1, 2. (a) Vatu vamwe vamona ngachilihi kuhya kushipilitu? (b) Vihula muka vyavilemu natushimutwila?

NDUMBWETU umwe wapwevo wakuCanada ambile ngwenyi: “Kuhya kushipilitu chinangukafwe ngupwenga nguwakuwahilila nakungulingisa nawa nguhonese vyeseko ngweji kumonanga.” Ndumbwetu walunga wamuBrazil ambile ngwenyi, “Tunatwame myaka 23 muulo wetu chakuzeneka vikokojola mwomwo yakuhya kushipilitu.” Ndumbwetu weka muPhilippines ambile ngwenyi, “Kuhya kushipilitu chinangukafwe ngupwenga wakuunda nakuzanga nawa vandumbwami vakuvisemwa vyakulisezaseza.”

² Vyakutalilaho vyakufwana nganevi vyasolola kulema chakupwa vakuhya kushipilitu. Jino tunahase kulihulisa ngwetu, ‘Nanguhasa ngachilihi kuzovoloka kushipilitu mangana ngunganyale nganomu vananganyala vatu vanavuluka muvyakutalilaho vili helu?’ Shimbu kanda tukumbulule chihula kana, twatela kutachikiza vyuma yahanjika Mbimbiliya kutalisa kuvatu vakuhya kushipilitu. Muchihande chino, natukumbulula vihula vitatu vyavilemu. (1) Uno kupwa vakuhya kushipilitu chalumbununa ika? (2) Vyakutalilaho muka navitukafwa tuzovoloke kushipilitu? (3) Uno kupwa “navishinganyeka vyaKulishitu”  nachitukafwa ngachilihi tupwenga tuvakuhya kushipilitu?

3. Mbimbiliya yasolola ngachilihi chihandwa chatwama hali mutu wakushipilitu namutu wakumujimba?

³ Kaposetolo Paulu atukafwa tutachikize omu apwa mutu wakuhya kushipilitu, hakuvuluka chihandwa chatwama hali ‘mutu wakushipilitu namutu wakumujimba.’ (Tangenu Wavaka-Kolinde 1, 2:14-16.) Uno chihandwa muka chatwamaho? “Mutu wakumujimba” vamulumbununa ngwavo “keshi kutambula vyuma vyashipilitu yaKalungako, mwomwo vinapu uleya kuli ikiye.” Oloze “mutu wakushipilitu” apwa mutu uze “eji kukekesanga vyuma vyosena” kaha nawa atwama “navishinganyeka vyaKulishitu.” Paulu atukolezeza ngwenyi tupwenga tuvakuhya kushipilitu. Chihandwa cheka muka chatwama hali mutu wakushipilitu namutu wakumujimba?

4, 5. Mutu wakumujimba vanahase kumutachikijila haka?

⁴ Tuchishimutwilenu havilinga atwama navyo mutu wakumujimba. Vatu vamuno mukaye vafwila kaha vyuma yafwila mijimba yavo. Paulu alumbunwine vyuma kanevi ngwenyi “shipilitu yize yili nakuzata noholili muli vana vakulikanga.” (Efwe. 2:2) Shipilitu kana yeji kuzondolanga vatu mangana vakavangize vatu vavavulu. Ngocho vavavulu veji kulinganga vyuma vize vamona kupwa vyamwaza, kaha kavasaka kukavangiza jindongi jaKalungako. Mutu wakumujimba asaka kuya fuma nakufwila luheto.

⁵ Vyuma vyeka muka tunahase kutachikijilaho mutu wakumujimba? Vosena vaze veji kwazananga mukala “vilinga vyakumujimba” vakiko vavuluka kupwa vatu vakumujimba. (Ngale. 5:19-21) Mumukanda watete uze Paulu asonekelele vandumbwenyi vamuKolinde, avulukile vilinga vyeka vyavivulu vize vatwama navyo vatu vakumujimba. Vilinga kana shina: Vihandwa, nakulikindwojokela, nakulitwala kujizango jakusopela, nakuhona kuvumbika vaze vali nakutwaminyina, nakufwa hakulya nakunwa. Kaha nawa mutu wakumujimba eji kuhonanga kufungulula cheseko. (Vishi. 7:21, 22) Yuta avulukile nawa ngwenyi vatu kana “kavahaka mangana kuvyuma vyakushipilituko.”—Yuta 18, 19.

