Ngwasemukilile hafwamu vavulukilenga ngwavo kolkhoz mu 1937, mungalila yaTokmok, muKyrgyzstan. Twahanjikilenga lilimi lyaKyrgyz. Visemi jami vazachilenga hafwamu kaha vazachilenga kufuma chimene swi nakuchingoloshi. Vaka-kuzata vavafwetelenga kaha vyakulya oloze jimbongo vavahanyinengajo kamwe mumwaka. Mama afulyangililenga hakutuzakama ami nasongo yami. Ngwakuminyinyine kaha mumango 5 kushikola, kufumaho nayami ngwaputukile kuzata hafwamu.

Mungalila twapwile nakutwama mwapwile uhutu chikuma, kaha vatu vazachilenga chikuma nangolo numba vawane mwakuyoyela. Hakupwa ngumukweze kangwashinganyekelenga ovyo vatu veji kuyoyelanga chipwe omwo kuyoya nachikapwa kulutweko. Kangwashinganyekele ngwami muchano waYehova Kalunga navyuma ajina kukalinga navyalumuna kuyoya chamiko. Jila watanjilililemo muchano muKyrgyzstan yapwile yakukomwesa. Waputukilile mungalila yetu kunote yaKyrgyzstan.

Muchano waYehova Kalunga waputukile kutanda muKyrgyzstan muji 1950. Chipwe ngocho, chapwile chachikalu kunangula vatu muchano. Mwomwo ika chakaluhwilile? Halwola kana lifuchi lyaKyrgyzstan lyapwile muchiyulo chaUnion of Soviet Socialist Republics (USSR). Vinjiho jaYehova kavazanyinenga muvihande vyamapolitikiko. (Yowa. 18:36) Ngocho vavayanjishilenga chikuma kuli vaka-Communist. Oloze ukalu kana kawalingishile Mazu aKalunga ahone kuheta kuvatu vamwaza michimako. Mukuyoya chami chosena ngunalinangula jino ngwami kuli Yehova “vyuma vyosena vyapwa vyavyashi.”—Mako 10:27.

 Luyanjisa lwalingishile Vinjiho jaYehova vavule muKyrgyzstan. Mwomwo ika? Chiyulo chaUSSR chahetele nakuSiberia kuze vatwalilenga vafunge. Hakuwana nge naVinjiho vavatwalilenga kuchihela kana, echi chalingishile vafunge vavavulu valinangule muchano. Kahomu vakindulukilenga muKyrgyzstan, vaputukile jino kutandakanyisa muchano. Havatu vaze vatwalile muufunge hapwile naEmil Yantzen uze asemukilile muKyrgyzstan mu 1919. Emil vamutwalile kuchilombo chakuyanjishila vafunge kuze akaliwanyine naVinjiho jaYehova. Etavililile muchano, kaha kuheta mu 1956 akindulukile kwimbo. Emil atwaminenga kwakamwihi nangalila yaSokuluk. Mungalila kana mukiko mwapwile chikungulwilo chatete mulifuchi lyaKyrgyzstan mu 1958.

Omu mwahichile mwaka umwe Victor Vinter ayile kuSokuluk. Ou ndumbwetu wakushishika vamuyanjishile chikuma. Hakuwana nge kazanyinenga muvihande valifuchi nachiyuloko, ngocho vamukashile hamyaka yitatu mapapa kavali, kufumaho vamukashile mukamenga hamyaka 10 nakumutwala nawa muufunge hamyaka 5. Chipwe ngocho, luyanjisa kalwahonesele kulemesa chamuchano kutandako.

Kuheta mu 1963 mulifuchi lyaKyrgyzstan mwapwile Vinjiho jaYehova vakuheta 160, kaha vavavulu vafuminyinyine kuGermany, nakuUkraine, nakuRussia. HaVinjiho kana hapwile naEduard Varter uze vambapachishile muGermany mu 1924. Muji 1940, vaka-Nazi vamutwalile kuchilombo chavafunge, kaha nawa omu mwahichile myaka yayindende, vaka-Communist vamuchiyulo chaUSSR vamutwalile muufunge. Kuheta mu 1961 ou ndumbwetu anungulukilile kumbaka yaKant yize yalihata nambaka yetu.

