1. Muchima muka wamwaza vatwama nawo vatu jaYehova?

 KUSHIKULU, Mbimbiliya yahanjikilile chimweza ngwayo, vatu jaKalunga “navakalihana” mumilimo yaYehova hakuvatwaminyina kuli mwanenyi. (Samu 110:3) Upolofweto kana uli nakutesamo chikupu makumbi ano. Mwaka himwaka Vinjiho jaYehova, vali nakuzata jiola jajivulu chikuma mumulimo wakwambulula. Kaha kavavafweta hakuzata mulimo kanako, oloze veji kulinganga ngocho chakulisakwila kumuchima. Kaha nawa veji kuwanangako lwola lwakuzakama vandumbwavo hakuvahana vyuma vasakiwa mukuyoya, nakuvazakama muvishinganyeka nakushipilitu. Vandumbwetu vamalunga vaze vatongola, veji kuzachisanga jiola jajivulu hakuwahisa vihande vyahakukunguluka nahakufunga vandumbwavo. Mwomwo ika veji kulisuwilanga kulinga vyuma vyosena evi? Mwomwo vazanga chikuma Yehova navakwavo vatu.—Mateu 22:37-39.

2. Chakutalilaho muka atusela Yesu, kweseka namukanda Wavaka-Loma 15:1-3?

² Yesu atusela chakutalilaho chamwaza chize chasolola nge, ahakilenga kulutwe vyuma vasakilenga vakwavo kuhambakana vize asakilenga ikiye. Shikaho tuli nakuzata nangolo mangana tukavangizenga mujitambo jenyi. (Tangenu Wavaka-Loma 15:1-3.) Kachi nge natumulondezeza, kaha natunganyala mwamunene. Yesu ambile ngwenyi: “Kuhana cheji kunehanga kuwahilila chikuma kuhambakana kutambula.”—Vili. 20:35.

3. Vyuma muka natushimutwila muchihande chino?

³ Muchihande chino, natushimutwila havyuma alisuwile Yesu kulinga mangana akafwe vakwavo nomwo tunahase kumulondezeza. Natushimutwila nawa omwo tunahase kulisuula mangana tukafwe chikuma vakwetu.

4. Uno Yesu ahakilenga ngachilihi vyuma vasakilenga vakwavo kulutwe kuhambakana vize asakilenga ikiye?

⁴ Yesu alisuwile kukafwa vakwavo numba tuhu azeyelenga. Achishinganyekenu omu evwile Yesu hakumona vatu vaneza kuli ikiye kupili yize pamo yapwililile kwakamwihi naKapelenau. Yesu alombele kuli Ise ufuku wosena, kaha azeyele chikuma. Oloze omu amwene lize liyongomena lyavatu evwililile keke vaka-kuhutwa navaka-kuviza vaze vapwile haliyongomena kana. Yesu avokile kumisongo yavo, nakuhanjika chihande chamwaza chize chavakolezezele chikuma vavuluka ngwavo, Chihande ChahaPili.—Luka 6:12-20.

5. Uno mitwe yajitanga yili nakulondezeza ngachilihi Yesu hakupwa namuchima wakulisuula numba tuhu vanazeye namilimo yeka?

⁵ Mitwe yajitanga yeji kulondezezanga Yesu. Tutalenu hachakutalilaho chino, chisemi walunga nafumu kumilimo, kaha nazeye chikuma. Mwomwo yakuzeya chikuma, keshi nakushinganyeka kutwaminyina nachilongesa chaKulemesa Kalunga mwaTanga halwola kanako. Oloze chamokomoko nakuzeya mwalomba Yehova amuhane ngolo mangana atwaminyine chilongesa kana. Kaha nakushimbula chiku, Yehova mwakumbulula kulomba chenyi nakuputuka jino kutwaminyina chilongesa kana ngana muze eji kulinganga vyalumingo vyosena. Chikupu vene, vana venyi navalinangulako chishina chachilemu chikuma. Navatachikiza chikupu ngwavo visemi javo vamona vyuma vyakushipilitu kupwa vyavilemu chikuma kuhambakana kala vyuma.

