1, 2. (a) Vatu vaze veji kutwaminyinanga Vinjiho jaYehova valihandununa ngachilihi navaze vamumauka eka? (b) Vyuma muka natushimutwila muchihande chino nechi nachikavangizaho?

“TWAMINA yenu iya?” Echi chikiko chihula vavula vatu kuhulisa Vinjiho jaYehova, mwomwo mumauka akwitava amavulu mwatwama twamina umwe, pwevo chipwe lunga. Oloze yetu kaveshi kututwaminyina kumutuko. Veji kututwaminyinanga kuli Kulishitu uze vasangwile, uze veji kutwaminyinga kuli Ise Yehova.—Mateu 23:10.

² Chipwe ngocho kwatwama lizavu lyamalunga, ‘lyandungo wakushishika wakuzangama,’ lize lyeji kutwaminyinanga vatu jaKalunga makumbi ano. (Mateu 24:45) Uno twejiva ngachilihi ngwetu Yehova ikiye ali nakututwaminyina kuhichila muli Mwanenyi uze katwamonako? Muchihande chino nechi nachikavangizaho, natushimutwila omu Yehova hamyaka yayivulu nazachisanga vatu vamwe vatwaminyine vatu jenyi. Muvihande vyosena vivali natushimutwila havishina vitatu vize navisolola nge Yehova ikiye natwaminyinanga vaze malunga mangana vatetekele vatu jenyi, kaha achili lika nakutwaminyina vatu jenyi noholyapwa.—Isa. 58:11.

3. Vyuma muka vyakafwile Mose atwaminyine vaIsalele?

³ Shipilitu yajila yakafwilenga vatu vaze vemanyinyinengako Kalunga. Achishinganyekenu hali Mose uze vatongwele atwaminyine vaIsalele.  Vyuma muka vyamukafwile ahase kuzata mulimo waukalu ngana? Yehova “ahakile shipilitu yenyi yajila muli ikiye.” (Tangenu Isaya 63:11-14.) Yehova atwalileho lika kutwaminyina vatu jenyi hakuhana shipilitu yajila kuli Mose.

4. Uno vaIsalele vatachikijile ngachilihi ngwavo Mose vamutwaminyinyinenga nashipilitu yaKalunga? (Talenu muvwimbimbi wakulivanga.)

⁴ VaIsalele vatachikijile ngachilihi ngwavo Mose vamukafwile nashipilitu yajila hakuwana nge shipilitu yajila katwayimonako? Shipilitu yajila yakafwile Mose alinge vyuma vyakukomwesa nakulweza Fwalo lijina lyaKalunga. (Kulo. 7:1-3) Shipilitu yajila nawa yakafwile Mose apwenga navilinga vyamwaza vyakufwana nge, zangi, kuvova, kutalilila chikoki, vize vyamukafwile atwaminyine vaIsalele. Vilinga apwile navyo vyalihandunwine navilinga vyavatwamina vamumafuchi eka. (Kulo. 5:2, 6-9) Muchima apwile nawo Mose wasolwele hatoma nge Yehova ikiye amutongwele atwaminyine vatu jenyi.

5. Lumbununenu omu Yehova akafwililemo malunga veka vavaIsalele vatwaminyine vatu jenyi.

⁵ Kufumaho, shipilitu yajila yaYehova yakafwile nawa malunga veka atongwele vatwaminyine vatu jenyi. “Yoshuwa mwanaNune azalile namangana.” (Lushi. 34:9) “Shipilitu yaYehova yejile hali Ngiteyone.” (Kuyu. 6:34) “Kaha shipilitu yaYehova yahanyine ngolo Ndavichi.” (Samwe. 1, 16:13) Ava malunga vosena vapendaminyine hashipilitu yaKalunga yivakafwe, kaha chikupu vene yavakafwile vazate milimo yayilemu yize kachi kavahashile kuyizata mungolo javoko. (Yoshu. 11:16, 17; Kuyu. 7:7, 22; Samwe. 1, 17:37, 50) Ngocho Yehova vamwalishile havyuma kanevi.

