1. Chuma muka ahanjikile Yesu kuli tumbaji twenyi kutalisa kulwola luze nachikeza kukuma, kaha avahuhumwine ngwenyi ika?

 OMU kwasalile makumbi amandende nakufwa chaYesu, tumbaji twenyi vawana vamuhulishile ngwavo: “Chinjikizo muka chakukatachikijilaho . . . chikukulwishi chakatwamino kamyaka yino?” (Mateu 24:3) Chasoloka nge ava tumbaji vasakile kutachikiza lwola nakakakuma katwamino kamyaka yavaYuleya. Yesu hakuvakumbulula, ahanjikile hakukuma chakatwamino kamyaka yavaYuleya “[naha]chikukulwishi chakatwamino kamyaka yino” tuli nakuyoyelamo. Ahanjikile kutalisa kulwola nakakakuma katwamino kana ngwenyi: “Kutalisa kulikumbi lize chipwe kuola yize kakweshi mutu umwe natachikizako, chipwe vangelo vali mwilu, chipwe Mwana, shina Tata kaha.” Kaha ahuhumwine tumbaji twenyi vosena ngwenyi, “tonenunga.”—Mako 13:32-37.

2. Mwomwo ika chapwilile chachilemu kuli vaka-Kulishitu vakulivanga kupwa vakutona?

² Vaka-Kulishitu vavaYuleya vamulikulukaji lyamyaka lyakulivanga vatelelele kupwa vakutona mwomwo hakiko hapendaminyine kuyoya chavo. Yesu alwezele vaka-kumukavangiza vyuma vize navikavakafwa vakatachikize ngwavo kukuma chakatwamino kamyaka yavaYuleya chinapandama. Ambile ngwenyi: “Omu namukamona Yelusalema vanayijingilika kumaswalale che ndo, kaha tachikizenu ngwenu, lwola lwakuyilalisa lunapandama kwakamwihi.” Halwola kana vatelelele kwanuka mazu aYesu akuhuhumuna ‘nakuputuka kuchinyina kujipili.’ (Luka 21:20, 21) Vaze vakavangijile awa mazu akuhuhumuna vayovokele omu vaLoma vanongesele Yelusalema.

3. Vyuma muka natushimutwila muchihande chino?

 ³ Tuli nakuyoyela kusongo yakatwamino kamyaka yino kakuhuka. Shikaho nayetu twatela kulama uhashi wetu wakushinganyeka nakupwa vakutona. Muchihande chino natushimutwila omwo tunahase kulaminamo uhashi wetu wakushinganyeka nakupwa vakuvanguluka navyuma vili nakusoloka mukaye, namwakulilamina etu vavene namwakuzachishila kanawa lwola lunasaleko.

4. Mwomwo ika twatela kufwila kutachikiza omwo vyuma vili nakusoloka mukaye vili nakuteselamo upolofweto wamuMbimbiliya?

⁴ Kuli vyuma vyamwaza vyeji kutulingisanga tufwile kutachikiza omwo vyuma vili nakusoloka mukaye vili nakutesamo upolofweto wamuMbimbiliya. Chakutalilaho, Yesu avulukile mukana wavyuma vize navitukafwa tutachikize ngwetu kukuma chakatwamino kaSatana chinapandama. (Mateu 24:3-14) Kaposetolo Petulu atukolezeza tuhakenga muchima kuupolofweto uze uli nakutesamo, mangana tuzamise lufwelelo lwetu. (Petu. 2, 1:19-21) Mukanda wamakumishilo muMbimbiliya waputuka namazu akwamba ngwavo: “Echi chikiko kusoloka chavyuma asolwele Yesu Kulishitu, chize vamuhanyine kuli Kalunga mangana alwekese vandungo jenyi vyuma vize vyatela kulingiwa kalinwaha.” (Kuso. 1:1) Shikaho twafwila kutachikiza chikuma vyuma vili nakusoloka mukaye, nakutachikiza nawa omwo vyuma kana vinahase kutesamo upolofweto wamuMbimbiliya. Kaha pamo tunahase kufwila kushimutwila vyuma kana navakwetu.

5. Vyuma muka twatela kulihendako, kaha vyuma muka twatela kulinga? (Talenu nawa mivwimbimbi.)

⁵ Nge tuli nakushimutwila haupolofweto wamuMbimbiliya, katwatela kutakanga vyuma navisolokako. Mwomwo ika? Mwomwo katwasaka kuhanjika vyuma vize navineha vihandwa muchikungulwiloko. Chakutalilaho, tunahase kwivwa vatwamina vamukaye navahanjika hajila vanahase kukumishilamo vikokojola nakuneha kuunda namukingo. Katwatela kutaka ngwetu mazu kana ali nakutesamo upolofweto wahali Wavaka-Tesolonyika 1, 5:3, oloze twatela kutachikiza ulumbunwiso wauhya uze vasoneka mumikanda yetu. Nge kushimutwila chetu nachizamanga havyuma lyeji kutuwahishilanga liuka lyaYehova, kaha natulingisa chikungulwilo chipwenga lika chakulinunga hakupwa “nakujina chochimwe.”—Koli. 1, 1:10; 4:6.

