1, 2. (a) Mwomwo ika chakutalilaho chaNowa, naNdanyele, naYopa chatela kutukolezeza? (b) Vyuma vyapwile ngachilihi halwola Ezekele asonekele mazu ahali Ezekele 14:14?

KUTALA muli nakumona ukalu wakufwana nge kuviza, kuhona jimbongo chipwe kumiyanjisa tahi? Uno shimbu jimwe cheji kumikaluhwilanga kulivwisa kuwaha kuzata milimo yaYehova tahi? Nge mukiko, kaha vyakutalilaho vyaNowa, naNdanyele, naYopa navimikafwa mutwaleho kumika. Navakiko vapwile vakuhona kukupuka, kaha nawa vamwenenga ukalu wauvulu ngana uze tuli nakumona nayetu makumbi ano. Ukalu umwe wahakilenga myono yavo muponde. Chipwe ngocho, valamine kulonga chavo, nakupwa vakwononoka nakushishika kuli Kalunga, ngocho vatusela chakutalilaho chize twatela kulondezeza.—Tangenu Ezekele 14:12-14.

² Ezekele asonekele mazu ali muchisoneka chamutwe wachihande mu 612 B.C.E. * (Ezeke. 1:1; 8:1) Halwola kana, Yelusalema yapwile  kwakamwihi nakuyinongesa, kaha kuheta mu 607 B.C.E. vayinongesele. Vatu vavandende kaha vakiko vapwile navilinga vyamwaza ngana vize apwile navyo Nowa, naNdanyele, naYopa ngocho vavafunjikile mifunda yakuyovoka. (Ezeke. 9:1-5) Havatu vaze vapwile navilinga vyamwaza hapwile naYelemiya, naMbaluke, naEvete-meleke, navaLekave.

3. Vyuma muka natushimutwila muchihande chino?

³ Namakumbi ano nawa, vatu vaze amona Yehova ngwenyi vakuzeneka chuma chakuvahanyina mulonga ngana mwaNowa, naNdanyele, naYopa, vakiko kaha navakafunjika mifunda yakuyovoka hakukuma chakatwamino kamyaka yino. (Kuso. 7:9, 14) Shikaho tutalenu ovyo Yehova azachishilile ava malunga kupwa chakutalilaho chakwoloka twatela kulondezeza. Omu natushimutwila hali mutu himutu, natumona (1) ukalu vamwene (2) nomu tunahase kulondezeza lufwelelo lwavo nakwononoka chavo.

4, 5. Ukalu muka amwene Nowa, kaha lukakachila lwenyi lwapwa ngachilihi lwakulipwila?

⁴ Ukalu uze amwene Nowa. Hamakumbi aEnoke kaka yaNowa, vatu vapwile vaka-kuzamukila Kalunga. Vapwile nakuhanjika ‘navyuma vyakukomwesa vyavipi’ hali Yehova. (Yuta 14, 15) Ulyanyi wapwile nakuvulilako lika. Kaha kuheta mumakumbi aNowa, hamavu “hosena hapwilenga ulyanyi lika.” Vangelo vakuhuka vavwalile mijimba yautu nakumbata mapwevo, ngocho vasemene vana vaze vapwile vakutaluka kaha nawa vilyanyi. (Kupu. 6:2-4, 11, 12) Oloze Nowa apwile navilinga vyamwaza. “Nowa vamwivwililile uselewa kuli Yehova. . . . Kaha atwaminenga chakuzeneka katenga muli vaka-myaka yenyi. Nowa atambukilenga naKalunga wamuchano.”—Kupu. 6:8, 9.

