CHIHANDE CHAKULINANGULA 5
“Mutwe waLunga hiLunga Apwa Kulishitu”
“Mutwe walunga hilunga apwa Kulishitu.”—KOLI. 1, 11:3.
MWASO 12 Yehova Apwa Kalunga Wakulitulaho
VYUMA NATUSHIMUTWILA *
1. Vyuma muka vinahase kulingisa lunga azachise wata wenyi mujila yakuhenga?
UNO kupwa “mutwe” chalumbununa ika? Malunga vamwe veji kutwamanga namapwevo javo navana vavo, kweseka nachisemwa chavo chipwe jila vavalelelelemo. Ndumbwetu wapwevo Yanita wakuEurope, ambile ngwenyi, “Okwo ngwatwama, vatu vashinganyeka ngwavo mapwevo kavapwa vavalemu ngana mwamalungako, ngocho vatela kuvamona nge hivangamba.” Ndumbwetu Luke wakuUnited States nawa ambile ngwenyi, “Visemi vamwe vamalunga veji kunangulanga vana vavo vamalunga ngwavo kavatela kwivwililanga vyuma mwahanjika pwevoko.” Oloze vishinganyeka kana vyalimbalaka najila yakuzachishilamo wata yize asaka Yehova. (Esekesenuko Mako 7:13.) Jino vyuma muka navikafwa lunga apwenga mutwe watanga wamwenemwene?
2. Vyuma muka atela kutachikiza mutwe watanga, kaha mwomwo ika?
2 Nge lunga mwatachikiza vyuma asaka Yehova ngwenyi alingenga, kaha mwapwa mutwe watanga wamwenemwene. Atela nawa kutachikiza ovyo Yehova ahakililileko wata, najila atela kulondezezelamo chakutalilaho chaYehova naYesu. Mwomwo ika lunga atela kutachikijila vyuma kana? Mwomwo Yehova ikiye ahana mitwe yajitanga wata, ngocho asaka vauzachisenga kanawa.—Luka 12:48b.
OMWO CHALUMBUNUKILA KUPWA MUTWE
3. Uno chisoneka chaWavaka-Kolinde 1, 11:3, chatunangula ika kutalisa kuwata?
3 Tangenu Wavaka-Kolinde 1, 11:3. Eyi vesi yalumbununa jila yize Yehova alongeselamo tanga yenyi yamwilu nahamavu. Kupwa mutwe chasakiwa vyuma vivali. Wata nakutesamo milimo. Yehova ikiye “mutwe” chipwe mwata wakulitulaho. Ngocho asaka vana venyi vamwilu nava vahamavu vazachisenga kanawa wata uze avahana. (Loma 14:10; Efwe. 3:14, 15) Yehova ahana Yesu wata wakutwaminyina chikungulwilo. Chipwe ngocho, eji kumonanga mujila Yesu eji kututwaminyinangamo. (Koli. 1, 15:27) Yehova ahana nawa lunga wata wakutwaminyina puwenyi navana venyi. Chipwe ngocho, Yehova naYesu veji kumonanga mujila lunga eji kutwaminyinangamo tanga yenyi.—Petu. 1, 3:7.
4. Uno Yehova naYesu vakwechi ngolo jakulinga ika?
4 Yehova ikiye Mutwe watanga yosena yamwilu nahamavu. Ngocho akwechi ngolo jakuhakako jishimbi jize vatela kukavangiza vana venyi. (Isa. 33:22) Yesu nawa uze apwa mutwe wachikungulwilo chavaka-Kulishitu, akwechi lisesa lyakuhakako jishimbi jize twatela kukavangiza.—Ngale. 6:2; Kolo. 1:18-20.
5. Jingolo muka atwama najo mutwe watanga uze apwa muka-Kulishitu, kaha jakumina halihi?
5 Ngana muze chapwa kuli Yehova naYesu, namutwe watanga uze apwa muka-Kulishitu, akwechi ngolo jakutungila tanga yenyi jishimbi. (Loma 7:2; Efwe. 6:4) Chipwe ngocho, ngolo jenyi jatwama noho jakumina. Chakutalilaho, jishimbi mwatunga jatela kupendamina hajindongi jamuMazu aKalunga. (Vishi. 3:5, 6) Kaha nawa mutwe watanga katwama nalisesa lyakutungila jishimbi vaze kaveshi vakukanda yenyiko. (Loma 14:4) Numba tuhu vana venyi navatwalangaho lika kumuvumbika, oloze nge vanalimanyina lyehi, keshi cheka nangolo hali vakikoko.—Mateu 19:5.