Elizabeth Fot uze apwile ngamba yaYehova wakushishika naikiye atwaminenga muKant. Ayoyelelenga hakutongatonga. Hakuwana nge atachikijile kanawa mulimo kana, ngocho vandotolo namilongeshi vamukumwinenga avatongele uvwalo. Mutu umwe uze atongelelelenga apwile Aksamai Sultanalieva uze apwile pwevo lyachambamilonga. Omu Aksamai ayilenga kuli Elizabeth nakutongesa uvwalo, ahulishilenga vihula vyavivulu kutalisa kukuyoya navyuma vyeji kusolokanga kuli mutu nge nafu. Elizabeth akumbulwile vihula vyenyi vyosena kuzachisa Mbimbiliya. Kahechi chakafwile Aksamai apwenga jino muka-kwambulula watwima.

Halwola kana, Nikolai Chimpoesh uze afumine kuMoldova vamutongwele kupwa kalama wakujinguluka, kaha azachile mulimo kana hamyaka 30. Nikolai katambukililenga kaha vikungulwiloko, oloze atwaminyinyinenga mulimo wakusononona mikanda nakuyipangila vatu. Vaka-fulumende vatachikijile mulimo apwile nakuzata. Kaha Eduard Varter amukolezezele ngwenyi: “Nge vaka-fulumende navakuhulisa uvalweze okwo tweji kuwananga mikanda yetu, ukavalweze ngwove yeji kufumanga kuchikota chetu kuBrooklyn. Watela kumutala kapokola mumeso. Kanda kwivwa woma chuma numba chimweko.”—Mateu 10:19.

Nakushimbula chiku kufuma haze vashimutwilile, Nikolai vamukwachile kuli tupokola nakumutwala kuofesi yayinene yatupokola muKant. Nikolai ahanjikile vyuma vyasolokele ngwenyi: “Uze kapokola anguhulishile okwo kweji kufumanga mikanda yetu. Ngwamulwezele ngwami yeji kufumanga kuBrooklyn. Ahonene vyakuhanjika, ngocho angwechele nguyenga kwimbo, kaha kavangusanyikile chekako.” Ava Vinjiho vakumika vatwalileho kutandakanyisa mujimbu wamwaza kujingalila jakunote yalifuchi lyaKyrgyzstan. Omu muchano waYehova wahetele kuli vaka-tanga  yetu muji 1980, puwami Mairambubu ikiye apwile watete kuwitavila.

Mairambubu afumine kuNaryn ngalila yamuKyrgyzstan. Kuheta muAugust 1974 ejile nakumeneka ndumbwami wapwevo, ngocho twalijivile. Hahaze vene ngwamuzangile chikuma, kaha twalimbachile.

Kuheta muJanuary 1981, omu Mairambubu apwile musacha nakuya kuchisakano evwile mutu mwahanjika mazu twavulukanga kumaputukilo. Puwami Mairambubu asakile kulinangula vyavivulu, ngocho alwezele uze pwevo amuhane keyala yenyi. Oloze uze pwevo amulwezele kaha lijina ngwenyi ikiye Apun, mwomwo mumyaka kana mulimo waVinjiho jaYehova vaukanyishile. Muchishishisa chakuhana puwami keyala, Apun ikiye jino atambwile keyala yetu. Omu puwami akindulukile hembo awahililile chikuma.

Mairambubu ambile ngwenyi: “Ngunevu vyuma vyamwaza chikuma. Pwevo umwe ahanjikanga ngwenyi kulutwe kufwa kacheshi kukapwako chekako, kaha nawa tunyama navakatwamanga navatu mukuunda.” Vyuma ahanjikile vyevwakanyine kwijiva nge hivilota kuli ami ngocho ngwambile ngwami, “Tuvandaminenu omu mwakeza mangana akalumbunune kanawa.”

Omu mwahichile tukweji vatatu Apun atutambukililile. Kufumaho vatutambukililenga nawa kuli Vinjiho veka vaze vahanjikilenga lilimi lyaKyrgyz. Ava vandumbwetu vamapwevo vatunangwile muchano waYehova navyuma ajina kukalingila vatu. Vatunangwilenga kuzachisa mukanda waFrom Paradise Lost to Paradise Regained. * Hakuwana nge kwapwile mukanda umwe kaha muTokmok ngocho twaukopolwele hamapapilo.

