1-3. (a) Chuma muka nachitukafwa tutwaleho kupwa vakushishika kuli Kalunga mumakumbi ano akukuminyina? (b) Vyuma muka natushimutwila muchihande chino?

OMU tuli nakupandama kuchikukulwishi chakatwamino kano, vatu vavapi vali nakutwalaho lika ‘kusoka nge mwila.’ (Samu 92:7) Ngocho katweshi kulikomokela hakumona vatu kaveshi nakukavangiza jishimbi jaKalungako. Jino hakuwana nge tuli nakuyoyela mukaye kana, natuhasa ngachilihi kupwa ‘tuvana vavandende kuupi,’ oku nawa ‘tuvakukula lyehi mukunangakana chetu’?—Koli. 1, 14:20.

² Kukumbulula tunahase kuchiwana muchisoneka chamutwe wachihande, chize chinahanjika ngwacho: “Vaze veji kusakasakanga Yehova vatachikiza vyuma vyosena,” kulumbununa vyuma vize navivwisa Yehova kuwaha. (Vishi. 28:5) Kaha nawa mukanda waVishimo 2:7, 9 wahanjika ngwawo, Yehova “eji kuvalaminanga [vaka-kusungama] mangana amwenemwene.” Echi cheji kuvakafwanga vaka-kwoloka vatachikize “omu chapwa kwoloka, nomu mwaya chiyulo, nakusungama, chipwe ngwetu jijila jamwaza josena.”

 ³ Nowa naNdanyele naYopa vapwile namangana. (Ezeke. 14:14) Omu mukiko chapwa nakuli vatu jaKalunga makumbi ano. Nyi ngachilihi yenu hauka wenu? Kutala mwatachikiza “vyuma vyosena” mwatela kulinga mangana mwivwise Yehova kuwaha tahi? Chuma nachimikafwa mulinge ngocho shina, kupwa nachinyingi chakwoloka chakutachikiza Kalunga. Shikaho tushimutwilenu jino (1) vyuma vyakafwile Nowa, naNdanyele, naYopa vatachikize Kalunga, (2) omu chinyingi kana chavanganyalishile, (3) nomu tunahase kuvalondezeza.

4. Vyuma muka vyakafwile Nowa atachikize Yehova, kaha chinyingi chakwoloka chamukafwile ngachilihi?

⁴ Vyuma vyakafwile Nowa atachikize Kalunga. Kufuma vene kunyima, vatu valufwelelo vanalinangulanga hali Kalunga mujijila jino jitatu: hakumona vyuma atenga, nahakulinangula kuvatu veka vaze vevwilenga Kalunga woma, nahakumona omu navakisulanga hakuyoya kweseka namwaya jishimbi najindongi jenyi jakwoloka. (Isa. 48:18) Hakumona vyuma vyakutenga, Nowa amwene unjiho wauvulu wakusolola nge Kalunga kwatwama navilinga vyenyi vyakufwana nge “ngolo jenyi jahaya myaka yosena nauKalunga wenyi.” (Loma 1:20) Echi chamukafwile apwenga nalufwelelo lwakukola muli Kalunga.

5. Uno Nowa alinangwile ngachilihi vyuma ajina Kalunga kukalingila vatu?

⁵ Lufwelelo “lweji kwizanga havyuma nevu mutu.” (Loma 10:17) Uno Nowa alinangwile ngachilihi vyaYehova? Chakuhona kukakasana, vamunangwile kuli vausoko jenyi, kuhakilako naIse Lameke, lunga walufwelelo uze asemukile shimbu kanda Alama afwenga. (Talenu muvwimbimbi wakulivanga.) Havatu kana hapwile nawa kaka yenyi Metusela nakakuluka yenyi Yalete, uze afwile omu mwahichile myaka 366 kufuma haze asemukilile Nowa. * (Luka 3:36, 37) Pamo ava malunga namapwevo javo vakiko vanangwile Nowa atachikize omu vatu vaputukile kupwako, nomu ajina Kalunga ngwenyi hamavu hakazale navatu vakwoloka, nakulikanga chamumilemba chize chamulingishile naikiye amone ukalu. (Kupu. 1:28; 3:16-19, 24) Vyuma alinangwile vyamuhetele kumuchima nakumukunyula azachile Kalunga.—Kupu. 6:9.

