1. Vihula muka atela kulihulisa ndumbwetu wapwevo hakusakula mutu wakulimbata nenyi?

VAKA-KULISHITU vosena vatwama mwishi yaYesu Kulishitu, uze apwa twamina wakukupuka. Oloze nge pwevo muka-Kulishitu nasomboka, eji kupwanga mwishi yalunga uze kakupukako. Chuma kana kachapwa chachashiko. Shikaho shimbu kanda asomboke, nachiwaha nge mwalihulisa ngwenyi: ‘Unjiho muka ngunamono wakusolola nge, ou ndumbwami mwakapwa mutwe watanga wamwenemwene? Kutala ahaka mangana kuvyuma vyakushipilitu tahi? Nge chiku, nangutachikiza ngachilihi ngwami, mwakangutwaminyina kanawa kushipilitu nge tunalimbate lyehi?’ Atela nawa kulihulisa ngwenyi: ‘Vilinga muka nguli navyo vize navikatukafwa muulo wetu? Kutala ngwatwama namuchima wakutalilila chikoki, nazumbu tahi? Kutala nguli nausoko wakukola naYehova tahi?’ (Kwambu. 4:9, 12) Nge ndumbwetu wapwevo mwasakula kanawa vyuma vyakulinga shimbu kanda asomboke, kaha mwakapwa naulo wakufukila kaha nawa wakuwahilila.

2. Vyuma muka natushimutwila muchihande chino?

² Vandumbwetu vamapwevo vavavulu, veji kusololanga chakutalilaho chamwaza hakuliluula kuli malunga javo. Shikaho tweji kuvasakwililanga chikuma. Tweji kwivwanga kuwaha kuzachila Yehova hamwe kaha navava vandumbwetu vamapwevo vakushishika. Muchihande chino, natukumbulula vihula vino vitatu: (1) Ukalu muka nahase kumona pwevo wakusomboka? (2) Mwomwo ika pwevo atela kuliluwila kuli lunga lyenyi? (3) Uno chakutalilaho chaYesu, naAvingayile, naMaliya naye yaYesu vinahase kukafwa ngachilihi vapwevo nalunga vaze vapwa vaka-Kulishitu vapwenga vakwononoka?

3. Mwomwo ika vaka-kulimbata vosena veji kumwenenga ukalu?

³ Numba tuhu ulo wapwa wana wakukupuka wakuli Kalunga, oloze vatu kavakupukako. (Yowa. 1, 1:8) Echi chikiko chalingisa Mazu aKalunga ahanjike ngwawo valunga napwevo vaze valimbata navamonanga ukalu, uze vafwanyisa ‘kuluyando mumijimba yavo.’ (Koli. 1, 7:28) Tushimutwilenu haukalu umwe uze nahase kumona pwevo wakusomboka.

4. Chuma muka chinahase kulingisa pwevo ashinganyeke ngwenyi nge mwaliluula kuli lunga lyenyi, kaha mwasoloka nge wakuhehela?

⁴ Jila vamulelelelemo pwevo yinahase kumulingisa ashinganganyeke ngwenyi kuliluula kuli lunga lyenyi nachimusolola kupwa wakuhehela. Ndumbwetu Marisol wamuUnited States ambile ngwenyi: “Okwo ngwakolelele, mapwevo vavanangwilenga ngwavo vatela kweseka hamwe namalunga muvyuma vyosena. Oloze ami ngwatachikiza ngwami Yehova atongola malunga vapwenga mitwe yajitanga. Kaha asaka mapwevo valiluulenga kumalunga javo. Namapwevo vatwama namulimo waulemu, oloze chapwa chachikalu kuvumbikanga lunga lyami lwola lwosena mwomwo vatu mukaye kavachimona kupwa chamwazako.”

