1-2. Chuma muka alingile Yehova mangana tupwenga mutanga yenyi, kaha mwomwo ika?

YEHOVA atusakula tupwenga mutanga yenyi yavaka-kumulemesa. Twatokwa chikuma kupwa mutanga kaneyi. Mutanga kana mwatwama vatu vaze valihana kuli Kalunga nakufwelela mundando yakusokola yaYesu. Twatwama mutanga yakuwahilila. Tweji kupwanga vakusuuluka mukuyoya, nakutalilila nawa kuyoya chahaya myaka yosena mwilu chipwe muPalachise hano hamavu.

² Yehova atusolwelele zangi yayinene hakutuneha mutanga yenyi, numba tuhu chapwile chachikalu kulinga ngocho. (Yowa. 3:16) ‘Atulanjile nandando’ yayinene. (Koli. 1, 6:20) Eyi ndando yakusokola yikiko yatukafwa tupwenga nausoko wamwaza naYehova. Kaha nawa twatokwa kuvuluka mutu wamulemu chikuma mwilu nahamavu ngwetu Tata. Ngana muze twashimutwilanga muchihande chinafumuho, Yehova apwa chisemi wamwenemwene.

3. Chihula muka tunahase kulihulisa? (Talenu nawa lipwata lyakwamba ngwavo, “ Uno Yehova Angutachikiza Tahi?”)

³ Nayetu tunahase kuhulisa ngana muze ahulishile muka-kusoneka Mbimbiliya umwe ngwenyi: “Nangumushishishilamo ika Yehova havyuma vyamwaza vyosena nangulingila?” (Samu 116:12) Twatela kwijiva ngwetu katweshi kuhasa kufweta Yehova chuma numba chimweko. Chipwe ngocho, zangi yenyi yatulingisa tumuzange. Kaposetolo Yowano asonekele ngwenyi: “Etu twazanga vakwetu, mwomwo ikiye alivangile kutuzanga etu.” (Yowa. 1, 4:19) Vyuma muka twatela kulinga mangana Setu wamwilu amone ngwenyi twamuzanga?

4. Kweseka namukanda WaYakova 4:8, mwomwo ika twatela kupandama kuli Yehova?

⁴ Yehova asaka tupandame kuli ikiye nakushimutwilanga nenyi nawa. (Tangenu WaYakova 4:8.) Atulweza ‘tulombenga naluzema,’ kaha eji kutwivwanga lwola lwosena. (Loma 12:12) Ngocho keshi kwivwa kuzeya chipwe kumona ngwenyi milimo yinamuvulila, nakuhona kwivwilila kukulomba chetuko. Etu nawa tweji kwivwililanga kuli ikiye omu tweji kutanganga Mbimbiliya namikanda yeka yize yeji kutukafwanga twivwishise Mazu enyi. Tweji kwivwililanga nawa kuli Yehova hakwivwilila kanawa kuvihande hakukunguluka. Ngana muze kushimutwila kanawa cheji kukafwanga vana vapandame kuli visemi javo, mukiko nawa nakushimutwila naYehova shimbu yosena cheji kutukafwanga tupandame kuli ikiye.

5. Uno kulomba chetu chatela kupwa ngachilihi numba Kalunga achitavile?

⁵ Uno kulomba chetu chatela kupwa ngachilihi numba Kalunga achitavile? Tachikizenu ngwenu, Yehova asaka tumulwezenga vyuma vyosena vili kumichima yetu. (Samu 62:8) Shikaho twatela kulihulisa ngwetu: ‘Uno ngweji kulombanga namuchima wami wosena nyi chiku?’ Twafwelela vene ngwetu mwazanga chikuma Yehova, kaha muli nakusaka kupwa lika nausoko wamwaza naikiye. Shikaho, mwatela kushimutwilanga nenyi lwola lwosena. Mulwezenunga vyuma vyosena vili kumichima yenu, vize vinamilingisa muwahilile chipwe kumulweza ukalu muli nawo. Tachikizenu ngwenu munahase kulomba kuli ikiye kala lwola.