6, 7. Uno lutalililo lwazamishile ngachilihi lufwelelo lwaNowa?

⁶ Lutalililo lweji kuzamisanga lufwelelo. Twatachikiza ngwetu Nowa hakwijiva ngwenyi lijina lyenyi lyalumbununa “Kunoka [chipwe] Kuvendejeka,” chamukolezezele. (Kupu. 5:29, kwinyikila chamwishi) Lameke vamuhwiminyinyine ahanjike ngwenyi: “Ou ikiye [Nowa] mwakatuvendejeka . . . Kukukilikita chamavoko etu mwomwo yamavu aze vangwile kuli Yehova.” Nowa atalililile vyuma vyamwaza mwakalinga Kalunga. Ngana mwaAvele naEnoke afwelelelele muli “muka-tanga” uze mwakachika mutwe walinoka.—Kupu. 3:15.

⁷ Numba tuhu Nowa kevwishishile mashina namasongo aupolofweto wahali Kuputuka 3:15 koko, oloze afwelelelele ngwenyi upolofweto kana naukakafwa vatu vakasokoke. Kaha nawa ou upolofweto wamuEtene walitombola namujimbu ambulwilenga Enoke uze apolofwetele ngwenyi, Kalunga mwakasopesa vaka-kuhuka. (Yuta 14, 15) Mujimbu ambulwilenga Enoke uze naukatesamo cheka haAlamangetone, wakafwile Nowa apwenga nalufwelelo nakutalilila vyuma vyamwaza kulutwe.

8. Mujijila muka chinyingi chakwoloka chakutachikiza Kalunga chakingile Nowa?

⁸ Omu chinyingi chakwoloka chakutachikiza Kalunga changanyalishile Nowa. Chinyingi chakwoloka chakafwile Nowa apwenga namangana  akufuma kuli Kalunga aze amukingilenga kushipilitu. Chakutalilaho, hakuwana nge Nowa “atambukilenga naKalunga wamuchano,” ngocho katambukilenga chipwe kulikata navatu vavilinga vyavipiko. Kavamuhungumwishile kuli vangelo vaze vavwalile mijimba yautu nakukomwesa vatu vakuhona lufwelelo nauhashi wavo wakulipwila, pamo nakuvakunyula vavalemesa kwijiva nge hitulungako. (Kupu. 6:1-4, 9) Nowa atachikijile nawa ngwenyi vatu vavalwezele vaseme nakuzalisa hamavu. (Kupu. 1:27, 28) Ngocho ashinganyekele ngwenyi chapwile chakuhenga mapwevo kulisavala navangelo. Jino omu vaze mapwevo vasemene vana vakutaluka chikuma, Nowa amwene ngwenyi ashinganyekele mwamuchano. Mukuhita chalwola, Kalunga alwezele Nowa ngwenyi mwaneha livaji hamavu. Nowa afwelelele chuma kana, ngocho etavilile kutunga wato uze wamuyowele natanga yenyi.—Hepe. 11:7.

9, 10. Natuhasa kulondezeza ngachilihi lufwelelo lwaNowa?