5. Vishinganyeka muka vyalimbalaka naVisoneka vize vyeji kulingisanga malunga vamone mapwevo kupwa vamokomoko?

⁵ Mapwevo vamwe vasomboka kumalunga vaze vamona ngwavo mapwevo kavapwa vavalemuko. Ndumbwetu wapwevo Ivon, wakuSouth America ambile ngwenyi: “Kungalila yetu, malunga vakiko veji kulivanganga kulya. Vanyike vamapwevo vakiko veji kuzatanga milimo yahakanda. Oloze vamalunga kavayizatako mwomwo vavalweza ngwavo vapwa vavalemu chikuma.” Ndumbwetu wapwevo Yingling wakuAsia ambile ngwenyi: “Mulilimi lyetu mwatwama hanjikiso yakwamba ngwavo, ‘Mapwevo kavatela kupwa namangana chipwe nauhashiko. Mulimo wavo shina wakuzata milimo yahakanda. Kavavetavisa nawa vahanjike vishinganyeka vyavo kumalunga javoko.’” Nge lunga mwakavangiza vishinganyeka kanevi vyakulimbalaka naVisoneka, kaha mwayanjisa puwenyi nakuhona kulondezeza Yesu nakwivwisa Yehova kupihya.—Efwe. 5:28, 29; Petu. 1, 3:7.

6. Vyuma muka vatela kulinga mapwevo vakusomboka mangana vazamise usoko wavo naYehova?

⁶ Ngana muze twashimutwilanga muchihande chinafumuho, Yehova asaka lunga muka-Kulishitu azakamenga tanga yenyi kushipilitu, namuvishinganyeka nakuyitondela vyakulikafwa navyo. (Chimo. 1, 5:8) Chipwe ngocho, vandumbwetu vamapwevo vakusomboka, vatela kuwanangako lwola lwakutanga Mazu aKalunga nakushinganyekangaho, nakulombanga chikuma kuli Yehova. Kulinga vyuma kana chinahase kupwa chachikalu. Olozenyi atela kuwananga lwola lwakulinga vyuma kana. Mwomwo ika? Mwomwo Yehova asaka mutu himutu atunge usoko naikiye.—Vili. 17:27.

7. Chuma muka nachikafwa pwevo aliluule kuli lunga lyenyi?

⁷ Pwevo atela kuzata nangolo mangana aliluule kuli lunga lyenyi uze kakupukako. Nahase kulinga ngocho kachi nge mwatachikiza ovyo Visoneka vyahanjikila ngwavyo pwevo atela kuliluula kuli lunga lyenyi.

8. Kweseka naWavaka-Efwesu 5:22-24, mwomwo ika pwevo muka-Kulishitu atela kuliluwila kuli lunga lyenyi?

⁸ Pwevo muka-Kulishitu eji kuliluulanga kuli lunga lyenyi mwomwo omu mukiko asaka Yehova. (Tangenu Wavaka-Efwesu 5:22-24.) Afwelela ngwenyi Ise wamwilu eji kulinganga vyuma muzangi, kaha vyeshovyo mwamulweza kulinga navimunganyalisa.—Lushi. 6:24; Yowa. 1, 5:3.

9. Vyuma muka navisoloka kachi nge ndumbwetu wapwevo mwaliluula kuwata walunga lyenyi?

 ⁹ Kaye keji kulingisanga mapwevo vahumbule jishimbi jaYehova, nakushinganyeka ngwavo kachi nge pwevo mwaliluula kuwata, kaha napu wakuhehela. Chipwe ngocho, vatu vaze veji kukavangizanga vishinanyeka kana kavatachikiza Kalungako. Yehova keshi kuhasa kuhana vana venyi lushimbi luze naluvalingisa vapwenga vakuhehelako. Ndumbwetu wapwevo uze eji kuzatanga nangolo mangana atesemo mulimo uze vamuhana kuli Yehova, eji kunehanga kuunda mutanga yenyi. (Samu 119:165) Kaha eji kunganyalisanga lunga lyenyi, nakulinganyalisa yivene, navana venyi.