⁵ Achishinganyekenu hamazu kanawa vanahanjika hali Nowa. Mazu kana anasolola nge Nowa katambukile naKalunga muli vatu vakuhuka shimbu kanda Livaji hamyaka 70 chipwe 80 myaka yize vali nakuyoyanga vatu makumbi anoko. Oloze atwamine mukaye kana kafwe myaka 600. (Kupu. 7:11) Kaha nawa kakwapwile chikungulwilo ngana muze chili makumbi anoko, kaha nawa kakwapwile kausoko kenyi alumukile nakukundwiza vyuma vyakushipilituko. *

6. Mujijila muka Nowa asolwelelemo kuhamuka?

⁶ Nowa kalivwishilenga kaha kuwaha kuzachila Kalungako, oloze apwile “muka-kwambulula kwoloka,” nakuhanjika hatoma vyalufwelelo lwenyi muli Yehova. (Petu. 2, 2:5) Kaposetolo Paulu asonekele ngwenyi: “Hakupwa nalufwelelo kana, [Nowa] apayishile kaye.” (Hepe. 11:7) Twafwelela ngwetu, Nowa vamufumbukililenga, nakumutoleka pamo vene nakusaka kumujiha. Oloze kevwilenga ‘vatu womako.’ (Vishi. 29:25) Yehova amukafwile apwenga wakumika.

7. Omu Nowa apwile nakutunga wato, ukalu muka amwene?

⁷ Omu Nowa atambukile naKalunga hamakulukaji amyaka atanu, Yehova amulwezele atunge wato wakuyowelamo vatu natunyama. (Kupu. 5:32; 6:14) Mulimo kana kawapwile wawashiko. Nowa atachikijile ngwenyi kuzata mulimo kana nachilingisa vatu vamutoleke nakumuhunga. Chipwe ngocho, ononokele nakuzata mulimo kana. Mbimbiliya ngwayo “alingile vene ngocho.”—Kupu. 6:22.

8. Mujijila muka Nowa asolwelelemo lufwelelo muli Yehova?

⁸ Ukalu ukwavo amwene Nowa shina kutondela vaka-tanga yenyi vyuma vyakulikafwa navyo. Shimbu kanda Livaji, vatu vazachilenga nangolo mangana vawane vyakulya, kaha omu mukiko alingilenga naNowa. (Kupu. 5:28, 29) Chipwe ngocho, ahakile Kalunga kulutwe mukuyoya chenyi chosena. Nahalwola apwile nakutunga wato uze pamo wambachile myaka 40 chipwe 50 numba ukume, Nowa ahakile vyuma vyakushipilitu kulutwe.  Atwalileho lika kuzata milimo yakushipilitu hamyaka 350 kufuma haLivaji. (Kupu. 9:28) Chikupu vene, Nowa atusela chakutalilaho chamwaza.

9, 10. (a) Tunahase kulondezeza ngachilihi lufwelelo nakwononoka chaNowa? (b) Kalunga eji kumonanga ngachilihi vatu vosena vaze veji kukavanga jindongi jenyi?

⁹ Tunahase kulondezeza ngachilihi lufwelelo nakwononoka chaNowa? Tunahase kulinga ngocho hakukavangiza jindongi jaKalunga jakwoloka, jakuhona kupwa vamuno mukaye kaSatana, nakuhaka Wangana kulutwe mukuyoya chetu. (Mateu 6:33; Yowa. 15:19) Twatela kutachikiza ngwetu vatu mukaye kaveshi kusuuluka navyuma natusakula kulinga mukuyoya chetuko. Kaha nawa vatu mumafuchi amwe vatuhunga mwomwo yakukavangiza jishimbi jaKalunga, jize jahanjika haulo nahaujila. (Tangenu Malaki 3:17, 18.) Ngana muze alingile Nowa, nayetu tweji kwivwanga woma Yehova keshi vatuko. Twatachikiza ngwetu ikiye kaha eji kuhanga kuyoya chahaya myaka yosena.—Luka 12:4, 5.

¹⁰ Nyi ngachilihi yenu hauka wenu? Kutala namutwalaho ‘kutambuka naKalunga’ numba tuhu vakwenu navamihenda chipwe nge muli muuhutu, nakufwelela ngwenu Yehova mwamizakama tahi? Kachi nge namulondezeza lufwelelo nakwononoka chaNowa, kaha namufwelela chikupu ngwenu mwamizakama.—Fwili. 4:6, 7.

