvihela vyakwakusuku vyahamavu.” (Vili. 1:6-8) Kuhichila mumulimo wakwambulula, vatu vosena hamavu vanahase kulinangula vyandando yakusokola nakupwa vatu vayula kuWangana waKalunga. Makumbi ano, tweji kukundwizanga Wangana hakukafwa vandumbu jaKulishitu vaze vali hano hamavu mumulimo wakwambulula mujimbu wamwaza waWangana mukaye kosena.—Mateu 24:14; 25:40.

9. Mwomwo ika twatela kufwelela ngwetu Yehova mwakatesamo vyuma ajinyine kulingila vatu?

⁹ Uno Yesu alumbunwine ika hakwamba ngwenyi: “Mwaya muchima wove mulingiwe”? Yehova ikiye Tengi. Eji kutesangamo vyuma eji kuhanjikanga. (Isa. 55:11) Keshi kuketavisa kulikanga chaSatana chimuhonese kulinga vyuma ajina kulingila vatuko. Kufuma vene kumaputukilo, Yehova ajinyine ngwenyi hamavu hakazale navana vaAlama naEve vakukupuka. (Kupu. 1:28) Nge Alama naEve vafwile chakuzeneka vana, kachi vyuma ajinyine Kalunga vyakuzalisa hamavu navana vaAlama kavyateselemoko. Shikaho omu Alama naEve valingile shili, Yehova avetavishile vaseme vana. Kuhichila mundando yakusokola, Kalunga mwakalingisa vatu valufwelelo kupwa vakukupuka nakuyoya myaka yosena. Yehova azanga vatu, kaha ajina ngwenyi vatu vakwononoka vayoyenga kweseka namuze ajinyine.

10. Uno ndando yakusokola yanganyalisa ngachilihi vosena vaze vafwa?

¹⁰ Nyi ngachilihi mayongomena avatu vaze vafwile lyehi chakuzeneka kuzachila Yehova? Ndando yakusokola nayikalingisa vatu vosena vakavasangule. Setu wamwilu wazangi mwakavasangula nakuvahana lwola lwakulinangula vyayikiye mangana vakayoye myaka yosena. (Vili. 24:15) Yehova asaka vatu vayoye keshi kufwako. Hakupwa ikiye kasulu kakuyoya, ngocho apwa Ise yavosena vaze navakasanguka. (Samu 36:9) Echi chikiko chalingishile Yesu atunangule tulombenga ngwetu: “Ove Setu uli mwilu.” (Mateu 6:9) Yehova ahana Yesu mulimo waulemu wakusangula vatu vaze vafwa. (Yowa. 6:40, 44) MuPalachise, Yesu mwakatesamo mulimo wenyi vamuhana wakupwa ikiye ‘kusanguka, ikiye kuyoya.’—Yowa. 11:25.

11. Vyuma muka ajina Kalunga kukalingila “liyongomena lyalinene”?

¹¹ Yehova keshi kusolwela likoji lyenyi kuvatu vamwe kahako, mwomwo Yesu ambile ngwenyi: “Weshowo eji kulinganga mwaya muchima waKalunga, ikiye ndumbwami  walunga, ikiye ndumbwami wapwevo, ikiye mama.” (Mako 3:35) Kalunga ajina ngwenyi “liyongomena lyalinene” lyavatu vakumafuchi, namiyachi namalimi osena vamulemesenga. Vaze vafwelela mundando yakusokola yaKulishitu, nakulinga mwaya muchima waKalunga navakapwa hali vatu vaze navakalikuwa ngwavo: “Ulwilo wetu wafuma kuli Kalunga ketu ou atwama halitanda, nakuli Mwanamukoko.”—Kuso. 7:9, 10.

12. Kulomba chaYesu chasolola ngachilihi vyuma ajina Yehova kukalingila vatu vakwononoka?

¹² Vyuma ajina Yehova kulingila vatu vakwononoka vyasoloka hatoma mumazu ahanjikile Yesu mulomba chenyi. Twatela kuzata nangolo mangana tulingise lijina lyaYehova kupwa lyajila, ngana muze ahanjikile Yesu mukulomba chenyi. (Isa. 8:13) Lijina lyaYesu lyalumbununa ngwavo “Yehova Ikiye Ulwilo,” kaha kutulwila kuhichila mundando yakusokola cheji kwalisanga nakutohwesa lijina lyaYehova. Kalunga mwakazachisa Wangana wenyi mangana vatu vakwononoka vakanganyale kundando yakusokola. Chikupu vene, kulomba chaYesu chatufwelelesa nge kakweshi vyuma navihonesa Kalunga kutesamo vyuma ajinako.—Samu 135:6; Isa. 46:9, 10.