10. Uno mazu ahanjikile ndumbwetu Carol nawatunangula vishina muka?

¹⁰ Pwevo uze eji kuliluulanga kuli lunga lyenyi uze kakupukako, eji kusololanga hatoma ngwenyi azanga Yehova nakumuvumbika. Kaha nawa amona ngwenyi ikiye ahakako wata. Ndumbwetu Carol wakuSouth America ambile ngwenyi: “Ngwatachikiza vene ngwami shimbu jimwe lunga lyami eji kulimbenjanga. Kaha vyuma ngweji kulinganga nge nalimbenje, vikiko vyeji kusololanga nge ngwamona usoko wami naYehova kupwa waulemu chipwe chiku. Ngocho ngweji kufwilanga kuliluula mwomwo ngwasaka kwivwisa kuwaha chisemi chami wamwilu.”

11. Ika yakafwile ndumbwetu Aneese apwenga namuchima wakukonekelanga, kaha mazu ahanjikile nawatunangula vyuma muka?

¹¹ Chapwa chachikalu pwevo wakusomboka kuliluula nakuvumbika lunga lyenyi kachi nge namono ngwenyi kamuzakamako. Ivwenu vyuma alingile ndumbwetu wakusomboko Aneese omu amwene vyuma kana, ambile ngwenyi: “Kangwasaka kupihililako mwomwo ngwatachikiza ngwami tuvosena tweji kulimbenjanga. Chuma ngwafwila shina kumukonekelanga namuchima wosena ngana muze eji kulinganga Yehova. Shikaho kukonekela cheji kungulingisanga ngupwenga nguwakuunda.” (Samu 86:5) Pwevo wakusomboka uze atwama namuchima wakukonekela eji kuliluulanga kuli lunga lyenyi.

12. Vyakutalilaho muka vyatwama muMbimbiliya?

¹² Vatu vamwe vashinganyeka ngwavo mutu wakuliluula apwa wakuhehela. Oloze vishinganyeka  kana vyapwa vyamakuli. MuMbimbiliya mwatwama vatu vaze valiluwilenga, kaha nawa vapwile vakumika. Tushimutwilenu havyuma natulinangula kuli Yesu, naAvingayile naMaliya.

13. Mwomwo ika Yesu eji kuliluwilanga kuli Yehova? Lumbununenu.

¹³ Numba tuhu Yesu eji kuliluulanga kuli Yehova, oloze kachalumbununa nge katwama namangana chipwe uhashiko. Jila yayashi anangwililengamo vatu yasolola nge atwama namangana. (Yowa. 7:45, 46) Yehova azachililile hamwe naYesu hakutenga vyuma vyosena mwomwo amumwene ngwenyi atwama nauhashi. (Vishi. 8:30; Hepe. 1:2-4) Kaha nawa kufuma vene haze asangukile Yesu, Yehova amuhana ‘wata wosena wamwilu nahamavu.’ (Mateu 28:18) Numba tuhu Yesu atwama nauhashi wakulinga vyuma, oloze eji kupendaminanga hali Yehova amutwaminyine. Mwomwo ika? Mwomwo azanga Ise.—Yowa. 14:31.

14. Chishina muka navalinangula malunga (a) kujila yize Yehova amwenamo mapwevo? (b) kumazu ahali Vishimo 31?

¹⁴ Chishina navalinangulako malunga. Yehova kahaka pwevo mwishi yalunga lyenyi mwomwo yakumona mapwevo kupwa vamokomokoko. Tunahanjika ngocho mwomwo Yehova asakula namapwevo namalunga vakayule hamwe naYesu. (Ngale. 3:26-29) Yehova asolola ngwenyi afwelela Mwanenyi hakumuhana wata. Chochimwe nawa, lunga wamangana atela kuhanangako puwenyi lisesa lyakulinga vyuma vimwe. Mazu aKalunga ahanjika hali pwevo wamwenemwene ngwavo, eji kuzakamanga vakuzuvo yenyi nakulanda vyuma nakusekasana. (Tangenu Vishimo 31:15, 16, 18.) Pwevo kapwa ngana mwandungo uze katwama nalisesa lyakuhanjika vyuma nashinganyekako. Oloze lunga lyenyi atela kumufwelela nakwivwilila kuvyuma mwahanjikanga. (Tangenu Vishimo 31:11, 26, 27.) Nge lunga mwazakamanga puwenyi nakumuvumbika, kaha nachipwa chachashi pwevo kuliluula kuli ikiye.