6. Mwomwo ika Kalunga asakile vatu jenyi vononoke kuli vaze vapwile nakuvatwaminyina?

⁶ Vyuma muka vatelelele kulinga vaIsalele hakutachikiza ngwavo shipilitu yajila yikiko yakafwile malunga vaze vapwile nakuvatwaminyina? Omu vatu vayayavalile hali Mose, Yehova ahulishile ngwenyi: “Ava vatu navazenekanga kunguvumbika palanga nakumwaka uka?” (Kula. 14:2, 11) Chikupu vene, Yehova yikiye asakwile Mose, Yoshuwa, Ngiteyone, naNdavichi kupwa vatwamina vakumwimanyinako. Vatu vaze vononokele ava malunga vapwile nakwononoka Yehova kupwa Twamina yavo.

7. Uno Mose vamukafwile ngachilihi kuli vangelo?

⁷ Vangelo vakafwilenga vatu vaze vemanyinyinengako Kalunga. (Tangenu WavaHepeleu 1:7, 14.) Yehova atumine vangelo vahane Mose milimo, nakumukolezeza, nakumutetekela. Kalunga atumine Mose kupwa “muka-kuyula, muka-kuyovola hakumukafwa kuli kangelo uze alisolwele kuli ikiye muchiputa.” (Vili. 7:35) Yehova ahanyine Mose Jishimbi “kuhichila muli vangelo,” jize jamukafwile anangule vaIsalele. (Ngale. 3:19) Yehova amulwezele ngwenyi: “Yako utwaminyine vatu kuchihela chize ngunakulweze. Tala! Kangelo kami mwakutwaminyina.” (Kulo. 32:34) Mbimbiliya kayavuluka ngwayo vaIsalele vamwene kangelo mwazata milimo kanako. Oloze mujila Mose avatwaminyinyinemo nakuvanangula vyasolwele hatoma nge kwapwile mutu weka uze apwile nakumukafwa.

8. Vangelo vakafwile ngachilihi Yoshuwa naHezekiya?

⁸ Omu afwile Mose, vamuswanyine kuli Yoshuwa uze vakafwile kuli “twamina waliyongomena lyaYehova” mangana atwaminyine vatu jaKalunga kujita yize valwile navaKanane, kaha vaIsalele vafungulwile. (Yoshu. 5:13-15; 6:2, 21) Kutwala muze, Mwangana Hezekiya alitalasanyine namaswalale javaAsulya vaze vasakile kulukuka Yelusalema. Haufuku umwe kaha, “kangelo kaYehova . . . ajihile vatu 185,000.”—Vamya. 2, 19:35.

9. Uno kuhona kukupuka chavatu vaze vemanyinyinengako Kalunga chalumbunwine nge vaIsalele kavatelelele kuvononokako nyi? Lumbununenu.

 ⁹ Numba tuhu vangelo vapwa vakukupuka mwosena, oloze vatu vaze vakafwilenga kavapwile vakukupukako. Lwola lumwe Mose kavumbikile Yehovako. (Kula. 20:12) Yoshuwa kahulishile Kalunga omu valikashile chivwasano navaka-Ngiveyoneko. (Yoshu. 9:14, 15) Halwola lumwe, Hezekiya “alivwimbile” mumuchima wenyi. (Miji. 2, 32:25, 26) Chipwe ngocho, vaIsalele vatelelele kwononoka vatwamina kana numba tuhu kavapwile vakukupukako. Yehova apwile nakukafwa malunga kana kuhichila muli vangelo. Chapundu vene, Yehova apwile nakutwaminyina vatu jenyi.

10. Jishimbi jaKalunga jatwaminyinyine ngachilihi Mose?

¹⁰ Mazu aKalunga atwaminyinyinenga vaze vamwimanyinyinengako. Mbimbiliya yavuluka Jishimbi vahanyine kuli vaIsalele ngwayo “Jishimbi jaMose.” (Vamya. 1, 2:3) Chipwe ngocho, Visoneka vyavuluka ngwavyo Yehova yikiye muka-kuhana Jishimbi, kaha naMose atelelele kwononoka Jishimbi kana. (Miji. 2, 34:14) Omu Yehova amulwezele mwakutungila tavanaku, “Mose alingile vyuma vyosena vize amulwezele Yehova. Kaha alingile vene ngocho.”—Kulo. 40:1-16.