6. Vyuma muka twatela kulinga mangana tupandame lika kuli Setu wamwilu?

⁶ Hakusaka tutwaleho kupandama kuli Setu wamwilu, twatela kupwanga namuchima wakusakwilila. Tweji kwitavilanga mazu asonekele muka-kwimba jisamu ngwenyi: “Ove Yehova Kalunga kami, vyuma unalingi omwo vyavula! Milimo yove yakukomwesa yayivulu, kaha nawa weji kutushinganyekanga chikuma. Naumwe wauchi mwalyeseka nayove. Numba ngwami nguvyambulule nakuvihanjika, kangweshi kuvihasako, mwomwo vinavulu chikuma.” (Samu 40:5) Kusakwilila chetu kachakumina mumuchima kahako, oloze tweji kuchisololanga namuvilinga namuhanjikiso. Echi chikiko chatulingisa tulihandunune kuvatu vavavulu mukaye makumbi ano. Vatu vavavulu kavasakwilila Kalunga havyuma vyosena avalingilako. Mbimbiliya ngwayo “hamakumbi akukuminyina” vatu navakapwa vaka-kuhona kusakwilila. (Chimo. 2, 3:1, 2) Oloze, etu katwatela kupwa namuchima kanako.

7. Yehova asaka tulinge ika, kaha mwomwo ika?

⁷ Visemi vasaka vana vavo valizangenga, keshi kulizungisangako. Chochimwe nawa, Yehova asaka vana venyi vosena valizange nakupwa masepa. Zangi tweji kulisolwelanga navakwetu yikiko yatusolola kupwa tuvaka-Kulishitu vamuchano. (Yowa. 13:35) Tweji kwitavilanga mazu asonekele muka-kwimba jisamu ngwenyi: “Talenu! Omwo chawaha nomwo chayema vatu muundumbwavo kutwama hamwe mukulinunga!” (Samu 133:1) Nge natuzanga vandumbwetu, kaha Yehova mwamona ngwenyi twamuzanga naikiye nawa. (Yowa. 1, 4:20) Twatokwa chikuma kupwa mutanga yavatu vaze veji kulisolwelanga ‘likoji, nakulivwila keke.’—Efwe. 4:32.

8. Kweseka namukanda WaYowano 1, 5:3, chuma muka chachilemu cheji kutulingisanga twononoke Yehova?

⁸ Yehova asaka vana vononokenga visemi javo, kaha asaka nayetu nawa tumwononokenga. (Efwe. 6:1) Twatela kumwononoka mwomwo ikiye Tengi yetu, Muka-kuhana kuyoya, kaha nawa wamangana kuhambakana visemi vosena. Oloze kuzanga  Yehova chikiko chuma chachilemu cheji kutulingisanga tumwononoke. (Tangenu WaYowano 1, 5:3.) Chipwe ngocho, Yehova keshi kutushinjila tumwononokeko. Atutengele nalisesa lyakulisakwila etu vavene vyakulinga. Shikaho eji kwivwanga kuwaha nge natumwononoka mwomwo yakumuzanga.

9-10. Mwomwo ika chapwila chachilemu kutachikiza jishimbi jaKalunga nakujikavangiza?

⁹ Visemi vasaka vana vavo vapwenga vakukingiwa. Echi chikiko cheji kuvalingisanga vatunge jishimbi jize vatela kukavangiza vana vavo mangana vanganyale. Nge vana navajikavangiza, kaha navasolola ngwavo vavumbika visemi javo nakuvafwelela. Shikaho nayetu nawa twatela kutachikiza jishimbi ahakako Setu wamwilu nakujikavangiza. Nge natulinga ngocho, kaha natusolola ngwetu twamuzanga nakumuvumbika, kaha nawa natunganyala chikuma. (Isa. 48:17, 18) Oloze vatu vaze veji kukananga kukavangiza jishimbi jaYehova veji kumonanga ukalu.—Ngale. 6:7, 8.

¹⁰ Nge natuyoyanga mujila yize nayivwisa Yehova kuwaha, kaha natupwa vakulikangula kumujimba, namuvishinganyeka nakushipilitu. Yehova atachikiza vyuma vize navitunganyalisa. Aurora wamuUnited States ambile ngwenyi: “Kwononoka Yehova cheji kulingisanga mutu apwenga wakuwahilila mukuyoya.” Mazu kana amuchano. Nyi enu munanganyala ngachilihi hakukavangiza jishimbi jaYehova?

11. Uno kulomba cheji kutukafwanga ngachilihi?

¹¹ Kulomba nachitukafwa twononoke Yehova numba nge cheseko chinatutohwela.  Numba tuhu lwola lumwe chapwa chachikalu kwononoka Yehova hakupwa tuvaka-shili, oloze twatela kufwila kumwononokanga. Muka-kwimba jisamu alembelelele Kalunga ngwenyi: “Nguhane muchima wakufwila kukwononoka.” (Samu 51:12) Denise uze apwa payiniya washimbu yosena, ambile ngwenyi: “Kachi nge chinangukaluhwila kwononoka Yehova, kaha ngweji kumulombanga angukafwe ngulinge vyuma vyakwoloka.” Twafwelela chikupu ngwetu Yehova eji kukumbululanga kulomba changana.—Luka 11:9-13.