15. Chishina muka navalinangula mapwevo vasomboka kuchakutalilaho chaYesu?

¹⁵ Chishina navalinangulako mapwevo. Numba tuhu Yesu ateselengamo milimo yayivulu, oloze kashinganyeka ngwenyi nge mwaliluula kuli Yehova kaha mwasoloka nge wakuhehelako. (Koli. 1, 15:28; Fwili. 2:5, 6) Chochimwe nawa, napwevo wamwenemwene uze eji kulondezezanga Yesu, kashinganyeka ngwenyi nge mwaliluula kuli lunga lyenyi, kaha mwasoloka nge wakuhehelako. Shikaho mwakundwizanga lunga lyenyi mwomwo amuzanga, kaha nawa mwomwo azanga Yehova nakumuvumbika.

16. Kweseka naSamwele 1, 25:3, 23-28, ukalu muka amwene Avingayile? (Talenu muvwimbimbi wahalipapilo lyahelu.)

¹⁶ Avingayile asombokele kuli Navale. Navale apwile lunga walifwi, wakulivwimba, kaha nawa wakuhona kusakwilila. Chipwe ngocho, echi kachalingishile Avangayile awane kengililo kakujihilamo uloko. Nge asakile, kachi echelelele Ndavichi navatu jenyi vajihe lunga lyenyi. Oloze alingile chuma chize chakingile Navale navakuzuvo yenyi vosena. Achishinganyekenu kuhamuka apwile nacho Avingayile hakuya nakuliwana namaswalale 400, nakuhanjika mukavumbi kuli Ndavichi. Alisuwile nawa kwitavila mulonga walunga lyenyi. (Tangenu Samwele 1, 25:3, 23-28.) Ndavichi atachikijile ngwenyi chikupu vene Yehova azachishile ou pwevo wakuhamuka, mangana amukinge kukuvulumuna mulonga waunene.

17. Chishina muka navalinangula malunga kumujimbu waNdavichi naAvingayile?

¹⁷ Chishina navalinangulako malunga. Avingayile apwile pwevo wamangana. Ngocho Ndavichi evwililile kumazu enyi. Kaha echi chamukafwile ahone kupwa namulonga wamanyinga. Chochimwe nawa, lunga wamangana atela kukekesa kanawa vishinganyeka vyapuwenyi  shimbu kanda asakule vyakulinga. Pamo vyuma mwahanjika puwenyi navimukafwa ahone kusakula vyuma mujila yakuhenga.

18. Chishina muka navalinangulako mapwevo kuchakutalilaho chaAvingayile?

¹⁸ Chishina navalinangulako mapwevo. Pwevo uze avumbika Yehova nakumuzanga, eji kunganyalisanga tanga yenyi numba tuhu lunga lyenyi kazachila Yehovako, chipwe wakuhona kuhya kushipilitu. Keshi kutondatonda jila yakujihilamo uloko. Oloze nge mwavumbika lunga lyenyi nakuliluula kuli ikiye, kaha mwamulingisa etavile kulinangula muchano. (Petu. 1, 3:1, 2) Numba tuhu lunga lyenyi keshi kwitavila kulinangula muchanoko, oloze Yehova mwamusakwilila hakuliluula kuli lunga lyenyi.

19. Lwola muka pwevo atela kukana vyuma mwamulweza lunga lyenyi?

¹⁹ Pwevo muka-Kulishitu uze eji kuliluulanga kuli lunga lyenyi, keshi kukundwiza lunga lyenyiko nge mwamulweza alinge vyuma vize vyalimbalaka najindongi jamuMbimbiliya. Chakutalilaho, ndumbwetu wapwevo mwalinga ngachilihi nge lunga lyenyi uze ketavako mwamulweza ongenga, chipwe kulinga vyuma vyeka vize vyalimbalaka naMbimbiliya? Vaka-Kulishitu vosena kuhakilako navandumbwetu vakusomboka, vatela kupwa vakushishika chatete kuli Yehova Kalunga. Shikaho nge ndumbwetu wapwevo navamulweza kulinga vyuma vize vyalimbalaka naMbimbiliya, kaha atela kukana nakulumbununa mujila yalikoji ovyo nakanyina.—Vili. 5:29.