6. Mutu wakushipilitu tunahase kumutachikijila haka?

⁶ Uno “mutu wakushipilitu” apwa ngachilihi? Apwa mutu uze azanga vyuma azanga Kalunga. Vatu vakuhya kushipilitu vafwila ‘kulondezeza Kalunga.’ (Efwe. 5:1) Echi chalumbununa nge veji kushinganyekanga nganomu eji kushinganyekanga Yehova havyuma vimwe nakuvimona nawa nganomu avimona ikiye. Vamona Kalunga kupwa mutu nahenyi. Kaha nawa vatu vakuhya kushipilitu vafwila kukavangiza jindongi jaYehova. (Samu 119:33; 143:10) Muchishishisa chakufwila vyuma yafwila mijimba yavo, mutu wakuhya kushipilitu eji kufwilanga kusolola “mihako yashipilitu.” (Ngale. 5:22, 23) Tuchitalenu hachakutalilaho chize nachitukafwa twivwishise omu apwa “mutu vakuhya kushipilitu.” Nge mutu atachikiza chikuma vyakusekasana, veji kumuvulukanga ngwavo kuluwa mukusekasana. Chochimwe nawa, mutu uze amona vyuma vyakushipilitu kupwa vyavilemu veji kumuvulukanga ngwavo mutu wakuhya kushipilitu.

7. Vyuma muka yahanjika Mbimbiliya havatu vakuhya kushipilitu?

⁷ Mbimbiliya yasangejeka vatu vaze vazanga vyuma vyakushipilitu. Mukanda waMateu 5:3 wamba ngwawo: “Vawahilila vaze vejiva ngwavo vasaka vyuma vyakushipilitu, mwomwo Wangana wamelu unapu wavo.” Kaha nawa hali Wavaka-Loma 8:6 vasonekaho ngwavo: “Kujika vishinganyeka havyuma vyamujimba cheji kunehanga kufwa, oloze kujika vishinganyeka havyuma vyashipilitu cheji kunehanga kuyoya nakuunda.” Kujika vishinganyeka vyetu havyuma vyakushipilitu nachitukafwa tutwame  mukuunda naKalunga nakukapwa nakuyoya chahaya myaka yosena kulutwe.

8. Mwomwo ika twatela kuzata nangolo mangana tupwenga vakuhya kushipilitu?

⁸ Makumbi ano tuli nakuyoyela mukaye kakapi. Hakuwana nge vilinga vyakumujimba vinalisale chikuma, ngocho twatela kuzata nangolo mangana tupwenga vakuhya kushipilitu. Kachi nge mutu mwahona kuhaka mangana kuvyuma vyakushipilitu, kaha vilinga vyamuno mukaye vinahase kumuhungumwisa. Vyuma muka navitukafwa tuhone kupwa muukalu kana? Tunahase kuzovoloka ngachilihi kushipilitu?

9. (a) Vyuma muka navitukafwa tuzovoloke kushipilitu? (b) Vyakutalilaho muka vyavatu vakuhya kushipilitu vize natushimutwila?

⁹ Mwana eji kukolanga kanawa nge mwalondezeza chakutalilaho chamwaza veji kusololanga visemi jenyi. Chochimwe nawa, nayetu tunahase kuzovoloka kushipilitu nge natulondezezanga vatu vakuhya kushipilitu. Oloze katwatela kulondezezanga vatu vaze vafwila vyuma yafwila mijimba yavoko. (Koli. 1, 3:1-4) Mbimbiliya yahanjika havyakutalilaho vyosena vivali. Oloze hakuwana nge tunakusaka kuzovoloka kushipilitu, tushimutwilenu havyakutalilaho vyamwaza vyavatu vaze twatela kulondezeza. Natushimutwila hachakutalilaho chaYakova, naMaliya, naYesu.

10. Yakova asolwele ngachilihi nge apwile mutu wakuhya kushipilitu?

¹⁰ Tuvangilenu kushimutwila hachakutalilaho chaYakova. Chiyoyelo chaYakova chapwile chachikalu ngana muze chili kuli etu makumbi ano. Yayenyi Esau atondele kumujiha. Kaha nawa isewenu apwile namuchima waupi wakusaka kumulyapula. Chamokomoko naukalu kanou, Yakova atwalileho kupwa mutu wakuhya kushipilitu. Afwelelelele mujishiko jize Yehova ashikile kaka yenyi Apalahama, kaha nawa azachile nangolo hakuzakama vaka-tanga yenyi vaze Yehova mwakazachisa hakutesamo vyuma ajina. (Kupu. 28: 10-15) Vilinga nahanjikiso yaYakova vyasolwele nge ashinganyekelenga chikuma hajishimbi jaKalunga nakufwila kulinga mwaya muchima waKalunga. Chakutalilaho, omu Yakova evwile woma wayayenyi Esau, alombele kuli Kalunga ngwenyi: “Nguli nakukulomba unguyovole . . . Wambile ngwove, ‘Nangukakulingila vyamwaza chikupu, kaha nangukavulisa vaka-tanga yove nge usekeseke wakukalungalwiji, uze navahona kulava.’” (Kupu. 32:6-12) Yakova afwelelelele mujishiko jize Yehova amushikile najize ashikile vakakuluka jenyi, ngocho afwililile kulinga mwaya muchima waKalunga.