11. Ukalu muka waunene amwene Ndanyele namasepa jenyi vatatu muMbavilone? (Talenu muvwimbimbi wakulivanga.)

¹¹ Ukalu uze amwene Ndanyele. Ndanyele atwamine muufunge muMbavilone nganda yize yazalile navaka-kulemesa makombelo nakumona kupanda kupwa chachilemu. Kaha nawa vaka-Mbavilone vamwenenga ulumbi vaYuleya nakuhenda nawa Kalunga kavo Yehova. (Samu 137:1, 3) Chuma kana chevwishile kupihya vatu vakushishika vakufwana nge Ndanyele. Kaha Ndanyele namasepa jenyi vatatu, vaHananyiya, naMishayele, naAzaliya vavasakwile mangana vazachilenga mwangana. Ngocho vavahanyinenga vyakulya vyakulipwila. Oloze vize vyakulya navyakunwa vyanehele chihande, mwomwo Ndanyele kasakile “kulipihisa ivene nakulya chamwangana chiyema[ko].”—Ndanye. 1:5-8, 14-17.

12. (a) Vilinga muka vyamwaza apwile navyo Ndanyele? (b) Yehova amwene ngachilihi Ndanyele?

¹² Ndanyele apwile nauhashi wakunangakana vyuma, ngocho vamuhanyine chihela chachilemu. (Ndanye. 1:19, 20) Oloze muchishishisa chakulivwimba ikiye atwalileho lika kupwa wakulinyisa nakulikehesa, nakuvumbika Yehova. (Ndanye. 2:30) Kaha nawa Yehova avulukile Ndanyele halwola apwile mukweze ngwenyi apwile wakushishika hamwe kaha naNowa naYopa. Uno Kalunga alimbenjele hakufwelela Ndanyele tahi? Nduma. Ndanyele atwalileho lika kushishika nakwononoka Kalunga mukuyoya chenyi chosena. Echi chikiko chalingishile kangelo kaKalunga amusangejeke halwola apwile namyaka yakusemuka yamuji 90 ngwenyi: “Ove Ndanyele, ove mutu wamulemu chikuma.”—Ndanye. 10:11.

13. Uno Ndanyele anganyalishile ngachilihi vakwavo vaYuleya?

¹³ Hakuwana nge Yehova evwililile kuwaha Ndanyele, ngocho vamutongwele kupwa chilolo wamulemu muwangana waMbavilone navaMeto-Peleja. (Ndanye. 1:21; 6:1, 2) Yehova pamo akafwile Ndanyele mujila kana mangana vatu jenyi vatokwelemo ngana muze chapwile kuli Yosefwe muEjipitu, naEseta naMolotekai muPeleja. * (Ndanye. 2:48) Achishinganyekenu ocho kuwaha vevwile vaYuleya vaze vapwile muufunge kuhakilako vene naEzekele hakumona omu Yehova avakafwile mujila kana!

14, 15. (a) Chiyoyelo chetu chinalifwane ngachilihi nachize chaNdanyele? (b) Makumbi ano, visemi vanahase kulondezeza ngachilihi visemi jaNdanyele?

 ¹⁴ Tunahase kulondezeza ngachilihi lufwelelo nakwononoka chaNdanyele? Makumbi ano tuli nakutwama kwijiva nge vamwiza mukaye kano vanapihisa navilinga vyavipi vyaMbavilone Wamunene, uze apwa chiyulo chakaye chakwitava chamakuli, “chihela chakutwama vandemone.” (Kuso. 18:2) Ngocho twapwa tuvatu vakulipwila, kahechi chikiko chalingisa jino vatutoleke. (Mako 13:13) Shikaho tulondezezenu Ndanyele hakupandama chikuma kuli Yehova Kalunga ketu. Nge natulyononona nakufwelela muli Kalunga, kaha nayetu mwatumona kupwa tuvavalemu.—Isa. 43:4.