20. Uno twatachikiza ngachilihi ngwetu Maliya apwile nausoko wakukola naYehova?

²⁰ Maliya apwile nausoko wakukola naYehova. Kaha nawa chasoloka nge atachikijile kanawa Visoneka. Omu apwile nakushimutwila naElizaveta naye yaYowano Muka-kumbapachisa, enyikilile kumazu amuVisoneka VyachiHepeleu mapapa akuzomboka ha 20. (Luka 1:46-55) Achitalenu hachuma chino: Numba tuhu Maliya vamuhuhwile kuli Yosefwe, oloze kangelo kaYehova kavangililile kwiza kuli Yosefweko. Ou kangelo alwezele Maliya ngwenyi mwakasema mwanaKalunga. (Luka 1:26-33) Yehova atachikijile kanawa Maliya, nakumona nawa ngwenyi mwakazakama Mwanenyi nakumuzanga. Chakuzeneka kukakasana, Maliya atwalileho  lika kupwa nausoko wamwaza naYehova, nahalwola afwile Yesu nakumusangula.—Vili. 1:14.

21. Chishina muka navalinangula malunga kuvyuma yahanjika Mbimbiliya hali Maliya?

²¹ Chishina navalinangulako malunga. Lunga wamangana eji kuwahililanga kachi nge puwenyi atachikiza kanawa Visoneka. Keshi kusulakana chipwe kushinganyeka ngwenyi puwenyi anakusaka kupwa mutwe watangako. Oloze eji kumonanga ngwenyi nge puwenyi atachikiza kanawa Mbimbiliya, najindongi jatwamamo, kaha nachinganyalisa tanga yenyi. Kaha nawa atachikiza ngwenyi numba tuhu puwenyi alinangula chikuma kuhambakana ikiye, oloze lunga ikiye akwechi mulimo wakutwaminyina chilongesa chatanga, namilimo yeka yamuliuka.—Efwe. 6:4.

22. Chishina muka navalinangulako mapwevo kuli Maliya?

²² Chishina navalinangulako mapwevo. Numba tuhu mapwevo vatela kuliluulanga kuli malunga javo, oloze vatela nawa kuzata nangolo mangana vapwenga vakulikangula kushipilitu. (Ngale. 6:5) Shikaho, pwevo atela kuwanangako lwola lwakupwanga nachilongesa chauka, nakushinganyekanga havyuma mwalinangula. Kulinga ngocho, nachimulingisa azange Yehova, nakumuvumbika nakupwa nawa wakuwahilila hakuliluula kuli lunga lyenyi.

23. Uno mapwevo vaze veji kuliluulanga kuwata veji kunganyalanga ngachilihi, nakunganyalisa tanga yavo nachikungulwilo?

²³ Mapwevo vaze veji kuliluulanga kuli malunga javo mwomwo yakuzanga Yehova, veji kupwanga vakuwahilila nakusuuluka navyuma vali navyo kuhambakana mapwevo vaze vahumbula wata uze ahakako Yehova. Kaha nawa veji kuhananga chakutalilaho chamwaza kuli vanyike vamapwevo, navamalunga. Veji kulingisanga nawa vatu vatwame mukuunda mutanga, namuchikungulwilo. (Chitu. 2:3-5) Havatu vaze vali nakuzachila Yehova makumbi ano, vavavulu shina mapwevo. (Samu 68:11) Shikaho, tuvosena malunga namapwevo, tunahase kulingisa chikungulwilo chipwenga chakuwahilila. Muchihande nachikavangiza, natushimutwila omwo tunahase kulinga ngocho.