VATU vosena vasaka kupwa vakuwahilila. Oloze hakuwana nge tuli nakuyoyela mumakumbi akukuminyina, vatu vali nakumona ukalu waunene. (Chimo. 2, 3:1) Vamwe vanahase kuhomba mwomwo yakupwa naukalu wakufwana nge misongo, nakuhona milimo, nakufwisa, nakumona vilinga vyavipi navyuma vyeka. Navangamba jaKalunga vanahase kuhomba. Kachi nge muli muukalu kana, namuhasa ngachilihi kupwa vakuwahilila?

Hakusaka kukumbulula chihula kana, twatela chatete kutachikiza omwo chapwa kuwahilila nomu vatu vamwe vanatwaleho kupwa vakuwahilila chamokomoko navyeseko. Kufumaho natulinangula vyuma navitukafwa tutwaleho kupwa vakuwahilila.

Kuwahilila kachalumbununa kusehaseha kahako. Chakutalilaho, nge mutu napende wala, eji kusehanga chamusehela. Oloze nge napenduluka lyehi, kasehaseha chekako, ngocho mwaputuka cheka kushinganyeka haukalu wenyi. Shikaho kuseha chize apwanga nakuseha kachalumbunwine nge awahililangako.—Vishi. 14:13.

Oloze kuwahilila chamwenemwene cheji kufumanga kwishi yamuchima. Vatu vamwe vamba ngwavo, “kuwahilila chapwa kusuuluka chamuchima wamutu mwomwo yavyuma vyamwaza vize ali nakutonda chipwe vize ali nakuvandamina.” Kuwahilila chamwenemwene cheji kutwalililangaho chamokomoko naluyando ali nakumona mutu. (Teso. 1, 1:6) Mutu nahase kupwa lika wakuwahilila chamokomoko navyuma vyavipi vize navimusolokela. Chakutalilaho, vaposetolo vavavetele mwomwo yakuhanjika vyaKulishitu. Chipwe ngocho, “vafumine kumeso avaka-Sunendeline nakuwahilila mwomwo chapwile chakutamo kuvasawila halijina lyaYesu.” (Vili. 5:41) Echi kachalumbunwine nge vawahililile mwomwo yakuvavetako, oloze hakupwa vangamba jaKalunga vawahililile mwomwo yakulama kulonga chavo.

Kuwahilila kachapwa chakulijila chipwe chakusemuka nachoko. Mwomwo ika? Mwomwo kuwahilila wapwa himuhako washipilitu yajila yaKalunga. Shikaho, shipilitu yaKalunga yinahase kutukafwa tuvwale “mutu wamuhya” nakupwa vakuwahilila. (Efwe. 4:24; Ngale. 5:22) Ngocho kupwa vakuwahilila nachitukafwa tulipike naukalu wamukuyoya.

Yehova ajinyine ngwenyi hamavu hapwenga vatu vakuwahilila keshi nge vyuma vyavipi vize vili nakusoloka makumbi anoko. Chipwe ngocho, vilinga vyavipi vyavatu vakuhuka kavyahonesa Yehova kupwa wakuwahililako. Mbimbiliya yamba ngwayo: “Ngolo nakuwahilila vili muchihela chenyi atwama.” (Miji. 1, 16:27) Kaha nawa Yehova eji kwivwanga “kumuchima kuwaha” hakumona vangamba jenyi vali nakulinga vyuma vyamwaza.—Vishi. 27:11.

Tunahase kulondezeza Yehova hakuhona kulizakamina chikuma kachi nge vyuma kavyeshi nganomu twashinganyekanga ngwetu navipwako. Muchishishisa chakuhomba, natushinganyekanga havyuma vyamwaza tuli nakulivwisa  kuwaha oholyapwa nakuvandamina vyeka vyamwaza vili nakwiza kulutwe. *