MWOMWO IKA YEHOVA AHAKILAKO WATA?
6. Mwomwo ika Yehova ahakilileko wata?
6 Wata wapwa wana wakufuma kuli Yehova. Auhakileko mwomwo azanga tanga yenyi. Wata weji kulingisanga tanga yaYehova yitwame mukuunda nakuzata vyuma mukulonga. (Koli. 1, 14:33, 40) Nge Yehova kahakileko watako kachi vyuma kavyatambuka kanawako, kaha nawa tanga yenyi kachi kayapwa yakuwahililako. Chakutalilaho, kachi vatu kavatachikiza owo atela kutunga jishimbi nowo atela kujikavangizako.
7. Kweseka naWavaka-Efwesu 5:25, 28, uno Yehova ajinyine ngwenyi malunga valyachililenga mapwevo tahi?
7 Kachi nge wata ahakako Kalunga wapwa wamwaza, kaha mwomwo ika mapwevo vali nakuvayanjisa nakuvalyachilila kuli malunga javo? Chapwa ngocho mwomwo malunga vavavulu vahumbula jishimbi jaYehova, nakukavangiza visemwa vyavo. Veji kuyanjisanga nawa mapwevo javo mwomwo yakufwila vyuma vize vasaka vavene. Chakutalilaho, lunga nahase kulyachilila puwenyi mwomwo yakufwila kulimona kupwa wamulemu, chipwe kufwila kulisolola kuvatu ngwenyi apwa lunga wakutakama. Nahase kushinganyeka ngwenyi keshi kuhasa kushinjila puwenyi amuzangeko, oloze mwamulingisa amwivwenga woma nakuputuka jino kumulyachilila. * Vishinganyeka kana vyeji kulingisanga vatu vahone kuvumbika mapwevo, kaha vyalimbalaka namwaya kujina chaYehova.—Tangenu Wavaka-Efwesu 5:25, 28.
CHUMA MUKA NACHIKAFWA LUNGA APWENGA MUTWE WATANGA WAMWENEMWENE?
8. Chuma muka nachikafwa lunga apwenga mutwe watanga wamwenemwene?
8 Nge lunga mwalondezeza jila Yehova naYesu veji kuzachishilangamo wata wavo, kaha mwapwa mutwe watanga wamwenemwene. Tushimutwilenu havilinga vivali atwama navyo Yehova naYesu mangana tumone omwo vinahase kukafwa mutwe watanga atwamenga kanawa napuwenyi navana venyi.
9. Uno twatachikiza ngachilihi ngwetu Yehova apwa wakulinyisa?
9 Kulinyisa. Numba tuhu Yehova ikiye atwama namangana chikuma, oloze eji kwivwililanga vyuma veji kuhanjikanga vangamba jenyi. (Kupu. 18:23, 24, 32) Lwola lumwe alwezele vana venyi vamulweze vishinganyeka vyavo. (Vamya. 1, 22:19-22) Yehova apwa wakukupuka. Oloze kasaka ngwenyi nayetu kuvanga tulinge vyuma mujila yakukupukako. Eji kukafwanga etu vatu vakuhona kukupuka mangana tumuzachile mujila yamwenemwene. (Samu 113:6, 7) Mbimbiliya yavuluka Yehova ngwayo apwa “muka-kukafwa.” (Samu 27:9; Hepe. 13:6) Mwangana Ndavichi atachikijile ngwenyi kulinyisa chaYehova, chikiko chamukafwilenga atesemo milimo vamuhanyinenga.—Samwe. 2, 22:36.