11, 12. (a) Vyuma muka atelelele kulinga Yoshuwa navamyangana veka vaze vayulilenga vatu jaKalunga? (b) Uno Mazu aKalunga akafwile ngachilihi vaze vatwaminyinyinenga vatu jenyi?

¹¹ Yoshuwa apwile namukanda waJishimbi kufuma vene kumaputukilo akuyula chenyi. Vamulwezele ngwavo: “Utangenga mazu awo nakuwashinganyekanga musana naufuku mangana ulamenga jishimbi josena vasonekamo.” (Yoshu. 1:8) Kutwala muze, navamyangana vaze vayulilenga vatu jaKalunga valingilenga mwomumwe. Vavalwezele vanungulule mukanda waJishimbi nakuutanganga makumbi osena, mangana valamenga “mazu aJishimbi osena najindongi josena.”—Tangenu Lushimbi lwamuchivali 17:18-20.

¹² Mazu aKalunga akafwile ngachilihi malunga vaze vatwaminyinyinenga vatu jenyi? Talenu chakutalilaho chaMwangana Yoshiya. Omu vawanyine mukanda waJishimbi jaMose, muka-kusoneka waYoshiya aputukile kumutangilawo. * Uno mwangana alingile ika? “Omu mwangana evwile mazu amumukanda waJishimbi, apihililile nakupula uvwalo wenyi.” Oloze alingile vyuma vyeka nawa. Hakumutwaminyina naMazu aKalunga, Yoshiya aputukile mulimo wakunongesa kulemesa makombelo, kufumaho alwezele vatu valinge Paseka. (Vamya. 2, 22:11; 23:1-23) Yoshiya navatwamina veka vakushishika vahamukile kulinga vyuma kanevi nakulweza vatu jaKalunga vavikavangize, mwomwo vavatetekelele kuMazu aKalunga. Vyuma kanevi valingile vyakafwile vatu jaKalunga valinge mwaya muchima wenyi.

13. Chihandwa muka chapwile hali vatwamina javatu jaKalunga navatwamina vavaka-mafuchi eka?

¹³ Ava vamyangana vakushishika valihandunwine navatwamina vavaka-mafuchi eka vaze vazachishilenga mangana autu. Chakutalilaho, muchiyulo chavaKanane, vatu valingilenga vyuma vyaunyengwe vyakufwana nge kulisavala nakausoko, kulisavala namutu wausonyi woumwe, kulisavala nakanyama, kulumba vana mukakahya, nakulemesa makumbelo. (Levi 18:6, 21-25) Kaha nawa vatwamina vamuMbavilone namuEjipitu kavakavangijilenga jishimbi jakupandama kuunyoji jize Kalunga ahanyine vaIsaleleko. (Kula. 19:13) Oloze vatu jaKalunga vamwene omu vatwamina javo vavakafwilenga vapwenga vatoma kushipilitu nakumujimba. Chikupu vene, Yehova yikiye apwile nakuvatwaminyina.

14. Mwomwo ika Yehova ahuhumwinyinenga vatwamina vamwe vaze vatetekelelenga vatu jenyi?

 ¹⁴ Vamyangana vamwe vaze vayulilenga vatu jaKalunga kushikulu kavakavangijilenga jindongi jenyiko. Vaze vahonene kwononoka Yehova vakanyine kuvatwaminyina kushipilitu yenyi yajila, navangelo jenyi, naMazu enyi. Shimbu jimwe, Yehova avahuhumwinenga chipwe kuvashishisa navatwamina veka. (Samwe. 1, 13:13, 14) Omu lwahetele lwola, Yehova atongwele twamina uze apwile wamulemu kuhambakana malunga vaze azachishilenga kunyima.