Kuli nawa vyakutalilaho vyamuMbimbiliya vyavivulu vyavatu vaze vatwalileho kupwa vakuwahilila chamokomoko naukalu vamwenenga. Mutu umwe shina Apalahama uze ayanjiwile chikuma mwomwo yavilinga vyavipi vapwilenga navyo vakwavo. (Kupu. 12:10-20; 14:8-16; 16:4, 5; 20:1-18; 21:8, 9) Numba tuhu amwenenga ukalu waunene, oloze apwilenga lika wakuwahilila. Vyuma muka vyamukafwile? Atalilililenga kukatwama mulifuchi lyalihya lize navakayula kuli Meshiya. (Kupu. 22:15-18; Hepe. 11:10) Yesu ambile ngwenyi: “Senu Apalahama awahililile chikuma hakutalilila kukamona likumbi lyami.” (Yowa. 8:56) Tunahase kulondezeza Apalahama hakushinganyeka havyuma vyamwaza twatalilila kulutwe.—Loma 8:21.

Ngana mwaApalahama, kaposetolo Paulu nasepa lyenyi Shilase vatalilile vyuma ashikile Kalunga. Vapwile nalufwelelo lwakukola, ngocho lwavakafwile vapwenga vakuwahilila chamokomoko naukalu vamwene. Chakutalilaho, omu valingile vanavavete lyehi nakuvahaka mukamenga, “kuheta mukachi kaufuku Paulu naShilase vapwile nakulomba nakwalisa Kalunga namyaso.” (Vili. 16:23-25) Chuma chikwavo chavakafwile vapwenga vakuwahilila shina kutachikiza ngwavo vapwile nakuyanda mwomwo yalijina lyaKulishitu. Tunahase kulondezeza Paulu naShilase hakushinganyekanga hanganyo yatwama hakuzachila Kalunga nakashishi.—Fwili. 1:12-14.

Namakumbi ano, kuli vandumbwetu vavavulu vaze vanatwaleho kupwa vakuwahilila chamokomoko nakumona vihuli. Chakutalilaho, muNovember 2013, mulifuchi lyaPhilippines mwasolokele peho yanyamanganda (Super Typhoon Haiyan) yize yapuzwile jizuvo javandumbwetu jakuzomboka 1,000. Ndumbwetu George, wamumbaka yaTacloban naikiye zuvo yenyi yapuzukile. Ambile ngwenyi: “Numba tuhu vandumbwetu vanakumona ukalu, oloze vanawahilila. Chachikalu kulumbununa kuwaha nguli nakwivwa.” Shikaho nge tuli nakumona ukalu, twatela kushinganyeka havyuma vyamwaza atulingila Yehova kahechi nachitukafwa tupwenga vakuwahilila. Vyuma vyeka muka vyamwaza atulingila Yehova vize vyatela kutulingisa tuwahilile?

Kakweshi chuma cheka chatulingisa tuwahilile kuhambakana usoko wetu naKalungako. Achishinganyekenu hachumechi: Etu twatachikiza Mwata atengele vyuma vyosena. Apwa Kalunga ketu, ikiye Setu kaha nawa Sepa lyetu.—Samu 71:17, 18.

Twamona nawa kuyoya kupwa chachilemu nakulivwisacho kuwaha. (Kwambu. 3:12, 13) Hakuwana nge vatutenga mujila yakulipwila nakupandama kuli Yehova, ngocho twatachikiza vyuma ajina kukatulingila kulutwe. (Kolo. 1:9, 10) Echi chatukafwa tutachikize ovyo tweji kuyoyelanga navyuma twatela kulinga mukuyoya chetu. Oloze vavavulu kavatachikiza ovyo vatu veji kuyoyelangako. Paulu ahanjikile hachihandwa kanechi ngwenyi: “‘Vyuma vize Kalunga nawahishila vatu vaze vamuzanga, meso anahono kuvimona, matwitwi anahono kuvivwa, kaha nawa kavyengilile mumuchima wamutuko.’ Oloze Kalunga navisolola kuli etu kuhichila mushipilitu yenyi.” (Koli. 1, 2:9, 10) Kulinga mwaya muchima waYehova nakutachikiza vyuma ajina kukalingila vatu chikiko chatulingisa tuwahilile.