⁹ Omu tunahase kulondezeza lufwelelo lwaNowa. Chuma chachilemu twatela kulinga shina kulinangula Mazu aKalunga nakulamina mumuchima vyuma natutanga, nakwitavila chinyingi kana chitukafwe twalumune vilinga vyetu. (Petu. 1, 1:13-15) Ngocho lufwelelo namangana akufuma kuli Kalunga navitukinga kutufuta twaSatana nashipilitu yayipi yamuno mukaye. (Koli. 2, 2:11) Shipilitu kana yeji kuzondolanga vatu vafwile ulyanyi naujila. Kaha nawa yeji kuvalingisanga vafwile kulinga vyuma yafwila mijimba yavo. (Yowa. 1, 2:15, 16) Yeji kuvalingisanga nawa valiule unjiho wakusolola nge likumbi lyalinene lyaKalunga lili hakamwihi. Omu Yesu afwanyishile makumbi etu kumakumbi aNowa, kahanjikile haulyanyi nahaujilako, oloze ahanjikile haponde yatwama hakuzeya kushipilitu.—Tangenu Mateu 24:36-39.

¹⁰ Lihulisenu ngwenu: ‘Uno vilinga vyami vyasolola chikupu nge ngwamutachikiza Yehova tahi? Kutala lufwelelo lwami lweji kungukunyulanga ngukavangize jindongi jakwoloka jaKalunga nakwambulula mujimbu wamwaza tahi?’ Vyuma namukumbulula navisolola numba nge nayenu muli ‘nakutambuka naKalunga wamuchano.’

11. (a) Iya akafwile Ndanyele azange Yehova? (b) Vilinga muka vyaNdanyele muli nakufwila kulondezeza?

¹¹ Vyuma vyakafwile Ndanyele atachikize Yehova. Unjiho wasolola hatoma nge Ndanyele vamunangwilenga kuli visemi jenyi mangana azange Yehova naMazu enyi. Kaha nawa mukuyoya chenyi chosena atwalileho kuzanga Kalunga. Atwalileho kuhehwojolanga Visoneka nahalwola apwile kashinakaji. (Ndanye. 9:1, 2) Ndanyele atachikijile nawa omu Kalunga azachilililemo navaIsalele, kaha chinyingi kana achisolwele mukulomba chenyi chize vasoneka hali Ndanyele 9:3-19. Shikaho, nachiwaha nge namuwanangako lwola lwakutanganga mujimbu kana nakushinganyekangaho mangana mumone vyuma namulinangula kuli Ndanyele.

12-14. (a) Mujijila muka Ndanyele asolwelelemo chinyingi chakwoloka chakutachikiza Kalunga? (b) Kalunga akiswile ngachilihi Ndanyele hakuhamuka nakushishika chenyi?

¹² Omu chinyingi chakwoloka chakutachikiza Kalunga changanyalishile Ndanyele. Chapwile chachikalu kuli vaYuleya vakushishika kuzachila Kalunga muMbavilone, mwomwo mulifuchi kana vatu valemeselenga tuponya. Chakutalilaho, Yehova alwezele vaYuleya ngwenyi: “Tondenunga kuunda changanda yize ngunamitwaleko muufunge.” (Yele. 29:7) Oloze asakilenga nawa vatu valihane kuli ikiye namuchima wosena. (Kulo. 34:14) Chuma muka chakafwile Ndanyele atesemo vyuma vyosenevi vivali? Mangana akufuma kuli Kalunga amukafwile aliluule kuli vaze vapwile nangolo jakuyula. Omu mwahichile makulukaji amyaka nawa, Yesu ahanjikile chishina chochimwe.—Luka 20:25.

 ¹³ Achishinganyekenu havyuma alingile Ndanyele omu vahakileko lushimbi ngwavo, kakwatela kupwa mutu mwalombela kuli mutu wekako shina kuli mwangana kaha hamakumbi 30. (Tangenu Ndanyele 6:7-10.) Nge Ndanyele asakile kachi ambile ngwenyi, ‘Ukalu wauchi makumbi 30 amandende.’ Oloze kasakile elu lushimbi lumuhonese kulinga vyuma alinangwile muVisonekako. Kaha nawa kachi alombelenga mukuswama mangana vahone kumumona, hakuwana nge vatu vamutachikijile ngwavo alombelenga hakumbi hakumbi. Numba tuhu atachikijile ngwenyi kulinga chuma kana nachihaka mwono wenyi muponde, oloze atwalileho kulinga chuma chize amwene ngwenyi chakwoloka.

