1-2. Chuma muka alinangwile ndumbwetu umwe kutalisa kukuhuhumuna?

 LWOLA lumwe kunyima, vakulwane vavali muchikungulwilo vatambukilile ndumbwetu umwe wapwevo uze echele kukunguluka halwola lumwe. Mukulwane uze aputukile kushimutwila nou ndumbwetu amutangilile visoneka vyavivulu vyahanjika hakukunguluka. Ashinganyekele ngwenyi vyuma vanashimutwila nou ndumbwetu navimukafwa. Oloze hakumusalisa, ou ndumbwetu wapwevo avalwezele ngwenyi: “Enu vandumbwami, kamwatachikijile ukalu nguli nakuhitamoko.” Ava vandumbwetu kavalivangile kumuhulisa avalweze ukalu apwile nakuhitamo mukuyoya chenyiko. Echi chamulingishile amone ngwenyi, vyuma vamukafwile kavyakwachile haukalu wenyiko.

² Hakavanga uze mukulwane aputukile kushimutwila nauze ndumbwetu wapwevo ambile ngwenyi: “Halwola kana ngwamwene ngwami ou ndumbwetu kasakwililileko. Oloze omu ngwashinganyekeleho kanawa ngwamwene ngwami kangwatelele kaha kulusuka kumutangila visonekako, oloze ngwatelele kutachikiza ukalu apwile nakuhitamo mukuyoya chenyi nakuwana jino jila yamwaza yakumukafwilamo.” Uze mukulwane alinangwileho chishina chachilemu chikuma havyuma vyasolokele. Ngocho apwa jino kafunga wakeke kaha nawa muka-kuzakama kanawa mikoko.

3. Uno veya muchikungulwilo vatela kuhuhumuna vakwavo?

 ³ Vakulwane hakupwa tufunga, vatwama namulimo wakuhuhumuna vandumbwavo. Oloze shimbu jimwe vandumbwetu veka muchikungulwilo vanahase kuhuhumuna vakwavo. Chakutalilaho, ndumbwetu walunga chipwe wapwevo, nahase kuhuhumuna sepa lyenyi kuzachisa visoneka vyamuMbimbiliya. (Samu 141:5; Vishi. 25:12) Chipwe ndumbwetu wamukulwane wapwevo nahase kukafwa “vana vamapwevo” havihande ngana vize vavuluka hali WaChituse 2:3-5. Kaha visemi nawa veji kuhuhumunanga vana vavo nakuvolola. Shikaho numba tuhu echi chihande chinapandama  chikuma kuli vakulwane muchikungulwilo, oloze tuvosena tunahase kunganyala nge natulinangula jijila jakuhuhumwinamo vakwetu jize najivakafwa, nakuvakunyula, ‘nakuvevwisa kumuchima kuwaha.’—Vishi. 27:9.

4. Vyuma muka natushimutwila muchihande chino?

⁴ Muchihande chino natushimutwila havihula viwana kutalisa kukuhuhumuna: (1) Mwomwo ika twatela kuhuhumwina vandumbwetu? (2) Uno chinatemo kuvahuhumuna tahi? (3) Uno veya vatela kuhuhumuna vakwavo? (4) Namuhasa ngachilihi kuhuhumuna mutu mujila yize nayimukafwa?

5. Mwomwo ika nachipwila chachashi vatu kwitavila vyuma mwavahuhumuna mukulwane mujila yamwaza? (Wavaka-Kolinde 1, 13:4, 7)