Chuma chatete twalinangwile shina upolofweto wahali Kuputuka 3:15. Upolofweto kana naukatesamo kuhichila muli Yesu uze apwa Mwangana wauMeshiya. Mazu kana apwa amalemu, kaha vatela kuwevwa kuli vatu vosena. Echi chikiko chatulingishile nayetu twazane mumulimo wakwambulula. (Mateu 24:14) Nakushimbula chiku muchano wamuMbimbiliya waputukile kwalumuna kuyoya chetu.

Ndumbwetu umwe muTokmok atusanyikile kuchifupawenga chenyi. Omu ami napuwami twayileko, twamwene vilinga vyamwaza vapwile navyo Vinjiho. Kuchilika kana kakwapwile walako, kaha nawa vyuma vyatambukile mukulonga. Echi chalihandunwine chikuma navifupawenga vyeka  twamwenenga kuze vatu vanwinenga wala, nakusolola vilinga vyavipi nakuhanjika mazu akasautu.

Twayilenga nawa kukukunguluka chavaka-Kulishitu muchikungulwilo chamuTokmok. Twakungulukililenga mwishi yamitondo muze mwapwilenga muvule wamwaza. Vandumbwetu vatachikijile ngwavo tupokola vapwilenga nakutusondwesa, ngocho valwezelenga ndumbwetu umwe mangana ataletale kujila. Kaha kuheta mungonde yachishika twakungulukililenga muzuvo yandumbwetu. Kakavulu tupokola vejilenga nakusaka kutachikiza vyuma twapwilenga nakulinga. Omu ami napuwami Mairambubu vatumbapachishile muJuly 1982 mukalwiji Chüy, twatelelele kupwa tuvakuvanguluka. (Mateu 10:16) Vandumbwetu vavandende kaha vakiko vakukungulukile mumusenge nakwilila kuchihande chaLumbapachiso nakwimba mwaso waWangana.

Mu 1987 ndumbwetu umwe walunga angulwezele ngutambukile mutu wakuwahilila uze apwile muBalykchy. Twatambukilenga jola jiwana namasuhwa kufuma kwimbo lyetu nakuya kuli uze mutu. Omu twalingile tunamutambukila lyehi mapapa kakavulu, twawanyine vatu vakuwahilila vavavulu. Eyi yapwile chikupu jila yakutandakanyishilamo mujimbu wamwaza.

Ami naMairambubu twayilenga mapapa kakavulu kuBalykchy. Kakavulu twavatambukililenga kusongo yachalumingo kaha twayilenga navo muwande nakutwaminyina kukunguluka. Vatu vatondelenga chikuma mikanda yetu. Shikaho twambachililenga mikanda munjeke vavuluka ngwavo mishok yize vambachililenga jitamba. Twatwalilenga jinjeke jivali mukakweji, chipwe ngocho yapwilenga yayindende. Nahalwola twapwilenga mumasuhwa twambulililenga vatu.

Kuheta mu 1995, twasokolwele chikungulwilo mumbaka yaBalykchy kafwe myaka 8 kufuma haze twaputukile kutambukila mbaka kana. Twazachishilenga jimbongo jajivulu hamyaka yosena yize twatambukilenga. Katwapwile najimbongo jajivuluko. Uno jimbongo twazachishilenga twajiwanyine kulihi? Ndumbwetu umwe walunga ikiye atuhanyinenga jimbongo jakulikafwa najo. Yehova amwene muchima wetu wakufwila kutandakanyisa mujimbu wamwaza, ngocho ‘atusokwelelele vikolo vyamwilu.’ (Mala. 3:10) Chapundu vene vyuma vyosena vyapwa vyavyashi kuli Yehova.