11. Vyuma muka vyasolola nge Maliya apwile wakuhya kushipilitu?

¹¹ Tushimutwilenu nawa hali Maliya. Mwomwo ika Yehova asakwililile Maliya apwenga naye yaYesu? Mwomwo apwile wakuhya kushipilitu. Tunatachikiza ngachilihi ngocho? Tunatachikiza ngocho mwomwo yamazu akwalisa Yehova aze ahanjikile omu ayile nakumeneka vausoko wenyi vaZekaliya naElizaveta. (Tangenu Luka 1:46-55.) Mazu ahanjikile Maliya asolwele nge azangile Mazu aKalunga, kaha nawa atachikijile kanawa Visoneka vyachiHepeleu. (Kupu. 30:13; Samwe. 1, 2:1-10; Mala. 3:12) Tachikizenu nawa ngwenu numba tuhu Maliya naYosefwe vapwile vachili mukulimbata, oloze kavalisavalilengako swi nomu asemukile Yesu. Echi chili nakusolola vyuma muka? Chasolola nge vosena vavali vafwililile kulinga mwaya muchima waYehova nakukavangiza jindongi jenyi muchishishisa chakulinganyalisa kaha vavene. (Mateu 1:25) Maliya anukilenga lika vyuma vyasolokele mukuyoya chaYesu namazu amalemu aze ahanjikilenga. Kaha nawa “alamine mazu osena awa mumuchima wenyi.” (Luka 2:51) Afwililile kukamona omu Kalunga mwakatesamo vyuma ajina kuhichila muli Meshiya. Chakutalilaho chaMaliya chatela kutukafwa tulingenga chatete mwaya muchima waKalunga nakukavangiza jindongi jenyi mukuyoya chetu chosena.

12. (a) Yesu alondezezelenga ngachilihi Ise? (b) Tunahase kulondezeza ngachilihi chakutalilaho chaYesu? (Talenu muvwimbimbi wakulivanga.)

¹² Mutu muka uze apwa wakuhya chikuma kushipilitu kuhambakana vatu vosena? Yesu. Mukuyoya chenyi chosena nomu azachilenga mulimo wakwambulula alondezezelenga Ise Yehova. Vyuma alingilenga navize ashinganyekelenga mukuyoya chenyi chosena vyapendaminyinenga hajindongi jaKalunga. (Yowa. 8:29; 14:9; 15:10) Chakutalilaho, achishinganyekenu hamazu asonekele kapolofweto Isaya kutalisa kumuchima wakeke atwama nawo Yehova, nakuwesekesa kumazu aMujimbu Wamwaza vasoneka kuli Mako kutalisa kumuchima atwama nawo Yesu. (Tangenu Isaya 63:9; Mako 6:34.) Kutala tweji kulondezezanga Yesu nakusolwelanga keke kala vatu vali muukalu tahi? Yesu naikiye azachilenga natwima mumulimo wakwambulula nakunangula vatu mujimbu wamwaza. (Luka 4:43) Vyuma vyosenevi vyamusolola kupwa wakuhya kushipilitu.

13, 14. (a) Vyuma muka natulinangula kuvyakutalilaho vyavandumbwetu vakuhya kushipilitu vamakumbi ano? (b) Hanenu chakutalilaho.

¹³ Makumbi ano, kuli nawa vyakutalilaho vyavangamba jaKalunga vakuhya kushipilitu vavavulu vaze vali nakulondezeza Kulishitu. Pamo mweji kumonanga twima yavo mumulimo wamuwande, nazumbu, namuchima wavo wakeke, navilinga vyeka nawa. Ngana mwayetu, navakiko veji kulipikanga natutenga naukalu uze weji kwizanga mwomwo yakuhona kukupuka, oloze veji kukilikitanga mangana vapwenga navilinga vyamwaza. Ndumbwetu Rachel wamuBrazil ambile ngwenyi: “Ngwasakilenga kulondezeza vwaliso yakukaye. Ngocho ngwavwalilenga mwamupi. Oloze kulinangula muchano changukafwile ngwalumuneko vilinga vyami nakufwila kupwa wakuhya kushipilitu. Numba tuhu kachapwile chachashi kulinga ngochoko, oloze ngwapwa nguwakuwahilila mukuyoya chami chosena.”