10. Uno twatachikiza ngachilihi ngwetu Yesu apwile wakulinyisa?
10 Tushimutwilenu chakutalilaho chaYesu. Numba tuhu apwile Mwata, kaha nawa Muka-kunangula, oloze asanyishile tumbaji twenyi kumahinji. Mwomwo ika Yehova etavishilile mujimbu kana vausoneke muMbimbiliya? Mangana ukafwe mitwe yajitanga navatu veka valinanguleko chishina chachilemu. Yesu ambile ngwenyi: “Ngunamihane chakutalilaho, mangana nayenu nawa mulingenga omu ngunalingi ami kuli enu.” (Yowa. 13:12-17) Numba tuhu Yesu apwile nawata, kasakilenga vatu vamuzachileko, oloze ikiye azachililenga vatu.—Mateu 20:28.
Mutwe watanga mwasolola ngwenyi apwa wakulinyisa, nakuzanga tanga yenyi nge mwazatanga milimo yahakanda nakuvazakama kushipilitu (Talenu palangalafu 11, 13)
11. Vyuma muka nahase kulinangula mutwe watanga kuli Yehova naYesu kutalisa kukulinyisa?
11 Vishina natulinangulako. Mutwe watanga nahase kusolola ngwenyi apwa wakulinyisa mujijila jajivulu. Chakutalilaho, kafwila puwenyi navana venyi valingenga vyuma mujila yakukupukako. Eji kwitavilanga vishinganyeka vyavo numba tuhu kavyalifwanyine nomwo munayi vishinganyeka vyenyiko. Marley wakuUnited States, ambile ngwenyi: “Lwola lumwe, ami nalunga lyami tweji kupwanga navishinganyeka vyakulihandununa. Oloze ngwamona ngwami angumona kupwa nguwamulemu nakunguvumbika, mwomwo shimbu kanda asakule vyakulinga eji kunguhulisanga evwenga vishinganyeka vyami.” Kaha nawa lunga wakulinyisa eji kulisuulanga kuzata milimo yahakanda, numba tuhu vatu mungalila vayimona ngwavo milimo kana yamapwevo. Chuma kana kachapwa chachashiko. Mwomwo ika? Ndumbwetu wapwevo Rachel ambile ngwenyi, “Okwo ngwafuma, nge lunga mwakafwa puwenyi kukosa malonga chipwe kukomba, kaha vausoko navatu veka muchitungilo navamumona kupwa wakuhulama. Navashinganyeka nawa ngwavo vamwingila kuli puwenyi.” Nge evi vikiko vishinganyeka vyatwama mungalila yenu, kaha anukenu ngwenu Yesu asanyishile tumbaji twenyi kumahanji, numba tuhu mulimo kana wapwilenga wavangamba. Mutwe watanga wamwenemwene, kafwila kusuulwisa vatu muchitungileko, oloze afwila kusuulwisa puwenyi navana. Vilinga vyeka muka vinahase kukafwa mutwe watanga?
12. Uno zangi yalingisa Yehova naYesu valinge ika?
12 Zangi. Yehova eji kulinganga vyuma vyosena mwomwo yazangi. (Yowa. 1, 4:7, 8) Eji kutuzakamanga kushipilitu kuhichila muMazu enyi Mbimbiliya naliuka lyenyi. Eji kutukafwanga nawa tumone ngwetu tuvakukingiwa hakutufwelelesa ngwenyi atuzanga. Eji kutukafwanga nawa tupwenga navyakulikafwa navyo mukuyoya mwomwo Mbimbiliya ngwayo “eji kutuhananga vyuma vize tweji kulivwisanga kuwaha.” (Chimo. 1, 6:17) Numba tuhu eji kutuzangamisanga nge tunalimbenje, oloze eji kutwalangaho lika kutuzanga. Kaha nawa Yehova alongesele ndando yakusokola mwomwo atuzanga. Yesu nawa atuzanga chikuma mwomwo alisuwile kutufwila. (Yowa. 3:16; 15:13) Kakweshi chuma nachihonesa Yehova naYesu kuzanga vatu vaze vapwa vakushishika kuli vakikoko.—Yowa. 13:1; Loma 8:35, 38, 39.
13. Mwomwo ika mutwe watanga atela kusolwela tanga yenyi zangi? (Talenu lipwata lyakwamba ngwavo, “ Vyuma Atela Kulinga Lunga Uze Nambate Kalinwaha Mangana Vamuvumbikenga Kuli Puwenyi.”)
