CHIHANDE CHAKULINANGULA 7
Kutachikiza Wata Vatwama Nawo Vakulwane muChikungulwilo
“Kulishitu apwa mutwe wachikungulwilo, hakupwa ikiye muka-kulwila mujimba kanou.”—EFWE. 5:23.
MWASO 137 Mapwevo Vakushishika
VYUMA NATUSHIMUTWILA *
1. Mwomwo ika tanga yaYehova yapwila yakulinunga?
TWAWAHILILA chikuma hakupwa mutanga yaYehova. Mwomwo ika twapwila vakuunda kaha nawa vakulinunga? Mwomwo tuvosena tweji kuzatanga nangolo, mangana tuliluule kuli vaze Yehova ahana wata. Shikaho tunahase kupwa vakulinunga chikuma, nge natutachikiza omwo Yehova alongeselamo wata.
2. Vihula muka natushimutwila muchihande chino?
2 Muchihande chino, natumona veya vatwama nawata muchikungulwilo. Natukumbulula nawa vihula vino: Mulimo muka vatwama nawo vandumbwetu vamapwevo? Kutala vandumbwetu vosena vamalunga vapwa mitwe yavandumbwetu vosena vamapwevo tahi? Uno vakulwane muchikungulwilo namitwe yajitanga, vakwechi wata woumwe tahi? Tuvangilenu kushimutwila omwo twatela kumona vandumbwetu vamapwevo.
OMWO TWATELA KUMONA VANDUMBWETU VAMAPWEVO
3. Vyuma muka navitukafwa tumone mulimo veji kuzatanga vandumbwetu vamapwevo kupwa waulemu?
3 Vandumbwetu vamapwevo vaze veji kuzakamanga jitanga javo, nakuzata mulimo wakwambulula mujimbu wamwaza, nakukafwa chikungulwilo, twavamona kupwa vavalemu chikuma. Kukekesa omu Yehova naYesu vavamona, nachitukafwa nayetu tuvamone kupwa vavalemu chikuma. Natushimutwila nawa omwo twatela kumona mapwevo nganomu avamwenenga Paulu.
4. Uno Mbimbiliya yasolola ngachilihi nge Yehova amona namalunga namapwevo kupwa vavalemu?
4 Mbimbiliya yasolola hatoma ngwayo Yehova amona mapwevo kupwa vavalemu ngana muze amona malunga. Chakutalilaho, Mbimbiliya yasolola ngwayo mulikulukaji lyamyaka lyakulivanga, Yehova ahanyine shipilitu yajila kuli mapwevo namalunga, nakuvakafwa valingile vyakukomwesa, vyakufwana nge kuhanjika malimi akulisezaseza. (Vili. 2:1-4, 15-18) Avawavisa nawa mangana vakayule hamwe naKulishitu. (Ngale. 3:26-29) Kaha nawa malunga namapwevo navakatambula fweto yakuyoya chahaya myaka yosena hano hamavu. (Kuso. 7:9, 10, 13-15) Vosena vatwama nawa namulimo wakwambulila vatu mujimbu wamwaza nakuvanangula. (Mateu 28:19, 20) Chakutalilaho, mukanda waVilinga wahanjika milimo azachile Pilishila hamwe kaha nalunga lyenyi Akwila, vaze valumbunwinyine Apolo, lunga uze apwile wakutanga chikuma, muchano mujila yakwoloka.—Vili. 18:24-26.
5. Kweseka naLuka 10:38, 39, 42, Yesu amwenenga ngachilihi mapwevo?
5 Yesu avumbikilenga mapwevo. Kalondezezelenga vaFwaliseu vaze vamwenenga mapwevo kupwa vamokomoko, nakukana kuvahanjikisa chipwe kuvanangula Visonekako. Oloze Yesu ashimutwililenga vyuma vyakushipilitu hamwe namapwevo, namalunga. * (Tangenu Luka 10:38, 39, 42.) Kaha nawa havatu vaze atambukilenga navo hakuya nakwambulula, hapwilenga namapwevo. (Luka 8:1-3) Ahanyine nawa mapwevo mulimo wakuya nakulweza vaposetolo ngwavo Yesu nasanguka.—Yowa. 20:16-18.