¹⁴ Yehova akiswile Ndanyele hakuhamuka nakumika chenyi hakumukinga kuvandumba vaze vasakile kumulya. Kumuyovola mujila kana chahanyine unjiho wakulipwila hali Yehova, kaha unjiho kana wahetele nakumafuchi akwakusuku amuWangana WavaMeto-Peleja.—Ndanye. 6:25-27.

15. Natuhasa ngachilihi kupwa nalufwelelo ngana luze lwaNdanyele?

¹⁵ Omu tunahase kulondezeza lufwelelo lwaNdanyele. Kupwa nalufwelelo lwakukola kachasakiwa kaha kutanga Mazu aKalungako, oloze shina “kumona omu alumbunukila.” (Mateu 13:23) Twasaka kumona vyuma nganomu avimona Yehova, nakwivwa nganomu eji kwivwanga havyuma kana. Ngocho twatela kushinganyekanga havyuma natutanganga. Twatela nawa kulombanga namuchima wetu wosena, chikumanyi nge tuli muvyeseko chipwe muukalu weka. Nge natulomba nalufwelelo kuli Yehova atuhane ngolo namangana, kaha mwatuhanavyo vene.—Yako. 1:5.

16, 17. Vyuma muka vyakafwile Yopa apwenga nachinyingi chakwoloka chakutachikiza Kalunga?

¹⁶ Vyuma vyakafwile Yopa atachikize Yehova. Yopa kapwile kaIsaleleko, oloze apwile kausoko kaApalahama, naIsaka, naYakova, kaha Yehova alijimbwile kuli vakiko nakuvalweza vyuma ajina kukalingila vatu. Pamo naYopa alinangwile vyuma kanevi. (Yopa 23:12) Ambile ngwenyi: “Ngunakwivunga.” (Yopa 42:5) Kaha nawa Yehova ambile ngwenyi, Yopa ahanjikile muchano hali ikiye.—Yopa 42:7, 8.

¹⁷ Yopa nawa atachikijile vilinga vyaKalunga vyavivulu hakumona vyuma atenga. (Yopa 12:7-9, 13) Kufumaho Elihu hamwe kaha naYehova vazachishile vyuma vyakutenga mangana vanukise Yopa ngwavo, mutu keshi kuhasa kulyesekesa  hamwe naKalungako. (Yopa 37:14; 38:1-4) Mazu aKalunga akwachile Yopa kumuchima kaha ambile ngwenyi: “Ngunatachikiza jino ngwami nauhasa kulinga vyuma vyosena, kakweshi vyuma unajinyi kulinga navipwa vyavikalu kuli oveko. . . . Ngunapihilila nakulimbila mulukungu namuuto.”—Yopa 42:2, 6.

18, 19. Mujijila muka Yopa asolwelelemo ngwenyi atachikijile chikupu Yehova?

¹⁸ Omu chinyingi chakwoloka chakutachikiza Kalunga changanyalishile Yopa. Yopa apwile naushi wakunangakana jindongi jaKalunga. Atachikijile kanawa Yehova, kaha alingile vyuma kweseka nachinyingi kana. Chakutalilaho, atachikijile ngwenyi keshi kuhasa kuzanga Kalunga okunyi ali nakulinga mwamupi kuli vakwavo vatuko. (Yopa 6:14) Yopa kamwenenga vakwavo kupwa vakukuminamoko, oloze azakaminenga vatu vosena numba vapwa vapichi chipwe vihutu. Ambile ngwenyi: “Ou angutengele ami mujimo, keshi ikiye atengele navakikoko numba?” (Yopa 31:13-22) Chapundu vene, Yopa kalivwimbile nakumona vakwavo ulumbi mwomwo yaluheto apwile nalwoko. Muchima wenyi walihandununa navatu valuheto vamukaye.