⁵ Vakulwane muchikungulwilo vazanga vandumbwavo vosena. Shimbu jimwe, veji kusololanga zangi kana hakuhuhumuna ndumbwavo naputuka kuya mujila yakuhenga. (Ngale. 6:1) Shimbu kanda mukulwane muchikungulwilo ahuhumune mutu, atela chatete kushinganyeka havyuma vize ahanjikile kaposetolo Paulu kutalisa kuzangi. Ahanjikile ngwenyi: “Zangi yeji kutalililanga chikoki kaha nawa yeji kutetelanga. . . . Yeji kufwikanga vyuma vyosena, nakwitavila vyuma vyosena, nakutalilila vyuma vyosena, nakukakachila muvyuma vyosena.” (Tangenu Wavaka-Kolinde 1, 13:4, 7.) Kachi nge mukulwane mwashinganyeka hali eji jivesi jamuMbimbiliya, nachimukafwa atachikize ovyo ali nakuhuhumwina ndumbwenyi nakwijiva jila yamwaza yakuhanjikilamo kuli ndumbwenyi. Nge mutu vanakuhuhumuna mwamona ngwenyi ou mukulwane amuzakama, kaha nachimwashiwila kwitavila vyuma vali nakumuhuhumuna.—Loma 12:10.

6. Chakutalilaho muka chamwaza ahanyine kaposetolo Paulu?

⁶ Kaposetolo Paulu ahana chakutalilaho chamwaza vakulwane. Chakutalilaho, omu vandumbwenyi vamuTesolonyika vasakiwile kuvahuhumuna, Paulu avahuhumwine. Kaha mumikanda yize avasonekelele Paulu avangilile kuvasangejeka hakuzata chavo nakashishi, nahakukilikita chavo muzangi, nahalukakachila lwavo. Ashinganyekele nawa havyuma vapwile nakuhitamo mukuyoya chavo nakuvalweza ngwenyi chiyoyelo chavo kachapwile chachashiko. Kaha nawa avasangejekele hakushishika chavo omu vapwile nakuvayanjisanga. (Teso. 1, 1:3; Teso. 2, 1:4) Avalwezele nawa ngwenyi vahanyine chakutalilaho chamwaza kuli vakwavo vaka-Kulishitu. (Teso. 1, 1:8, 9) Chikupu vene, vawahililile chikuma hakwivwa Paulu mwavasangejeka. Paulu asolwele hatoma ngwenyi azangile chikuma vandumbwenyi. Shikaho mazu amumikanda yize asonekelele vaka-Tesolonyika, ahashile kukafwa vandumbwenyi.—Teso. 1, 4:1, 3-5, 11; Teso. 2, 3:11, 12.

7. Mwomwo ika vamwe vanahase kukana kwivwilila vyuma vanavahuhumuna?

⁷ Vyuma muka vinahase kusoloka nge natuhuhumuna mutu mujila yakuhenga? Mukulwane umwe wakulindunuka ahanjikile kutalisa kuli vatu vamwe ngwenyi, “Numba tuhu vyuma navavahuhumuna vyakwoloka oloze vamwe veji kukananga kuvitavila mwomwo yajila yayipi vanavahuhumwinamo.” Chishina muka natulinangulako? Chapwa chachashi mutu kwitavila mazu akuhuhumuna nge vanamuhuhumuna mujila yazangi keshi mujila yamatotoko.

8. Vihula muka atela kulihulisa mukulwane nge ali nakusaka kuhuhumuna ndumbwenyi chipwe chiku?

⁸ Vakulwane kavatela kulusukanga kuhuhumuna vandumbwavoko. Shimbu kanda mukulwane ahuhumune ndumbwenyi atela kulihulisa ngwenyi: ‘Kutala ngwatela kumuhuhumuna tahi? Uno vyuma nalingi chikupu vene vyakuhenga tahi? Uno nahokola lundongi lwamuMbimbiliya tahi nyi nalingi kaha vyuma vize vyalihandununa navyuma ngwazanga yami?’ Chapwa chamwaza vakulwane kuhona ‘kuhanjikanga nakulusuka.’ (Vishi. 29:20) Nge mukulwane katachikijile  kanawa numba nge ali nakusakiwa kuhuhumuna ndumbwenyiko, kaha atela kuhulisa mukwavo mukulwane vawane nge kuliko lundongi lumwe nahokola ndumbwetu luze vatela kushimutwilaho nenyi.—Chimo. 2, 3:16, 17.