6. Vishina muka tunahase kulinangula hamukanda WaPetulu 2, 3:11-13?

⁶ Tangenu WaPetulu 2, 3:11-13. Kaposetolo Petulu atukafwa tushinganyekenga havyuma vyatela kutulingisa tukekese kanawa upolofweto wamuMbimbiliya. Atulweza twanukenga “kupwako chalikumbi lyaYehova.” Mwomwo ika? Mwomwo echi kachalumbununa nge tuli nakusaka kutachikiza ‘likumbi naola’ yize Yehova mwakaneha Alamangetoneko, oloze mwomwo twafwila kuzachisa lwola lunasaleko mangana tupwenga ‘natwamiso yajila navilinga vyakuzachila Kalunga.’ (Mateu 24:36; Luka 12:40) Mujila yikwavo, tunahase kwamba ngwetu twafwila kupwa navilinga vyamwaza, nakumona nawa ngwetu tuli nakuzachila Yehova mwomwo twamuzanga chikuma. Shikaho, twatela kulilama etu vavene numba tutesemo vyuma kana.

7. Tunahase kusolola ngachilihi ngwetu tuli nakulilama etu vavene? (Luka 21:34)

⁷ Yesu alwezele tumbaji twenyi vahakenga mangana kuvyuma vili nakusoloka mukaye nakulilama nawa vavene. Chishina kana vachilumbununa  hatoma mumazu akuhuhumuna atwama hali Luka 21:34. (Tangenu.) Yesu hano ambile ngwenyi: “Lilamenunga enu vavene.” Mutu uze eji kulilamanga ivene eji kupwanga wakuvanguluka navyuma vize vinahase kwenyeka usoko wenyi naYehova nakulihenda kuvyuma kana. Echi nachimukafwa atwaleho kutwama muzangi yaKalunga.—Vishi. 22:3; Yuta 20, 21.

8. Kaposetolo Paulu alwezele vaka-Kulishitu valingenga ika?

⁸ Kaposetolo Paulu alwezele vaka-Kulishitu valilamenga vavene. Chakutalilaho, alwezele vaka-Kulishitu vamuEfwesu ngwenyi: “Nyingililenu ngwenu kutambuka mweji kutambukanga, kamweshi nakutambuka nge vaka-kuhona manganako, oloze nge vaka-mangana.” (Efwe. 5:15, 16) Lwola lwosena usepa wetu naYehova watwama muponde, ngocho Mbimbiliya yatulweza ‘tutachikizenga mwaya muchima waYehova’ mangana tuhonese kala vyuma navisaka kwenyeka usepa wetu naikiye.—Efwe. 5:17.

9. Vyuma muka navitukafwa tutachikize mwaya muchima waYehova?

⁹ Mbimbiliya kayahanjika vyuma vyosena vize vinahase kwenyeka usepa wetu naYehovako. Shikaho, twatela kulisakwilanga vyakulinga kutalisa kuvihande vize kavavuluka hatoma muVisonekako. Hakusaka tusakulenga kanawa vyakulinga, twatela kutachikiza “mwaya muchima waYehova.” Chuma nachitukafwa shina kulinangulanga Mazu aKalunga shimbu yosena nakushinganyekanga havyuma tunalinangula. Nge natutachikiza chikuma mwaya muchima waYehova nakupwa “navishinganyeka vyaKulishitu,” kaha natutambukanga “nge vaka-mangana” numba tuhu kakweshi lushimbi lwakutulweza hatoma vyuma twatela kulingako. (Koli. 1, 2:14-16) Vyuma vimwe vize twatela kulihendako vyapwa vyavyashi kuvitachikiza, oloze vyeka vyapwa vyavikalu.

10. Vyuma muka vimwe vize twatela kulihendako?

¹⁰ Vyuma vimwe twatela kulihendako shina, kusapula chaseya, nakunwa wala wauvulu, nahanjikiso yayipi, nakutala vyakuhemahema vyaulyanyi namivwimbimbi yauvumbi navyuma vyeka. (Samu 101:3) Muka-kole wetu Liyavolo ali nakutondatonda jila yakwenyekelamo usepa wetu naYehova. (Petu. 1, 5:8) Nge katwazangamineko, Satana nahase kutulingisa tuputuke kwivwila vakwetu lushiushiu, nakuhona kupwa vakashishi, nakukokelanga kumukombe wetu, nakupwa nachijindo, nakulivwimba nakulamina vakwetu koko. (Ngale. 5:19-21) Hakuputuka, muchima wakulinga vyuma kana unahase kupwa waundende. Oloze nge katweshi kuzachilaho washiko, kaha muchima kana nauyangilila nakupwa nge usungu nakutunehela jino ukalu.—Yako. 1:14, 15.