15. (a) Uno vapolofweto vasolwele ngachilihi ngwavo nakukeza twamina wamwenemwene? (b) Mutu muka vapolofwetelele chimweza ngwavo mwakapwa twamina?

¹⁵ Hamyaka yayivulu, Yehova apolofwetele ngwenyi mwakatongola twamina wamwenemwene akatwaminyine vatu jenyi. Mose alwezele vaIsalele ngwenyi: “Yehova Kalunga kenu mwakamikatwila kapolofweto wamuli vandumbwenu, wakufwana nge ami, kaha mukamwivwililenga.” (Lushi. 18:15) Isaya ahanjikile chimweza ngwenyi ou mutu mwakapwa ‘twamina, kaha nawa kapitau.’ (Isa. 55:4) Ndanyele nawa vamuhwiminyinyine asoneke vyakwiza ‘chaTwamina Meshiya.’ (Ndanye. 9:25) Kaha Yesu Kulishitu alivulukile yivene ngwenyi ikiye “Twamina” yavatu jaKalunga. (Tangenu Mateu 23:10.) Tumbaji twenyi vamukavangijilenga namichima yavo yosena, nakwitavila ngwavo Yehova yikiye amusakwile. (Yowa. 6:68, 69) Vyuma muka vyavalingishile vafwelele ngwavo Yesu Kulishitu yikiye vatongwele kuli Yehova mangana atwaminyine vatu jenyi?

16. Vyuma muka vyasolola nge Yesu vamukafwilenga nashipilitu yajila?

¹⁶ Shipilitu yajila yakafwile Yesu. Halwola vapwile nakumbapachisa Yesu, Yowano Muka-kumbapachisa amwene “melu nawasokoloka, kaha amwene shipilitu nayifuma mwilu nge liyembe nakuwila hali ikiye.” Kaha “shipilitu yamukatwile nakumutwala mupambo.” (Mako 1:10-12) Omu Yesu azachilenga milimo yenyi hano hamavu, shipilitu yajila yaKalunga yamukafwile alinge vyuma vyakukomwesa, nakuhanjika nangolo jize vamuhanyine kuli Ise. (Vili. 10:38) Shipilitu yajila nawa yamukafwile apwenga navilinga vyakukupuka vyakufwana nge, zangi, kuwahilila, nalufwelelo lwakukola. (Yowa. 15:9; Hepe. 12:2) Kakweshi twamina weka apwile navilinga kaneviko. Chikupu vene, Yesu vamutongwele kuli Yehova.

17. Vangelo valingile vyuma muka mangana vakafwe Yesu?

¹⁷ Vangelo vakafwile Yesu. Omu Yesu alingile hivanamumbapachisa lyehi, “vangelo vejile nakuputuka kuzachila Yesu.” (Mateu 4:11) Omu kwasalile jola jajindende nakufwa, “kangelo afumine mwilu, asolokele kuli ikiye, kaha amukolezezele.” (Luka 22:43) Yesu afwelelele ngwenyi Yehova mwatuma vangelo vamukafwe hakala lwola apwile muukalu mangana alinge mwayile muchima waKalunga.—Mateu 26:53.

18, 19. Mazu aKalunga akafwile ngachilihi Yesu mukuyoya chenyi nahakunangula?

 ¹⁸ Mazu aKalunga atwaminyinyinenga Yesu. Kufuma vene kumaputukilo amilimo yenyi yahano hamavu, Yesu apendaminyine haVisoneka mangana vimutwaminyine. (Mateu 4:4) Ononokele Mazu aKalunga nakwitavila afwenga hachitondo chakumuyanjishila. Nahalwola apwile kwakamwihi nakufwa, ahanjikile upolofweto wakuvuluka Meshiya. (Mateu 27:46; Luka 23:46) Oloze vatwamina vamukwitava vamumakumbi enyi, vakanyine Mazu aKalunga omu alimbalakilenga navyuma vafwelelele. Yesu ahanjikile mazu ahanjikile Yehova kuhichila muli kapolofweto Isaya akwamba ngwenyi: “Vatu kana ava veji kunguvumbikanga kaha namivumbo yavo, oloze michima yavo yili kwakusuku nayami. Kulemesa veji kungulemesanga cheji kuyanga mwamokomoko, mwomwo veji kunangulanga jishimbi javatu kupwa nge himazu aKalunga.” (Mateu 15:7-9) Kutala mwashinganyeka ngwenu Yehova nahase kusakula malunga kana vatwaminyine vatu jenyi tahi?