6. Hanjikenu chakutalilaho chize chasolola omwo Yesu azachishile lwola lwenyi mangana akafwe vakwavo.

⁶ Yesu azachishilenga lwola lwenyi akafwe vakwavo. Chakutalilaho, Yesu evwile chikuma kukola kumuchima omu atachikijile ngwenyi sepa lyenyi Yowano Muka-kumbapachisa vanamujihi. Mbimbiliya yamba ngwayo: “Omu Yesu evwile mujimbu [wakufwa chaYowano], afumine nawato kuze apwile, ayile kwauka wenyi kuchihela kwakuhona vatu.” (Mateu 14:10-13) Ngwafwelela tunatachikiza jino chuma chalingishile Yesu afwile kupwa kwauka wenyi. Vatu vamwe vasaka kupwa kwauka wavo kachi nge vali nakulishona. Oloze chaluvinda Yesu kahashile kupwa ukawenyiko. Liyongomena lyavatu lyalivangile kuheta kuze apwile nakuya shimbu kanda ikiye. Uno Yesu alingile ngachilihi? Yesu ashinganyekele haukalu vapwile nakumona vatu kana, ngocho “avevwililile  keke.” Amwene chikupu ngwenyi, vapwile nakusakiwa kuvakafwa kushipilitu, kaha hahaze vene alingile ngocho. Shikaho “aputukile kuvanangula vyuma vyavivulu.”—Mako 6:31-34; Luka 9:10, 11.

7-8. Hanjikenu chakutalilaho chize chasolola omwo vakulwane vanahase kulondezeza Yesu hakukafwa vandumbwavo vaze vali muukalu.

⁷ Vakulwane muchikungulwilo veji kulondezezanga Yesu. Tweji kusakwililanga chikuma vakulwane hamilimo yosena veji kutuzachilanga. Kaha nawa milimo yimwe veji kuzatanga kavayitachikiza kuli vandumbwavoko. Chakutalilaho, nge kunasoloka misongo yakukasumuna, vandumbwetu vamuKomiti yaKulivwasana naVipatela, veji kulisuulanga kukafwa vandumbwavo. Kaha kakavulu ukalu kanou weji kusolokanga naufuku, mwomwo yakwivwila keke vandumbwavo vaze vali muukalu ava vakulwane hamwe kaha najitanga javo veji kulisuulanga kuzakama vandumbwavo kana.

⁸ Vakulwane veji kwazananga nawa mumulimo wakutunga jiZuvo jaWangana, navihela vyeka vyamuliuka namulimo wakukafwa vaze vali muukalu. Kaha nawa vakulwane vamuvikungulwilo vyetu veji kuzachisanga jiola jajivulu, hakutunangula, nakutukolezeza, nakutukafwa. Chikupu vene, ava vandumbwetu najitanga javo tuli nakuvasakwilila chikuma. Yehova atwaleho lika kuvakisula hamuchima vali nakusolola. Oloze ngana mwavandumbwetu vosena, vakulwane navakiko vatela kuwanangako nawa lwola lwakuzakama jitanga javo kushipilitu mukutela kuzachisanga kaha lwola lwosena kumilimo yamuliuka.

9. Kweseka naWavaka-Fwilipi 2:4, 5, muchima muka vatela kupwa nawo vaka-Kulishitu?

⁹ Tangenu Wavaka-Fwilipi 2:4, 5. Numba tupwa tuvakulwane chipwe chiku, tuvosena  twatela kufwila kupwa namuchima wakulisuula ngana uze apwile nawo Yesu. Mbimbiliya yahanjika ngwayo: “Alilingishile kupwa wamokomoko nakulifwanyisa nandungo.” (Fwili. 2:7) Talenu chishina natulinangula kuvesi kana. Ndungo wamwenemwene chipwe ngamba eji kufwilanga kulinga vyuma vize navisuulwisa kaka yenyi. Hakuwana nge twapwa tuvandungo jaYehova kaha nawa tweji kulisuulanga kuzachila vandumbwetu, shikaho twasaka kutuzachisa chikuma kuli Yehova nakufwila kukafwa chikuma vandumbwetu. Tutalenu havyuma vimwe vinahase kutukafwa tulinge ngocho.