 ¹⁴ Reylene wamuPhilippines naikiye apwile naukalu. Afwililile kuya kumashikola ahelu mangana akapwe hamilimo yayinene nakupwa najimbongo jajivulu. Ambile ngwenyi: “Ngwaputukile kuzelendenda vyuma vyakushipilitu. Kaha ngwamwene jino ngwami ngwazelendendele mulimo waulemu chikuma kuhambakana mulimo ngwazachilenga. Echi changukafwile nguputuke cheka kuzachila Yehova natwima.” Kufuma vene haze, Reylene eji kuhananga chakutalilaho chamwaza hakufwelela jishiko jaYehova jatwama hali Mateu 6:33, 34. Ambile ngwenyi: “Ngwatachikiza ngwami Yehova mwanguzakama.” Pamo nayenu mwatachikizako vatu vaze vali nakusolola chakutalilaho chamwaza muchikungulwilo chenu. Shikaho nayetu twatela kulondezeza vandumbwetu vakushishika vaze vali nakukavangiza Kulishitu.—Koli. 1, 11:1; Teso. 2, 3:7.

15, 16. (a) Vyuma muka twatela kulinga mangana tulondezeze Kulishitu? (b) Natuhasa ngachilihi kupwa “navishinganyeka vyaKulishitu”?

¹⁵ Tunahase kulondezeza ngachilihi Kulishitu? Hali Wavaka-Kolinde 1, 2:16 vavulukaho vyakupwa “navishinganyeka vyaKulishitu.” Kaha nawa hali Wavaka-Loma 15:5 vatulweza tupwenga ‘namuchima umwe ngana uze apwile nawo Kulishitu Yesu.’ Shikaho hakusaka tupwenga ngana mwaKulishitu, twatela kushinganyeka nganomu eji kushinganyekanga nakulondezeza vilinga vyenyi. Ngocho twatela kukavangizanga mujitambo jenyi. Yesu ashinganyekelenga hausoko wenyi naKalunga. Shikaho kulondezezanga Yesu nachitukafwa tulondezeze Yehova. Kweseka navyuma kanevi, chasolola hatoma nge chapwa chachilemu kupwa navishinganyeka ngana vize apwile navyo Yesu.

¹⁶ Tunahase kulinga ngachilihi ngocho? Tumbaji vamwene vyakukomwesa alingilenga Yesu, nakwivwilila kuvyuma anangwilenga, nomu azakaminenga vatu vosena, nomu akavangijilenga jindongi jaKalunga mukuyoya chenyi. Vambile ngwavo: “Etu tunapu tuvinjiho kuvyuma vyosena vize alingile.” (Vili. 10:39) Oloze etu makumbi ano katweshi kumona Yesu mwalinga vyuma kana nameso etu kapuko. Chipwe ngocho, Yehova atuhana mikanda yaMujimbu Wamwaza mangana yitukafwe kutachikiza vilinga vyaYesu. Kutanga mikanda yakufwana nge Mateu, naMako, naLuka, naYowano, nachitukafwa tutachikize omu vyapwa vishinganyeka vyaYesu. Nachitukafwa nawa tukavangizenga “kanawa mujitambo jenyi” nakupwa “navishinganyeka vyovimwe” ngana vize vyaKulishitu.—Petu. 1, 2:21; 4:1.

17. Uno kupwa navishinganyeka vyaKulishitu nachitukafwa ngachilihi?

¹⁷ Uno kupwa navishinganyeka vyaKulishitu nachitunganyalisa ngachilihi? Ngana muze vyakulya vyeji kuwahisanga mujimba, nakulinangula omu vyapwa vishinganyeka vyaKulishitu nawa nachitukafwa tupwenga tuvakuhya kushipilitu. Mukuhita chalwola natutachikiza vyuma nahase kulinga Kulishitu mukala ukalu. Ngocho nachitukafwa tusakulenga kanawa vyakulinga vize navitukafwa tupwenga nachivezu chitoma mangana Kalunga atwivwile kuwaha. Twatela kufwila ‘kuvwala Mwata Yesu Kulishitu’ mangana tunganyale mujila kaneyi.—Loma 13:14.

18. Kweseka navyuma tunashimutwila mutu wakuhya kushipilitu atela kupwa ngachilihi?

¹⁸ Tunalinangula omu apwa mutu wakuhya kushipilitu. Tunamono nawa omu tunahase kulinangula kuvyakutalilaho vyavatu vakuhya kushipilitu. Chamakumishilo, tunalinangula nawa omu kupwa “navishinganyeka vyaKulishitu” nachitukafwa tupwenga vakuhya kushipilitu. Oloze natushimutwila nawa vilinga vyeka vize vyasakiwa numba mutu apwenga wakuhya kushipilitu. Chakutalilaho, tunahase kutachikiza ngachilihi ngwetu tunakuzovoloka kushipilitu? Vyuma vyeka muka twatela kulinga mangana tupwenga vakuhya kushipilitu? Uno kuhya kushipilitu nachitukafwa ngachilihi mukuyoya chetu hakumbi hakumbi? Chihande chinakavangizaho nachitukafwa tukumbulule vihula kanevi.