9. Tunalinangula ika kuli Paulu kutalisa kukuhuhumuna vandumbwetu havwaliso nakulilenga? (WaChimoteu 1, 2:9, 10)

⁹ Tutalenu hachakutalilaho chino. Nge mukulwane namono ngwenyi vwaliso nakulilenga chandumbwetu umwe kacheshi kanawako, atela kulihulisa ngwenyi, ‘Kutala kuliko lundongi lumwe lwamuMbimbiliya luze nahokola nalulingisa ngumuhuhumune tahi?’ Kachi nge ou mukulwane keshi nakusaka kuhuhumuna ndumbwenyi kweseka namunayi vishinganyeka vyenyiko, kaha nahase kuhulisa mukwavo mukulwane chipwe kala ndumbwenyi wakuhya kushipilitu evwenga munayi vishinganyeka vyenyi. Kaha vosena vanahase kukekesela hamwe kanawa mazu akuhuhumuna ahanjikile Paulu kutalisa kuvwaliso nakukulilenga. (Tangenu WaChimoteu 1, 2:9, 10.) Paulu avulukile jindongi jakutalisa kuuvwalo wamuka-Kulishitu ngwenyi, watela kupwa wakutamo, wakavumbi, uze nawa naumusolola kupwa muka-kushinganyeka kanawa. Oloze Paulu kavulukile mukana wavyuma twatela kulinga navize katwatela kulingako, mwomwo atachikijile ngwenyi vaka-Kulishitu vakwechi lisesa lyakulisakwila kala uvwalo navasaka chachikalu kaha kavahokwele jindongi jamuMbimbiliyako. Shikaho vakulwane hakusaka vamone numba nge chinatemo kuhuhumuna ndumbwavo havwaliso yenyi chipwe chiku, chatete vatela kukekesa vamone numba nge vwaliso yenyi yakavumbi, kaha nawa yili nakumusolola kupwa muka-kushinganyeka kanawa.

10. Vyuma muka twatela kutachikiza kutalisa kuvyuma vize vanahase kulisakwila vandumbwetu?

¹⁰ Twatela kutachikiza ngwetu vaka-Kulishitu vakuhya kushipilitu vavali vanahase kusakula mutu himutu nauvwalo wenyi, oloze wosena unahase kupwa wakutamo. Shikaho katwatela kushinjila vakwetu valinge vyuma vize tunakushinganyeka ngwetu vyakwolokako.—Loma 14:10.

11-12. Nge tunamono ngwetu vandumbwetu vali nakusakiwa kuvahuhumuna, vihula muka atela kulihulisa mukulwane, kaha mwomwo ika?

¹¹ Nge tunamono ngwetu vandumbwetu vali nakusakiwa kuvahuhumuna, kaha twatela kulihulisa ngwetu, uno iya atela kuvahuhumuna? Shimbu kanda mukulwane ahuhumune ndumbwetu asomboka chipwe mwana, atela chatete kuhulisa mutwe watanga uze nahase kuzata mulimo kana muchishishisa chakuuzata ikiye. * Chipwe mutwe watanga nahase kulweza ou mukulwane ngwenyi naikiye mwapwako halwola mwalinga ngocho. Ngana muze twahanjikanga  mupalangalafu 3, shimbu jimwe nawa chinahase kupwa chakutamo ndumbwetu wapwevo wamukulwane kuhuhumuna ndumbwetu wapwevo wamukweze.