11. Chuma muka chimwe chachipi twatela kulihendako, kaha mwomwo ika?

¹¹ Chuma chimwe twatela kulihendako chize kachasoloka nge chachipiko shina kulikata navatu vatu vavapi? Chakutalilaho, achishinganyekenu muli nakuzata namutu uze kapwa Chinjiho chaYehovako. Kaha muli nakufwila mutu muli nakuzata nenyi ashinganyekenga vyuma vyamwaza hali Vinjiho jaYehova, ngocho namumusolwela likoji. Shimbu jimwe pamo munahase nakulilanga hamwe kulya chamusana. Kutwala muze namuputuka jino kulilanga hamwe kuswakumwe. Lwola lumwe mukushimutwila chenu, uze mutu mwaputuka kuhanjika vyuma vyaunyengwe. Hakavanga namukana kwivwilila kuvihande kana, oloze mukuhita chalwola namwijilila vihande kana nakuvimona jino ngwenu vyamwaza. Likumbi limwe, uze mukwenu muka-milimo  mwamilweza muyenga kuchihela chasanga nakushikama hanyima yakukotoka, kaha namwitavila kuya. Kutwala muze, namuputuka kushinganyeka ngana mwaikiye, nakuputuka kulinga vyuma vize eji kulinganga. Numba tuhu tunahase kupwa valikoji nakalemesa kuvatu vosena, oloze twatela kwanuka ngwetu vatu vaze natusakula kushikama navo vanahase kutwalumuna. (Koli. 1, 15:33) Nge natulilama etu vavene ngana muze atuhuhumwine Yesu, kaha natulihenda kukulikata navatu vaze kavayoya kweseka najishimbi jaKalungako. (Koli. 2, 6:15) Natumona nawa ponde yinahase kutuwana nakulihendako.

12. Mulimo muka vatelele kuzata tumbaji omu vapwile nakuvandamina chikukulwishi chakatwamino kamyaka yavaYuleya?

¹² Tumbaji twaYesu kavatelelele kutwama kaha kulu oku vali nakuvandamina chikukulwishi chakatwamino kamyaka yavaYuleyako. Yesu avahanyine mulimo wakuzata. Avatumine kuya nakwambulula mujimbu wamwaza “muYelusalema, namuYuleya mwosena, namuSamaliya, nakuvihela vyakwakusuku vyahamavu.” (Vili. 1:6-8) Mulimo kana wapwile waunene chikuma. Vazachishile kanawa lwola lwavo hakulisuula kuzata ou mulimo.

13. Mwomwo ika twatela kuzachishila kanawa lwola lwetu? (Wavaka-Kolose 4:5)

 ¹³ Tangenu Wavaka-Kolose 4:5. Hakusaka tulilame etu vavene, twatela kukekesa jila tweji kuzachishilangamo lwola lwetu. “Vyuma vyakwiza mukukasumuna” vinahase kuwana kala mutu. (Kwambu. 9:11) Tunahase kufwa mukukasumuna.

14-15. Jila muka tunahase kuzachishilamo kanawa lwola lwetu? (WavaHepeleu 6:11, 12) (Talenu nawa muvwimbimbi.)

¹⁴ Tunahase kuzachisa kanawa lwola lwetu hakulinga mwaya muchima waYehova nakuzamisa usepa wetu naikiye. (Yowa. 14:21) Twatela kupwa “vakuzama mbe, chakuzeneka kusosoloka, shimbu yosena [tupwenganga] navyuma vyavivulu vyakuzata mumulimo waMwata.” (Koli. 1, 15:58) Kulinga ngocho nachikatukafwa tukazeneke kuliveya omu nachikeza kukuma chakano kaye kakuhuka chipwe kukuma chakuyoya chetu.—Mateu 24:13; Loma 14:8.

¹⁵ Makumbi ano Yesu achili lika nakutwaminyina tumbaji twenyi omu vali nakwambulula vyaWangana waKalunga hamavu hosena. Ikiye nazateko lyehi mulimo wenyi. Yesu ali nakutunangula mwakwambulwila kuhichila muliuka lyaYehova, kaha nawa ali nakutuhana vinoma vyakuzachisa hakwambulula mujimbu wamwaza. (Mateu 28:18-20) Etu nawa twatela kuzatako mulimo wetu hakupwa tuvasamalikita mumulimo wakwambulula nakunangula, nakupwa vakutona shimbu tuli nakuvandamina Yehova anehe kukuma chakatwamino kamyaka yino. Nge natukavangizanga mazu ahali WavaHepeleu 6:11, 12, kaha natutwalaho kulama lutalililo lwetu “palanga nakusongo.”—Tangenu.

16. Chuma muka twatela kufwila?

¹⁶ Yehova anoneka likumbi nalwola mwakakumisa kano kaye kaSatana. Nge likumbi kana lineza, Yehova mwakatesamo upolofweto wosena uze asoneka muMazu enyi. Lwola lumwe tunahase kushinganyeka ngwetu kukuma chakatwamino kamyaka yino chinachelewa. Olozenyi likumbi lyaYehova ‘kalyeshi kukakotokelako.’ (Hamba. 2:3) Shikaho tufwilenu ‘kutalililanga Yehova, nakuvandaminanga Kalunga muka-kutulwila.’—Mika 7:7.