12. Kweseka namukanda Wavaka-Efwesu 5:1, vyuma muka twatela kulinga?

¹² Tangenu Wavaka-Efwesu 5:1. Tweji kufwilanga kulondezeza Yehova, mwomwo twapwa ‘tuvana venyi azanga.’ Tweji kumulondezezanga hakusolwelanga vakwetu zangi nalikoji nakuvakonekelanga. Nge vatu vaze kavatachikiza Kalungako navamona vilinga vyetu vyamwaza, kaha chinahase kuvalingisa vafwile kutachikiza vyavivulu hali ikiye. (Petu. 1, 2:12) Visemi vaze vapwa Vinjiho jaYehova vatela kuzakama vana vavo ngana muze eji kutuzakamanga Yehova. Echi nachilingisa vana vavo vafwile kutunga usepa naSetu wamwilu.

13. Chuma muka chatela kutulingisa twambulile mutu numba tuhu tuli nakwivwa woma?

¹³ Vana veji kwivwanga kuwaha kuhanjika hamasevo. Nayetu nawa tweji kwivwanga  kuwaha hakupwa naSetu wamwilu Yehova, kaha twasaka navakwetu nawa vamutachikize. Tweji kwivwanga ngana muze evwilenga Mwangana Ndavichi, uze asonekele ngwenyi: “Nangulisashilanga muli Yehova.” (Samu 34:2) Oloze pamo tunahase kwivwa sonyi kulwezako vakwetu vyaYehova. Jino vyuma muka navitukafwa tupwenga vakuhamuka? Chuma chatela kutulingisa tuhamuke nakuhanjika shina kutachikiza ngwetu Yehova eji kwivwanga kuwaha nge natuhanjika hali ikiye. Kaha nawa vakwetu navanganyala nge navamutachikiza. Yehova mwatukafwa tupwenga vakuhamuka. Akafwile vandumbwetu vamulikulukaji lyamyaka lyakulivanga, kaha nayetu mwatukafwa.—Teso. 1, 2:2.

14. Mwomwo ika chapwila chachilemu kwambulila vatu mujimbu wamwaza?

¹⁴ Yehova katala vatu kumesoko, kaha nawa eji kwivwanga kuwaha nge natusolwela vakwetu zangi, chamokomoko nokwo vafuma. (Vili. 10:34, 35) Jila yimwe yayilemu yakusolwelamo ngwetu twavazanga shina kuvambulila mujimbu wamwaza. (Mateu 28:19, 20) Uno nganyo muka nayifumamo? Vaze navatwivwilila navapwa nachiyoyelo chamwaza nakupwa nalutalililo lwakukayoya haya myaka yosena.—Chimo. 1, 4:16.

15-16. Vyuma muka vyatela kutulingisa tuwahilile?

¹⁵ Yehova apwa chisemi wazangi, ngocho asaka vana venyi vapwenga vakuwahilila. (Isa. 65:14) Kuli vyuma vyavivulu vyatela kutulingisa tupwenga vakuwahilila, numba tuhu tuli nakumona ukalu. Chakutalilaho, twatachikiza chikupu ngwetu Setu Yehova atuzanga chikuma. Kaha nawa twatachikiza kanawa muchano wamuMbimbiliya. (Yele. 15:16) Chuma chikwavo chatulingisa tuwahilile shina twatwama mutanga yakulipwila yize yatwama navatu vaze vazanga Yehova, najishimbi jenyi, nakulizanga nawa mwavomwavo.—Samu 106:4, 5.

¹⁶ Natupwanga lika vakuwahilila hakutachikiza ngwetu chiyoyelo nachikawaha chikuma kulutwe. Twatachikiza ngwetu kalinwomu Yehova afumiseko upi wosena, kaha Wangana wenyi naukalingisa mavu kupwa Palachise. Kaha nawa twatalilila kukamona vatu twazanga vaze vafwa omu navakavasangula nakukatwama cheka navo hamwe. (Yowa. 5:28, 29) Chuma kana nachikawaha chikuma. Kaha chachilemunyi, tunatachikiza ngwetu kalinwomu vaka-kuyoya vakushipilitu vamwilu navatu vosena hano hamavu vahane kavumbi Yehova, nakumwalisa nakumulemesa mujila yize etavila.