 ¹² Kuli cheka chuma chikwavo chize mukulwane muchikungulwilo atela kushinganyekaho. Nahase kulihulisa ngwenyi, ‘kutala ami yami ngunatemo kuhuhumuna ndumbwami tahi? Nyi nachiwaha kachi nge ndumbwetu weka ikiye mwamuhuhumuna?’ Chakutalilaho, nge ndumbwetu atwama naukalu wakulimona kupwa wamokomoko, kaha chinahase kupwa chachashi kwitavila vyuma navamuhuhumuna nge mukulwane uze mwamuhuhumuna naikiye ahitamo lyehi muukalu uze ali nakuhitamo, mukutela kumuhuhumuna kuli mukulwane uze kanda ahitengaho lyehi muukalu kana. Mukulwane uze ahitamo lyehi muukalu ali nakuhitamo ikiye nahase kumwivwishisa kanawa nakuhanjika vyuma vize navimukolezeza. Chipwe ngocho, vakulwane vosena vatwama namulimo wakukolezeza vandumbwavo mangana valinge vyuma kweseka namuze vyahanjika visoneka. Shikaho vakulwane vosena vakwechi lisesa lyakuhuhumuna vandumbwavo numba tuhu vakiko kanda vachihitengamo lyehi muukalu vali nakuhitamo vandumbwavo.

13-14. Mwomwo ika chapwila chachilemu kuli mukulwane kupwa muka-kwivwilila?

¹³ Pwenunga vaka-kwivwilila. Kachi nge mukulwane ali nakusaka kuhuhumuna ndumbwenyi atela kulihulisa ngwenyi: ‘Vyuma muka ngunatachikiza hachiyoyelo chayou ndumbwami? Vyuma muka vili nakusoloka mukuyoya chenyi? Uno ali nakuhita muukalu uze kangwatachikijileko tahi? Vyuma muka ali nakusakiwa chikuma oholyapwa?’

¹⁴ Lundongi luze lwatwama hali WaYakova 1:19 lwatalisa chikuma kuli vaze veji kuhuhumunanga vakwavo. Yakova asonekele ngwenyi: “Mutu himutu anguhwenga kwivwilila, ashipwokelenga kuhanjika, ashipwokelenga kukwata utenu.” Mukulwane nahase kushinganyeka ngwenyi natachikiza muchano wosena, oloze pamo keshi mukikoko. Mukanda waVishimo 18:13 watulweza ngwawo: “Kachi nge mutu mwakumbulula kuchihande shimbu kanda atachikize mashina namasongo, chinapu uleya nasonyi kuli ikiye.” Chapwa chachilemu kuhulisa mutu ivene atulweze unjiho wosena. Echi chasakiwa kwivwilila kanawa shimbu kanda tuhanjike. Anukenu chishina twalinangulanga kuli mukulwane twavulukanga kumaputukilo achihande chino. Mukutela kuvangila kuhanjika vyuma awahishile, atelele kuvangila kutachikiza ukalu apwile nakuhitamo ou ndumbwetu mukuyoya chenyi nakuwana jino jila yamwaza yakumukafwilamo. Nge vakulwane navavangila kutachikiza unjiho wosena, kaha vanahase kukafwa vandumbwavo nakuvakolezeza.

15. Uno vakulwane vanahase kukavangiza ngachilihi lundongi lwatwama hali Vishimo 27:23?

¹⁵ Tachikizenu kanawa mikoko jenu. Ngana muze twahanjikanga hakavanga kuhuhumuna mutu chasakiwa kulinga vyuma vyavivulu keshi kumutangila kaha visoneka chipwe kumulweza vyakulingako. Vandumbwetu vatela kutachikiza ngwavo, twavazakama, kaha tweji kufwila kuvevwishisa nakuvakafwa. (Tangenu Vishimo 27:23.) Vakulwane vatela kuzata nangolo mangana vatunge usoko wakukola navandumbwavo.

16. Vyuma muka navikafwa vakulwane vahuhumunenga kanawa vandumbwavo?

 ¹⁶ Vakulwane kavatela kulingisa vandumbwavo vashinganyeke ngwavo, vanahase kaha kuhanjika navandumbwavo kuvanga nge kuli vyuma vimwe vinalimbenjeko. Oloze vatela kuhanjikanga navandumbwavo lwola lwosena nakuvazakama muukalu vali nakuhitamo. Mukulwane umwe ambile ngwenyi, “nge navalinga ngocho, kaha navatunga usepa wakukola navakiko. Nge vali nakusakiwa kuvahuhumuna, kaha nachipwa chachashi kulinga ngocho.” Shikaho mutu uze vali nakuhuhumuna nachimwashiwila kwitavila vyuma vali nakumukafwa.

