KWESEKA najishimbi jize Kalunga ahanyine vaIsalele, Yehova etavililenga wana watutela natukwilimba uze vamuhanyinenga. Ava tujila vavali vavavulukililenga hamwe lwola lwosena mujishimbi kana. Nge kajila umwe hali ava tujila vavali wauchi vazachishilengako umwe. (Levi 1:14; 12:8; 14:30) Mwomwo ika chuma kana chapwilile chakutamo? Chapwile chakutamo mwomwo tutela kavapwilenga nakuwanyiwa lwola lwosenako. Mwomwo ika?

Tutela vapwa tujila vaze vavula kunungwojoka, kaha vavula kutwama mulifuchi lyaIsalele mungonde yanonga. Mukakweji waOctober, veji kunungulukilanga kumafuchi akusulo kuze kweji kuzumanga chikuma, kaha veji kukindulukanga muIsalele kuchivatuko chavula. (Mwaso 2:11, 12; Yele. 8:7) Shikaho, echi chikiko chalingishile vaIsalele kushikulu vachiwane kupwa chachikalu kuhana tutela kupwa wana kuchivatuko chavula.

Tukwilimba vakiko kavavula kunungwojokako, shikaho vapwilenga vavashi kuwana mulifuchi lyaIsalele lwola lwosena. Kaha nawa tukwilimba vavapichilenga hamembo. (Esekesenuko Yowano 2:14, 16.) Kweseka namukanda waBible Plants and Animals, wamba ngwawo, “hamembo osena namujimbaka josena jamuPaleshitane vapichilenga tukwilimba. Vatu vosena vapwilenga navikalanga hamembo avo chipwe mena hajizuvo muze vatwaminenga tukwilimba.”—Esekesenuko Isaya 60:8.

Chikupu vene, Yehova asolwele ngwenyi apwa wazangi kaha nawa wakutetela, hakwitavisa vaIsalele vamuhane wana watujila vaze vahashilenga kuwana lwola lwosena.