10. Vihula muka twatela kulihulisa?

¹⁰ Kekesenu kanawa muchima mwatwama nawo. Lihulisenu vihula vino: ‘Kutala ngunahase kulisuula kuzachisa lwola lwami, nangolo jami mangana ngukafwe vandumbwami tahi? Chakutalilaho, uno nangulinga ngachilihi nge vanangulweze kutambukila ndumbwami walunga chipwe kutwala ndumbwami wakashinakaji kukukunguluka? Kutala ngweji kulisuulanga kuya nakuzata nge kuli nakusakiwa vandumbwetu kuya nakuwahisa hachihela chakukungulukila changalila nahaZuvo yaWangana tahi?’ Omu twalihanyine kuli Yehova, twamushikile ngwetu natuzachisanga vyuma vyosena tuli navyo mangana tumuzachile. Yehova asaka tuzachise lwola lwetu, nangolo jetu, navikumba vyetu mangana tukafwe vandumbwetu. Kaha eji kuwahililanga chikuma nge natulinga ngocho. Jino nge tunamono ngwetu tuli nakusakiwa kwalumunako vyuma vimwe twatela kulinga ngachilihi?

11. Uno kulomba nachitukafwa ngachilihi tupwenga namuchima wakulisuula kukafwa vandumbwetu?

¹¹ Lombenunga kuli Yehova namuchima wosena. Kachi nge munamono ngwenu muli nakusaka kupwa namuchima wakulisuula oloze chinakumikaluhwila, kaha mwatela kulomba kuli Yehova nakumulweza ukalu wenu wosena. Mwatela kumulweza omwo muli nakwivwa, nakumulomba amihane “muchima wakufwila kulinga vyuma nangolo jakulingamo nawa.”—Fwili. 2:13.

12. Uno vandumbwetu vamalunga vakumbapachisa vanahase kukafwa ngachilihi muvikungulwilo?

¹² Nge mwapwa muvakweze vamalunga vakumbapachisa, kaha munahase kulomba Yehova amikafwe mangana mupwenga namuchima wakufwila kukafwa chikuma vandumbwenu muchikungulwilo. Muvikungulwilo vyamumafuchi amwe, mwatwama vakulwane vavavulu kuhambakana vaka-kuzachila. Kaha vaka-kuzachila vavavulu vapwa vakukola. Hakuwana nge liuka lyetu lili nakuya nakutohwelako chikuma, shikaho kuli nakusakiwa vandumbwetu vavakweze vavavulu vaze vatela kuzakama vatu jaYehova. Nge namulisuula kuzata kala milimo, kaha namupwa muvakuwahilila. Mwomwo ika? Mwomwo namwivwisa Yehova kuwaha, nakulingisa vandumbwenu vamone chikupu ngwavo mwavazakama, nakupwa nawa vakusuuluka mwomwo yakukafwa vandumbwenu.

13-14. Tunahase kukafwa ngachilihi vandumbwetu vaze vali muukalu? (Talenu muvwimbimbi wahalipapilo lyahelu.)

¹³ Kekesenu mumone vyuma vanakusakiwa vakwenu. Kaposetolo Paulu alwezele vaka-Kulishitu vamuYuleya ngwenyi: “Kanda namuvulyama kulinganga mwamwaza nakwazananga vyuma vyenu navakwenuko, mwomwo Kalunga eji kwivwilanga kuwaha vimuna vakuvatula vangocho.” (Hepe. 13:16) Mazu avalwezele apwile amalemu chikuma. Mwahichile kaha tando yayindende kufuma haze vatambwile ou mukanda, vaka-Kulishitu vamuYuleya vasezele membo avo nakusekasana chavo, navausoko wavo vaze kavapwile vaka-kwitavako “[na]kuchinyina kujipili.” (Mateu 24:16) Halwola kanelu vasakiwile kulikafwa umwe namukwavo. Kachi nge hakavanga vakavangijile chishina avalwezele Paulu chakwazananga vyuma vyavo navakwavo, kachi chavashiwilile kusuuluka navyuma vapwile navyo halwola kana.