¹⁹ Yopa ahungile kulemesa chamakuli mumuchima wenyi. Atachikijile ngwenyi nge mwazanga chikuma luheto nachisolola nge ali nakukana “Kalunga wamuchano.” (Tangenu Yopa 31:24-28.) Avumbikilenga ulo nakuumona nganomu aumona Yehova. Alishikile lushiko nameso enyi ngwenyi, keshi kutala pwevo weka nakumwivwila uvumbiko. (Yopa 31:1) Tachikizenu ngwenu, halwola kana Kalunga etavishile vatu kumbata luhali. Shikaho nge asakile kachi apwile namapwevo vavali. * Chasoloka nge akavangijile chakutalilaho chaulo watete uze Kalunga ahakileko muEtene. (Kupu. 2:18, 24) Omu mwahichile myaka 1,600, Yesu anangwile vaka-kumwivwilila jindongi kaneji jakwoloka kutalisa kuulo nakukulisavala chalunga napwevo.—Mateu 5:28; 19:4, 5.

20. Kutachikiza Yehova najishimbi jenyi nachitukafwa ngachilihi tusakulenga masepa vamwaza nakulihizumuna nawa mujila yamwaza?

²⁰ Omu tunahase kulondezeza lufwelelo lwaYopa. Chuma nachitukafwa tumulondezeze shina kupwa nachinyingi chakwoloka chakutachikiza Yehova, nakulinga vyuma kweseka nachinyingi kana mukuyoya chetu chosena. Chakutalilaho, muka-kwimba jisamu Ndavichi ambile ngwenyi, Yehova “ahunga weshowo azanga ulyanyi,” kaha atuhuhumwine nawa tuhone “kulikata navaka-kutangisa.” (Tangenu Samu 11:5; 26:4.) Visoneka kana vinaminangula vyuma muka hali Kalunga? Uno kushinganyeka haVisoneka kana nachimikafwa ngachilihi musakulenga kanawa vyuma mukuyoya, nakuzachisa Internet, nakusakula masepa vamwaza, nakulihizumuna mujila yamwaza? Jila namukumbulwilamo vihula kana nayisolola nge mwejiva kanawa Yehova chipwe nduma. Hakusaka tupwenga tuvakuzeneka katenga mukaye kano kakuhuka, twatela kunangulanga “uhashi wakukekesa vyuma” mangana tuhandununenga kwoloka nakuhenga, nakuhandununa nawa mangana nauleya.—Hepe. 5:14; Efwe. 5:15.

21. Vyuma muka navitukafwa tutachikize “vyuma vyosena” twatela kulinga mangana tusuulwise Setu wamwilu?

²¹ Yehova alisolwele kuli Nowa, naNdanyele, naYopa, mwomwo vamutondelenga namuchima wosena. Kaha avakafwile ‘vatachikize vyuma vyosena’ vatelelele kulinga mangana vamwivwise kuwaha. Ngocho vatusela chakutalilaho chamwaza, kaha nawa vafukililile mukuyoya chavo. (Samu 1:1-3) Jino lihulisenu ngwenu, ‘Kutala Yehova ngwamutachikiza nganomu vamutachikijile kuli Nowa, naNdanyele, naYopa tahi?’ Munahase kumutachikiza chikuma kuhambakana navakiko, mwomwo makumbi ano musana wamuchano uli nakutohwelako lika. (Vishi. 4:18) Shikaho hehwojolenunga muMazu aKalunga nakushinganyekanga havyuma namutanga, nakumulomba amihane shipilitu yajila. Echi nachimikafwa mupandame kuli Senu wamwilu, kaha namupwa namangana nakunangakana mukaye kano kakapi.—Vishi. 2:4-7.