17. Halwola lwakufwana ngachilihi haze mukulwane atela kusolola muchima wakutalilila chikoki nalikoji?

¹⁷ Pwenunga namuchima wakutalilila chikoki nalikoji. Kachi nge mutu hakavanga nakane kwitavila vyuma vyamuvisoneka vanamuhuhumuna, kaha vakulwane vatela kumutalilila chikoki nakumusolwela likoji. Mukulwane katela kupwa natato yakupihilila washi, nge ndumbwenyi nahuhumuna ketavilile vyuma namuhuhumuna chipwe kuvizachisa hahaze veneko. Mbimbiliya yahanjika kutalisa kuli Yesu ngwayo: “Keshi kukachika lihongo lyakufunyukako, keshi kukajima wanda uze uli nakufwinda wishiko.” (Mateu 12:20) Shikaho nge mukulwane ali nakulomba kwaukawenyi, atela kuvuluka ndumbwenyi nahuhumuna mukulomba chenyi kuli Yehova, mangana amukafwe ashinganyeke havyuma ovyo vanamuhuhumuna nakuvizachisa. Ndumbwetu uze vanahuhumuna ali nakusakiwa kumuhana lwola lwakushinganyeka havyuma vize vanamuhuhumuna. Nge mukulwane mwapwa namuchima wakutalilila chikoki nalikoji, kaha ndumbwetu uze vali nakuhuhumuna mwachiwana kupwa chachashi kwitavila vyuma vali nakumuhuhumuna. Ngocho vakulwane vatela kuzachisa Mazu aKalunga lwola lwosena hakuhuhumuna vandumbwavo.

18. (a) Vyuma muka twatela kwanuka nge tuli nakuhuhumuna ndumbwetu? (b) Nganomu unasolola muvwimbimbi nalipwata, vyuma muka vali nakushimutwila visemi?

¹⁸ Linangulenu kuvyuma munalimbenje. Hakuwana nge katwakupukako, ngocho katweshi kuhasa kukavangizanga kanawa vishina vyosena tunavuluka muno muchihande mujila yakukupukako. (Yako. 3:2) Shimbu jimwe natulimbenjanga.  Oloze nge tunalingi ngocho, twatela kufwilanga kulinangula kuvyuma tunalimbenje. Nge vandumbwetu navatachikiza ngwavo twavazanga, kaha nachipwa chachashi kutukonekela kachi nge vyuma tunahanjika chipwe vize tunalingi vinavahukanyisa. Talenu nawa lipwata lyakwamba ngwavo, “ Vyuma Navikafwa Visemi.”

19. Uno tunahase kwivwisa ngachilihi vandumbwetu kumuchima kuwaha?

¹⁹ Nganomu tunashimutwila, kachapwa chachashi kuhuhumuna mutuko mwomwo katwakupukako, kaha nawa navatu vaze natuhuhumuna kavakupukako. Shikaho twatela kwanukanga jindongi tunalinangula muchihande chino. Mwatela kutachikiza kanawa ovyo muli nakuhuhumwina ndumbwenu. Mwatela nawa kumona numba nge chakutamo kuhuhumuna ndumbwenu nakumona nawa numba nge yenu munatemo kumuhuhumuna. Shimbu kanda muhuhumune mutu, mwatela kumuhulisa vihula nakwivwilila kanawa omwo mwahanjika mangana mwivwishise kanawa ukalu ali nakuhitamo mutu kana. Fwilenu kumona vyuma ngana muze ali nakuvimona ikiye. Pwenunga vavavwovu kuli vandumbwenu nakutunga usepa wakukola navakiko. Anukenu chishina chino, twatela kuhuhumunanga vandumbwetu mujila yize nayivakafwa ‘nakuvevwisa nawa kumuchima kuwaha.’—Vishi. 27:9.