13 Vishina natulinangulako. Vyuma vyosena mwalinganga mutwe watanga atela kuvilinga muzangi. Mwomwo ika? Kaposetolo Yowano asonekele ngwenyi: “Ou azeneka kuzanga ndumbwenyi ou amona, [chipwe tanga yenyi] keshi kuhasa kuzanga Kalunga uze kumonako.” (Yowa. 1, 4:11, 20) Lunga uze azanga tanga yenyi, nakusaka nawa kulondezeza Yehova naYesu, eji kuzakamanga tanga yenyi kushipilitu, namuvishinganyeka, nakuvatondela vyakulikafwa navyo. (Chimo. 1, 5:8) Eji kunangulanga vana venyi nakuvazangamisa. Kaha nawa eji kusakulanga kulinga vyuma vize navineha kavumbi hali Yehova, nakunganyalisa tanga yenyi. Tushimutwilenu jino havyuma atela kulinga mutwe watanga, najijila nahase kulondezezelamo Yehova naYesu.
VYUMA ATELA KULINGA MUTWE WATANGA
14. Uno mutwe watanga eji kuzakamanga ngachilihi tanga yenyi kushipilitu?
14 Kuzakama tanga yenyi kushipilitu. Yesu alondezezelenga ise mwomwo azakaminenga vaka-kumukavangiza kushipilitu. (Mateu 5:3, 6; Mako 6:34) Chochimwe nawa, chuma chachilemu chize mutwe watanga atela kulingila tanga yenyi, shina kuyizakama kushipilitu. (Lushi. 6:6-9) Atela kulinga ngocho hakulinangwilanga hamwe navo Mazu aKalunga, nakuyanga navo kukukunguluka, namuwande, nakuvakafwa vatunge usoko naYehova.
15. Jila muka yize mutwe watanga mwasolwelamo ngwenyi azakama tanga yenyi muvishinganyeka?
15 Kuzakama tanga yenyi muvishinganyeka. Yehova ahanjikilenga hatoma ngwenyi azanga Mwanenyi. (Mateu 3:17) Vyuma ahanjikilenga Yesu, navize alingilenga vyasolwele hatoma nge azangile tumbaji twenyi. Echi chalingishile navakiko vamuzange. (Yowa. 15:9, 12, 13; 21:16) Chochimwe nawa, mutwe watanga mwasolola ngwenyi azanga vana venyi napuwenyi kuhichila muvyuma mwalinga, vyakufwana nge kulinangwila navo hamwe Mbimbiliya. Atela nawa kuvalweza ngwenyi avazanga nakuvamona kupwa vavalemu. Kaha nge chinahase, atela nawa kuvasangejekanga numba vene hakachi kavatu.—Vishi. 31:28, 29.
Mutwe watanga atela kutondelanga tanga yenyi vyakulikafwa navyo mangana evwise Yehova kuwaha (Talenu palangalafu 16)
16. Chuma muka chikwavo atela kulinga mutwe watanga, kaha atela kulihenda kuchuma muka?
16 Kutondela vaka-tanga yenyi vyakulikafwa navyo. Yehova ahanyinenga vaIsalele vyakulikafwa navyo, nahalwola avazangamishilenga mwomwo yakulikanga chavo. (Lushi. 2:7; 29:5) Namakumbi ano, eji kutuhananga vyakulikafwa navyo. (Mateu 6:31-33; 7:11) Yesu nawa alishilenga vaka-kumukavangiza. (Mateu 14:17-20) Okilenga nawa misongo yavo. (Mateu 4:24) Mutwe watanga atela kutondela vaka-tanga yenyi vyakulikafwa navyo, mangana evwise Yehova kuwaha. Chipwe ngocho, katela kundupukila chikuma mumilimo yakukayeko, mangana awanenga lwola lwakuzakama tanga yenyi kushipilitu namuvishinganyeka.
17. Mujila muka Yehova naYesu veji kutunangwilangamo nakutuzangamisa?
17 Kuvanangula. Yehova eji kutunangulanga nakutuzangamisa mangana tunganyale. (Hepe. 12:7-9) Yesu eji kulondezezanga ise hakunangula vaka-kumukavangiza muzangi. (Yowa. 15:14, 15) Numba tuhu eji kutuhuhumunanga, oloze apwa walikoji. (Mateu 20:24-28) Atachikiza ngwenyi katwakupukako, ngocho tunahase kulimbenja.—Mateu 26:41.