13. Kulihana mulumbapachiso cheji kusololanga vyuma muka?

¹³ Jila yimwe tunahase kusolwelamo kusakwilila chetu handando yakusokola, shina kulihana kuli Yehova nakutumbapachisa mwomwo yakufwelela mundando yakusokola. Kutumbapachisa cheji kutusololanga kupwa “vakuli Yehova.” (Loma 14:8) Cheji kusololanga nge tunalombo Kalunga atuhane chivezu chamwaza. (Petu. 1, 3:21) Yehova eji kukumbululanga  kulomba kana hakututomesa namanyinga aKulishitu. Twafwelela jino ngwetu mwatuhana vyuma vyosena vize atushika.—Loma 8:32.

14. Mwomwo ika vatulwezela tuzangenga vakwetu?

¹⁴ Jila yeka muka tunahase kusolwelamo kusakwilila chetu handando yakusokola? Hakuwana nge zangi yikiko yeji kulingisanga Yehova alinge vyuma vyosena, ngocho asaka vaka-kumulemesa vosena vasololenga zangi. (Yowa. 1, 4:8-11) Tweji kusololanga ngwetu twasaka kupwa ‘tuvana vaSetu wamwilu’ hakuzanga vakwetu. (Mateu 5:43-48) Jishimbi jajilemu jivali shina kuzanga Yehova nakuzanga vakwetu. (Mateu 22:37-40) Kaha jila yimwe tunahase kusolwelamo zangi yakuzanga vakwetu shina kwononoka lushimbi lwakwambulula mujimbu waWangana waKalunga. Tweji kulondezezanga Kalunga hakuzanga vakwetu. Zangi yaKalunga “yinakupuka lyehi muli etu” nge natwononoka lushimbi lwakuzanga vakwetu chikumanyi vandumbwetu.—Yowa. 1, 4:12, 20.

15. (a) Vyuma muka vyamwaza atuhana Yehova? (b) Vyuma muka vyamwaza twatalilila kulutwe?

¹⁵ Vatu vosena vanahase kuvakonekela shili yavo nge navafwelela mundando yakusokola. Mazu aKalunga atufwelelesa ngwawo shili jetu ‘navakajijimbangana.’ (Tangenu Vilinga 3:19-21.) Nganomu twashimutwilanga lyehi, Yehova etavila vangamba jenyi vawavisa kupwa vana venyi kuhichila mundando yakusokola. (Loma 8:15-17) Etu “mikoko veka” nawa Yehova atuneha mutanga yenyi hano hamavu. Nge tunakupuka lyehi nakuhita mucheseko chamakumishilo, Yehova mwakatwitavila jino kupwa tuvana venyi. (Loma 8:20, 21; Kuso. 20:7-9) Yehova mwatwalangaho lika kuzanga vana venyi. Ndando yakusokola yaneha nganyo yahaya myaka yosena. (Hepe. 9:12) Yehova ikiye atuhana wana kanou, kaha naumwe wauchi nahase kututambulawo.

16. Ndando yakusokola yatusokola ngachilihi?

¹⁶ Kakweshi chuma mwahasa kulinga Liyavolo mangana ahonese vatu vosena vaze navapihilila nakwalumuka kukapwa mutanga yaYehovako. Yesu ejile hamavu nakufwa “kamwe kaha kunahu.” Ngocho ndando yakusokola vayifweta kunahu. (Hepe. 9:24-26) Yafumisako shili yize twaswana kufuma kuli Alama. Twasakwilila Kulishitu hakulisuula chenyi kwiza nakutufwila, mwomwo twasokoka kukaye kano vayula kuli Satana, kaha nawa katweshi kwivwa woma wakufwako.—Hepe. 2:14, 15.

17. Zangi yaYehova yaminganyalisa ngachilihi?

¹⁷ Vyuma atushika Kalunga navikatesamo chikupu. Ngana muze jishimbi ahaka muvyuma atenga kavyalumukako, navyuma ajina kulingila vatu kavyeshi kukalumukako. Vyuma atushika mwakavitesamo chikupu. (Mala. 3:6) Yehova atulingila vyuma vyamwaza vyakulipwila. Atuhana wana uze azanga chikuma. “Tunatachikiza nakwitavila zangi yaKalunga yakutuzanga etu. Kalunga ikiye zangi.” (Yowa. 1, 4:16) Hamavu hosena nahakapwa palachise, kaha vatu vosena navakalondezeza Kalunga hakusololanga zangi. Shikaho, tuvosena tulinungenu hamwe navatu jaKalunga vakushishika vamwilu nakwamba ngwetu: “Kwalisa, naupahu, namangana, nakusakwilila chosena, nakavumbi, nangolo, naundume vipwenga vyaKalunga ketu haya myaka namyaka. Amene.”—Kuso. 7:12.