¹⁵ Visemi vanahase kulinangula kuchakutalilaho chavisemi jaNdanyele. Mujila muka? Numba tuhu muYuleya mwazalile navilinga vyavipi omu Ndanyele apwile kanyike, oloze ikiye azangilenga Kalunga. Echi chasolola nge visemi jenyi vakiko vamunangwile kufuma kuunyike azange Kalunga. (Vishi. 22:6) Kaha nawa lijina lyaNdanyele lize lyalumbununa “Kalunga Ikiye Muka-kunguyula,” lyasolola nge visemi jenyi vevwilenga woma Kalunga. (Ndanye. 1:6, kwinyikila chamwishi) Shikaho enu visemi kanda namuzeya kunangula vana venuko, twalenuho lika kuvanangula nakuvatalilila chikoki. (Efwe. 6:4) Kaha nawa valombelenungako nakulombanga navo hamwe. Nge namuzata nangolo mangana mutumbe muchano wamuMbimbiliya mumichima yavo, kaha Yehova mwamikisula.—Samu 37:5.

16, 17. Ukalu muka amwene Yopa?

¹⁶ Ukalu amwene Yopa. Chiyoyelo chaYopa chapwile chakulihandununa nachiyoyelo chavakwavo. Shimbu kanda achimone vyeseko, “apwile mutu wamulemu chikuma havatu vakuMututuko vosena.” (Yopa 1:3) Apwile naluheto, ayile fuma, kaha nawa vamuvumbikilenga chikuma. (Yopa 29:7-16) Oloze chamokomoko navyuma vyosena evi, Yopa kalivwimbile nakulimona kupwa wamulemu nakulitwamina kulemesa Kalungako. Shikaho Yehova amuvulukile ngwenyi, “ngamba yami” kaha nawa ngwenyi, “apwa mutu wakusungama, wakulonga. Muka-kungwivwa ami Kalunga woma, kaha eji kulihendanga kuvyuma vyavipi.”—Yopa 1:8.

¹⁷ Oloze chiyoyelo chenyi chalumukile mukapyapya kakandende kaha. Engilile muuhutu waunene nakuyanda chikuma. Twatachikiza ngwetu Satana ikiye anehele ukalu kana hakumuvangijikila ngwenyi apwile nakuzachila Kalunga mwomwo yakusaka kaha kunganyalilaho. (Tangenu Yopa 1:9, 10.) Yehova kaliwile makuli aze ahanjikile Satanako. Oloze ahanyine Yopa lwola lwakusolola kulonga chenyi nakusolola nawa ngwenyi  alemeselenga Kalunga namuchima wenyi wosena keshi mwomwo yakusaka kunganyalilahoko.

18. (a) Vyuma muka vyeji kumivwisanga kuwaha hakushinganyeka hakulonga chaYopa? (b) Vyuma vize Yehova alingilile Yopa vyasolola vyuma muka hali ikiye?

¹⁸ Satana anehelelele Yopa ukalu mujijila jakulisezaseza, nakulingisa jino Yopa ashinganyeka ngwenyi ukalu kana wafumine kuli Kalunga. (Yopa 1:13-21) Kaha masepa jenyi vatatu vaze valyongele ngwavo vejile nakumuvendejeka vaputukile kuhanjika mazu amapi. Vahanjikile ngwavo Kalunga apwile nakumuzangamisa mwomwo yavilinga vyenyi vyavipi. (Yopa 2:11; 22:1, 5-10) Chamokomoko namazu vahanjikilenga, Yopa apwile lika wakulonga. Numba tuhu shimbu jimwe alimbenjele hakulusuka kuhanjika vyuma vimwe, oloze Yehova ejivile kukola apwile nakwivwa. (Yopa 6:1-3) Kalunga amwene ou lunga wakushishika uze kahokwele kulonga chenyiko numba tuhu Satana amuyanjishilenga. Omu vyeseko vyakumine, Yehova akindulwishilile Yopa vyuma vize apwile navyo mapapa kavali, kaha nawa kukuyoya chenyi vamuhakililileko cheka myaka 140. (Yako. 5:11) Hamyaka yosena yize ayoyele atwalileho lika kuzachila Yehova. Tunatachikiza ngachilihi ngocho? Tunejiva vyuma kana mwomwo Yopa afwile lyehi shimbu kanda Ezekele asoneke mazu ali muchisoneka chamutwe wachihande.