6. Uno kaposetolo Paulu asolwele ngachilihi ngwenyi amwenenga mapwevo kupwa vavalemu?
6 Kaposetolo Paulu amwenenga mapwevo kupwa vavalemu. Chakutalilaho, alwezele Chimoteu amonenga ‘vakulwane vamapwevo nge hivanaye,’ kaha ‘vanyike vamapwevo nge vandumbwenyi.’ (Chimo. 1, 5:1, 2) Numba tuhu Paulu akafwile chikuma Chimoteu azovoloke kushipilitu, oloze ahanjikile ngwenyi Chimoteu vamunangwile “mikanda yajila” kuli naye nakaka yenyi. (Chimo. 2, 1:5; 3:14, 15) Kaha nawa mumukanda uze atumine kuLoma, amenekele vandumbwenyi vamapwevo halijina halijina. Atachikijile milimo vapwile nakuzata. Ngocho avasakwililile hakukilikita chavo.—Loma 16:1-4, 6, 12; Fwili. 4:3.
7. Vihula muka natushimutwila?
7 Nganomu tunashimutwila mujipalangalafu jinafumuho, Visoneka kavyasolola nge malunga vapwa vavalemu kuhambakana mapwevoko. Vandumbwetu vamapwevo veji kukafwanga chikuma chikungulwilo. Kaha vakulwane veji kuvasakwililanga hakukilikita chavo, mangana chikungulwilo chipwenga mukuunda nakulinunga. Oloze kuli vihula vimwe twatela kukumbulula. Chakutalilaho, mwomwo ika Yehova asakila ngwenyi vandumbwetu vamapwevo lwola lumwe vafwikenga kumutwe? Hakuwana nge vandumbwetu vamalunga kaha vakiko veji kutongolanga vapwenga vakulwane chipwe vaka-kuzachila, kutala echi chalumbununa nge vandumbwetu vamalunga vosena vapwa mitwe yavandumbwetu vosena vamapwevo tahi?
KUTALA VANDUMBWETU VOSENA VAMALUNGA VAPWA MITWE YAVANDUMBWETU VOSENA VAMAPWEVO TAHI?
8. Kweseka naWavaka-Efwesu 5:23, uno vandumbwetu vosena vamalunga vapwa mitwe yavandumbwetu vamapwevo vosena tahi? Lumbununenu.
8 Kukumbulula mukavatu ngwetu, nduma. Ndumbwetu walunga kapwa mutwe wavandumbwetu vosena vamapwevo muchikungulwiloko. Oloze Kulishitu ikiye mutwe wachikungulwilo. (Tangenu Wavaka-Efwesu 5:23.) Lunga mutanga akwechi wata hali pwevo lyenyi. Ndumbwetu walunga wakumbapachisa keshi nawata hali nayeko. (Efwe. 6:1, 2) Vakulwane muchikungulwilo kavatwama nawata wauvulu hali vandumbwetu vamapwevo, nava vamalungako. (Teso. 1, 5:12; Hepe. 13:17) Ndumbwetu wapwevo wamujike uze keshi cheka kukanda yavisemi jenyiko, mwatwalangaho lika kuvavumbika nakuvumbika vakulwane muchikungulwilo. Shikaho, mapwevo namalunga muchikungulwilo, mutwe wavo apwa kaha Yesu.
Vandumbwetu vamapwevo vavajike vaze kaveshi cheka kukanda yavisemi javoko, vatwama muwata waYesu (Talenu palangalafu 8)
9. Mwomwo ika vandumbwetu vamapwevo shimbu jimwe vatela kufwikila kumutwe?
9 Yehova katongola mapwevo vatwaminyine chikungulwiloko, oloze atongola malunga. (Chimo. 1, 2:12) Mwomwo ika? Mangana vyuma muchikungulwilo vitambuke mukulonga, ngana muze atongola Yesu kupwa mutwe walunga. Yehova asaka ngwenyi nge nakupwa vyuma vimwe vize navilingisa ndumbwetu wapwevo azate mulimo uze vatelanga kuzata kuli ndumbwetu walunga, kaha ndumbwetu kana atela kufwika kumutwe. * (Koli. 1, 11:4-7) Echi kachalumbununa nge Yehova amona mapwevo kupwa vamokomokoko. Oloze asaka vasolole ngwavo vavumbika wata uze ahakako. Tushimutwilenu jino chihula chino: Wata muka vatwama nawo mitwe yajitanga navakulwane muchikungulwilo?