Mu 1992 vangutongwele kupwa kalama muchikungulwilo chazachisa lilimi lyaKyrgyz, kaha ami yami ngwapwile ngukalama watete muchikungulwilo kana. Muchikungulwilo chetu chamuTokmok mwapwile milimo yayivulu. Twalinangwilenga Mbimbiliya navanyike vaze vahanjikilenga lilimi lyaKyrgyz vaze vafuminenga hashikola. Havanyike kanava twalinangwilenga navo, umwe atwama muKomiti yaMutango, kaha vavali vapwa vapayiniya vakulipwila. Twakolezezelenga nawa vandumbwetu nge tuli kukukunguluka. Kumaputukilo aji 1990 mikanda yetu yapwilenga kaha mulilimi lyaRussian, kaha nawa likiko lilimi twazachishilenga hakukunguluka. Oloze vandumbwetu vavavulu muchikungulwilo vahanjikilenga lilimi lyaKyrgyz mwomwo likiko lyapwile lilimi lyavo. Ngocho ngwalumwinenga vihande mulilimi lyavo mangana muchano uvahete kumichima.

Ami naMairambubu nawa twapwile namulimo wakulela vana vetu. Twayilenga navo mumulimo  wamuwande nakukukunguluka. Mwanetu wapwevo Gulsayra uze apwile namyaka 12 halwola kana, alivwishilenga kuwaha kushimutwila navatu vyuma yahanjika Mbimbiliya. Kaha nawa vana vetu valaminyinenga mumutwe mazu amuVisoneka. Echi chakafwile vana vetu navazukulu jetu vazane chikuma mumilimo yamuchikungulwilo. Havana vetu 9 navazukulu jetu 11, 16 vali nakuzachila Yehova nakuyanga kukukunguluka.

Vandumbwetu vaze vazachilenga mulimo wakwambulula mungalila yetu muji 1950 vanahase kulikomokela chikuma hakumona omu mulimo unazovoloka mungalila kana. Kufuma vene muji 1990 tunalivwisanga kuwaha kwambulula mujimbu wamwaza mukuunda nakulikungulwila hamwe navandumbwetu.

Mu 1991 ami napuwami twayile kukukunguluka changalila halwola lwatete muAlma-Ata, ngalila yize vanakuvuluka jino ngwavo Almaty, muKazakhstan. Kaha kuheta mu 1993, vandumbwetu muKyrgyzstan vapwile nakukunguluka changalila chatete muchivaza chaSpartak mumbaka yaBishkek. Vandumbwetu vawahishile chivaza kana hachalumingo chamuundu. Omu mukulwane atalilenga chize chivaza amwene milimo twazachile, awahililile chikuma ngocho katufweteseleko.

Mwaka wa 1994 wapwile wakulipwila chikuma mwomwo hakiko twatambwile mikanda yatete mulilimi lyaKyrgyz. Oholyapwa mikanda yinalisale jino mulilimi lyaKyrgyz mwomwo vali nakuyalumuna haofesi yamutango muBishkek. Mu 1998 fulumende yaKyrgyzstan yetavishile Vinjiho kuzata mulimo wavo wakwambulula. Liuka lyetu lili nakutohwelako, ngocho muKyrgyzstan muli jino vaka-kwambulula 5,000. Makumbi ano, muli vikungulwilo 83 namazavu 25 azachisa lilimi lyaChinese, naChingeleshi, naKyrgyz, naRussian, naLilimi lyaTuveveve lyakuRussia, naTurkish, naUighur, naUzbek. Vandumbwetu vosenava vakuvisemwa vyakulisezaseza vali nakuzachila Yehova mukulinunga. Yehova ikiye nalingisa kupwenga kwalumuka kanechi.

Yehova nawa alumwine kuyoya chami. Ngwafuma mutanga yavaka-kuzata hafwamu, kaha nawa ngwakuminyinyine kaha mumango 5 kushikola. Oloze Yehova angutongwele kupwa ngukalama muchikungulwilo nakunguzachisa ngunangule muchano wamuMbimbiliya vatu vaze valinangula chikuma kuhambakana ami. Chikupu vene, Yehova eji kulinganga vyuma vyakukomwesa. Vyuma ngunamono mukuyoya chami vinangukafwe ngutachikize ngwami kuli Yehova “vyuma vyosena vyapwa vyavyashi.”—Mateu 19:26.