¹⁹ Yesu etavilile Mazu aKalunga amutwaminyine muvilinga vyenyi nahakunangula. Omu vatwamina vamukwitava vamuhulishilenga vihula, ikiye kavakumbulwilenga kuzachisa mangana enyi chipwe uhashi wenyiko. Oloze avakumbulwilenga kuzachisa Visoneka. (Mateu 22:33-40) Kaha nawa kakomwesele vaka-kumwivwilila hakuvalweza mijimbu yamwilu chipwe yakutenga chavyumako, oloze “asokolwele vishinganyeka vyavo vamone kanawa mwalumbunukilile Visoneka.” (Luka 24:32, 45) Chikupu vene, Yesu azangile Mazu aKalunga nakufwila kuwalwezako vakwavo.

20. (a) Yesu asolwele ngachilihi nge aliluwilenga kuli Kalunga? (b) Chihandwa chapwile hali Yesu naHelote Angalipa I chatunangula vyuma muka hali Yehova kupandama kuvatwamina eji kusakulanga?

²⁰ Numba tuhu Yesu akomweselenga vaka-kumwivwilila ‘namazu amwaza,’ oloze ahanyinenga ulemu kuli Yehova uze apwile Muka-kumunangula. (Luka 4:22) Omu lunga umwe muka-luheto asakile kwalisa Yesu hakumuvuluka ngwenyi, “Muka-kunangula Wamwaza,” Yesu amukumbulwile ngwenyi: “Mwomwo ika unanguvulukila ngwove nguwamwaza? Naumwe wauchi apwa wamwaza, kuvanga umwe kaha, ivene Kalunga.” (Mako 10:17, 18) Yesu alihandunwine naHelote Angalipa I uze apwile mwangana chipwe twamina muYuta omu mwahichile myaka kafwe 8. Likumbi limwe omu kwapwile chilika, Helote “avwalile uvwalo wenyi wawangana.” Vatu vaze vakungulukile vatambakanyine ngwavo: “Olyo hilizu lyakalunga, kalyeshi lyamutuko!” Helote awahililile hakumwalisa. Vyuma muka jino vyasolokele? “Hahaze vene kangelo kaYehova amuvetele, mwomwo katohwesele Kalungako, kaha vamulile kumavunu, ngocho afwile.” (Vili. 12:21-23) Chamuchano vene kakweshi mutu mwahasa kwamba ngwenyi, Helote vamusakwile kuli Yehova kupwa twaminako. Oloze Yesu ahanyine unjiho wakusolola nge vamutongwele kuli Kalunga, kaha nawa lwola lwosena atohweselenga Yehova kupwa Twamina Wakulitulaho.

21. Vyuma muka natushimutwila muchihande nachikavangizaho?

²¹ Yesu kavamusakwile mangana ayule hamyaka yayindende kahako. Omu asangukile ambile ngwenyi: “Wata wosena wamwilu nahamavu vananguhanewo lyehi.” Ambile nawa ngwenyi: “Ami nangupwanga nayenu makumbi osena palanga nakuchikukulwishi chakatwamino kamyaka yino.” (Mateu 28:18-20) Oloze mwahasa kutetekela ngachilihi vatu jaKalunga hamavu okunyi apwa mutu wakushipilitu mwilu? Veya asakula Yehova mangana vatwaminyine vatu jenyi hamwe naKulishitu? Kaha vaka-Kulishitu vatachikiza ngachilihi vaze vemanyinako Yehova? Chihande nachikavangizaho nachikumbulula evi vihula.