VANA VAMAPWEVO vavali vapwile nakutambuka munganda yaBaguio, yamuPhilippines. Kaha vamwene kalitemba kamikanda, oloze kavaswenyene kuze kukalitembako. Ndumbwetu wapwevo Helen uze emanyineko, amwesele kukanwa omu amwene ava vana vamapwevo. Numba tuhu vahambakanyine, oloze vevwile kuwaha chikuma hakumona omu Helen amwesele kukanwa.

Ava vana vamapwevo omu vapwile musacha, vamwene chinjikizo chakwamba ngwavo, jw.org haZuvo yaWangana. Kaha vanukile ngwavo, chize chinjikizo chikiko vamwene nahaze hakalitemba kamikanda. Ngocho vasulukile musacha, nakuya haZuvo yaWangana vakamone lwola veji kukungulukanga.

Kaha omu lyahetele likumbi lyakukunguluka, vayile kukukunguluka. Omu vengilile muZuvo yaWangana, vawanyine Helen. Kaha hahaze vene vanukile ngwavo, ikiye uze amwesele kukanwa hakalitemba. Ndumbu Helen ambile ngwenyi, “Omu vapandamine kuli ami, ngwalizakaminyine chikuma, mwomwo kangwatachikijile chuma chavalingishile vezenga kuli amiko.” Oloze vamulwezele vyuma vyasolokele.

Ava vana vamapwevo valivwishile kuwaha kukunguluka, kaha nawa vapwile vakukasunuka kupwa hamwe navandumbwetu. Kahomu chakumine kukunguluka, vamwene vakwavo vali nakuwahisa muZuvo yaWangana. Ngocho navakiko valombele mangana vazane mumulimo kanou wakuwahisa. Numba tuhu umwe aya lyehi kulifuchi lyeka, oloze ou mukwavo aputukile kukunguluka lwola lwosena nakulinangula Mbimbiliya. Vyuma kanevi vyamwaza vyasolokele mwomwo yakumwesamwesa.