MULIMO WAMITWE YAJITANGA NAVAKULWANE MUCHIKUNGULWILO
10. Chuma muka chinahase kulingisa mukulwane atungile vandumbwenyi jishimbi?
10 Vakulwane muchikungulwilo vazanga Kulishitu, ‘namikoko’ vaze vavahana kuli Yehova naYesu kulamanga. (Yowa. 21:15-17) Mukulwane muchikungulwilo nahase kushinganyeka ngwenyi vaka-kwambulula vapwa ngana mwavana venyi mwomwo yakuvazakama. Nahase kushinganyeka ngwenyi hakuwana nge mutwe watanga atwama nalisesa lyakutunga jishimbi jize najikinga tanga yenyi, namukulwane nahase kutunga jishimbi jize nashinganyeka ngwenyi najikinga mikoko jaKalunga. Vandumbwetu vamwe vanahase kulingisa mukulwane muchikungulwilo apwenga mutwe wavo kushipilitu, hakumulweza avasakwile vyakulinga. Kutala vakulwane muchikungulwilo namitwe yajitanga, vakwechi wata woumwe tahi?
Vakulwane muchikungulwilo veji kuzakamanga vandumbwavo kushipilitu, nakuvalingisa vapwenga vakukingiwa. Yehova avahana nawa mulimo wakulingisa chikungulwilo chipwenga chitoma (Talenu palangalafu 11-12)
11. Uno wata wamutwe watanga walifwanyina halihi nawata wamukulwane muchikungulwilo?
11 Paulu asolola ngwenyi wata atwama nawo mutwe watanga walifwanako chindende nawata atwama nawo mukulwane muchikungulwilo. (Chimo. 1, 3:4, 5) Chakutalilaho, asonekele ngwenyi Yehova asaka tanga yononokenga kuli mutwe watanga. (Kolo. 3:20) Kaha nawa asaka vatu muchikungulwilo vononokenga vakulwane. Asaka nawa mitwe yajitanga navakulwane muchikungulwilo vazakamenga vaze vali mwishi yavo kushipilitu. Kaha nawa vatela kuvalingisa vamone ngwavo vavazanga. Ngana mwamitwe yajitanga vamwenemwene, vakulwane muchikungulwilo veji kukafwanga vandumbwavo kachi nge vali muukalu. (Yako. 2:15-17) Numba tuhu Yehova asaka vakulwane namitwe yajitanga vakafwe vakwavo vononoke jishimbi jenyi, oloze kasaka ‘vahambakanenga havyuma vasoneka’ muMbimbiliyako.—Koli. 1, 4:6.
Mitwe yajitanga vavahana wata kuli Yehova mangana vatwaminyine jitanga javo. Mutwe watanga wamwenemwene, eji kuvangilanga kushimutwila napuwenyi shimbu kanda asakule vyakulinga (Talenu palangalafu 13)
12-13. Kweseka naWavaka-Loma 7:2, mujila muka wata vatwama nawo mitwe yajitanga walihandununa nawata vatwama nawo vakulwane muchikungulwilo?
12 Hatwama nawa chihandwa hawata atwama nawo mutwe watanga, nauze atwama nawo mukulwane muchikungulwilo. Chakutalilaho, Yehova ahana vakulwane mulimo wakusopa vihande muchikungulwilo, nakufumisa mutu wakuhona kupihilila nakwalumuka muchikungulwilo.—Koli. 1, 5:11-13.
13 Oloze Yehova ahana nawa mitwe yajitanga wata, uze kavatwama nawo vakulwaneko. Chakutalilaho, avahana ngolo jakutunga jishimbi jize vatela kukavangiza vaka-jitanga javo. (Tangenu Wavaka-Loma 7:2.) Chakutalilaho, mutwe watanga nahase kutunga lushimbi ngwenyi vana venyi kavatela kukindulukanga hembo naufukuko. Atwama nangolo jakuzangamisa vana venyi, kachi nge vanahono kukavangiza lushimbi kana. (Efwe. 6:1) Chipwe ngocho, mutwe watanga wamwenemwene eji kuvangilanga kushimutwila napuwenyi shimbu kanda akase jishimbi, mwomwo vapwa “mujimba umwe.” *—Mateu 19:6.
VUMBIKENUNGA KULISHITU HAKUPWA MUTWE WACHIKUNGULWILO
Yesu vamuhana ngolo kuli Yehova mangana atetekele chikungulwilo chavaka-Kulishitu (Talenu palangalafu 14)
14. (a) Kweseka Mako 10:45, mwomwo ika chapwila chakutamo Yehova kutongola Yesu kupwa mutwe wachikungulwilo? (b) Uno Lizavu lyaKutwaminyina lyazata mulimo muka? (Talenu lipwata lyakwamba ngwavo “Mulimo Lyazata Lizavu lyaKutwaminyina.”)