Talenu nawa vyuma vikwavo atulingila Yehova. Twapwa tuvakuwahilila chikuma mwomwo eji kutukonekelanga jishili jetu. (Yowa. 1, 2:12) Kaha nawa keke yenyi yatukafwa tupwenga nalutalililo lwakukapwa mukaye kakahya. (Loma 12:12) Namakumbi ano, Yehova atuhana vandumbwetu vaze tweji kukungulukanga navo. (Samu 133:1) Mazu aKalunga atufwelelesa nawa ngwawo, Yehova eji kukinganga vatu jenyi kuli Satana navandemone. (Samu 91:11) Kushinganyekanga havyuma kanevi vyamwaza atulingila Kalunga, nachitukafwa tutwaleho kupwa vakuwahilila.—Fwili. 4:4.

Kutala muka-Kulishitu wakuwahilila nahase kutwalaho lika kupwa wakuwahilila tahi?  Yesu ambile ngwenyi: “Ngunahanjika vyumevi kuli enu mangana muwahilile nge omu ngwawahilila ami, kaha namuwahilila chikuma.” (Yowa. 15:11) Mazu kana asolola nge tunahase kupwa lika vakuwahilila. Achishinganyekenu hachakutalilaho chakakahya. Nge namukasambiza, kaha milangi nayitohwa chikuma. Chochimwe nawa, mwatela kutwalaho lika kulyanga kulya chakushipilitu mangana kuwahilila chenu chitwaleho lika. Anukenu ngwenu kuwahilila cheji kwizanga mwomwo yakupwa nashipilitu yaKalunga. Shikaho nge namulomba Yehova lwola lwosena amihane shipilitu yenyi nakushinganyekanga havyuma namutanga muMazu enyi, kaha namupwanga vakuwahilila.—Samu 1:1, 2; Luka 11:13.

Munahase nawa kupwa lika vakuwahilila hakuzata milimo yize yeji kwivwisanga Yehova kuwaha. (Samu 35:27; 112:1) Mwomwo ika? Mwomwo vatutenga namuchima wakwivwa “Kalunga wamuchano woma nakulama jishimbi jenyi, mwomwo echi chikiko chilika vatwama nacho vatu vosena.” (Kwambu. 12:13) Chipwe ngwetu atutenga mangana tulinge mwaya muchima wenyi. Shikaho, nge natutwalaho lika kuzachila Yehova, kaha natupwa vakuwahilila chikuma mukuyoya chetu. *

Kupwa vakuwahilila nachitukafwa tunganyale mwamunene. Chakutalilaho, natwivwisanga Setu wamwilu kuwaha chamokomoko naukalu natumona mukuyoya chetu. (Lushi. 16:15; Teso. 1, 5:16-18) Kaha nawa kupwa vakuwahilila, nachitukafwa tulihende kumuchima wakufwila luheto nakulisuula jino kuzata milimo yaWangana waKalunga. (Mateu 13:44) Nge natumona nganyo yeji kwizanga mwomwo yakulinga vyuma kanevi, kaha natuwahilila chikuma nakwivwisa nawa vakwetu kuwaha. Vili. 20:35; Fwili. 1:3-5.

Muka-kuhehwojola umwe wahayunivesiti yamuNebraska muUnited States ambile ngwenyi: “Nge mutu mwapwa wakusuuluka mukuyoya chenyi, kaha kulutwe mwakapwa nawa wakulikangula kumujimba.” Mazu ahanjikile alitombola namazu amuMbimbiliya akwamba ngwavo: “Muchima wakuwahilila unapu nge vitumbo vyamwaza.” (Vishi. 17:22) Chikupu vene, omu namutwalaho lika kupwa vakuwahilila, nachimikafwa mupwenga vakuwahilila chikuma.

Nge natulomba Yehova atuhane shipilitu yenyi yajila, nakulinangula Mazu enyi nakushinganyeka havyuma natulinangula, kaha katweshi kupwa vakuhombako oloze natupwa vakuwahilila. Tunahase nawa kupwa vakuwahilila hakushinganyekanga havyuma natulingila Yehova, nakulondezeza lufwelelo lwakukola lwavandumbwetu, nakufwila kulinga mwaya muchima waKalunga. Nge natulinga vyuma kana, kaha natwivwa ngana muze evwile muka-kwimba jisamu hali Samu 64:10 ngwenyi: “Muka-kwoloka mwawahilila muli Yehova nakuchinyina muli ikiye.”