 ¹⁴ Vandumbwetu kaveshi kuhasa kutulwezanga lwola lwosena vyuma vali nakusakako. Chakutalilaho, ndumbwetu walunga nahase kufwisa muka-mahyenyi, nakumulingisa aputuke kulishona. Ndumbwetu kana nahase kusakiwa kumuwahishilako vyakulya, nakumukafwa mwakutambukila, chipwe milimo yeka yakukanda. Chinahase kumukaluhwila kutulweza ukalu wenyi mwomwo yakushinganyeka ngwenyi, mwatuhana chiteli. Oloze ou ndumbwetu nahase kusakwilila chikuma nge natulisuula kumukafwa chakuzeneka ikiye kutulweza vyuma ali nakusaka. Katwatela kushinganyeka ngwetu kuli ndumbwetu weka uze nahase kumukafwa muukalu wenyi chipwe ngwetu mwatulwezanga nge ali nakusakiwa kumukafwa. Shikaho lihulisenu ngwenu, ‘Vyuma muka nangusaka vandumbwami vangulingile kachi nge yami ngwapwanga muukalu kana?’

15. Vyuma muka twatela kufwila kulinga hakusaka kukafwa vakwetu?

¹⁵ Pwenunga vavashi kuhanjikisa. Chakuzeneka kukakasana twafwelela mwatachikizako vandumbwenu vamwe muchikungulwilo vaze veji kulisuulanga kukafwa vandumbwavo lwola lwosena. Vandumbwetu kana kavashinganyeka ngwavo tweji kuvahananga chiteliko, tunahase kufwelela ngwetu navatukafwa nge tuli muukalu. Shikaho twatela kufwila kupwa ngana mwavakiko. Alan wamyaka yakusemuka yamuji 40 uze apwa mukulwane muchikungulwilo asaka kupwa wamwashi kuhanjikisa. Ahanjikile kutalisa kuli Yesu ngwenyi: “Numba tuhu Yesu apwilenga navyuma vyavivulu vyakulinga, oloze vatu vamyaka yakulisezaseza vosena vamuzangile chikuma, kaha nawa kavevwilenga woma kumulomba mangana avakafweko. Vamumwene chikupu ngwavo avazakaminenga chikuma. Shikaho nayami nguli nakusaka kulondezeza Yesu ngupwenga nguwamwashi kuhanjikisa, nakupwa namuchima wakutetela nakuzakama vatu.”

16. Uno mazu ahali Samu 119:59, 60, nawatukafwa ngachilihi tukavangize kanawa Yesu?

 ¹⁶ Katwatela kuhombako nge tunahono kulondezeza Yesu mujila yakukupuka. (Yako. 3:2) Chakutalilaho, mutu uze vali nakunangula keshi kuhasa kulondezeza muka-kumunangula mujila yakukupukako. Oloze omu ou mutu vali nakunangula mwatwalaho lika kulondezeza muka-kumunangula naikiye mwaputuka kuzovoloka. Chochimwe nawa nge natuzachisanga vyuma tweji kulinangulanga hachilongesa chauka, nakufwila kuzachila hatutenga twetu, kaha natukavangiza kanawa Yesu uze apwa chakutalilaho chetu.—Tangenu Samu 119:59, 60.

17-18. Kuwaha muka nachifumamo hakulondezeza muchima wakufwila kukafwa vatu apwile nawo Yesu?

¹⁷ Nge natupwa namuchima wakufwila kukafwa vandumbwetu, kaha navakiko nawa navafwila kulinga mwomumwe. Tim uze apwa mukulwane muchikungulwilo ambile ngwenyi: “Tuli navandumbwetu vavakweze vaze vali nakuzovoloka nakuvatongola kupwa vaka-kuzachila. Kaha veka vanavatongola unyike mwomwo yakulondezeza muchima wakufwila kukafwa vakwavo vamwene kuli vandumbwavo. Muchima wakulisuula vali nakusolola uli nakukafwa vandumbwetu muchikungulwilo nakukafwa nawa vakulwane kuzata milimo yamuchikungulwilo.”

¹⁸ Twatwama mukaye muze vatu kavatwama namuchima wakufwila kukafwa vakwavoko. Oloze vatu jaYehova kavapwa ngochoko. Muchima wakufwila kukafwa vatu apwile nawo Yesu, unatukafwe tufwile kumulondezeza. Numba tuhu katweshi kuhasa kukavangiza mujitambo jenyi mujila yakukupukako, oloze tunahase ‘kukavangiza kanawa mujitambo jenyi.’ (Petu. 1, 2:21) Omu tuli nakutwalaho lika kulondezeza muchima wakufwila kukafwa vatu asolwele Yesu, natupwa vakuwahilila mwomwo tuli nakwivwisa Yehova kuwaha.