19, 20. (a) Tunahase kulondezeza ngachilihi lufwelelo nakwononoka chaYopa? (b) Tunahase kulondezeza ngachilihi muchima waYehova wakeke?

¹⁹ Tunahase kulondezeza ngachilihi lufwelelo nakwononoka chaYopa? Kala mweshomwo nachipwa chiyoyelo chetu, twatela kuhaka Yehova kulutwe mukuyoya chetu hakumufwelela nakumwononoka namuchima wosena. Etu tukwechi vyuma vyavivulu vyakutulingisa tulinge ngocho kuhambakana Yopa. Chakutalilaho, twatachikiza Satana natufuta twenyi. (Koli. 2, 2:11) Twasakwilila Yehova hakutusonekela mukanda waYopa uze watukafwa twijive ovyo Kalunga etavishila kuyanda. Kweseka naupolofweto waNdanyele, twatachikiza ngwetu Wangana waKalunga wapwa fulumende yakaye kosena yize vayula kuli Kulishitu Yesu. (Ndanye. 7:13, 14) Kaha twatachikiza nawa ngwetu ou Wangana ukiko naukafumisako kuyanda chosena hamavu.

²⁰ Chakutalilaho chaYopa chasolola nge twatela kwivwilanga keke vandumbwetu vaze vali nakumona ukalu. Vatu vamwe vanahase kulusuka nakuhanjika mazu aze kavatelanga kuhanjikako. (Kwambu. 7:7) Muchishishisa chakuvahana mulonga, twatela kupwa vakunangakana nakuvevwila keke. Nge natulinga ngocho, kaha natulondezeza Setu Yehova uze apwa wakeke kaha nawa wazangi.—Samu 103:8.

21. Uno mazu ahali WaPetulu 1, 5:10, asolola ngachilihi vyuma vyasolokele mukuyoya chaNowa, naNdanyele, naYopa?

²¹ Numba tuhu Nowa, naNdanyele, naYopa vayoyelele hamyaka yakulisezaseza nakumona nawa ukalu wakulisezaseza, oloze vosena vatwalileho lika kumika. Mijimbu yakuyoya chavo yatwanukisa mazu akaposetolo Petulu. Asonekele ngwenyi: “Omu namulinga himunayande lyehi katando kakandende, Kalunga walikoji lyalinene lyosena, . . . mwakamanyisa kumilongesa. Mwakamizamisa mbe, mwakamijikijisa, mwakamilingisa mukemane nangolo.”—Petu. 1, 5:10.

22. Vyuma muka natushimutwila muchihande nachikavangizaho?

²² Mazu asonekele Petulu asolola nge Yehova atufwelelesa ngwenyi mwatuzakama nakutujikijisa. Awa mazu azata nakuli vatu jaKalunga makumbi ano. Tuvosena twasaka Yehova atujikijise mangana tutwaleho kumulemesa. Shikaho, tufwilenu kulondezeza lufwelelo nakwononoka chaNowa, naNdanyele, naYopa. Nganomu natushimutwila muchihande nachikavangizaho, chuma chakafwile ava vangamba jaYehova vatwaleho lika kulama kulonga chavo shina kutachikiza kanawa Yehova. Kaha nawa ‘vatachikijile vyuma vyosena’ asakile Yehova ngwenyi valingenga. (Vishi. 28:5) Omu mukiko chatela kupwa nakuli yetu.