14 Yehova ahanyine ndando yakusokola mangana alande mutu himutu muchikungulwilo, naweshowo mwafwelela Yesu. (Tangenu Mako 10:45; Vili. 20:28; Koli. 1, 15:21, 22) Shikaho chapwile chakutamo kutongola Yesu uze atufwililile, mangana apwenga mutwe wachikungulwilo. Hakupwa mutwe, Yesu atwama nangolo jakuhakako jishimbi jize vatela kukavangiza vatu, najitanga, nachikungulwilo chosena. (Ngale. 6:2) Yesu katwama kaha namulimo wakutunga jishimbiko, oloze eji kutuzakamanga nawa nakutusolwela zangi.—Efwe. 5:29.
15-16. Vyuma muka munalinangula kumazu ahanjikile ndumbwetu Marley, nandumwetu Benjamin?
15 Vandumbwetu vamapwevo veji kusololanga ngwavo vavumbika Kulishitu, hakuliluula kuli malunga atongola mangana vavazakame. Vandumbwetu vamapwevo vavavulu veji kwivwanga ngana muze eji kwivwanga ndumbwetu Marley wakuUnited States. Ambile ngwenyi: “Ngwasuuluka hakupwa ngupwevo lyamutu, namulimo ngwatwama nawo muchikungulwilo. Ngweji kuzatanga nangolo mangana nguliluule kuwata uze Yehova ahana lunga lyami, navakulwane muchikungulwilo. Chapwa chachashi kuliluula, mwomwo lunga lyami navandumbwami vamalunga muchikungulwilo veji kunguvumbikanga, nakungusakwilila hamilimo ngweji kuzatanga.”
16 Vandumbwetu vamalunga nawa veji kusololanga ngwavo vatachikiza mwakuzachishila wata, hakuvumbika vandumbwetu vamapwevo. Ndumbwetu Benjamin wakuEngland, ambile ngwenyi: “Ngunalinangula vyavivulu kuvyuma veji kukumbululanga vandumbwami vamapwevo hakukunguluka, najila yakulinangwilamo Mbimbiliya, namwakupwila muka-kwambulula wakwipangweji. Chikupu vene mulimo veji kuzatanga wapwa waulemu chikuma.”
17. Mwomwo ika twatela kuvumbikila wata uze ahakako Yehova?
17 Shikaho muchikungulwilo munahase kupwa kuunda, kachi nge vosena, malunga namapwevo, namitwe yajitanga, navakulwane muchikungulwilo, navatachikiza wata ahakako Yehova nakuliluula kuwata kana. Chuma chachinenenyi shina nachineha kavumbi hali Setu wamwilu wazangi, Yehova.—Samu 150:6.
MWASO 123 Kuliluula kuLiuka lyaYehova
^ par. 5 Mulimo muka vatwama nawo vandumbwetu vamapwevo muchikungulwilo? Kutala vandumbwetu vosena vamalunga vapwa mitwe yavandumbwetu vosena vamapwevo tahi? Uno vakulwane muchikungulwilo namitwe yajitanga, vakwechi wata woumwe tahi? Muchihande chino, natumona omu Mazu aKalunga akumbulula vihula kana.
^ par. 5 Talenu palangalafu 6 muchihande chakwamba ngwavo, “Zakamenunga Vandumbwetu vaMapwevo,” muKaposhi Kakutalila waSeptember 2020.
^ par. 9 Talenu lipwata lyakwamba ngwavo, “ Lwola Muka Ndumbwetu Wapwevo Atela Kufwika kuMutwe?”
^ par. 13 Hakusaka mutachikize owo atela kusakwila tanga muchikungulwilo vatela kupwa, talenu chihande chakwamba ngwavo “Vumbikenunga Vakwenu muChikungulwilo chaYehova,” muKaposhi Kakutalila waAugust 2020, palangalafu 17-19.
^ par. 59 Hakusaka mutachikize vyavivulu hachihande kana, talenu mukanda wakwamba ngwavo, ‘Twamenunga muZangi yaKalunga,’ lifwo 209-212.
^ par. 64 Hakusaka mutachikize vyavivulu kutalisa kumulimo lyazata Lizavu lyaKutwaminyina, talenu Kaposhi Kakutalila waJuly 15, 2013, lifwo 20-25.