18. Vyuma muka eji kuliulanga mutwe watanga wamwenemwene?
18 Mutwe watanga uze eji kulondezezanga Yehova naYesu, apwa muka kuliula tutenga twapuwenyi navana venyi. Kaha nawa ‘kavakwachila chikuma matotoko.’ (Kolo. 3:19) Eji kukavangizanga chisoneka chaWavaka-Ngalesha 6:1 hakuvolola “nashipilitu yayivwovu,” mwomwo atachikiza ngwenyi naikiye nawa kakupukako. Atachikiza nawa ngwenyi jila yamwaza yakuvanangwilamo shina, kuvahana chakutalilaho chamwaza, ngana muze alingilenga Yesu.—Petu. 1, 2:21.
19-20. Uno mutwe watanga mwalondezeza ngachilihi Yehova naYesu nge ali nakusakula vyakulinga?
19 Kusakula vyuma vize navinganyalisa tanga. Yehova eji kusakulanga vyuma vize vyeji kunganyalisanga vatu jenyi. Chakutalilaho, kahakileko kuyoya mangana alinganyalise iveneko, oloze mangana tulivwisengacho kuwaha. Kakweshi mutu amushinjilile mangana atume Mwanenyi ezenga nakutufwilako. Alisuwile kulinga chuma kana mangana atunganyalise etu. Yesu nawa asakwilenga kulinga vyuma vize vyanganyalishilenga vakwavo. (Loma 15:3) Chakutalilaho, aputukile kunangula vatu halwola atelelele kutwama nakunoka.—Mako 6:31-34.
20 Namutwe watanga wamwenemwene amona ngwenyi kusakula vyuma vize navinganyalisa tanga yenyi chapwa chachilemu numba tuhu chapwa chachikalu. Eji kulihendanga kukusakula vyuma chakuzeneka kushinganyekaho, chipwe kweseka namunayi vishinganyeka vyenyi. Eji kwitavilanga kumunangula kuli Yehova. * (Vishi. 2:6, 7) Echi cheji kumukafwanga asakule vyuma vize navinganyalisa vakwavo keshi ikiyeko.—Fwili. 2:4.
21. Vyuma muka natushimutwila muchihande nachikavangizaho?
21 Yehova ahana mitwe yajitanga mulimo waukalu, kaha asaka vazate nangolo mangana vautesemo. Shikaho nge lunga mwakilikita mangana alondezeze Yehova naYesu, kaha mwapwa mutwe watanga wamwenemwene. Nge puwenyi nawa mwatesamo mulimo wenyi, kaha navapwa vakuwahilila muulo wavo. Uno pwevo atela kumona ngachilihi wata vahana lunga lyenyi? Kaha ukalu muka nahase kumona? Chihande nachikavangizaho nachikumbulula vihula kana.
MWASO 16 Alisenu Yehova Mwomwo yaMwanenyi Wakuwavisa
^ par. 5 Nge lunga nambate, eji kupwanga jino mutwe watanga. Muchihande chino natushimutwila omwo Yehova alongesa wata, novyo auhakilako navyuma vanahase kulinangula malunga kuchakutalilaho chenyi naYesu. Muchihande nachikavangizaho natushimutwila havyuma vanahase kulinangula valunga napwevo kuli Yesu, nakuvyakutalilaho vyeka vyamuMbimbiliya. Kaha muchihande chamuchitatu, natukashimutwila hajila vandumbwetu vamalunga, vatela kuzachishilamo wata vavahana muchikungulwilo.
^ par. 7 Lwola lumwe, vyuma veji kuhanjikanga hajipolongalamu jahatelevijini, nahavisaji vyahapeho, namujivindiyo, navize veji kuhanjikanga vaka-lyepe, vyeji kusololanga nge chapwa chakutamo mutu kuyanjisa puwenyi. Ngocho vatu vanahase kushinganyeka ngwavo kachapwa chakuhengako mutu kutwama chivwoto puwenyi.
^ par. 20 Nge munakusaka kutachikiza mwakusakwila kanawa vyakulinga, kaha talenu chihande chakwamba ngwavo, “Sakulenu Vyuma Vyakulinga Vize Navineha Kavumbi Kuli Kalunga,” muKaposhi Kakutalila waApril 15, 2011, lifwo 13-17.
